AARALEN YA ARTIKULO 26
“Pawil Kayo ed Siak”
“Pawil kayo ed siak, tan ompawil ak ed sikayo.”—MAL. 3:7.
KANSION 102 “Tulongan Iray Makapuy”
DIAD SAYAN ARTIKULO *
1. Antoy nalilikna nen Jehova no walay ompawil ed sikato ya lingkor to?
NAARALAN tayo ed imbeneg ya artikulo ya inkompara nen Jehova so sarili to ed maong a managpastol ya maar-aro ton aasikasoen so kada karnero to. Tan no walay anggan sakey ya nabalang, anapen ton anapen. Oniay imbaga nen Jehova ed saray Israelita nensaman ya anaynan ed sikato: “Pawil kayo ed siak, tan ompawil ak ed sikayo.” Amta tayo ya ontan nin siansiay nalilikna nen Jehova anggad natan ta oniay imbaga to: “Agak manguman.” (Mal. 3:6, 7) Imbaga nen Jesus ya malikeliket si Jehova tan saray anghel no walay anggan sakey ya abalang a lingkor To ya ompawil ed Sikato.—Luc. 15:10, 32.
2. Antoy aralen tayo ed sayan artikulo?
2 Aralen tayo so taloran ilustrasyon nen Jesus ya pakaaralan tayo no panon tayon natulongan iramay akaarawi ed si Jehova. Pantongtongan tayo no antoy dapat ya ugali tan pantrato tayo ed saray inaktibo no tutulongan tayo ran ompawil. Tan amtaen tayo met no akin ya sulit so pansagpot tayon tulongan iray inaktibo.
ANAPEN SO ABALANG YA SINSILYO
3-4. Akin ya maan-anos ya inanap na samay biin abitla ed Lucas 15:8-10 so abalang ya sinsilyon drakma?
3 Nepeg ya maanos tayon anapen iramay labay da lay ompawil ed si Jehova. Diad sakey ya ilustrasyon ed Ebanghelyo nen Lucas, inistorya nen Jesus so sakey a bii ya abalang toy sinsilyo ya drakma balet ta inanap to lapud mabmabli itan ed sikato. Naimano tayod sayan ilustrasyon ya talagan maan-anos ton inanap imay sinsilyo.—Basaen so Lucas 15:8-10.
4 Imbaga nen Jesus ya malikeliket imay bii nen naalmo to imay abalang ya sinsilyo. Nensaman, no miasawa so Israelitan bii, kaslakan et sikatoy regaloan na nanay to na sakey ya set na samploran sinsilyo ya drakma. Samay sinsilyo ya abalang to may bii et nayarin kaiba ed samay inregalo ed sikato nen nanay to kanian mabmabli ed sikato. Nen abalang, inisip to ya naplag kanian nanselsel na lamparaan tan maanos ton inanap. Balet agto anengneng. Ompan makuykuyep imay lamparaan to. Kanian angalay panis tan sineetan ton pinanisan so interon abung to. Nen kupkupen to la imay apanis to, walay kinmirlap ya sinsilyon pilak! Seguradon akainawa imay bii ta anengneng to imay aanapen to. Lapud liket to, tinawag to iray kakaaro to tan saray kakaabay da.
5. Akin et kaukolan so anos tan sagpot diad pananap tayod saray inaktibo?
5 Nanengneng tayod sayan ilustrasyon nen Jesus ya no walay abalang tayo, kaukolan so anos tan sagpot pian naalmo tayo itan. Ontan met no aanapen tayo iramay akaarawi ed kongregasyon. Ompan abaybayag la ran agmimiaral. Say arum ed sikara et inmalis ed arum ya lugar tan anggapoy makaamta ditan ya Tasi ira. Balet segurado tayo ya wala ray inaktibon labalabay da lay ompawil ed si Jehova. Labalabay da lan ituloy so panlingkor ed si Jehova kaiba na kongregasyon. Balet kakkaukolan day tulong tayo.
6. Antoy nitulong tayo pian naanap iray inaktibo?
6 Siopa ray nayarin ontulong ed pananap ed saray inaktibo? Amin tayo—saray elder, payunir, saray kapamilya na inaktibo, tan amin ya manangipalapag ed kongregasyon. Kasin walay kaarom odino kanayon mo ya inaktibo? Kasin walay akabat mon inaktibo diad panagpulong ed kaabungan odino legan mon manka-cart witnessing? Ipaliwawam ed sikato ya no labay ton walay ombisita ed sikato, iter moy address tan contact number to ed saray elder diad kongregasyon yo.
7. Antoy naaralan mo ed imbaga na sakey ya elder ya si Thomas?
7 Antoy gawaen na saray elder pian naalmo da iray inaktibo ya labay da lay ompawil ed si Jehova? Imanoen so imbaga na sakey ya elder ed Spain ya si Thomas. * Masulok ya 40 ya inaktibo so atulongan to ya ompawil ed kongregasyon. Imbaga to: “Tetepetan ko ray nanduruman agagi no walay kabat dan inaktibo tan no iner so panaayaman to. Odino tepetan ko ra no kasin walay nanonotan dan agi ya agla mimiaral. Malikeliket ya mitutulongan iray agagi. Insan no bisitaen ko la imay inaktibo, kukumustaen ko ray ananak to tan saray kakanayon to. Wala ra kasi inaktibo ya ipipila da ray ananak da nensaman diad saray aral, tan ompan wala ray anak da ya nan-Tasi met. Maabig no natulongan met iran ompawil ed si Jehova.”
TULONGAN YA OMPAWIL ED SI JEHOVA IRAY AKAARAWIN ANANAK TO
8. Diad samay ilustrasyon nipaakar ed anak ya linmayas ya nabasad Lucas 15:17-24, antoy ginawa na ama sanen nagbabawi imay anak to?
8 Antoy dapat ya ugali tan pantrato tayo ed saramay labay da lay ompawil ed si Jehova? Imanoen iray naaralan tayo ed samay ilustrasyon nen Jesus nipaakar ed anak ya linmayas. (Basaen so Lucas 15:17-24.) Imbaga nen Jesus ya nen akapannonot ya maong imay anak, nandesisyon ya ompawil lad abung da. Anggano wala nid arawi, nen sikatoy abantag nen ama to, batik tan nilakalakap toy anak to pian nipalikna to ya inar-aro to. Imbaga na anak so amin ya nalilikna to. Sikatoy nakokonsiensian maong tan imbaga tod ama to ya agla manepeg a natawag ya anak to. Akasian na ama imay anak to kanian nanggaway paraan pian nipalikna to ya malikeliket ton aawaten, aliwan bilang sakey ya uupaan noagta bilang pinabpabli ton anak. Aliwan saman labat. Angiparaan imay ama na baleg a ponsia tan impasulongan toy sankarakepan a kawes imay anak to pian pruebaan ya inar-aro to.
9. Anto so dapat ya ugali tayo pian natulongan tayo ray inaktibo ya ompawil ed si Jehova? (Nengnengen so kahon ya “ No Panon ya Tulongan Iramay Labay Da Lay Ompawil.”)
9 Si Jehova et singa samay ama ed ilustrasyon. Inar-aro to iray inaktibon agagi tayo tan labalabay to ya ompawil la rad sikato. No aligen tayoy Jehova, walay nitulong tayo pian ompawil ira. Pian nagawaan tayo itan, nepeg tayon ipanengneng so anos, pililikna, tan panangaro. Akin et importante ya nanengneng da iratan ed sikatayo, tan panon tayon nipanengneng iratan?
10. Akin et kaukolan so anos no walay tutulongan tayon inaktibo?
10 Tandaan ya agtampol ompawil ed si Jehova iray inaktibo kanian kaukolan so anos. Inamin na dakel ya datin inaktibo ya apakiwas ira nen ag-ira tinundaan ya pasyaren na saray elder tan arum ni ed kongregasyon. Oniay imbaga na sister ya si Nancy a taga Southeast Asia: “Walay maapit ya kaarok ed kongregasyon ya balbaleg so nitulong tod siak. Inturing to ak ya singa atsi to. Impanonot tod siak so malikeliket ya impanlingkor mid si Jehova nensaman. Maan-anos to ak ya dedengelen no ibabalikas koy naliliknak, tan agnababaingan ya bilinen ak. Talagan alikliknak ya walay tuan kaarok ya wadtan a lanang no kaukolan koy tulong.”
11. Akin et importante so pililikna no walay inaktibo ya asugatan so liknaan to?
11 Say pililikna et singa makatambal a puyok—napaabig to so asugatan ya liknaan. Say arum ya inaktibo et abayag la ya walay babarongan da ed sakey ya agi diad kongregasyon. Kanian ngalngali agda labay so ompawil. Ompan say pakalikna na arum et naagrabiado ra. Kakkaukolan day napangibagaan na nalilikna ra, amay amta ran natalosan toy situasyon da. (Sant. 1:19) Oniay imbaga nen María ya datin inaktibo: “Kakkaukolan ko ya walay ondengel ed siak, amay nasaralan ko no maermen ak, tan amay agto ak taynanan no kakkaukolan koy tulong.”
12. Akin ya say panangaro nen Jehova et singa lubir?
12 Diad Biblia, say panangaro nen Jehova ed saray lingkor to et inkompara ed berber odino lubir. Akin? Isipen iyan eksena: Imadyin mo ya nalelener ka ed madaluyon ya dayat, tan walay aka-motorboat ya binuntokan to kay life vest. Misalsalamat ka ta agka la nairapan ya manpaletaw. Balet anggano aka-life vest ka, ompan ompatey ka lanlamang lapud ambetel so danum. Dapat buntokan to ka met na lubir ya napeketan mo tan guyoren to ka anggad makalugan ka ed motorboat. Oniay imbaga nen Jehova nipaakar ed saray Israelita nensaman ya inmarawi ed sikato: ‘Guguyoren ko ra panamegley na saray bedber na aro.’ (Os. 11:4) Ontan met so nalilikna na Dios natan ed saramay akatunda ed panlilingkor dad sikato, ya ngalngali agmakaimwas ed saray problema tan kapagaan ed bilay. Labalabay ton ipalikna ed sikara ya inar-aro to ra, tan labalabay to ran guyoren papawil ed sikato. Tandaan mo, sarag kan usaren nen Jehova pian ipaliknay panangaro to ed sikara.
13. Panon ya nanengneng ed eksperiensya nen Pablo ya baleg so nagawaan na panangaro tayo?
13 Lanang tayon ibaga ed saray inaktibo ya inar-aro ira nen Jehova tan inar-aro tayo met ira. Si Pablo ya abitla ed imbeneg ya artikulo et masulok ya 30 taon ya inaktibo. Imbaga to: “Sakey ya kabuasan nen paalis ak lad abung, walay maomaong ya akulaw ya agi ya linmad abung mi. Alikliknak so panangaro ed impitongtong dad siak. Kanian singa ak ugaw ya man-nguyangoy. Imbagak ed sikara ya imbaki ira nen Jehova ya mitongtong ed siak. Lapud saman ya impasyar da, nandesisyon ak ya ompawil ak lad si Jehova.”
TULOYTULOY YA TULONGAN IRAY INAKTIBO
14. Base ed ilustrasyon ya nabasad Lucas 15:4, 5, antoy ginawa na managpastol nen nalmo to imay abalang ya karnero?
14 No nalmo tayo la ray inaktibo, importante ya tuloytuloy tayo ran tulongan tan pabiskegen. Singa samay anak ya linmayas diad ilustrasyon nen Jesus, ompan nakokonsiensia ira tan isipen dan agla ra makanepegan. Tan nayarin makapkapuy irad espiritual lapud nagmaliw iran kabiangan na mundo nen Satanas. Tulongan tayo ra sirin pian ombiskeg lamet so pananisia rad si Jehova. Diad samay ilustrasyon nen Jesus nipaakar ed abalang ya karnero, imbaga to ya ineba na managpastol imay karnero tan inyulop to lamet ed saray karnero to. Ompan naksawan lan maong imay managpastol lapud impananap tod samay abalang ya karnero. Balet amta to ya kaukolan ton ebaen imay karnero ta ompan makapkapuy ni tan agni makaakar.—Basaen so Lucas 15:4, 5.
15. Panon tayon natulongan iray inaktibo ya labay da lay ompawil ed si Jehova? (Nengnengen so kahon ya “ Baleg ya Tulong ed Saray Inaktibo.”)
15 Tua ya kaukolan tayoy mansakripisyo tan mansagpot pian natulongan tayon ombiskeg lamet iray inaktibo. Anggano aliwan mainomay, nagawaan tayo itan diad tulong na espiritu nen Jehova, say Salita to, tan saray publikasyon ya itatarya na organisasyon to. (Roma 15:1) Oniay imbaga na sakey ya eksperiensyadon elder: “Maslak ed saray inaktibo ya labay da lay ompawil ed si Jehova et kaukolan ya iyaralan lamet na Biblia.” * Kanian no kerewen ed sika na saray elder ed kongregasyon yo ya iyaralan mo so sakey ya inaktibo, maliket mo komon ya awaten itan ya asainmin. Onia ni imbaga to may elder: “Samay pilien ya mangiyaral ed sakey ya inaktibo et nepeg ya makaaro, amay napanpiyaan, tan napangibagaan toy nalilikna to.”
LIKET ED TAWEN TAN DALIN
16. Panon tayon amta ya ontutulong iray anghel pian naalmo tayo ray inaktibo?
16 Dakel lay eksperiensya ya mamaneknek ya ontutulong iray anghel pian naalmo tayo ray inaktibo ya labay da lay ompawil ed si Jehova. (Apo. 14:6) Singa bilang, si Silvio ya taga Ecuador et impapuson nampikasi ed si Jehova ya komon et makapawil la ed kongregasyon. Legan ya manpipikasi, walay nan-doorbell. Sikatoy pinasyar na duaran elder. Impalikna rad sikato ya labalabay dan tulongan.
17. Antoy nalikna tayo no walay nitulong tayo ed impawil na sakey ya inaktibo?
17 Seguradon malikeliket tayo no walay nitulong tayo ed impawil na sakey ya inaktibo. Oniay imbaga nen Salvador, sakey ya payunir ya mansasagpot pian natulongan iray inaktibo: “No maminsan, agko napigilay akis ko lapud liket. Malikeliket ak kada no walay apapawil nen Jehova ya inar-aro ton karnero manlapud mundo nen Satanas. Tan ipapasen kon baleg a pribilehyo so mitulongan ed Sikato ed pananap ed saray abalang ya karnero to.”—Gawa 20:35.
18. No sakey kan inaktibo, antoy nalilikna nen Jehova ed sika tan antoy tatalaranan ton gawaen mo?
18 No sakey ka ed saray akaarawi ed kongregasyon, tandaan mo ya inar-aro ka nin siansia nen Aman Jehova. Labalabay to ya ompawil ka lad sikato. Siempre, wala ray kaukolan mon gawaen pian makapawil ka. Balet isip mo ya si Jehova et singa samay ama ed ilustrasyon nen Jesus. Tatalaranan to lay ipawil mo, tan seguradon maar-aro to kan awaten ed pamilya to.
KANSION 103 Saray Pastol—Regalo a Lalaki
^ par. 5 Labalabay nen Jehova ya ompawil ed sikato iramay akaarawi ed kongregasyon. Baleg so nitulong tayo pian napaseseg iray inaktibo ya ompawil ed si Jehova. Diad sayan artikulo, amtaen tayo no anto ray gawaen tayo pian natulongan ira.
^ par. 7 Sinalatan so arum ya ngaran.
^ par. 15 Makatulong ed arum ya inaktibo so pangiyaral ed sikara na pigaran kabiangan na libron No Panon a Mansiansia ed Panangaro na Dios. Say arum et atulongan nen inyaral ed sikara so pigaran kapitulo na libron Onapit ed si Jehova. Say Komite na Kongregasyon Parad Serbisyo so manpili no siopay mangiyaral ed sakey ya inaktibo.
^ par. 68 DESKRIPSION NA LITRATO: Taloran brother ya tutulongan day sakey ya inaktibo ya labay to lay ompawil. Ite-text da, ipapalikna ran inar-aro da, tan dedengelen da no ibabalikas toy nalilikna to.
