1-2. Akin ya sikatayo ran Kristiano et naikompara ed atagtagey ya bilding? (1 Corinto 15:58)

 NEN 1978, walay atagtagey ya bilding ya impaalagey ed Tokyo, Japan ya 60 so palapag to. Mabetbet so yegyeg ed satan ya syudad kanian inisip na totoo ya ompan maganggano itan ya nageba no yegyeg. Pero walay ginawa na saray engineer pian ag-itan ombigay. Anggano malmalet so impanggawa ra ed pundasyon na bilding, in-design da ya sarag toy mila ed galaw na yegyeg. Lapud flexible so design to, ag-itan ombagsak. Sikatayo ran Kristiano et singa satan ya atagtagey ya bilding. Akin ey?

² Importante ya malmalet so espiritual ya pundasyon tayo, pero dapat flexible tayo met tan marunong tayon man-adjust. Importante ya mapekder tayo no say pantongtongan et ganggan tan estandarte nen Jehova. (Basaen so 1 Corinto 15:58.) ‘Akaparaan tayon tuloken’ iratan anggan antoy nagawa. Pero wala met iray situasyon ya importantin “makatunongan” o flexible tayo. (Sant. 3:17) Antoy epektod sikatayo no mapekder tayo pero akaparaan tayo met ya man-adjust? Magmaliw tayon desidido ya unoren si Jehova, pero agtayo magmaliw ya is-istrikto. Pantongtongan tayod sayan artikulo no panon tayon magmaliw ya mapekder. Amtaen tayo met so limaran pakana nen Satanas pian pakapuyen so determinasyon tayo tan no anto ray gawaen tayo pian agto tayo napatitan.

3. Anto ran ganggan so inter nen Jehova ya nabasa ed Gawa 15:28, 29?

³ Malinlinew tan mainomay ya talosan iray ganggan nen Jehova, say Sankatagyan ya Manangiter na Ganggan. (Isa. 33:22) Singa bilang, binilin na mananguley ya ulop nen inmunan siglo iray Kristiano ya: (1) si Jehova labat so dayewen da, aliwan saray idolo, (2) respetoen day inkasagrado na dala, tan (3) arawian day seksual ya imoralidad. (Basaen so Gawa 15:28, 29.) Sikatayo ran Kristiano natan ey, antoy gawaen tayo pian naunor tayo irayan ganggan?

4. Panon tayon naipanengneng ed si Jehova ya sikato labat so dadayewen tayo? (Apocalipsis 4:11)

 ⁴ Si Jehova labat so dayewen tayo, aliwan saray idolo. Ingganggan nen Jehova iray Israelita ya ag-ira mandadayew ed imahen o dios-diosan. (Deu. 5:6-10) Nen tinukso na Diablo si Jesus, imbaga nen Jesus ya si Jehova labat so nepeg ya dayewen. (Mat. 4:8-10) Kanian agtayo mandadayew ed saray imahen, tan agtayo iidoloen iray totoo. Say arum natan et singa la dios so pakanengneng da ed saray sikat tan kabkabat ya pari, politiko, atleta, singer, tan artista. Agtayo ra aaligen. Say dayewen tayo labat et si Jehova ta sikato so ‘amalsa ed amin a bengatla.’—Basaen so Apocalipsis 4:11.

5. Akin et uunoren tayoy ganggan nen Jehova tungkol ed dala?

⁵ Uunoren tayoy ganggan nen Jehova tungkol ed inkasagrado na bilay tan dala. Diad pakanengneng nen Jehova, sagrado so dala. Akin ey? On ta irerepresenta na dala so bilay, ya mabmablin regalo na Dios. (Lev. 17:14) Nen inyabuloy nen Jehova ya nayari lan kanen na too so karne na ayep, ingganggan to ya agnepeg ya kanen so dala. (Gen. 9:4) Imbaga to lamet itan nen inter toy Mosaikon Ganggan ed saray Israelita. (Lev. 17:10) Tan inggiya to so mananguley ya ulop nen inmunan siglo ya bagaan iray Kristiano ya ‘itultuloy dan arawian so dala.’ (Gawa 15:28, 29) Determinado tayon unoren itan ya ganggan, lalo la no mandedesisyon tayo no anton klase na panagpatambal tan medical procedure so awaten tayo. b

6. Antoy gawaen tayo pian ag-itayo natukson manggaway imoral?

⁶ Desidido tayon agmanggawa na imoral. (Heb. 13:4) Bibilinen itayo nen apostol Pablo ya ‘pateyen’ tayo ray kabiangan na laman tayo. Antoy labay ton ibaga? No imbagan pateyen, talagan milaban tayo pian ag-itayo nadaeg na mauges tan makalaman iran pilalek. Iwasan tayo sirin so anggan anto ya mantukso ed sikatayon manggawa na imoral. Agtayo anggan labay ya linggisen iratan! (Col. 3:5; Job 31:1) No natutukso tayo ya manggaway aliwa, kaukolan tayoy onaksion ya tampol pian naekal itan ed isip tayo ta agtayo labay ya naderal so pikakaaro tayo ed si Jehova.

7. Antoy determinado tayon gawaen, tan akin?

⁷ Labay nen Jehova ya magmaliw tayon “matulok [manlapud] puso.” (Roma 6:17) Agtayo pipilien no anto labat ed saray ganggan to so labay tayon unoren. Kombinsido tayo ya parad pankaabigan tayo so amin ya ganggan to. (Isa. 48:17, 18; 1 Cor. 6:9, 10) Uunoren tayo met iratan ta labay tayon napaliket so puso nen Jehova. Aligen tayo imay salmista ya angibagan: “Determinado ak ya unoren iray pananontonan mo diad amin a panaon, anggad kaunoran.” (Sal. 119:112) Mamapasya balet si Satanas ya pakapuyen so espiritualidad tan determinasyon tayo. Amtaen tayo sirin no anto ray pakana to.

8. Panon ya uusaren nen Satanas so graben isusumpa pian onkapuy so determinasyon tayon manmatoor ed si Jehova?

⁸ Graben isusumpa. Uusaren nen Satanas iray gobierno tan arum nin totoo pian maltratoen tan pakapuyen so liknaan na saray lingkor na Dios. Si Satanas et singa leon ya labay to tayon “buagen”—labay ton naderal so relasyon tayod si Jehova. (1 Ped. 5:8) Nen inmunan siglo, saray Kristiano et tinaktakot, sinakitan, tan pinatey ni ingen na saray onsusumpa lapud katooran da ed si Jehova. (Gawa 5:27, 28, 40; 7:54-60) Anggad natan et ontan nin siansiay pakana nen Satanas. Diad Russia  tan ed arum ni ran bansa, dakel so manmamaltrato tan onsusumpa ed saray agagi tayo.

9. Akin et kailangan ya mas maingat tayo ed saray agnaliklikas ya pakana nen Satanas? Mangiter na alimbawa.

⁹ Agnaliklikas iran pakana. Uusaren nen Satanas so graben isusumpa pian arap-arapan to tayon atakien. Pero no maminsan, laen to tayod benegan. Atan iramay agnaliklikas o “masilib a pakana” to. (Efe. 6:11) Asali itan nen Brother Bob nen sikatoy naospital ta manpa-opera. Imbaga to lad saray doktor to ya anggan antoy nagawa, agan balot manpasaksak na dala. Pinmayag may surgeon to. Pero diad samay labi antis na operasyon, sikatoy nila na anesthesiologist nen sinmempet ya agano iray kapamilya to. Imbaga tod si Bob ya man-ready labat iray doktor na dala, agla pigan kailangan to. Seguro, inisip na sayan doktor ya manguman so desisyon nen Bob no anggapoy mandetdengel ya kapamilya to. Pero mapekder si Bob. Imbaga tod sayan doktor ya agdan balot sasaksakan na dala anggan antoy nagawa.

10. Akin et mapeligro no naalisan itayo na panagkatunongan na totoo? (1 Corinto 3:19, 20)

¹⁰ Panagkatunongan na totoo. No naimpluensyaan tayoy panagkatunongan na maslak ya totoo, ompan ibaliwala tayo la ray ganggan nen Jehova. (Basaen so 1 Corinto 3:19, 20.) Maslak ya totoo natan et gagawaen da no antoy labay da anggano amta ran kontra itan ed ganggan na Dios. Wala ray Kristiano nen inmunan siglo diad kongregasyon na Pergamo tan Tiatira ya naimpluensyaan na saray kabaleyan dan imoral tan mandadayew ed saray idolo. Sinimbawa nen Jesus irayan kongregasyon ta kokonsintien da lay seksual ya imoralidad. (Apo. 2:14, 20) Diad panaon tayo natan, maksil so impluensya na saray totoo. Ompan wala ray kapamilya o kaarom ya ibaga ran masyadon istrikto so relihyon tayo. Ompan kombinsien da ka ya ag-unoren so Biblia ta makaluma la kuno itan. Tan ayos labat kunoy manggaway imoral, basta anggapoy natatapakan mon arum ya too. Pero agda tayo naimpluensyaan no tandaan tayo ya andi-kakanaan iratan ya panagkatunongan.

11. Anggano mapekder tayo, antoy agtayo dapat gagawaen?

¹¹ Wala ray situasyon ya ompan ‘onlampas tayo la ed saray bengatlan nisulat’ ta say pakalikna tayo et singa kulang so instruksion nen Jehova. (1 Cor. 4:6) Agtayo labay ya aligen iray lider na relihyon diad panaon nen Jesus. Anta wala lay Mosaikon Ganggan, nanggawa ni ray kaaruman ya batas ya mair-irap ya unoren na maslak ya totoo. (Mat. 23:4) Diad panaon tayo, uunoren tayo ray malinew ya ganggan tan prinsipyo nen Jehova ya nabasa ed Biblia tan saray instruksion ya iiter na organisasyon to. Sapat la iratan kanian agtayo la aaruman. (Pro. 3:5-7) Agtayo sirin manggagawa na kaaruman iran guidelines insan tayo piliten iray agagi ya unoren da itan, lalo la no tungkol ed personal iran bagay.

12. Panon ya uusaren nen Satanas so “maapan panagpalikdo” pian agmansiansian mapekder iray Kristiano?

¹² Panagpalikdo o panagloko. Uusaren nen Satanas so “maapan panagpalikdo” tan saray ideyan anggapoy kakanaan to pian naloko tan agmankakasakey iray totoo. (Col. 2:8) Nen inmunan siglo, inusar nen Satanas iray pilosopiya na matatalinon totoo tan saray agmakasulatan ya bangat na saray Judio pian naibalang to iray Kristiano. Inkayat to ni ingen so ideya ya kaukolan da nin unoren so Mosaikon Ganggan. No agmanalwar iray Kristiano nensaman, ompan atan lay panisiaan da imbes ya si Jehova, say Lapuan na tuan karunongan. Diad panaon tayo ey? Uusaren nen Satanas iray balita tan social media pian mangikalat na fake news tan saray aliwan tuan impormasyon, ya diad tua et nanlapud saray sakim ya politician.  Amayamay so ontan nen kasagsagan na COVID-19 pandemic. c Saray Tasi nen Jehova ya dinmengel ed instruksion na organisasyon tayo et ag-aloko, kanian ag-ira nan-aburidon maong kompara ed saray totoo ya bastabasta anisia ed saratan.—Mat. 24:45.

13. Akin et kailangan tayoy manalwar ed nanduruman pakaabalaan?

¹³ Saray pakaabalaan. Ibabaga na Biblia ya kaukolan tayoy manpokus ed saray “mas importantin bengatla.” (Fil. 1:9, 10) Pero dakdakel natan so pakaabalaan ya upoten toy panaon, biskeg, tan atension tayo. Anggan saray normal ya gagawaen tayo ed kada agew—singa say panangan, iyinum, pan-relax, tan pantrabaho et nayarin magmaliw ya pakaabalaan no atan lan lanang so sankanonot tayo. (Luc. 21:34, 35) Sakey ni, no bantay tayo lan bantay na balita, ompan say sankanonot tan bungay sangi tayo et puros la isyu ed lipunan tan politika. Tan ompan agtayo nalilikas ya wala la manayay papanigan tayo. Amin irayan apantongtongan tayon pakana nen Satanas et uusaren to pian onkapuy so determinasyon tayon gawaen no antoy duga. Pantongtongan tayo natan no anto ray gawaen tayo pian agto tayo napatitan tan mansiansia tayon mapekder.

14. Antoy sakey ya makatulong pian mansiansia tayod panig nen Jehova?

¹⁴ Isip moy dedikasyon mod si Jehova tan no akin ya nampabautismo ka. Ginawam iratan ta labay mon paneknekan ya wala kad panig nen Jehova. Pawil mo may rason no akin ya akombinse ka ya nalmom lay katuaan. Nen nampa-Bible study ka, akabkabat moy Aman Jehova kanian naar-arom tan labay mon pagalangan. Binmiskeg so pananisiam tan nagbabawian mo iray agawaan mon kasalanan. Intundam iray makapuy ya kagagawam tan nansagpotan mon gawaen no antoy duga. Malikeliket ka ta aliknam ya pinerdona ka la na Dios. (Sal. 32:1, 2) Ag-abayag, lanang ka lan mimiaral tan ibabagam lad arum iray nanaaralan mod Biblia. Tan asabi panaon et indedikam so sarilim tan nampabautismo ka. Manlapu lad saman,  ginapoan mo lay manakar ed dalan paarap ed tuan bilay, tan desidido kan mansiansia ditan.—Mat. 7:13, 14.

15. Akin et importante ya itultuloy mon aralen tan dalepdepen so Biblia?

¹⁵ Itultuloy ya aralen tan dalepdepen so Biblia. No say sakey ya kiew et aralem so lamot to, aga mainomay ya natumba. Ontan met ed sikatayo ran Kristiano. Mabiskeg so pananisia tayo no akalamot itan ed Salita na Dios. Legan ya ombabaleg so kiew, tuloytuloy ya onaaralem tan onlalaknab iray lamot to. No tuloytuloy tayon aralen tan dalepdepen so Biblia, onaralem tan ombiskeg so pananisia tayo tan magmaliw tayon kombinsido ya parad pankaabigan tayo iray ganggan nen Jehova. (Col. 2:6, 7) Dalepdep moy alimbawa na saray matoor ya lingkor nen Jehova diad panaon na Biblia tan no panon iran aprotektaan lapud inunor da ray ganggan to. Singa bilang, dinmengel tan nanimanon maong si Ezequiel legan ya susukaten na anghel so templo diad pasingawey. Binmiskeg so liknaan nen Ezequiel lapud saray anengneng to, tan impaisulat itan nen Jehova ta pakaaralan tayo no panon tayon mansiansian mapekder ed dugan panagdayew. d (Eze. 40:1-4; 43:10-12) On, talagan ontibay so pananisia tayo no tuloytuloy tayon aralen tan dalepdepen iray aralem ya katuaan ya walad Biblia.

16. Panon ya aprotektaan si Bob lapud matoor so puso to? (Salmo 112:7)

¹⁶ Ipasal moy pusom ya manmatoor ed si Jehova. Oniay inkansion nen Arin David ed si Jehova: “Matoor so pusok, O Dios.” (Sal. 57:7) Singa ibabaga nen David ya agan balot manguman so panangaro tod si Jehova. Sarag tayo met ya ipasal so puso tayo ya manmatoor ed si Jehova tan manmatalek ed sikato anggan antoy nagawa. (Basaen so Salmo 112:7.) Ontan so ginawa nen Bob ya abitla nen niman. Matoor so puso to kanian nen naamtaan to ya mangi-ready iray doktor na dala no bilang ta kailangan ed operasyon to, inmebat ya tampol ya no bilang ta ontay gawaen da, agla sirin ituloy so operasyon tan manpa-discharge la. No pawilen nen Bob iman ya agawa, oniay nanonotan to: “Agak balot nan-duaran isip, buo so desisyon ko anggan antoy nagawa ed siak.”

17. Antoy naaralan tayo ed eksperiensya nen Bob? (Nengnengen met so litrato.)

 ¹⁷ Akapanmatoor si Bob ta antis nin manpaospital et buo lay desisyon to ya aga manpasaksak na dala. Akin et ontan lay inkapekder nen Bob? Unona, labay ton napaliket si Jehova. Komadua, inaral ton maong so Biblia tan saray publikasyon tayo kanian amta to ya sagrado so bilay tan dala. Komatlo, kombinsidon bendisyonan nen Jehova so katooran to tan amta ton say Dios lay akauley antokaman so nagawa ed sikato. Singa si Bob, mansiansia tayo met ya mapekder no ipasal tayoy puso tayo ya manmatoor ed si Jehova.

18. No tungkol ed pantiwala ed si Jehova, antoy naaralan mo ed si Barak? (Nengnengen met so litrato ed apis.)

¹⁸ Mantiwala ed si Jehova. Sakey ed saray alimbawa ed Biblia ya nantiwala ed saray instruksion nen Jehova et si Barak. Diad panaon nen Barak, “anggapoy . . . panagsamper odino gayang” na saray Israelita. (Ukom 5:8) Pero ingganggan nen Jehova si Barak ya milaban ed armada na Canaan ya say komander et si Sisera. Kompletoy armas na sarayan sundalo! Inusar nen Jehova si propetesan Debora pian ibaga ed si Barak ya onlasur manlapud palandey tan diad patar ya lugar to lusoben iray kalaban ya akalugan ed 900 ya karwahe. Inmunor si Barak anggano baleg so lamang na kalaban ta akakarwahe ira. Nen onlalasur lay Barak tan saray sundalo diad Palandey Tabor, biglan inmuran ya makmaksil! Milalaban si Jehova parad sikara! Kinmukutep ed pitek iray karwahe nen Sisera tan impanalo nen Jehova si Barak. (Ukom 4:1-7, 10, 13-16) Diad panaon tayo, panaloen itayo met nen Jehova basta mantiwala tayod sikato tan unoren tayo ray instruksion na organisasyon to.—Deu. 31:6.

19. Akin et determinadon ka ya mansiansian mapekder?

¹⁹ Diad sayan daan ya sistema, kailangan tayon itultuloy so espiritual ya pilalaban tayo tan mansiansia tayon mapekder. (1 Tim. 6:11, 12; 2 Ped. 3:17) Komon ta determinado tayo ya mansiansian mapekder antokaman so usaren Satanas—balanglan graben isusumpa, agnaliklikas ya pakana, panagkatunongan na totoo, panagpalikdo, tan saray nanduruman pakaabalaan. (Efe. 4:14) On, pansiansiaen tayon malet so debosyon tayod si Jehova, tan lanang tayon unoren iray ganggan to. Pero siempre, wala ray situasyon ya importantin makatunongan tayo tan akaparaan tayon man-adjust ya singa si Jehova tan si Jesus. Diad onsublay ya artikulo, pantongtongan tayo itan ya kualidad da tan no panon tayon naalig so alimbawa ra.