1. Panon tayon naalig so maaron Ama tayo, si Jehova?

INAR-ARO itayo nen Jehova. (Juan 3:16) Labay tayon aligen so maaron Ama tayo. Kanian mansasagpot tayon ipatnag so “pililikna, panamabli . . . , [tan] maaron panangabagey” ed amin, balet “nagkalalo la ed saray kapananisiaan tayo.” (1 Ped. 3:8; Gal. 6:10) No wala ray kabiangan na espiritual a pamilya tayo ya ondadalan ed mairap iran situasyon, labay tayo ran tulongan.

2. Antoy aralen tayo ed sayan artikulo?

² Amin ya malabay ya magmaliw a kabiangan na pamilya nen Jehova et makaeksperiensya na situasyon ya makapakapuy na liknaan. (Mar. 10:29, 30) Nayarin mas dakel so subok ya arapen tayo legan ya manasingger so anggaan na sayan sistema na mundo. Panon tayon natulongan so sakey tan sakey? Pantongtongan tayo no anto ray naaralan tayo ed salaysay na Biblia nipaakar ed si Lot, Job, tan Noemi. Amtaen tayo met iray pigaran subok ya aarapen na saray agagi tayo natan tan no panon tayo ran natulongan pian nasarag da iratan.

3. Singa nanengneng ed 2 Pedro 2:7, 8, anton makapuy a desisyon so ginawa nen Lot, tan anto ray resulta?

³ Makapuy a desisyon so ginawa nen Lot nen pinili toy manayam ed Sodoma ya ditan et grabe so imoralidad. (Basaen so 2 Pedro 2:7, 8.) Tua, maaligwas itan a lugar, balet dakel so aliwliwan naeksperiensya to lapud impanayam to ditan. (Gen.  13:8-13; 14:12) Say asawa nen Lot et mapatnag ya agustoan to so bilay ed satan a syudad odino nayarin labalabay ton kaulop so arum a totoo ditan kanian agto inunor si Jehova. Naandi so bilay to nen pinauran nen Jehova na asupre tan apoy ed satan ya lugar. Tan isipen pa met so duara ya biin ananak nen Lot. Akisipanan la ran miasawa ed saray lalaki ya inatey lanlamang diad Sodoma. Naandi so ayaman nen Lot tan saray kayarian to, tan say sankasakitan ed amin et say impatey na asawa to. (Gen. 19:12-14, 17, 26) Diad sarayan agawa, kasin maanos nin siansia si Jehova ed si Lot? On.

4. Panon ya impanengneng nen Jehova ya sikatoy maanos ed si Lot? (Nengnengen so litrato ed apis.)

⁴ Anggano pinili nen Lot so manayam ed Sodoma, sikatoy naabagey nen Jehova kanian angibaki na saray anghel ya mangiliktar ed sikato tan say pamilya to. Balet, imbes ya unoren to so imbaga na saray anghel ya apuraen day ontaynan ed Sodoma, sikatoy ‘nampaleen ni.’ Kanian binembenan la na saray anghel so lima to tan tinulongan dan ompaway ed syudad kaibay pamilya to. (Gen. 19:15, 16) Insan imbaga na saray anghel ed si Lot ya ombatik ira ed mapalandey a rehyon. Balet imbes ya unoren nen Lot si Jehova, akikasi ya dia lad asingger ya baley so batikan da. (Gen. 19:17-20) Maanos ya dinmengel si Jehova tan inabuloyan toy Lot ya ditan la ra onla. Balet natatakot lanlamang si Lot ya manayam ditan kanian inmalis ed mapalandey a rehyon, diad samay mismon lugar ya imbaga nen Jehova ya batikan to. (Gen. 19:30) Talagan maan-anos si Jehova! Panon tayon naalig so alimbawa to?

5-6. Panon tayon nagawaan so ibabaga na 1 Tesalonica 5:14 pian naalig tayoy Dios?

⁵ Singa si Lot, ompan walay kabiangan na espiritual a pamilya tayo ya nanggawa na makapuy a desisyon kanian nan-problema laingen. No bilang ta ontan, antoy gawaen tayo? Ompan natukso tayon ibaga ed sikato ya aanien to labat so intanem to, ya tua met. (Gal. 6:7) Balet, walay mas maabig a gawaen. Sarag tayon aligen so paraan na intulong nen Jehova ed si Lot. Panon?

⁶ Angibaki si Jehova na saray anghel aliwan pian pasakbayan labat si Lot noagta pian tulongan dan makaliktar ed kaderal na Sodoma. Mipadpara, ompan kaukolan tayon pasakbayan so sakey ya agi no nanenengneng tayon makapuy lay aarapen to. Balet ompan kaukolan tayo met ya tulongan. Anggano bilang et agto iyaplikan tampol so iter tayon simbawa ya base ed Biblia, kaukolan tayon anosan. Aligen tayo may duaran anghel. Agtayo onsusuko tan agtayo basta papaulyanan imay agi, noagta manggawa tayoy paraan pian natulongan tayo. (1 Juan 3:18) Ompan kaukolan tayon bembenan so lima to, a singa panangibaga, tan tulongan tayo pian niyaplika to so maabig a simbawa tayo ed sikato.​—Basaen so 1 Tesalonica 5:14.

7. Panon tayon naalig so impideneng nen Jehova ed si Lot?

⁷ Sarag komon nen Jehova so manpokus ed saray kakapuyan nen Lot. Balet, pinuyanan to si apostol Pedro pian ideskribe si Lot bilang matunong a too. Maong labat ta peperdonaen nen Jehova iray lingo tayo! (Sal. 130:3) Sarag tayo kasin aligen so impideneng nen Jehova ed si Lot? No manpokus tayod saray maabig a kualidad na saray agagi tayo, magmaliw tayon mas maanos ed sikara. Diad ontan et mas mainomay dan awaten so tulong ya iter tayo.

8. No maabagey tayo, antoy gawaen tayo?

⁸ Aliwan singa si Lot, si Job et nanirap anggano agmet nanggawa na makapuy a desisyon. Sikatoy akaeksperiensya na ambelat iran  problema. Sikatoy naandian na kaykayarian, aderal so reputasyon to, tan awalaan na graben sakit. Balet say mas makapaermen, inatey so amin ya anak da nen asawa to. Inakusaan met si Job na taloran palson kakaaro to. Akin et anggapoy panangabagey na sarayan palson kakaaro nen Job? Agda tinalosan no anton talaga so situasyon to. Kanian aliway inisip da ed si Job tan hinusgaan da. Antoy gawaen mo pian agmo ra naalig? Nepeg mon tandaan ya si Jehova labat so makaamta ed amin ya detalye nipaakar ed situasyon na sakey a too. Dengel mon maong so ibabaga na samay toon walaan na problema. Balet agka labat ondedengel; ipasen moy sarilim ed situasyon to. No ontan so gawaen mo, nipatnag moy tuan pililikna ed agim.

9. No maabagey tayo, antoy agtayo gawaen, tan akin?

⁹ No maabagey tayo, agtayo mangikakayat na saray tsismis nipaakar ed problema na arum. Say toon matsismis et agto papabiskegen so kongregasyon; papakapuyen to itan. (Pro. 20:19; Roma 14:19) Sikatoy makasarili tan agto ipapanengneng so kaabigan. Lapud saray ibabaga to et aaruman to laingen so sakit ya nalilikna na sakey a toon nanairapan. (Pro. 12:18; Efe. 4:31, 32) Mas maabig sirin no say nengnengen tayo et saray maong a kualidad na too tan nonoten tayo no panon tayon natulongan pian nasarag to iray subok.

10. Antoy naaralan tayo ed samay nabasa ed Job 6:2, 3?

¹⁰ Basaen so Job 6:2, 3. Si Job et akapangibaga na “saray salitan agla ninonot.” Balet binabawi to lanlamang iratan. (Job 42:6) Singa si Job, say sakey a toon ondadalan ed problema et nayarin makapangibaga na saray salitan agla ninonot, ya pagbabawian to lanlamang. No bilang nagawa itan, antoy nepeg ya reaksion tayo? Imbes ya balawen tayo, magmaliw tayon maabagey. Tandaan ya ag-itayo  pinalsa nen Jehova ya nawalaan na saray problema ya pansengegay ikapuy na liknaan tayo. Kanian natalosan tayo no akin ya say sakey a matoor a lingkor nen Jehova et makapangibaga na saray salitan agla ninonot no onkakapuy so liknaan to. Anggano wala ray ibaga ton aliwa nipaakar ed si Jehova odino ed sikatayo, agtayo komon tampol pampapasnokan tan agtayo huhusgaan ed imbaga to.​—Pro. 19:11.

11. Panon ya naalig na saray elder si Elihu no mangiiter iray simbawa?

¹¹ No maminsan, say toon onkakapuy so liknaan to lapud problema et mankaukolan na simbawa odino panangipetek. (Gal. 6:1) Panon itan ya nagawaan na saray elder? Maabig no aligen day Elihu, ya dinmengel tan impatnag toy pililikna ed si Job. (Job 33:6, 7) Angiter na simbawa si Elihu nen atalosan to la so walad nonot nen Job. Pian naalig na saray elder si Elihu, nepeg iran ondengel a maong tan talosan da so situasyon na samay too. No ontan so gawaen da, mas nasabi day puso to no mangiter la ra na simbawa.

12. Antoy epekto ed si Noemi na impatey na asawa to tan duaran anak to?

¹² Si Noemi et matoor ya bii ya inaro toy Jehova. Balet nen inatey so asawa to tan duaran anak ton lalaki, labay to lan salatan so ngaran to na “Mara,” ya say kabaliksan to et “Maermen.” (Ruth 1:3, 5, 20, paimanod leksab, 21) Si Ruth ya manugang nen Noemi et agto tinaynan iyan katulangan to ed sarayan subok. Aglabat angiter na praktikal a tulong si Ruth, noagta niligliwa to met si Noemi. Imbalikas tod si Noemi so panangaro tan suporta to panamegley na saray simpli tan nanlapud puso ya salita.​—Ruth 1:16, 17.

13. Akin ya saramay inateyan na asawa et kaukolan day suporta tayo?

¹³ No walay kabiangan na espiritual ya pamilya tayo ya inateyan na asawa, kaukolan toy suporta tayo. Say sanasawa et singa duaran kiew ya sanabay a tinmubo, ya diad inlabas na saray taon et nankakawelan la iray lamot da. No natumba so sakey a kiew tan ompatey, naapektoan ya maong imay sakey a kiew. Mipadpara, no say sakey et inateyan na asawa, nayarin mabayag ton liknaen so ermen tan sakit na liknaan. Si Paula, * ya biglaan so impatey na asawa to, et imbaga to: “Biglan anguman so bilay ko, kinmapuy ak a maong. Anggapo lay best friend ko. Sikatoy pangibabagaan ko na amin ya naliliknak. Mililiket ed siak no maliket ak, tan wadtan ya onsuporta no walay mairap ya dadalanen ko. Naynay ya ondedengel no ibagak ed sikatoy problemak. Pakaliknak et singa nakal so kapalduan laman ko.”

14-15. Panon tayon ligliwaen so sakey ya inateyan na asawa?

¹⁴ Panon tayon ligliwaen so sakey ya inateyan na asawa? Say unonan gawaen tayo et mitongtong tayo ed sikato, anggano nababaingan tayo odino agtayo amta so ibaga tayo. Si Paula ya abitla nen niman, et oniay imbaga to: “Natatalosan ko ya nayarin nababaingan iray totoo ya mitongtong ed sakey ya inateyan. Iisipen da ya ompan walay nibaga ran aliwa. Balet mas aliwa no anggapon balot so ibaga ra.” Diad tua, agmet iilaloan na sakey ya inateyan ya say ibaga tayo et makapaseseg ya maong. Imbaga nen Paula: “Apresyaen ko so anggan say simplin pangibaga na saray kakaarok ya, ‘Mieermen ak ed sika.’”

¹⁵ Si William, ya inateyan na asawa pigaran taon lay apalabas, et imbaga to: “Apresyaen ko no istoryaen na arum iray balibalin nanonotan da ed si asawak; naliliknak ya sikatoy inaro tan rerespetoen da. Akatulong itan ya maong ed siak. Naliligliwa ak ed saray istorya da, ta  talagan inarok si asawak tan nagmaliw lan parte na bilay ko.” Oniay imbaga na sakey ya abalo ya si Bianca: “Naliligliwa ak no manpikasi so arum ya kaiba ak tan no inabang dad siak so sakey odino duaran teksto. Makakatulong ed siak no mangiistorya ira nipaakar ed si asawak tan no ondedengel ira ed istoryak nipaakar ed sikato.”

16. (a) Antoy nepeg tayon gawaen parad saray inateyan? (b) Base ed Santiago 1:27, antoy responsabilidad tayo?

¹⁶ No panon ya agtinaynan nen Ruth si Noemi, kaukolan met ya tuloytuloy tayon suportaan iray inateyan. Si Paula, ya abitla nen niman, et imbaga to: “Nen kakkapatey nen asawak, dakel so sinmuporta ed siak. Balet ag-abayag, pinmawil lad dati so bilay da. Siak balet, anguma-uman so bilay ko. Kanian baleg ya tulong no natalosan na arum ya say sakey ya inateyan et kaukolan toy suporta diad ontumbok iran bulan, tan anggan pigaran taon ni ingen.” Siempre, aliwan parepareho so kada too. Wala ray maka-recover ya tampol. Say arum balet, ompawil lamet so ermen da kada no walay gawaen da ya datin gagawaen da kaibay asawa ra. Nanduruma so panermen na kada too. Tandaan tayo ya inikdan itayo nen Jehova na pribilehyo tan responsabilidad ya asikasoen iray abalo.​—Basaen so Santiago 1:27.

17. Akin ya saramay tinaynan na asawa ra et kaukolan day suporta tayo?

¹⁷ Say arum et tinaynan na asawa ra. Ansakisakit itan ed sikara tan kinmapuy ya maong so liknaan da. Si Joyce, ya tinaynan na asawa to lapud arum a bii, et imbaga to: “Mas grabe so sakit ya naliliknak lapud impandiborsyo mi  nen asawak no ikompara ed sakit ya naliknak no bilang ta sikatoy inatey. No inatey lapud aksidente odino sakit, mas naawat ko ni ta agto itan nilabay. Balet nen tinaynan to ak, aman so nilabay to. Abebbeba laingen so pakanengneng kod sarilik.”

18. Anto ray sarag tayon gawaen pian natulongan iramay anggapo lay asawa ra?

¹⁸ No manggawa tayoy anggan simpli labat ya kaabigan ed saramay anggapo lay asawa ra, ipapaseguro tayod sikara ya inaro tayo ra. Lapud anggapo lay kaiba ra, kaukolan day maong ya kaaro. (Pro. 17:17) Panon mon nipanengneng ya kaaro da ka? Sarag mo ran imbitaan parad simplin panangan. Tan nayarin itagar mo ra ed panagrelaks odino diad ministeryo. Sarag mo met iran ipila sagpaminsan ed panagdayew na pamilya yo. No gawaen mo iratan, napaliket moy Jehova, ta sikatoy “asingger ed samay asugatay puso” tan “managprotekta na saray balon bibii.”​—Sal. 34:18; 68:5.

19. Antoy ibabaga na 1 Pedro 3:8 ya gawaen tayo?

¹⁹ Sano uleyan la na Panarian na Dios so dalin, “nalingwanan la iray pakakagonigonan.” Talagan tatalaranan tayo la so panaon sano “agla nanonotan iray apalabas a bengatla, tan agla iratan mansiansia ed puso.” (Isa. 65:16, 17) Anggad agni itan sinmabi, suportaan tayoy sakey tan sakey tan ipanengneng tayo diad salita tan gawa ya inaro tayo so amin ya kabiangan na espiritual ya pamilya tayo.​—Basaen so 1 Pedro 3:8.