1. Antoy sakey a rason no akin ya malikeliket tayo?

TALAGAN makapalikliket a naamtaan ya ondarakel so totoo nen Jehova! Nen imbeneg a taon, akapangikondukta tayo na masulok ya 10,000,000 ya panangiyaral na Biblia. Prueba itan ya papasindagen na saray lingkor na Dios so liwawa da! Tan isipen pay minilyon ya interesado ya inmatendi ed Memoryal. Diad satan et naaralan da so panangaro ya impanengneng na Dios diad impangitarya to na dondon.—1 Juan 4:9.

2, 3. (a) Antoy agmakaamper ed sikatayon ‘onsinag a singa silew’? (b) Nipaakar ed samay imbaga nen Jesus diad Mateo 5:14-16, antoy aralen tayo?

² Diad interon mundo et nanduruma so lenguahe na saray totoo nen Jehova. Balet ag-itan makaamper ed sikatayon idayew ya nankakasakey so Ama tayo, si Jehova. (Apo. 7:9) Antokaman so lenguahe tayo odino inerman so panaayaman tayo, sarag tayoy onsinag ya “singa silew ed mundo.”​—Fil. 2:15.

³ Say nanenengneng tayon idarakel tayo, say pankakasakey ya panliliketan tayo, tan say pantutultuloy tayon akabantay et makakatulong ya amin pian nigloria tayo si Jehova. Diad sayan artikulo,  pantongtongan tayo no panon ya nagagawa itan.—Basaen so Mateo 5:14-16.

4, 5. (a) Likud ed panagpulong, panon tayo nin nisindag so liwawa tayo? (b) Anto ray positibon resulta na maong ya ugali tayo? (Nengnengen so litratod gapo na artikulo.)

⁴ “Anggapoy siopaman ya makapansiansian matoor tan matua ed Katawan diad sarayan nakekeraan ya agew . . . no agto anamoten so pankanawnawan pasindagen so liwawa to.” Atan so komento na artikulon “Light in the Darkness,” ya im-publish diad The Watch Tower na Hunyo 1, 1925. Insan impaliwawa na artikulo: “Nepeg ton gawaen itan diad pangipulong to na maong a balita ed saray totoo diad dalin, tan diad pambilay to unong ed saray dalan na liwawa.” Say sakey ya paraan sirin pian nisindag tayoy liwawa tayo et diad pangipulong tayo na maong a balita tan pangibangat ed arum. (Mat. 28:19, 20) Ontan met, nigloria tayo si Jehova panamegley na ugali tan kagagawa tayo. Oobserbaan itayo na saray totoon nakakatongtong tayod kaabungan tan saray ondadalan. Baleg so nagawaan na makaaron imis tan pangibano ed sikara pian nakabat da no siopa itayo tan no anton klase na Dios so dadayewen tayo.

⁵ “Sano onloob kayod abung,” kuan nen Jesus ed saray disipulo to, “ibano yo so akan-abung.” (Mat. 10:12) Diad saray lugar ya mabetbet ya nampulongan nen Jesus tan saray apostol to, niyugali la na totoo ya palooben ed abung da iramay agda kabat. Diad panaon tayo, aliwa lan ontan iray totoo diad dakel a lugar. Balet, no ipatnag tayoy maong ya ugali tan makaaro tayon ipaliwawa so rason no akin ya linma tayod sikara, maslak et naaandi so paga ra odino magmaliw iran relaks. Mabetbet ya say balibalin imis so sankaabigan ya pangigapo na tongtongan. Tua met itan ed saray agagi tayon manpa-public witnessing panamegley na cart. Legan kan mibibiang ed satan, nayarin naimanom ya positibo so maslak ya reaksion na totoo no balibali imis mo tan no ibanom ira. Nayarin lapud satan et onasingger irad sikatayo tan mangala ra na publikasyon tayo. Ontan met, lapud maong ya ugalim, nayarin makapangigapo ka na tongtongan.

6. Panon ya pinalaknab na maedad lan sanasawa so ministeryo da?

⁶ Walay maedad lan sanasawa diad England ya lapud makapuy lay laman da et naiirapan la ran manpulong ed kaabungan. Nanggawa ray paraan pian nisindag day liwawa ra diad paway na mismon abung da. Mangidi-display ira na saray publikasyon tayo diad lamisaan no abeten la na saray atateng so anak da manlapud asingger ya eskuelaan. Dakel so nainteresan tan angala na saray kopya na libron Questions Young People Ask​—Answers That Work, Volume 1 tan 2, ontan met ed saray brosyur. Inibaan ira na sakey a payunir ya kakongregasyon da diad sayan klase na panagpulong. Naimano na sakey ed saray ateng ya makaaro imay payunir tan impapuso so pansasagpot na maedad lan sanasawa, kanian inawat to so panangiyaral na Biblia.

7. Antoy nagawaan mo pian natulongan iray dayo ed lugar yo?

⁷ Diad agano ni ran taon, dakdakel so ontataynan ed lugar da tan manaayam la rad arum ya bansa bilang refugee. Antoy nagawaan mo pian natulongan mo ran nakabat si Jehova tan naamtaan day gagala to? Ompan sarag mon igapo diad panaral na sakey a panangibano ed lenguahe na saramay inmalis ed lugar yo. Makatulong so JW Language app pian nagawaan mo itan. Ontan met, ompan sarag moy manaral na pigaran salita da ya mangalay interes da. Insan nayarian mon ipanengneng ed sikara so jw.org tan ipaimano iray nanduruman video tan publikasyon ya available ed lenguahe ra.—Deu. 10:19.

8, 9. (a) Anton praktikal a tulong so nanaawat tayo diad saray aral tayod midweek? (b) Panon ya natulongan na atateng so ananak da ya mibiang ed saray aral tayo?

 ⁸ Maaron imparaan nen Jehova so Aral Parad Ministeryo tan Bilay na Kristiano pian magmaliw tayon mas epektibo ed ministeryo. Saray nanaawat tayon praktikal ya suhestion diad sayan aral et ontutulong ed dakel ed sikatayo pian nawalaan na kompiyansa diad panagpawil tan panangiyaral na Biblia.

⁹ Naiimano na dakel ya bisitan onaatendi ya saray ananak tayo et aktibo ed aral. Sikayo ran atateng, tulongan yo iray anak yo ya isindag so liwawa da diad pangibangat ed sikaran mankomento diad sarili dan salita. No maminsan, say simpli tan impapuson balikas da so mamakiwas ed saray interesado ya aralen so katuaan.—1 Cor. 14:25.

10. Panon ya makatulong so panagdayew na pamilya pian napansiansia so pankakasakey?

¹⁰ Say sakey nin paraan pian nisindag yoy liwawa yo et diad pamasiansia ed pankakasakey na pamilya yo tan ed kongregasyon yo. Nagawaan itan na atateng no mangiyuuksoy ira na regular ya Panagdayew na Pamilya. Dakel ya pamilya so walaan na eskedyul ya manbantay na JW Broadcasting kada bulan. Kayari na pambantay, maabig no pantongtongan yo no panon yon niyaplika iray naaralan ed programa. No idadaulo na ateng so panagdayew na pamilya, nepeg ton tandaan ya say panangigiya ya kaukolan na sakey ya ugaw et midumaan ed sakey ya tinedyer la. Manggaway paraan no panon ya niyaplika so naaralan pian minabang so kada membro na pamilya.​—Sal. 148:12, 13.

11-13. Panon ya makatulong so amin pian napansiansia so pankakasakey ed kongregasyon tan natulongan so arum ya isindag so liwawa ra?

¹¹ Panon ya makatulong iray kabataan pian napansiansia so pankakasakey ed kongregasyon tan napaseseg so arum ya isindag so liwawa ra? No sakey kan kabataan ya Kristiano, say sakey ya paraan pian nagawaan mo itan et diad pangipanengneng na interes ed saray maedad la. Nayarin marespetom ya paistorya ed sikara iray eksperiensya ra ed abayag lan panlilingkor da. Seguradon napabiskeg ka, tan mas napapaseseg ka pati sikara ya isindag so liwawa na katuaan. Sarag tayon amin ya i-welcome iramay mimiaral ed Kingdom Hall tayo. No gawaen tayo itan, mansiansia so pankakasakey tayo tan nayarin napakiwas iray bisita ya mibiang met ed pangisindag na liwawa da. Nayarim ya ibano tan imisan iray bisita, ya ompan sarag mo ni ingen so onyurong ed  abay da pian naasistian ira. Nayarin ipakabat mo rad arum, pian nalikna ran welcome ira.

¹² No inyasain kan mangidaulo ed pantitipon parad lawak na kimeyan, baleg so nagawaan mo pian natulongan iray maedad la ya makapibiang ed ministeryo. Kasin walay teritoryan sarag dan kimeyan? Wala ray situasyon ya nayarin iyulop ira ed mas ugaw ni pian naasistian ira. Sarag yo met ya ipanengneng so pakatalos ed saramay makapuy lay laman da tan lapud sirkumstansya ra et limitado so nagawaan da ed ministeryo. On, no ipanengneng yoy konsiderasyon tan pakatebek, natulongan iray ugaw ni tan maedad la, eksperiensyado tan balo ni, ya maseseg dan ipulong so maong a balita.​—Lev. 19:32.

¹³ Apakiwas so salmista ya ibaga: “Agaylay abig tan makapaliket a saray sanaagi et saniiban manaayam a walay pankakasakey!” (Basaen so Salmo 133:1, 2.) Lapud pankakasakey da, agunggonaan a maong iray Israelita ed maabig ya impluensya na arum ya mandadayew ed si Jehova. Singa itan larak a panaglana ya ambalbalingit tan makaparepresko. Maabig no pansagpotan moy magmaliw a maong ya impluensya ed arum tan ontulong pian napansiansia so pankakasakey tayo. No gagawaen mo la itan, nakomendaan ka. Sarag mo kasi “manpalaknab,” ya gawaen itan a nagkalalo ni tan tuloytuloy?​—2 Cor. 6:11-13, paimanod leksab.

14. Antoy nagawaan mo pian nisindag moy liwawam ed lugar ya panaayaman yo?

¹⁴ Panon mo nin mas nisindag so liwawa na katuaan ed lugar ya panaayaman yo? Nayarin nasagyat so arum ed katuaan lapud maabig ya panagsalitam tan kagagawam. Tepetay sarilim: ‘Antoy nibagad siak na saray kakaabay mi? Kasin pansiasiansiaen kon maayos tan malinis so abung mi pian anggapoy nabalaw na kakaabay mi? Kasin mabulos ak ya ontutulong ed arum?’ No mitotongtong kad arum ya agagi, maabig no tepetan mo ra no antoy epekto na ipapanengneng dan kaabigan tan maong ya ugali da diad saray kakanayon, kakaabay, katrabaho, odino kaeskuela ra. Seguradon naamtaan mo ray balibalin eksperiensya ra.​—Efe. 5:9.

15. Akin et importante ya mantultuloy tayon akabantay?

¹⁵ Napatnagan ed ugali tayo no kasin pansasagpotan tayon tuloytuloy ya isindag so liwawa tayo. Aminpigan binilin nen Jesus iray disipulo to: “Mantultuloy kayon manbantay.” (Mat. 24:42; 25:13; 26:41) No iisipen tayo ya mabayag ni isabi na “baleg a kairapan,” ya onsabi itan balet aliwan diad sayan panaon ya pambibilayan tayo, naandi so inkaganatan tayo ed panagpulong a kimey. (Mat. 24:21) Imbes ya nisindag tayon maong so liwawa tayo ed saray totoo, ompan onkuyep itan tan naerep ni ingen.

16, 17. Antoy nagawaan mo pian mantultuloy kan akabantay?

¹⁶ Legan ya onuuges so panaon ya pambibilayan tayo, kaukolan tayon amin so mantultuloy ya akabantay. No onkikiwas si Jehova, gagawaen to itan ed dugan panaon. Agtayo itan nakuestion. (Mat. 24:42-44) Balet kaleganan to, kaukolan tayoy mananos, tan mantultuloy ya akabantay. Basaen ya inagew-agew so Salita na Dios, tan mansiansian alerto nipaakar ed panagpikasi. (1 Ped. 4:7) Aligen so maong ya alimbawa na saray agagi tayon mansiasiansian maliket legan iran tuloytuloy ya akabantay tan mangisisindag na liwawa da. Say sakey ya maabig ya alimbawa et samay eksperiensya ya nabasad artikulo ya “Pitomplon Taon Lan Ompepeket ed Kawes na Sakey ya Judio,” ya im-publish ed Say Panag-bantayan na Abril 15, 2012, pahina 18-21.

¹⁷ Naynay ya mibiang ed saray makapabiskeg ya kimey tan panlilimog. Mangiter itan ed sika na baleg a liket, tan agmo naimano ya maples ya onlalabas so panaon. (Efe. 5:16) Diad apalabas ya sanlasus taon, saray agagi tayo et nankimey na impasya tan dakel so agawaan da. Balet natan et mas dakel so nagagawaan  tayo lapud panangigiya nen Jehova. Papasindagen tayo so liwawa tayo diad paraan ya agtayon balot naisip nensaman.

18, 19. Panon itayon natulongan na saray elder ed kongregasyon pian magmaliw tayon alerto tan aktibo? Mangiter na alimbawa.

¹⁸ Napapabiskeg so pananisia tayo ta anggaman agtayo perpekto, siansian aabobonan nen Jehova so panaglingkor tayo. Ontan met, aapresyaen tayoy intarya nen Jehova ya “regalo a lalaki”​—saray elder ed kongregasyon. (Basaen so Efeso 4:8, 11, 12) No ombisita ed sika so sakey ya elder, komon ta ipasen mo itan ya pankanawnawa ya makaaral ed karunongan to tan pian nagunggonaan ed bilin to.

¹⁹ Walay duaran elder ed England ya binmisita ed sanasawa ya walaan na problema. Pakalikna na asawan bii et sikatoy ‘akikasakey ed agmananisia.’ Inamin na asawan laki ya aliwan maong ya manbangat tan anggapoy inyuksoy ton regular ya panagdayew na pamilya da. Impaimano na saray elder ed sayan sanasawa so alimbawa nen Jesus. Inasikaso to ray disipulo to tan intarya to ray pankaukolan da. Pinaseseg na saray elder so asawan laki ya aligen toy Jesus. Pinaseseg da met so asawan bii ya magmaliw ya maanos. Angiter met ira na praktikal iran suhestion ed sanasawa no panon iran makapantulongan pian nawalaan ira na panagdayew na pamilya kaibay duaran anak da. (Efe. 5:21-29) Talagan nansagpot ya maong so asawan laki ya unoren itan, tan sikatoy kinomendaan na saray elder. Sikatoy pinaseseg dan mantultuloy ya mansagpot tan manmatalek ed masanton espiritu pian magmaliw ya maong a mangidaulo ed espiritual. Lapud panangaro tan suporta da, nisindag na sayan pamilya so liwawa da.

20. Antoy nailaloan mo legan mon isisindag so liwawam?

²⁰ “Maliket so balang sakey ya ontatakot ed si Jehova, samay manaakar ed saray dalan To,” so inkansion na salmista. (Sal. 128:1) No isisindag moy liwawam​—diad pangiimbitam ed arum ya manlingkor ed Dios, diad pansasagpot mon napansiansia so pankakasakey, tan diad pantultuloy mon akabantay—​naliknam so baleg a liket. Naimano na arum so maabig iran kimey mo, tan dakel so napakiwas ya mangigloria ed Ama tayo.​—Mat. 5:16.