TULOYTULOY ya igigiya tan papabiskegen nen Jehova iray totoo to legan na “kaunoran iran agew.” (2 Tim. 3:1) Importante ya unoren tayoy panangigiya nen Jehova. Mipara so situasyon tayo ed saray Israelita nen wala rad kalawakan. Kaukolan dan unoren so tanol na trumpeta.

Ingganggan nen Jehova si Moises ya manggawa na duaran trumpeta ya gawad pinanday a pilak. Usaren iratan ya “panawag ed saray totoo” tan pian ipaamta ya kaukolan da lay ombuat. (Num. 10:2) Say pamaknol na saray saserdote ed trumpeta et depende ed no antoy kaukolan ya gawaen na saray totoo. (Num. 10:3-8) Ontan met natan, makakaawat iray lingkor na Dios na nanduruman instruksion. Amtaen tayoy taloran paraan no panon tayon makakaawat na instruksion, tan no panon ya mipara iratan ed saray tanol na trumpeta ed Israel nensaman. Saray lingkor nen Jehova natan et iimbitaan to ed angkabaleg iran pantitipon, saray manangasikaso et ipapasal, tan wala ray pananguman ed loob na organisasyon.

No labay nen Jehova ya mantitipon so amin ya Israelita diad bandad bukig na tabernakulo, bansag ya paknolen na saray saserdote so duaran trumpeta. (Num. 10:3) Seguradon narengel itan na amin ya tribu ya mankakampo ed paliber na tabernakulo tan naapag ed apatiran grupo. Siempre, makasabin tampol iramay mankakampo ed bandad bukig na tabernakulo. Say arum balet et walad bandad arawi kanian ompan mas mabayag iran makasabi tan kaukolan day manapura. Inerman so pankakampoan da, labay nen Jehova ya amin da et mantitipon pian narengel da so instruksion to.

Natan et agtayo la mantitipon ed sakey a tabernakulo, balet siansia nin iimbitaan itayo nen Jehova ed angkakabaleg iran pantitipon, singa say regional a kombension tan espiritual iran programa. Ditan et makakarengel tayo na saray bangat tan instruksion to. Parepareho so ipaparaan ya programa parad saray lingkor na Dios anggan iner so kawalaan da. Kanian malikeliket iray onaatendi ed saratan ya pantitipon. Tua, wala ray manbiahe na mas arawi, balet amta ra ya sulit so amin ya pansakripisyo da pian makaatendi ira.

Panon to balet iramay walad nisulinek a lugar? Lapud modernon teknolohiya, nababantayan da so parehon programa tan nalilikna da ya singa met la ra wadman. Singa bilang, nen binmisita so  headquarters representative diad Benin, nanggaway paraan so branch office pian nabantayan so programa ed Arlit, Niger, sakey a lugar ed Sahara Desert ya panmiminaan. Limaran agagi tan 16 ya interesado so nambantay na programa. Anggano wala ra ed arawin lugar, aliklikna da ya kaiba ira ed 44,131 ya nantitipon parad satan a programa. Insulat na sakey a brother: “Salamat ta inkonekta yo kami ed sayan programa. Talagan aliklikna mi ya inar-aro yo kami.”

No sakey labat ya trumpeta so paknolen na saserdote, “saray papangulo labat, saray ulo na nilibo ed Israel” so onla ed tolda ya pantitiponan. (Num. 10:4) Ditan et iikdan ira na instruksion tan ipapasal ira nen Moises pian nagawaan day responsabilidad da ed kanya-kanyan tribu da. No sakey kan pangulo nensaman, seguradon mansagpot kan onla pian makaaral ka.

Saray elder ed kongregasyon et aliwa ran ‘pangulo’ tan ag-ira pakakatawan ed saray agagi. (1 Ped. 5:1-3) Balet gagawaen day anggaay nayarian dan pastolan so pulok na Dios. Kanian labalabay day paibangat no wala ray panangipasal, singa say Kingdom Ministry School. Ditan et naaaralan na saray elder no panon dan mas nagawaan iray kimey da ed kongregasyon. Lapud sarayan panangipasal, ombibiskeg so espiritualidad na saray agagi. Kanian anggano agka kaiba ed sayan panangipasal, minanabang ka nin siansia.

No maminsan, paknolen na saray saserdote so trumpeta ed manguman-uman ya tanol, atan so sinyales ya labay nen Jehova ya ombuat la so interon kampo. (Num. 10:5, 6) Mauk-uksoy so ibuat na interon kampo, balet siempre, aliwa iyan mainomay. Ompan wala ray Israelita ya agda ni labay komon so onalis. Akin kasi?

Ompan pakalikna na arum et mabetbet so iyaalis-alis da odino biglaan. Ibabaga na Biblia: “Anggad wadman so lurem ed tagey na tabernakulo, mansiansia met iray Israelita ed pankakampoan da tan ag-ira ombuat.” Balet “no maminsan et manlapud labi ya anggad kabuasan labat so pansiansia na lurem.” No maminsan met et “duaran agew, sakey bulan, odino mas mabayag ni.” (Num. 9:21, 22) Aminpiga kasin inmalis so interon kampo? Abitla ed Numeros kapitulo 33 so manga 40 lugar ya nankampoan na saray Israelita.

No maminsan et masirom so pankakampoan na saray Israelita. Marakep no walay naalmo ran masirom a lugar ed satan ya “baleg tan makapataktakot a kalawakan.” (Deu. 1:19) Kanian, ompan agda la labay so onalis no masirom lay kulaan da.

Aliwan maminpinsan so ibuat na saray Israelita. Anggano bansag ya narengel na amin so pamaknol na trumpeta, kaukolan ya alagaren na arum so turno dan ombuat. Say unonan onalis et saray tribu ya mankakampo ed bukig​—say tribu na Juda, Isacar, tan Zebulon. (Num. 2:3-7; 10:5, 6) No akaalis la ra, paknolen lamet na saray saserdote so trumpeta ed manguman-uman ya tanol pian naamtaan na taloran tribu ed abalaten ya turno da lay onalis. Ontan so mamipat ya gawaen na saray saserdote anggad makaalis la so interon kampo.

No wala ray pananguman ed organisasyon, ompan mairap mo met ya awaten. Akin ey? Ompan pakaliknam et amayamay so nagagawan pananguman. Ompan wala la ray apasalan mon uksoyan tan agmo la labay so man-adjust. Antokaman so naliliknam, ompan agka la makankaanos tan singa naiirapan kan makapibansag ed saray pananguman. Balet amta tayo ya no unoren tayoy Jehova, bendisyonan to tayo.

Diad panaon nen Moises, inggiya nen Jehova so minilyon ya lalaki, bibii, tan ugugaw diad kalawakan. No agto ira inggiya tan inasikaso, ompan inatey iran amin. Diad sayan kaunoran iran agew, ompatey tayo met ed espiritual no ag-itayo igiya nen Jehova. Diad tua, anggano mapeligro so panaon ya pambibilayan tayo, maliket tayo lapud panangigiya to. Komon ta lanang tayo met ya unoren so nanduruman tanol na trumpeta ya singa ginawa na saray matoor ya Israelita!