SARATAN a libro et tinawag ya rainbow set. Nen sarag ko lan aralen iratan, wala ray anengneng kon makolor a litrato ya nannonotan kon maong. Kanian anggano ugaw ak ni, labalabay ko lan naamtaan iray ibabangat na Biblia, a singa nabasa ed saraman ya balibalin libro.

Nen say interon India et apektado la na Sankamundoan a Guerra II, anguma-uman so bilay ko. Nansian iray ateng ko insan la ra nandiborsyo. Agko natalosan no akin ya mansian so duaran toon inar-arok. Singa naandian ak na pakalikna ed emosyon tan bukbukor ko la. Saksakey ak ya anak, tan anggapoy nailaloan kon mangiter na ligliwa tan suporta ya kakkaukolan ko.

Manaayam kami ed saman nen nanay ko diad Karachi, say capital na probinsya. Sakey ya agew, binmisita ed abung mi si Fred Hardaker, sakey ya maedad lan doktor ya Tasi nen Jehova. Parehoy relihyon to ed samay misioneron angiter na saramay libro ed atateng ko. Tinepetan toy nanay ko no labay toy manaral na Biblia. Agto labay balet imbaga to ya ompan  siak so malabay. Diad sinmublay ya simba, ginapoan koy nanaral na Biblia kaibay Brother Hardaker.

Kalabas na pigaran simba, ginapoan koy onatendi ed saray Kristianon pantitipon ya gagawaen ed clinic nen Brother Hardaker. Manga 12 ya maedad lan Tasi so oonla ditan pian mandayew. Niligliwa tan inasikaso da ak a singa anak da. Makakaliket ak no nanonotan kon onyuyurong irad abay ko, tan agko la kaukolan so ontangay sano mitotongtong irad siak bilang tuan kakaaro, satan so kakkaukolan kod saman a panaon.

Insan intagar ak nen Brother Hardaker ya milad sikato diad ministeryo. Imbangat to ak no panon ya paknolen so nalibit ya ponograpo pian niparengel mi ray akarekord ya antikey a paliwawan base ed Biblia. Arum ed saratan a paliwawa et diretsaan, kanian say arum ya unabung et agda labay ya dengelen iratan. Balet panliliketan koy manpulong ed arum. Inar-arok so katuaan tan labalabay kon inabang itan ed arum.

Nen akasabi lad India iray sundalon Hapon, lalon dinesdes na saray Britanon opisyal iray Tasi nen Jehova. Insan nen Hulyo 1943, naeksperiensyak itan a mismo. Say principal na eskuelaan mi, ya sakey a pari na Anglican Church, et inekal to ak ed eskuelaan lapud “makapuy ya ugalik” kuno. Imbaga tod nanay ko ya say pipiulop kod saray Tasi nen Jehova et makapuy so epekto to ed arum ya kaeskuelak. Nampasnok si nanay ko tan binawalan to ak lad saray Tasi. Ag-abayag, inyakar to ak ed si tatay ko diad Peshawar, sakey a baley ed norte ya manga 1,370 kilometro so kaarawi to. Lapud atundaan ko lay manaral na Biblia tan agak la makakapiulop ed saray Tasi, kinmapuy so espiritualidad ko.

Nen 1947, pinmawil ak ed Karachi pian mananap na trabaho. Legan kon wadman, linma ak ed clinic nen Dr. Hardaker. Malikeliket to ak ya pinatuloy.

“Kumusta, antoy naliliknam?” so intepet to, ta say amta to et manpa-check up ak.

Inyebat ko: “Dok, say sakit ko et espiritual, aliwan pisikal. Kaukolan koy manaral na Biblia.”

“Kapigan so labay mon igapo ey?” so intepet to.

“Natan la no sarag to,” so inyebat ko.

Diad saman a labi et balibali so impanaral mi na Biblia. Pakaliknak et pinmawil imay datin biskeg ko ed espiritual. Sinali ak ya patundaen nen nanay ko ya miulop ed saray Tasi, balet natan et desidido ak lan awaten so katuaan. Nen Agosto 31, 1947, indedikak so bilay ko ed si Jehova tan nampabautismo ak. Insan nen 17 so taon ko, ginmapo ak ya manlingkor bilang regular payunir.

Say unonan asainmin ko bilang payunir et diad Quetta, say datin kawalaan na outpost na saray Britanon sundalo. Nen 1947, say bansa et pinankadua, a nagmaliw ya India tan Pakistan. * Lapud saya et dakel so nagagawan karawalan ed saray totoo lapud relihyon da, tan nanresulta iya ed sakey ed saray sankarakelan ya bilang na totoon tinmaynan ed ayaman da tan linmad arum ya lugar. Manga 14 milyon ya totoo so nagmaliw ya refugee. Saray Muslim ed India et linmad Pakistan, tan saray Hindu tan Sikh diad Pakistan et linmad India. Diad saman ya magulo iray totoo, linmugan ak ed seksekan ya tren diad Karachi tan say pineketan ko labat et diad bembenan ed paway na puerta ya anggad Quetta.

Diad Quetta, akabat koy George Singh, sakey ya espisyal payunir ya manga 25 so taon to. Inikdan to ak na daan lan bisikleta ya luluganan (odino itutulak) ko diad saray mapukdol ya teritorya. Lanang ya bukbukor koy manpupulong. Diad loob na anem bulan, awalaan ak na 17 ya iyaaralan na Biblia, tan arum ed sikara et inawat day katuaan. Say sakey ed sikara et opisyal na sundalo ya si Sadiq Masih, tan tinulongan to kami nen George ya ipatalos so pigaran literatura na Biblia diad lenguahen Urdu, say manunan lenguahe na Pakistan. Asabi panaon, si Sadiq et nagmaliw ya maseseg a manangipalapag na maong a balita.

Ag-abayag, pinmawil ak ed Karachi tan nanlingkor ak ditan kaiba si Henry Finch tan Harry Forrest, saray misionero ya kakkasabi da manlapud Gilead School. Talagan dakdakel so naaralan kod impangipasal dad siak! Aminsan, inibaan koy Brother Finch ya manpulong ed bandad norte na Pakistan. Diad leksab na ataragey ya kapalandeyan,  dakel so akatongtong min mapaabeban totoo ya mansasalita na Urdu ya napgaan ed katuaan. Kalabas na duay taon, naimbitaan ak ya manaral ed Gilead School; pinapawil da ak ed Pakistan bilang part-time ya manangasikaso na sirkito. Nanayam ak ed missionary home diad Lahore, kaiba so talora nin brother ya misionero.

Makapaermen ta nen 1954, saray misionero ed Lahore et ag-akapantatalosan kanian nandesisyon so branch office ya ikdan ira na arum ya asainmin. Say lingok et walay pinilaan ko ed sikara, kanian abaat ak. Maer-ermen ak tan inisip kon aliwa ak ya matatken ed espiritual. Pinmawil ak ed Karachi insan inmalis ak ed London, England, pian diman manpaabig ed espiritual.

Diad London, wala ray kakongregasyon ko ya membro na pamilyan Bethel. Say branch servant ya si Pryce Hughes so maaron angipasal ed siak. Sakey ya agew, inistorya to ya aminsan et sikatoy sinimbawa nen Joseph F. Rutherford, say mangaasikaso ed kimey a panagpulong ed interon mundo ed saman. Nen sinali nen Brother Hughes ya idepensa so sarili to, mas ambelat so impanimbawa ed sikato nen Brother Rutherford. Mankelaw ak nen akaimis labat si Brother Hughes legan ton iistoryaen itan. Imbaga to ya sikatoy adismaya diad gapo. Balet amoria to lanlamang ya kaukolan to iman ya ambelat ya simbawa, tan panangaro iman nen Jehova. (Heb. 12:6) Sinmabid pusok iray imbaga to tan tinmulong itan pian napapawil lamet so liket ko ed panaglingkor.

Diad saman et inmalis si nanay ko ed London tan nampaiyaral na Biblia ed si John E. Barr, ya nagmaliw a membro na Mananguley ya Ulop. Tuloytuloy so inyaligwas to ed espiritual tan abautismoan nen 1957. Naamtaan ko met ya antis ya ompatey si tatay ko, sikatoy nampaiyaral na Biblia ed saray Tasi nen Jehova.

Nen 1958, nankasal kami nen Lene, sakey ya sister ya taga Denmark ya nanayam met lad London. Diad tinmumbok ya taon, abendisyonan kami na anak ya bii, si Jane, say panguloan ed limaran ananak mi. Naikdan ak met la na saray pribilehyo diad Fulham Congregation. Balet sinmabi panaon, nansakit si Lene kanian kinaukolan mi onalis ed medyo ampetang ya lugar. Kanian nen 1967, nanayam kami ed Adelaide, Australia.

Diad Adelaide et 12 so kakongregasyon mi ya alanaan. Maseseg iran mangidadaulo ed kimey a panagpulong. Ag-abayag et pinmawil so maabig ya rotina mi ed panaglingkor.

Nen 1979, pinmaway so komaliman anak mi nen Lene, si Daniel. Sikatoy nansakit na Down syndrome *  tan antikey labat so pambilay to. Anggad natan et mairap ko nin ipaliwawa so gonigon ya alikna mi. Ginawa mi so anggaay nayarian mi pian sikatoy naasikaso mi, balet agmi met pinaulyanan iray apatira nin anak mi. No maminsan et manpapasireg si Daniel ta nakukulangan na oxygen lapud walay duaran abot ed puso to, tan kaukolan min ibatik ed ospital. Balet anggano walay sakit to, sikatoy matalinon ugaw tan maar-aro. Inar-aro to met si Jehova. No manpipikasi kamin pamilya antis ya mangan, pambembenan to ray lima to, tanger-tanger, tan impapuso ton ibagay “Amen!” Insan lad satan mangan.

Nen apat taon nen Daniel, nansakit met na graben leukemia. Kinmapuy kamin maong nen Lene diad pisikal tan emosyonal. Pakaliknak et asingsingger ak lan na-depress. Balet nen nadidismaya kami lan maong, tinmoktok ed puerta mi so manangasikaso na sirkito ya si Neville Bromwich. Diad saman ya labi, sikatoy akalua tan nilakap to kami. Nan-akisan kami. Aligliwa kamin maong ed saray maaro tan mapangasin imbaga to. Manga ala-una lad palbangon so insipot to, tan ag-abayag et inatey si Daniel. Say impatey to so sankaermenan lan agawa ed bilay mi. Balet nilabanan mi so pinasyan ermen, ya matalek kamin anggapon balot—anggan say patey—so makapangisian ed si Daniel ed panangaro nen Jehova. (Roma 8:38, 39) Talagan tatalaranan mi lan sikatoy nakaiba mi lamet sano paolien diad balon mundo na Dios!—Juan 5:28, 29.

Natan, kayarik ya alampasan so amiduan grabe ya impaka-stroke ko, siansia nin manlilingkor ak bilang elder ed kongregasyon mi. Lapud saray naeksperiensyak, naaralan koy magmaliw ya maempatya tan makasi ed arum, lalo lad saramay ondadalan ed saray problema. Agko ira huhusgaan. Imbes, itetepet kod sarilik: ‘Panon ya akaapekto ed liknaan tan panagnonot da iray adalan dad bilay da? Panon kon nipanengneng ya walay malasakit kod sikara? Panon ko ran napaseseg ya gawaen day linawa nen Jehova?’ Talagan labalabay koy man-shepherding ed saray agagi ed kongregasyon! On, no liligliwaen tan papabiskegen koy arum, siak a mismo et naliligliwa tan napapabiskeg met.

Naliliknak so singa alikna na salmista ya angibaga: “Sanen nadadaeg ak na saray kapagaan, niligliwa tan pinakalma mo ak.” (Sal. 94:19) Tinulongan ak nen Jehova diad amin ya probleman dinalan na pamilya mi, nen pinasegsegang ak lapud relihyon ko, nen adismaya ak, tan nen ngalngali ak la na-depress. Talagan si Jehova et nagmaliw ya tuan Ama ed siak!