1. Segurado tayo ed anto, tan akin?

 KASIN no maminsan et onkakapuy met so liknaan mo no nanenengneng moy amin ya problema ed mundo natan? Ombebetel lay aroan ed pamilya. Maslak ya totoo et masesebeg tan makasarili ira. Agda italtalek iray walad autoridad. Pero diad tua, sarayan nagagawa et pabiskegen toy liknaan mo. Akin ey? On ta prueba iratan ya nagagawa la iray propesiya na Biblia tungkol ed ugali na saray totoo diad “kaunoran iran agew.” (2 Tim. 3:1-5) Agnaitanggi na anggan siopan too ya manbibilay tayo la ed kaunoran iran agew, tan prueba itan ya manuuley lay Kristo Jesus bilang Ari ed Panarian na Dios. Pero sakey labat itan ed dakel ya propesiya na Biblia ya walay koneksion to ed Panarian. Maabig sirin no rebyuen tayo iray pigaran propesiya ya agawa ed agano ni pian ombiskeg so pananisia tayo.

2. Anto ray aralen tayo ed sayan artikulo, tan akin? (Komentoan so litrato ed apis.)

² Pantongtongan tayo ed sayan artikulo so (1) propesiya ya makatulong pian natalosan tayo no kapigan ginmapon manuley so Panarian, (2) saray propesiya ya makatulong pian nakombinse tayo ya Ari lay Jesus ed Panarian na Dios diad tawen, tan (3) saray propesiya ya mangipapaamta no panon ya naderal iray onkokontra ed Panarian na Dios. Amin irayan  propesiya et singa piraso na jigsaw puzzle ya no buoen tayo et nanengneng tayo ya talagan asingsingger lay anggaan.

3. Antoy ipapaseguro na propesiya ed Daniel 7:13, 14 tungkol ed Ari ed Panarian na Dios?

³ Ipapaseguro na propesiya ed Daniel 7:13, 14 ya duga labat ya si Kristo Jesus so pinili na Dios ya Ari ed Panarian To. Nabasa ditan ya malikeliket ya “manlingkor ed sikato iray totoo ed nanduruman nasyon” tan anggapoy onsalat ed sikato ya Ari. Nabasa met ed libro na Daniel ya onggapon manuley si Jesus ed Panarian kayari na simbolikon pitoran panaon. Panon tayon amta no kapigan itan agawa?

4. Panon ya makatulong so Daniel 4:10-17 pian nakuenta tayo no anton taon ginmapo ya nanuley si Kristo bilang Ari ed Panarian? (Nengnengen met so paimanod leksab.)

⁴ Basaen so Daniel 4:10-17. Say karukey na simbolikon “pitoran panaon” et 2,520 ya taon. Ginmapo itan nen 607 B.C.E. nen inekal na Babilonia so sampot ya ari ed Jerusalem ya mangirerepresenta ed uley nen Jehova. Anampot itan nen 1914 C.E. nen introno nen Jehova si Jesus—samay “makankanepegan” ya magmaliw ya Ari ed Panarian na Dios. *—Eze. 21:25-27.

5. Akin et makapabiskeg na pananisia imay propesiya tungkol ed “pitoran panaon”?

⁵ Akin et makapabiskeg na pananisia iyan propesiya? Ipapaseguro na propesiya tungkol ed “pitoran panaon” ya tooren nen Jehova so sipan to diad dugarugan panaon. Abaybayag lan inyeskedyul nen Jehova no kapigan onggapon manuley so Panarian to, tan talagan tinoor to itan nen sinmabi itan ya petsa. Makaseguro tayo sirin ya nagawa iray arum nin propesiya base ed eskedyul nen Jehova. On, no antoy imbaga nen Jehova, “seguradon ontua” diad dugarugan panaon!—Hab. 2:3.

6. (a) Anto ray nanenengneng tayo diad dalin ya prueban manuuley lay Kristo diad tawen? (b) Panon itan ya kinompirma na propesiya ed Apocalipsis 6:2-8?

⁶ Nen asingger lan manampot so ministeryo nen Jesus ed dalin, imbaga tod saray papatumbok to no anto ray palatandaan ya sikatoy ginmapo lan manuuley diad tawen. Imbaga to ya wala ray nagawan guerra, eras, tan yegyeg. Imbaga to met ya wala ray nagawan salot o epidemya diad “nanduruman pasen”—say sakey ya alimbawa et say COVID-19 pandemic. Ibabaga na Biblia ya amin iraya et “tanda” na kiwawala nen Kristo. (Mat. 24:3, 7; Luc. 21:7, 10, 11) Kayari na masulok ya 60 ya taon manlapud impatey nen Jesus tan impawil tod tawen, kinompirma to ed si apostol Juan ya talagan nagawa iratan ya amin. (Basaen so Apocalipsis 6:2-8.) Tinmua iratan ya amin ya propesiya manlapu la nen manuuley lay Jesus ed Panarian nen 1914.

7. Akin et aliwliwa iray agawa diad dalin nen ginmapon nanuley si Jesus?

⁷ Akin et aliwliway agawa diad dalin nen nagmaliw ya Ari si Jesus? Ibabaga na Apocalipsis 6:2 ya say unonan gawaen nen Jesus bilang Ari et miguerra. Siopa ray kalaban to? Say Diablo tan saray demonyo. Ibabaga na Apocalipsis kapitulo 12 ya atalo si Satanas ed sayan guerra tan sikatoy imbasileng diad dalin kaiba iray demonyo to. Ampetang so ulo nen Satanas tan ipapangget toy pasnok to  ed saray totoo, kanian ‘pakaskasi lay dalin.’—Apo. 12:7-12.

8. Antoy epekto ed sikatayo no nanenengneng tayon nagagawa la iray propesiya na Biblia tungkol ed Panarian?

⁸ Akin et makapabiskeg na pananisia irayan propesiya? Saray nagagawa ed mundo tan say iyuuges na ugali na totoo et prueba ya manuuley lay Jesus bilang Ari. Kanian imbes ya onsyodot tayo no nanenengneng tayo ya makasarili tan masesebeg la ray totoo, tandaan tayo ya kasumpalan iratan na saray propesiya ed Biblia. On, prueba iratan ya manuuley lay Panarian! (Sal. 37:1) Tan ilaloan tayo ya mas onloor ni so situasyon ed sayan mundo legan ya manasingger so Armagedon. (Mar. 13:8; 2 Tim. 3:13) Misatsalamat tayo ed si Aman Jehova ya impaisulat to iraya ed Biblia kanian natatalosan tayo no akin ya oniay nagagawa ed mundo natan.

9. Panon ya indeskribe na propesiya ed Daniel 2:28, 31-35 so sampot ya sankamakapanyarian ya gobierno ed interon mundo, tan kapigan itan linmesa?

⁹ Basaen so Daniel 2:28, 31-35. Nagagawa la iyan propesiya natan. Naamtaan tayo ed samay kugip nen Nabucodonosor “no antoy nagawa ed kaunoran iran agew,” no ginmapo lan manuley si Kristo. Kaiba ed saray onkontra ed Panarian na Dios so sampot ya sankamakapanyarian ya gobierno ed interon mundo, ya isisimbolo na saray ‘sali ya balatyang tan pitek.’ Linmesa itan ya gobierno nen nan-alyansa so Britanya tan Amerika nen World War I. Nanengneng tayo ed samay imahen ya akugip nen Nabucodonosor ya sayan gobierno et walay duaran pidumaan to ed saramay akaunan gobierno.

10. (a) Diad propesiya ed Daniel, akin et dugaruga so impandeskribe ed alyansa na Britanya tan Amerika? (b) Antoy nepeg ya panalwaran tayo? (Nengnengen so kahon ya “ Manalwar Kad Pitek!”)

 ¹⁰ Unona, say alyansa na Britanya tan Amerika et isisimbolo na pinanlaok ya balatyang tan pitek, aliwan singa saramay akadkaunan gobierno ya insimbolo na puron metal ya singa say balitok o pilak. Isisimbolo na pitek iray “ilalak na katooan” o say karaklan ya totoo. (Dan. 2:43, paimanod leksab) Agtayo naitanggi ya maksil so impluensya na saray totoo. Singa bilang, sikara so mamipili na lider da no eleksion, idedepensa da iray karapatan da, manproprotesta ira, tan wala ray nanduruman unyon na saray empleyado tan trabahador. Kanian anggano makapanyari so alyansa na Britanya tan Amerika, agnagawaan na sayan gobierno so amin ya labay to.

11. Akin et kombinsido tayo ya manbibilay tayo la ed panaon na anggaan?

¹¹ Komadua, anggapo lay onsublay ed alyansa na Britanya tan Amerika—atan lay sampot ya sankamakapanyarian ya gobierno ed mundo. Diad Armagedon, sayan gobierno ya isisimbolo na sali na balbaleg ya imahen et mekmeken na Panarian na Dios, kaiba lay arum nin gobierno na too. *—Apo. 16:13, 14, 16; 19:19, 20.

12. Akin et mangiiter ed sikatayo na ilalo so propesiya nen Daniel?

¹² Akin et makapabiskeg na pananisia iyan propesiya? Nanengneng tayo ed sayan propesiya nen Daniel ya manbibilay tayo la ed panaon na anggaan. Masulok lan 2,500 ya taon so apalabas, impropesiya nen Daniel ya kayari na Babilonia et wala ni apatiran mantutumbokan ya gobierno ya baleg so epekto ra ed saray lingkor na Dios. Tan say sampot et say alyansa na Britanya tan Amerika. Labay ton ibaga sirin, asingsingger lan deralen na Panarian na Dios so amin ya gobierno na totoo, tan atan la so manuley ed dalin.—Dan. 2:44.

13. Antoy isisimbolo na “komawalon ari” tan “samploran arari” ya abitla ed Apocalipsis 17:9-12, tan panon ya asumpal iyan propesiya?

¹³ Basaen so Apocalipsis 17:9-12. Kayari na World War I, walay sakey nin asumpal ya propesiya ed Biblia tungkol ed kaunoran iran agew. Labay na saray lider na gobierno ya niwalay kareenan ed interon mundo. Kanian nen Enero 1920, binuo da so League of Nations, ya sinalatan na United Nations nen Oktubre 1945. Sayan organisasyon et tinawag na Biblia ya “komawalon ari” ta wala met so pakayari to. Pero say autoridad to et manlalapu labat ed saray gobierno ya onsusuportad sikato. Sarayan gobierno et tinawag ed Biblia ya “samploran arari.”

14-15. (a) Antoy ibabaga na Apocalipsis 17:3-5 tungkol ed “Makapanyarin Babilonia”? (b) Akin et nibagan ‘naeekatan’ lay Makapanyarin Babilonia?

¹⁴ Basaen so Apocalipsis 17:3-5. Diad sakey a pasingawey, anengneng nen apostol Juan so sakey ya imoral a bii—say “Makapanyarin Babilonia”—ya mangisisimbolo ed empiryo na palson relihyon ed interon mundo. Panon ya nasusumpal iyan propesiya natan? Abaybayag lan onsusuporta iray palson relihyon ed saray lider na gobierno. Pero akapropesiya ya iyan nen Jehova ed kapusoan na saray lider na gobierno so “panggawa ed samay walad kanonotan to.” Antoy nagawa? Atakien tan deralen na saray lider na gobierno (say “samploran arari”) so amin ya palson relihyon.—Apo. 17:1, 2, 16, 17.

¹⁵ Panon tayon amta ya asingsingger lan  naderal so Makapanyarin Babilonia? Pian naebatan itan, tandaan tayo ya samay literal ya syudad na Babilonia nensaman et apaliberan na danum, say Ilog Eufrates. Diad libron Apocalipsis, saray minilyon ya onsusuporta ed Makapanyarin Babilonia et nikompara ed “saray danum.” (Apo. 17:15) Pero akapropesiya ya ‘naekatan’ itan. Labay ton ibaga, onsabi so panaon ya dakdakel lay ag-onsuporta ed palson relihyon. (Apo. 16:12) Nagagawa la itan ya propesiya natan. Karaklan ya totoo et aliwa lan relihyoso lapud anggapo lay tiwala da ed relihyon.

16. Akin et makapabiskeg na pananisia iray propesiya tungkol ed pakabuo na United Nations tan pakaderal na Makapanyarin Babilonia?

¹⁶ Akin et makapabiskeg na pananisia irayan propesiya? Say impanbuo ed United Nations tan say idaraiset na onsusuporta ed palson relihyon et prueba ya manbibilay tayo la ed kaunoran iran agew. Anggano naeekatan lay simbolikon danum na Makapanyarin Babilonia, aliwan satan so rason na pakaderal to. Singa abitla nen niman, say manderal ed palson relihyon et say “samploran arari”—saray gobierno ya onsusuporta ed United Nations.  Iyan nen Jehova ed kapusoan da so “panggawa ed samay walad kanonotan to.” Biglaan so panderal dad palson relihyon, kanian seguradon nabigla met so interon mundo. * (Apo. 18:8-10) No aderal lay Makapanyarin Babilonia, seguradon nataktakot iray totoo tan posiblin onirap so bilay, pero sikatayo ran lingkor na Dios et maliket tayo. Akin ey? On ta sa wakas et permanente lan aderal so palson relihyon ya abaybayag lan mamapauges ed si Aman Jehova. Sakey ni, no agawa la itan, labay ton ibaga et asingsingger lay kililiktar tayo!—Luc. 21:28.

17-18. (a) Antoy gawaen tayo pian tuloytuloy tayon napabiskeg so pananisia tayo? (b) Antoy aralen tayo ed ontumbok ya artikulo?

¹⁷ Impropesiya nen Daniel ya diad panaon na anggaan et “ondakel so tuan kakabatan.” Tan talagan ontan so nagagawa natan! Natatalosan tayo la ray propesiya ya nasusumpal ed panaon tayo. (Dan. 12:4, 9, 10) Makapabilib so detalyadon pakakasumpal na saratan ya propesiya, kanian lalon ombibiskeg so talek tayod si Jehova tan ed Salita to. (Isa. 46:10; 55:11) Kanian komon ta tuloytuloy mon aralen so Biblia pian ombiskeg so pananisiam tan natulongan moy arum ya manlingkor met ed si Jehova. Tandaan tayo ya protektaan nen Jehova iramay buo so tiwala rad sikato. Tan makaseguro tayo ya anggan anto ni tay nagawa ed arapen, mansiansia tayon kalmado ta ikdan to tayoy kareenan.—Isa. 26:3.

¹⁸ Diad ontumbok ya artikulo, aralen tayo ray propesiya tungkol ed Kristianon kongregasyon diad panaon na anggaan. Ditan tayo nanengneng ya papaneknekan met na sarayan propesiya ya manbibilay tayo la ed kaunoran iran agew. Pantongtongan tayo met iray ebidensya ya talagan idadaulo na Ari tayon si Jesus iray matoor ya papatumbok to.