AARALEN YA ARTIKULO 30
Pabiskeg Moy Panangarom ed si Jehova tan ed Kaparam ya Too
“Nisengeg ed aro et ombaleg itayo komon ed amin a bengatla.”—EFE. 4:15.
KANSION 2 Jehova so Ngaran Mo
DIAD SAYAN ARTIKULO a
1. Anto ran katuaan so naaralan mo nen kakkagapom ni manpa-Bible study?
KASIN nanonotan mo ni reaksion mo nen kakkagapom ni manpa-Bible study? Ompan abigla ka nen naamtaan mo ya wala manayay ngaran na Dios. Seguro, malikeliket ka nen naamtaan mo ya anggapo tay impierno tan agpapairapen na Dios iray inatey. Tan seguro, a-touch ka nen naamtaan mo ya posiblin nanengneng mo lamet iray inatey ya kapamilyam tan kakaarom, tan nakaibam irad paraiso diad dalin.
2. Anto la ray inaligwasan mo nen dinmakel lay antam ed Biblia? (Efeso 5:1, 2)
2 Nen dinmakel lay antam ed Biblia, diman mo met naar-aro si Jehova kanian apakilos ka ya unoren iray ganggan to. Agka la padalos-dalos ya mandesisyon ta iyaaplikam la ray prinsipyo ed Biblia. Dinmakep so ugalim ta sankanonot mo la no antoy makapaliket ed Dios. Naaalig mo lay ugali nen Aman Jehova, singa sakey ya ugaw ya aaligen toy ugali na maar-aron ateng to.—Basaen so Efeso 5:1, 2.
3. Anto ray itepet tayod sarili tayo?
3 Tepetan tayoy sarili tayo: ‘Kasin mas mabiskeg so panangarok natan ed si Jehova kompara nen balo ak nin Tasi? Kasin nanengneng ed kabibilay ko ya talagan aaligen koy panagnonot nen Jehova? Kasin naging mas maaro ak ed saray agagi?’ No diad inlabas na panaon et alikas mon singa binmetel lay panangarom ed si Jehova tan ed agagi, agka komon nadidismaya. Diad tua, ontan so agawa ed arum ya Kristiano nen inmunan siglo. Pero ag-ira sinukoan nen Jesus, kanian seguradon agto ka met sukoan. (Apo. 2:4, 7) Amta to ya napapetang tayo lamet so panangaro tayod si Jehova tan ed agagi.
4. Antoy pantongtongan tayo ed sayan artikulo?
4 Pantongtongan tayod sayan artikulo no panon tayon napabiskeg so panangaro tayo ed si Jehova tan ed kapara tayon too. Insan tayo met pantongtongan no anto ran bendisyon so awaten tayo, tan no panon met ya minabang so arum no ontan so gawaen tayo.
PABISKEG MOY PANANGAROM ED SI JEHOVA
5-6. Anto ran subok so naeksperiensya nen apostol Pablo, pero akin et aga tinmunda ya nanlingkor ed si Jehova?
5 Malikeliket ya nanlingkor si apostol Pablo ed si Jehova anggano dakdakel so dinalan ton subok. Arawrawi so biniahe to bilang misionero. Agaylay irap na panagbiahe nensaman ta dakel so “kapeligroan,” tan no maminsan et wala ray matakew ed dalan. Asali to met so minaltrato na saray onkokontra ed pampupulong to. (2 Cor. 11:23-27) Tan wala ray agagi ya manbabalaw ed sikato imbes ya pablien da komon so itutulong tod sikara.—2 Cor. 10:10; Fil. 4:15.
6 Antoy akatulong ed si Pablo pian ag-ontabang ed panlilingkor to? Inaral ton maong so Kasulatan kanian anengneng to ya maomaong ya Dios si Jehova. Apatunayan to met diad mismon eksperiensya to ya sikatoy inar-aro na Dios, kanian naar-aro to met si Aman Jehova. (Roma 8:38, 39; Efe. 2:4, 5) Atan ya panangaro to ed si Jehova so nampakilos ed sikato ya ‘tuloytuloy ya manlingkor ed saray masanto.’—Heb. 6:10.
7. Antoy sakey ya paraan pian ombiskeg so panangaro tayo ed si Jehova?
7 Singa si Pablo, ombiskeg met so panangaro tayo ed si Jehova no maaral tan mabasa tayo na Biblia. Kada no man-Bible reading ka, isip mon maong no antoy naaralan mo tungkol ed si Jehova. Tepetan moy sarilim: ‘Diad sayan salaysay, anto ran detalye so mangipapanengneng ya inar-aro ak nen Jehova? Anto ray alabayan ko dia ya ugali o kualidad to?’ No isipen mo iratan, seguradon ombiskeg so panangarom ed Dios tayo.
8. Akin et ombiskeg so panangaro tayo ed si Jehova no lanang tayon manpipikasi ed sikato?
8 Say sakey nin paraan pian ombiskeg so panangaro tayo ed si Jehova et no lanang tayon mitongtong ed sikato tan ibaga tayoy amin ya walad puso tayo. (Sal. 25:4, 5) Dengelen tan ebatan nen Jehova so ontan iran pikakasi. (1 Juan 3:21, 22) Oniay imbaga nen Sister Khanh b ya taga Asia: “Nen balo ak ni labat ed katuaan, say rason no akin ya inarok si Jehova et lapud saray naaralan ko ed Biblia. Pero nen anengneng kon mismo ya eebatan to iray pikakasik, diman ko lalon naar-aro. Labay kon nalikna to ya sikatoy inar-arok kanian gagawaen ko no antoy makapaliket ed sikato.”
PABISKEG MOY PANANGAROM ED KAPARAM YA TOO
9. Antoy patunay ya inar-aro nen Timoteo iray agagi?
9 Kayari na pigaran taon manlapud impagmaliw nen Pablo ya Kristiano, walay akabat to ya makakkalakal ya balolaki, si Timoteo. Inaro nen Timoteo si Jehova, tan inaro to met iray agagi. Oniay imbaga nen Pablo tungkol ed si Timoteo nen sinulatan toy kongregasyon diad Filipos: “Anggapo lay arum a nibakik . . . a singa sikato a peteg a mangasikaso ed sikayo.” (Fil. 2:20) Kasin naimano yo ya agla binitla nen Pablo no kasin maong ya man-organisa o manpaliwawa si Timoteo? Mapatnag ya say pambiliban nen Pablo ed si Timoteo et say panangaro tod agagi. Baleg so tiwala to ya agto ra paulyanan. Seguradon naar-aro met na agagi si Timoteo kanian tatalaranan day ibisita to ed kongregasyon da.—1 Cor. 4:17.
10. Antoy ginawa nen Anna tan say asawa to pian nipalikna day panangaro ed agagi?
10 Singa si Timoteo, ipalikna tayo met ed agagi ya inar-aro tayo ra. (Heb. 13:16) Ontan so ginawa nen Anna tan say asawa to ya abitla diad imbeneg ya artikulo. Nen nila da so sakey ya pamilyan Tasi kayari na maksil ya bagyo, anengneng da ya nakal so atep na abung da kanian abasa ray gamit da, pati amin ya kawes da. Oniay imbaga nen Anna: “Impesak mi iray kawes da, insan mi met la plinantsa tan tinupi. Simpli met labat iman ya ginawa mi, pero lapud saman et nagmaliw kamin malet ya sankakaaro anggad natan.” Apakilos si Anna tan say asawa to ya ontulong ta inar-aro da iray agagi.—1 Juan 3:17, 18.
11. (a) Antoy epekto ed arum no panengnengan tayo ray panangaro? (b) Base ed Proverbio 19:17, antoy gawaen nen Jehova no ipapanengneng tayoy panangaro?
11 No maomaong tayo ed arum tan panengnengan tayo ray panangaro, nalikna ra ya inar-aro ira nen Jehova tan nanengneng da ya aaligen tayoy kaabigan to. Tan diad tua, anggano agda ibabaga, agda nalingwanan so kamaongan ya impanengneng tayod sikara. Ontan so alikna nen Sister Khanh ya abitla nen niman. Agto kuno nalingwanan iramay agagi ya tinmulong ed sikato nen kabataan ni. Kuan to: “Maong labat ta wala ray maar-aron sister ya ipipila da ak ed panagpulong. Samaren da ak, saniba kamin man-merienda o mangugto, insan da ak lamet iyakar pasempet ed abung. Natan ko la a-realize ya baleg iman ya abala ed sikara, pero alikliknak ya ginawa da iman lapud inar-aro da ak.” Siempre, aliwan amin ya pinanengnengan tayoy kaabigan et misalamat ed sikatayo. Oniay intuloy nen Khanh: “Labalabay koy makabawi ed kaabigan na saraman ya sister pero agko amta no iner la ra natan. Andi bale ta kabat ira nen Aman Jehova. Ipipikasik ya sikato lay ombales ed sikara.” Ag-alingolingo si Sister Khanh. Nanenengneng nen Jehova so itutulong tayod arum anggano say pakalikna tayo et melmelag tan simpli met labat so ginawa tayo. Diad tua, ipapasen to itan ya singa bagat tayod sikato. Tan ibabaga ni ingen na Biblia ya singa walay utang nen Jehova ed sikatayo ya bayaran ton bayaran.—Basaen so Proverbio 19:17.
Say itutulong tan pangaaro tayod agagi et pakanengnengan ya ontatatken tayo ed espiritual (Nengnengen so parapo 12)
12. Panon ya naipanengneng na saray brother so panangaro ed saray kakongregasyon da? (Nengnengen met iray litrato.)
12 No sakey kan brother, panon mon naipanengneng so panangaro ed saray kakongregasyon mo? Si Jordan et kabataan ya brother. Tinepetan to so sakey ya elder no anto ni ray sarag ton gawaen pian makatulong ed kongregasyon. Sikatoy kinomendaan na elder ta wala la ray nagagawaan to, pero imbaga to met no anto ni ray kaukolan ton i-improve. Singa bilang, in-suggest tod Jordan ya marakep no masakbay ya onsabi antis na aral pian na-welcome to ray agagi. Imbaga to met ya lanang ya mankomento tan regular ya manpulong kaiba iray kagrupo to. Binilin to met si Jordan ya manisip na praktikal iran paraan pian natulongan to ray agagi. Nen inyaplika nen Jordan irayan advice, baleg so inaligwasan to. Tan say mas importante, binmiskeg so panangaro to ed agagi. A-realize nen Jordan ya anggano aliwa nin ministeryal a lingkor so sakey ya brother, dapat matulong la, ta pian no naturo et apasal la ya manserbi tan ontulong ed agagi.—1 Tim. 3:8-10, 13.
13. Antoy amakiwas ed si Brother Christian pian manlingkor lamet bilang elder?
13 Panon to no nakal kad pribilehyom bilang ministeryal a lingkor o elder? Tandaan mo ya papablien nin siansia nen Jehova iray agawaan mo nensaman tan agton balot lingwanan so panangarom. (1 Cor. 15:58) Anggano anggapoy pribilehyom natan ed kongregasyon, naiimano to so ipapanengneng mon panangaro ed saray agagi. Nen nakal ya elder si Brother Christian, adismaya kunon maong. Pero oniay imbaga to: “Inar-arok si Jehova kanian manlingkor ak nin siansia ed sikato anggano anggapoy pribilehyok.” Kalabas na panaon, aturo lamet ya elder si Christian. Oniay inamin to: “Diad tua, singa manaalangan ak ya awaten itan ya pribilehyo. Pero inisip ko, no linawa nen Jehova ya manlingkor ak lamet bilang elder, awaten ko itan lapud panangarok ed sikato tan ed agagi.”
14. Antoy naaralan mo ed imbaga nen Sister Elena?
14 Inar-aro tayo met iray totoon pupulongan tayo. (Mat. 22:37-39) Imanoen so imbaga nen Sister Elena ya taga ed Georgia: “Nen balo ak nin Tasi, say rason no akin ya manpupulong ak et lapud aman so ipapagawa nen Jehova. Pero nen ombibiskeg lay panangarok ed si Jehova, diman ko met lalon naaro iray totoo. Antis ak ya manpulong, iimadyinen ko ni no anto ray problema da tan no anto ran topic so labay dan pantongtongan. No ontan so sankanonot ko, mas nakakasian ko ra kanian labalabay ko ya naamtaan day katuaan.”—Roma 10:13-15.
SARAY BENDISYON NO IPANENGNENG TAYOY PANANGARO
No inaro tayo ray agagi, anggan say simplin itulong tayo ed sikara et manresulta ed dakel ya bendisyon (Nengnengen so parapo 15-16)
15-16. Singa nanengneng ed reenactment diad litrato, anto ray bendisyon no ipanengneng tayoy panangaro?
15 No ipanengneng tayoy panangaro ed agagi, diad tua et aliwan sikara labat so minabang. Imanoen so eksperiensya nen Brother Paolo tan say asawa to. Nen ginmapo so COVID-19 pandemic, dakel ya maedad lan sister so imbangat da no panon dan usaren so gadyet da diad panagpulong. Diad gapo et nairapan so sakey ya sister, pero naaralan to lanlamang so mangusar na gadyet kanian atan so inusar to pian naimbitaan iray kakanayon to ed Memoryal. Walay 60 ya kanayon to ya inmatendi panamegley na videoconference! Dakel so atulongan na impanbangat nen Paolo tan say asawa to. Sinulatan na sister si Paolo. Kuan to: “Salamat ed sikayo ta anggano maedad kami la, inanosan yo kamin binangatan. Agkon balot nalingwanan so panangiyansakit nen Aman Jehova tan say makulin intulong yo ed sikami.”
16 Wala kunoy balibalin naaralan nen Paolo ed sayan agawa. A-realize to ya talagan mas importante so panangaro nen say talino o abilidad tayo. Kuan to: “Dati ak ya circuit overseer. Seguro, alingwanan la na agagi iramay paliwawak nensaman pero amay intulong kod sikara, aman kuno so agda nalingwanan.”
17. Siopa ni minabang no ipanengneng tayoy panangaro?
17 No ipanengneng tayoy panangaro ed arum, anggan sikatayon mismo et nagunggonaan. Apatunayan itan nen Jonathan ya taga New Zealand. Aminsan ya ngarem na Sabado, walay anengneng ton brother ya payunir ya bukbukor toy mani-street witnessing. Implano nen Jonathan ya ibaan iman ya payunir diad panag-street witnessing diad ontumbok iran Sabado na ngarem anggano ampetapetang so panaon. Agbalot naisip nen Jonathan ya sikato met lanlamang manaya so nagunggonaan diad saman ya ginawa to. Oniay kuan to: “Diad tua, agko nai-enjoy so panagpulong. Pero nen naobserbaan koy epektibon panagbangat to may brother tan anengneng ko ya mabunga so ministeryo to, diman ko a-realize ya makapaliket manayay manpulong. Aka-close ko met iman ya brother. Baleg so nitulong tod siak pian ontatken ak ed espiritual, onseseg ak ed panagpulong, tan lalo ak ya onapit ed si Jehova.”
18. Antoy labay nen Jehova ya gawaen tayo?
18 Labay nen Jehova ya ombiskeg so panangaro tayod sikato tan ed kapara tayon too. Singa apantongtongan tayo, ombiskeg so panangaro tayo ed si Jehova no maaral tan mabasa tayoy Biblia, no lanang tayon dadalepdepen itan, tan no naynay tayon manpipikasi ed sikato. Ombiskeg so panangaro tayo ed agagi no tulongan tayo ra tan no lanang tayon wadtan parad sikara. No gawaen tayo iratan ya amin, lalo tayon onapit ed si Aman Jehova tan ed sakey tan sakey. Tan sayan malet ya pankakaaro tayo et mansiansia anggad angga!
KANSION 109 Manaaroan ya Maong Manlapud Puso
a Anggano abaybayag tayo lan manlilingkor ed si Jehova odino balo tayo ni labat ya Tasi, importante ya tuloytuloy tayon onaligwas ed espiritual. Ontatken tayod espiritual no pabiskegen tayoy panangaro tayod si Jehova tan ed kapara tayon too. Atan so pantongtongan tayo ed sayan artikulo. Legan mon dadalepdepen iyan artikulo, isip mo no anto la ray inaligwasan mo tan no anto ni ray kaukolan mon i-improve ed sarilim.
b Sinalatan so arum ya ngaran.