1. Akin et importante so manparaan antis ya onsabi so kalamidad?

 NO WALAY kalamidad, mas baleg so tsansa ya makaligtas tayo no antis ya onsabi itan et namparaan tayo la. Tan no akaparaan tayo, natulongan tayo met so arum pian makaligtas ira. Duga so imbaga na sakey ya humanitarian organization ed Europe: “Mas baleg so tsansa ya makaligtas ka no akaparaan ka.”

2. Akin et importantin akaparaan tayo ed isabi na baleg a kairapan? (Mateo 24:44)

² Bigbigla so igapo na “baleg a kairapan,” kanian nataktakot iray totoo. (Mat. 24:21) Pero diad sikatayo ran lingkor nen Jehova, tatalaranan tayo la itan. Diad tua, manga 2,000 ya taon lay apalabas, imbaga la nen Jesus ed saray papatumbok to ya manparaan la ra parad satan ya agew. (Basaen so Mateo 24:44.) Anggano mair-irap itan ya panaon, nasarag tayo no akaparaan tayo. Tan natulongan tayo met so arum pian nakaya da itan.—Luc. 21:36.

3. No baleg ya kairapan la, akin et importante so anos, malasakit, tan panangaro?

³ Walay taloran kualidad ya makatulong pian nasarag tayo so baleg a kairapan. Singa bilang, panon to no ipulong tayo la so ambelbelat ya mensahe na panangukom tan kontraen itayo na saray totoo? (Apo. 16:21) Kaukolan tayo so anos pian nagawaan tayo itan. Seguradon protektaan itayo nen Jehova. Panon to no diad satan ya panaon et onirap so bilay na arum ya agagi? (Hab. 3:17, 18) Tulongan tan iter tayoy pankaukolan da no walay malasakit tayo ed sikara. Panon to no atakien itayo la na alyansa na saray bansa tan kapilitan ya maniiba tayo ed melmelag ya ayaman kaiba iray agagi? (Eze. 38:10-12) Agtayo masyadon nairapan no mabiskeg so panangaro tayo ed sakey tan sakey.

4. Anto ran teksto ed Biblia so mamapaseseg ed sikatayo ya tuloytuloy ya ipanengneng so anos, malasakit, tan panangaro?

⁴ Papasesegen itayo na Biblia ya tuloytuloy tayon ipanengneng so anos, malasakit, tan panangaro. Ibabaga na Lucas 21:19:  “Diad pansungdo [o pananos] yo et niliktar yoy bilay yo.” Ibabaga met na Colosas 3:12: “Isulong yo so . . . panangabagey [o malasakit].” Tan ibabaga na 1 Tesalonica 4:9, 10: “Imbangat kayo la na Dios ya aroen yoy sakey tan sakey. . . . Balet papasesegen mi kayo, agagi, ya itultuloy yon gawaen itan a mas nagkalalo ni.” Nen akasabi irayan panamaseseg ed saray inmuunan Kristiano, ipapanengneng da la so anos, malasakit, tan panangaro. Pero importante ya tuloytuloy dan ipanengneng iratan. Ontan met so dapat tayon gawaen. Pantongtongan tayo sirin no panon ya impanengneng na saray inmuunan Kristiano iratan ya kualidad. Tan nengnengen tayo no panon tayon naalig so alimbawa ra, diad ontan et akaparaan tayo la ed baleg ya kairapan.

5. Antoy akatulong ed saray inmuunan Kristiano pian naanosan da ray subok?

⁵ Dakel so inanosan na saray inmuunan Kristiano. (Heb. 10:36) Siempre, asali da met iray problema ya dadalanen met na arum ya totoo. Pero dakel nin subok so inarap da. Kinontra tan pinairap ira na saray Judion lider na relihyon tan saray opisyal na Roma. Tan say mas ansakit, binusol ira na mismon kapamilya ra. (Mat. 10:21) Diad loob na kongregasyon, kailangan da met so manalwar ed impluensya na saray apostata, ta no andi, naderal so pankakasakey da. (Gawa 20:29, 30) Pero inanosan da iratan ya amin tan nanmatoor ira. (Apo. 2:3) Panon iran akapan-anos? Dinalepdep da so impan-anos na saray matoor ya lingkor na Dios, ya singa si Job. (Sant. 5:10, 11) Impikasi dad si Jehova ya ikdan to ra na pakpel tan biskeg. (Gawa 4:29-31) Tan imbes ya manpokus irad problema, inisip da no anto ray maong ya resulta no mananos ira.—Gawa 5:41.

6. Antoy naaralan mo ed ginawa nen Sister Merita pian naanosan toy subok?

⁶ Naanosan tayo met iray subok no lanang tayon i-personal study tan dalepdepen iray maong ya alimbawa ed Biblia tan nanduruman eksperiensya na agagi ed saray publikasyon tayo. Ontan so ginawa nen Sister Merita ya taga Albania. Sikatoy minaltrato na pamilya to lapud impan-Tasi to, pero akapan-anos tan akapanmatoor. Oniay imbaga to: “Apaseseg ak ya maong nen inaral koy istorya nen Job. Nantutumbokan iray subok ya inarap to, tan agto amta ingen no siopay panlalapuan na saratan. Pero makapabilib ta say kuan to, ‘Anggad ompatey ak et agko ikbanan so integridad ko!’ (Job 27:5) A-realize ko ya melmelag so problemak no ikompara ed dinalan nen Job. Maong ak ni ingen ta amtak no siopan talagay panlalapuan na saray subok ya dadalanen ko.”

7. Anggano anggapo met so dadalanen tayon mair-irap ya subok natan, antoy marakep ya ipasal tayo lan gawaen?

⁷ Agtayo labat komon manpipikasi ed si Jehova no mair-irap so dadalanen tayon subok. Maabig no ipasal tayoy sarili tayo ya ibagad si Jehova iray pakakaaburidoan tayo anggano simpli labat iratan. (Fil. 4:6; 1 Tes. 5:17) Singa bilang, no aliwliway agew mo, no nai-stress ka, tan no dakdakel so iyuulom, kasin kekerewen moy tulong nen Jehova? No apasalan mo la ya si Jehova so kekerewan moy tulong anggano simpli labat so problemam, sikaton tampol so batikan mo no ondalan ka lad mair-irap ya subok. No natan ni labat et nanenengneng mo la ya tutulongan to ka diad angkekelag iran problemam, ombiskeg so tiwalam ya anggan antoy nagawa diad arapen et tulongan to ka.—Sal. 27:1, 3.

8. Base ed eksperiensya nen Sister Mira, akin et nibaga tayon say panaanos tayo natan et makatulong pian naanosan tayo ray subok diad arapen? (Santiago 1:2-4) (Nengnengen met so litrato.)

⁸ No natan ni labat et aanosan tayo la ray subok, mas baleg so tsansa ya naanosan tayoy baleg a kairapan. (Roma 5:3) Akin et ontan so  nibaga tayo? Apatunayan la na dakel ya agagi ya kada no nalampasan day sakey ya subok, napipino ira tan ombibiskeg so pananisia ra ta anengneng dan mismo ya tinulongan ira nen Jehova. Lapud binmiskeg so pananisia da, mas ready iran arapen so antokaman ya subok ya onsabi. (Basaen so Santiago 1:2-4.) Naeksperiensya itan nen Sister Mira ya payunir ed Albania. No maminsan, naiisip to kuno ya mas maong ni arum ta daiset labat so problema ra, sikato balet dakdakel. Pero no ontan la kunoy nalilikna to, iisipen to no panon ya sikatoy tinulongan nen Jehova diad apalabas ya 20 ya taon, tan ibabaga tod sarili to: ‘Anggan antoy nagawa sirin, manmatoor ak. Natan ak ni kasi ontunda anta dakdakel lay subok ya alampasan ko diad tulong nen Jehova?’ Singa si Sister Mira, isip mo iramay panaon ya tinulongan ka nen Jehova. Tandaan mo ya sankanengneng nen Jehova so panaanos mo tan seguradon bendisyonan to so panmamatoor mo. (Mat. 5:10-12) No apasal ka lan mananos natan, mas desidido kan ituloy so panaanos mo no baleg a kairapan la.

9. Panon ya impanengneng na kongregasyon diad Antioquia ed Sirya so malasakit ed saray kapara dan Kristiano?

⁹ Nen inmunan siglo, walay agawan baleg ya eras ed Judea tan apektado iray Kristiano. Nen abalitaan itan na agagi diad Antioquia ed Sirya, kaskasian da iray agagi ed Judea. Pero agda labat ira akasian. Lapud imamalasakit da iray kapara dan Kristiano, kinmilos ira pian natulongan da ra. Nandesisyon iran “mangipawit na tulong ed saray agagin manaayam diad Judea, kada sakey unong ed nasarag to.” (Gawa 11:27-30) Anggano arawi so Judea, nanggawa na paraan iray agagi ed Antioquia pian makasabi so tulong da.—1 Juan 3:17, 18.

10. Panon tayon nipanengneng so malasakit ed saray agagin apektado na kalamidad? (Nengnengen met so litrato.)

¹⁰ Imamalasakit tayo met natan iray agagin apektado na kalamidad. Tutulongan tayo ra diad nanduruman paraan. Mandodonasyon tayo ed worldwide work tan ipipikasi tayo ra. Sarag tayo met ya ibaga ed saray elder tayo ya labay tayoy manboluntaryo ed relief project. b (Pro. 17:17) Nen 2020, masulok ya 950 ya Disaster Relief Committee so binuo ed interon mundo pian natulongan iramay apektado na COVID-19 pandemic. Misatsalamat tayo ed saray maar-aro tan makukulin agagi ya mangidadaulo tan manboboluntaryo ed saray relief project. Sikara so mangibubunog na saray relief supply, seseguradoen da ya agnapapaulyanan so espiritualidad na agagi, tan say arum ed sikara et ontutulong pian naapiger o nipaalagey lamet so aderal ya kaabungan na agagi tan saray Kingdom Hall. Gagawaen da iratan ya amin ta imamalasakit da ray kapara dan Kristiano.—Ikompara so 2 Corinto 8:1-4.

11. Akin et napapagalangan si Aman Jehova no ipapanengneng tayoy malasakit ed saray agagi?

¹¹ No ipanengneng tayoy malasakit ed saray agagin apektado na kalamidad, naimano itan na anggan saray aliwan Tasi. Walay ontan ya agawa ed Bahamas. Nen 2019, dineral na Bagyon Dorian so sakey ya Kingdom Hall diman. Nen aapigeren itan na saray agagi, nananap iray contractor ya manggawa ed arum ya kimey tan impa-estimate da no pigaray nagastos. Oniay imbaga na contractor: “Agko la parentaan . . . yay equipment, libre met lay labor tan materyales . . . Donasyon ko lad organisasyon yo ta pambiliban koy malasakit yo ed saray kaagian yo.” Maslak ed saray totoo natan et agda kabat si  Jehova, pero naoobserbaan da iray gagawaen na Saray Tasi nen Jehova. No nanengneng day malasakit tayo ed sakey tan sakey, ompan atan so paraan pian nakabat day Jehova, say Dios ya “daakan so panangasi to.”​—Efe. 2:4.

12. Akin ya say pangipanengneng na malasakit natan et i-ready to tayo la parad baleg ya kairapan? (Apocalipsis 13:16, 17)

¹² Akin et mas kaukolan tayon ipanengneng so malasakit no baleg a kairapan la? Natan ni labat et dakel lan agagi so nasusubok lapud matoor ira ed Panarian imbes ya diad bansa ra. Ibabaga na Biblia ya mas lalon onggrabe so situasyon no baleg a kairapan la. (Basaen so Apocalipsis 13:16, 17.) Ompan wala ray agagi ya naekal ed trabaho tan onirap so bilay da. Kakkaukolan day tulong tan malasakit tayo. No apasal tayo lan tulongan iray agagi natan, agtayo la nairapan ya ipanengneng so malasakit ed sikara diad baleg a kairapan. Komon ta diad satan ya panaon et nasabian itayo na Ari tayon si Jesus ya ontan so gagawaen tayo, tan sakey tayo ed saray pangibagaan to na, “Tawir yoy Panarian.”​—Mat. 25:34-40.

13. Base ed Roma 15:7, antoy ginawa na saray inmuunan Kristiano pian ombiskeg so aroan da?

¹³ Inar-aro na saray inmuunan Kristiano so sakey tan sakey. Pero diad tua, aliwa itan ya mainomay ya gawaen. Akin ey? Say sakey ya rason et lapud nandurumay background da. Isipen pay kongregasyon ed Roma. Say arum ya agagi ditan et Judio, tan Mosaikon Ganggan so abangonan da. Pero wala met iray agagi ya dumay lahi ra, kanian duma met so kaugalian da. Say arum et aripen, say arum et andi—tan ompan say arum ni ingen ed sikara et amo na kaagian da. Antoy kaukolan ya gawaen na sarayan Kristiano pian ombiskeg so aroan da anggano wala ray pandurumaan da? Binilin ira nen apostol Pablo ya ‘awaten day sakey tan sakey.’ (Basaen so Roma 15:7.) Amay Griegon salita ya impatalos ya ‘awaten’ et ontutukoy ed maong ya pantrato, pansangkaili, o pikaaro ed sakey ya too. Singa bilang, oniay bilin nen Pablo ed si Filemon nen pinmawil so aripen ton si Onesimo: “Awat mo [si Onesimo] a singa ed pangawat mod siak.” (Filem. 17) Nen akabat nen Priscila tan Aquila si Apolos, datdaiset ni amta to tungkol ed Kristo. Kanian sikatoy kinaaro tan “impila ra” pian nabangatan da. (Gawa 18:26) On, anggano nandurumay background na saray Kristiano nensaman, inawat day sakey tan sakey kanian ag-itan nagmaliw ya hadlang ed kongregasyon.

14. Antoy ginawa nen Sister Anna tan say asawa to pian naipalikna ra so panangaro ed saray agagi?

¹⁴ Nipanengneng tayo met ya inar-aro tayo ray agagi no ipalikna tayod sikara ya labalabay tayo ran nakaaro tan nakaiba. Seguradon aroen da tayo met no ontan so gawaen tayo. (2 Cor. 6:11-13) Naeksperiensya itan nen Sister Anna tan say asawa to. Nen kakkaalis da ed balon asainmin da bilang missionary ed West Africa, biglan nagka-COVID-19 pandemic. Lapud COVID-19, agda nakaiba ya personal iray kakongregasyon da. Antoy ginawa ra pian naipanengneng day panangaro ed agagi? Lanang dan ivi-video call iray agagi tan ibabaga ra ya labalabay da ran nakabat tan nakaaro. A-touch iray agagi ed satan ya ginawa da, kanian lanang da met la ran imi-message tan tatawagan. Akin et ontan lay impan-effort na sayan sanasawa? Oniay imbaga nen Sister Anna: “Alikliknak so panangaro na agagi ed siak tan ed pamilyak. Wadtan iran lanang parad sikami—diad irap man o inawa. Kanian labay ko met ya ipalikna ed arum so ontan ya panangaro.”

15. No tungkol ed pangaro ed amin ya agagi, antoy naaralan mo ed alimbawa nen Sister Vanessa? (Nengnengen met so litrato.)

¹⁵ Diad kongregasyon, nanduruman lugar tan pamilya so binalegan na saray agagi, kanian  segurado ya nanduruma met so ugali tan kalareker tayo. Pero ag-itan magmaliw ya hadlang no say nengnengen tayo et saray balibalin ugali da. Apatunayan itan nen Sister Vanessa ya manlilingkor ed New Zealand. Imbaga to ya wala ra kunoy kakongregasyon to ya mairap ton pibagayan ta naiirita ed ugali ra. Pero imbes ya iwasan to ra tan agto la ra katongtongen, nanggawa na paraan pian nakaiba tan mas nakabat to ra. Diman to anengneng no akin ya inar-aro ira nen Jehova. Oniay imbaga nen Sister Vanessa: “Nen niyasain ya circuit overseer si asawak, mas dakel lan agagi so nakakaiba mi tan nandurumay ugali tan personalidad da. Main-inomay ko la natan so mibagay. Malikeliket ak no nakakaibak iray nanduruman agagi. Seguradon naliliketan met si Jehova ed pandurumaan tayo, ta ni, nanduruman klase na totoo so inyasingger to ed organisasyon to.” On, ipapanengneng tayon inar-aro tayo ray agagi no say pampokusan tayo et saray balibalin ugali ya anengneng nen Jehova ed sikara.—2 Cor. 8:24.

16. Akin et importantin maong so panangaro no baleg a kairapan la? (Nengnengen met so litrato.)

¹⁶ Importantin maong so panangaro no baleg a kairapan la. No ginmapo la itan, iner dapat so kulaan tayo pian iligtas itayo nen Jehova? Imanoen tayoy imbaga nen Jehova ya gawaen na saray lingkor ton manaayam ed Babilonia no lusoben la itan: “La kayo, sikayo ran totook, loob kayod saray kuarto yo, tan ikapot yo iray puerta. Amot kayon magano anggad onlabas so sanok na Dios.” (Isa. 26:20) Ompan ontan met ya instruksion so kaukolan tayon unoren no baleg a kairapan la. Posiblin say tutukoyen na “saray kuarto” et saray kongregasyon. Im-promise nen Jehova ya protektaan to tayo diad baleg ya kairapan no agtayo onsian ed organisasyon to. Importante sirin ya natan ni labat et pabiskegen tayo lay panangaro tayo ed saray agagi. Ta diad baleg ya irap, ompan ditan akasalalay no kasin makaligtas tayo o andi!

17. Akin et importante ya man-ready tayo la natan ed isabi na baleg a kairapan?

¹⁷ Amin ya totoo et manirap no onsabi lay “baleg ya agew nen Jehova.” (Sof. 1:14, 15) Anggapoy exempted—anggan sikatayo ran lingkor nen Jehova et nairapan met. Pero no manri-ready tayo la natan parad baleg a kairapan, kalmado tayo labat no onsabi la itan tan natulongan tayo met so arum. Makapan-anos tayo antokaman so subok. Ipanengneng tayoy malasakit tan mansakripisyo tayo pian natulongan tayo ray agagin maniirap. Tan agtayon balot onikban ed saray agagi ta inar-aro tayo ra. No ontan so gawaen tayo, seguradoen nen Jehova ya panliketan tayoy bilay ya andi-anggaan diad balon mundo, ya ditan et agtayo lan balot nanonotan iray problema tan kairapan ya dinadalan tayo!—Isa. 65:17.