1. Akin ya no maminsan et naeermenan iray lingkor nen Jehova tan say pakalikna da et bukbukor da?

AMIN tayo et naeermenan no maminsan, tan say pakalikna tayo et bukbukor tayo. Wala ray agagi ya mainomay dan labanan itan ya liknaan, say arum balet et mairap dan labanan. Diad tua, no maminsan anggano amayamay so kaiba tayo, singa maermen tayo nin siansia lapud nanduruman rason. Singa bilang, wala ray agagi ya naiirapan a man-adjust ed balon kongregasyon da. Say arum et naermenan nen akaarawi rad pamilya da ta close ira. Wala met iray naiiliw dan maong so inatey lan kaaro odino kapamilya da. Tan wala ray agagi ya nen nagmaliw iran Tasi et intakwil ira na pamilya ra odino binusol ira na datin kakaaro da.

2. Anto ran tepet so ebatan tayo?

² Kabkabat itayo nen Jehova, tan natatalosan toy situasyon tayo. Amta to no naeermenan tayo, tan labalabay to tayon tulongan. Pero, panon itayon tutulongan nen Jehova? Antoy gawaen tayo pian natulongan tayoy sarili tayo, tan panon tayo met ya natulongan iray agagi ya naeermenan? Pantongtongan tayoy ebat ed saratan ya tepet.

3. Antoy ginawa nen Jehova pian natulongan toy Elias?

³ Sankanonot nen Jehova so pankaabigan na amin ya lingkor to. Sikatoy asingger ed kada sakey ed sikatayo, tan amta  to no onkakapuy tayo lan maong lapud graben ermen. (Sal. 145:18, 19) Isip mo pay malasakit nen Jehova ed propeta ton si Elias. Sayan lingkor na Dios et nambilay diad panaon ya mauge-uges so kipapasen ed Israel. Say ari tan reyna et kontra ed dugan panagdayew kanian impapatey da ray lingkor nen Jehova, tan say manunan puntirya ra et si Elias. (1 Ara. 19:1, 2) Say amta nen Elias, bukbukor to lay akeran propeta nen Jehova kanian natatakot a maong. (1 Ara. 19:10) Nen anengneng nen Jehova ya onman so nalilikna nen Elias, angibakin tampol na anghel pian napaseguroan ya agto bukbukor ta dakel ni ray akeran matoor ya Israelita.—1 Ara. 19:5, 18.

4. Base ed Marcos 10:29, 30, panon ya aasikasoen nen Jehova iray lingkor ton agla susuportaan na kapamilya o kakaaro da?

⁴ Amta nen Jehova ya baleg so insakripisyo na arum ed sikatayo pian makapanlingkor ed sikato. Ompan nen nandesisyon tayon manlingkor ed si Jehova et ag-itayo la susuportaan na kapamilya o kakaaro tayo ya aliwan Tasi. Seguro nan-aburidoan met itan nen apostol Pedro, kanian oniay intepet tod si Jesus: “Tinaynan mi lay amin a bengatla tan tinmumbok kami ed sika; anto sirin so awaten mi?” (Mat. 19:27) Impaseguro nen Jesus ed saray disipulo to ya magmaliw iran kabiangan na baleg ya espiritual a pamilya. (Basaen so Marcos 10:29, 30.) Si Aman Jehova so ulo na satan ya pamilya, tan insipan to ya asikasoen to iray lingkor to. (Sal. 9:10) Antoy gawaen tayo pian naawat tayoy tulong nen Jehova no maermen tayo?

5. Akin et makatulong no isipen mo no panon kan tutulongan nen Jehova?

⁵ Isip mo no panon kan tutulongan nen Jehova. (Sal. 55:22) Makatulong itan pian nalabanan moy ermen mo. Oniay imbaga nen Carol, * sakey ya single sister ya bukbukor toy Tasi ed pamilya da: “Kada no iisipen ko no panon ak ya tinulongan nen Jehova ed saray problemak nensaman, napapaseguroan  ak ya anggan antoy nagawa, agto ak paulyanan. Agko bukbukor ta wadtay Aman Jehova.”

6. Akin et makapaseseg so 1 Pedro 5:9, 10 ed saray agagin naeermenan?

⁶ Isip mo no panon ya tutulongan nen Jehova iray agagi. (Basaen so 1 Pedro 5:9, 10.) Oniay imbaga nen Brother Hiroshi, ya bukbukor toy Tasi ed pamilya da: “Amtak ya wala pa met so kanya-kanyan problema na saray kakongregasyon ko, balet gagawaen da nin siansiay anggaay nayarian dan manlingkor ed si Jehova. Makapaseseg itan ed sikami ran bukbukor mi Tasi ed pamilya.”

7. Akin et makatulong no lanang kan manpikasi?

⁷ Lanang kan manpikasi, manbasa na Biblia, tan miaral. Ibagam ed si Jehova so amin ya naliliknam. (1 Ped. 5:7) “Akatulong ya maong ed siak so pampikasi ed si Jehova pian nalabanan koy ermen ko,” so imbaga nen Michelle, sakey a kabataan ya sister ya bukbukor to met so Tasi ed pamilya. Say pakalikna to et anggapoy kakampi tod pamilya ra manlapu la nen nagmaliw ya Tasi. “Si Jehova so nagmaliw ya Amak, tan diad sanagew et maminpiga ak ya manpikasi ed sikato. Ibabagak ed sikato so amin ya naliliknak.”

8. Akin et makatulong no inagew-agew mon basaen so Biblia tan no dalepdepen mo iray nababasam?

⁸ Inagew-agew mon basaen so Biblia, tan dalepdep mo iramay salaysay ya idadanet toy panangaro nen Jehova ed kada lingkor to. Oniay imbaga nen Sister Bianca, ya aanosan toy panagbalaw na pamilya to: “Babasaen tan dadalepdepen ko ray salaysay na Biblia, pati saray istoryay bilay na saray lingkor nen Jehova ya kaparehas koy situasyon. Baleg so nitulong na satan ed siak.” In-memorize met na arum iray makapaseseg ya teksto ed Biblia, singa say Salmo 27:10 tan Isaias 41:10. Say arum et ibabansag day ondengel na audio recording no manbabasa iray Biblia tan no manpaparaan ira parad aral. Imbaga da ya makakatulong itan pian agda naliknan bukbukor da.

9. Akin et makatulong no lanang kan miaral?

⁹ Lanang kan miaral pian napaseseg ka tan nakabat mo nin maong iray agagi. (Heb. 10:24, 25) Oniay imbaga nen Michelle ya abitla nen niman: “Anggano mabaing ak, seseguroen ko ya lanang ak ya mimiaral tan mankokomento. Akatulong iya pian naliknak ya parte ak na kongregasyon.”

10. Akin et balibali no mikaaro ka ed saray agagi?

¹⁰ Mikaaro ed saray agagi. Mikaaro ka ed saray agagi ya pakaaralan moy alimbawa ra, anggan diad saramay agmo kaedad odino dumay kipapasen da ed bilay. Ibabaga na Biblia ya “say karunongan et walad saray maedad  la.” (Job 12:12) Anggan saray maedad la et makaaral met ed saray matoor ya kabataan. Si David tan Jonatan et baleg so agwat na edad da, balet nagmaliw iran malet ya sankaaro. (1 Sam. 18:1) Pinaseseg day sakey tan sakey pian makapanmatoor ira ed si Jehova anggano wala ray dinalan dan subok. (1 Sam. 23:16-18) “Saray agagi tayo ed kongregasyon so pinagka-ama, ina, kuya, atsi, odino ading tayo,” so imbaga nen Sister Irina, ya bukbukor toy Tasi ed pamilya da. “Sikara so uusaren nen Jehova ya mangaro tan onsuporta ed sikatayo.”

11. Antoy gawaen tayo pian nawalaan tayoy tuan kakaaro?

¹¹ Aliwan mainomay so mikaaro, lalo la no mabaing ka. Oniay imbaga nen Rowena, sakey ya mabaing ya sister ya nagmaliw ya Tasi anggano wala ray onkokontra ed sikato: “Nampatulong ak ed saray agagi ta amtak ya diad tulong tan suporta ra et nasarag ko ray subok.” Pero no maminsan, ompan mairap ya ibagad arum so naliliknam. Balet kaukolan mon gawaen itan ta atan so mamaelet na pankakaaro. Labalabay kan pasesegen tan tulongan na saray kakaarom ed kongregasyon. Pero siempre, kaukolan mon ibaga ed sikara so situasyon mo pian amta ra no panon da kan natulongan.

12. Panon ya makatulong so ministeryo pian nawalaan tayoy tuan kakaaro?

¹² Sakey ed saray sankaabigan ya paraan pian makapikaaro ka ed saray agagi et no miulop kad sikara diad ministeryo. Oniay imbaga nen Carol ya abitla nen niman: “Dinmakel so tuan kakaarok nen lanang kon kaiba iray sister diad ministeryo tan ed saray kimey diad kongregasyon. Amtak ya uusaren ira nen Jehova pian natulongan ak.” On, baleg a bendisyon iray tuan kakaaro ed kongregasyon. Uusaren ira nen Jehova pian nalabanan moy ermen mo tan agmo naliknan bukbukor mo.—Pro. 17:17.

13. Antoy responsabilidad tayon amin ed kongregasyon?

¹³ Responsabilidad tayon amin ya pansiansiaen so deen tan aroan diad kongregasyon. (Juan 13:35) Baleg so nitulong na ibabaga tan gagawaen tayo pian agnalikna na arum ya bukbukor da. Imanoen iyan imbaga na sakey ya sister: “Nen naamtaan koy katuaan, saray agagi so nagmaliw ya pamilyak. No agda ak tinulongan, seguro agak nagmaliw ya Tasi.” Anto sirin so gawaen mo pian saramay bukbukor day Tasi ed pamilya et nalikna dan parte ira na kongregasyon?

14. Antoy gawaen tayo pian nakaaro tayo ray balo ed kongregasyon?

¹⁴ Sika lay unonan mikaaro. I-welcome iray balo ed kongregasyon. (Roma 15:7) Pero pian nakaaro tayo ran talaga, agtayo labat ira ibabano. Ipalikna tayo ya walay malasakit tayod sikara. Amtaen tayo no anto ray dadalanen dan subok. Pero siempre, iwasan tayoy mantepet na masyadon personal. Wala ray totoo ya ag-ira basta-basta mangibaga na nalilikna ra. Kanian agtayo ra pipiliten. Mas maabig no mataktika kan mantepet tan dengel mon maong so ibabaga ra. Singa bilang, tepetan mo ra no panon dan naamtaan so katuaan.

15. Panon ya natulongan na saray maespiritual ya agagi iray kakongregasyon da?

¹⁵ Ombiskeg so pananisia na saray kakongregasyon tayo no nalikna ran imamalasakit ira na saray maespiritual ya agagi, lalo la ray elder. Oniay imbaga nen Melissa, ya pinabaleg nen nanay to ed katuaan: “Misalsalamat ak  ya maong ed saray brother ta inturing da ak ya singa anak. No kaukolan koy katongtong, sikaray aasinggeran ko ta amtak ya dengelen da ak.” Imanoen met so agawa ed kabataan ya brother ya si Mauricio. Agaylay ermen to nen nagmaliw ya inaktibo imay angiyaral ed sikato. Imbaga to: “Maong labat ta wadtan iray elder ed kongregasyon mi. Lanang da ak ya kukumustaen. Itatagar da ak met ed ministeryo. Ibabaga dad siak iray nanaaralan da ed personal study da, tan itatagar da ak met ya man-relax.” Si Melissa tan Mauricio et parehon manlilingkor la natan ed Bethel.

16-17. Anto ray praktikal ya paraan ya natulongan tayoy arum?

¹⁶ Ontulong ed praktikal ya paraan. (Gal. 6:10) “No maminsan, say kaukolan tayo labat et amay nalikna tayon walay manmamalasakit ed sikatayo, anggan simpli labat so gawaen da,” so imbaga nen Leo ya arawi ed pamilya to ta manlilingkor bilang misionero ed sakey ya bansa. “Nanonotan ko nen abangga so luluganan ko, na-stress ak ya maong! Maong labat ta walay sanasawa ya angitagar ed siak ya mangan diad abung da. Agko la nanonotan no antoy inakan mi, pero agkon balot nalingwanan so indengel da ed siak. Linmemew so liknaan ko.”

¹⁷ No asemblea tan kombension, malikeliket tayo ta kaiba tayo ray agagi tan makapanpapasesegan tayo. Pero oniay imbaga nen Carol ya abitla nen niman: “No asemblea tan kombension, say pakaliknak et bukbukor ko.” Akin et ontay nalilikna to? Imbaga to: “Anggano apaliberan ak na nilasus odino nilibo ni ingen ya agagi, siempre say kaabay dad yurongan et saray kapamilya ra, siak balet anggapoy kaibak ya kapamilyak. No nanenengneng ko ra, naeermenan ak la laingen.” Wala met iray agagi tayon abalo ya maer-ermen no first time day onatendi ed kombension o asemblea ya agda la kaibay asawa ra. Siopay nanonotan mon kakongregasyon yo ya ontay situasyon to? Anto kasi no itagar yo ya milad sikayo no ontumbok ya kombension o asemblea?

18. Panon tayon niyaplika so 2 Corinto 6:11-13?

¹⁸ Seguroen mon walay panaon mon nakaiba iray agagi. No walay plaplanoen yon gathering odino manpasyar kayo, ipila yo iray  nanduruman agagi lalo la iramay say pakalikna da et bukbukor da. Labay tayon ‘ilukas ya maong so puso tayo’ ed sikara. (Basaen so 2 Corinto 6:11-13.) “No walay pamilya ya mangimbita ed sikami diad abung da odino itagar da kamin manpasyar, malikeliket kami,” so imbaga nen Melissa ya abitla nen niman. Walay naiisip mon kakongregasyon yo ya sarag ya itagar o imbitaan na pamilya yo?

19. Kapigan kakkaukolan na arum ya agagi so kaiba?

¹⁹ Wala ray agew ya talagan kakkaukolan itayo na saray agagi. Singa bilang, mairap so situasyon da no walay selebrasyon o holiday ya iselebra na saray kapamilya ran aliwan Tasi. Ompan say arum et maer-ermen no onsabi lay death anniversary na kapamilya o kaaro da. No itagar tayo ra ed saratan ya agew, nalikna dan walay kaaro da ya ‘maasikaso’ tan manmamalasakit ed sikara.—Fil. 2:20.

20. No naeermenan tayo, antoy nepeg tayon tandaan ya singa impaseguro nen Jesus ed Mateo 12:48-50?

²⁰ Dakel so rason no akin ya naeermenan tayo no maminsan tan pakalikna tayo et bukbukor tayo. Amta nen Jehova iratan ya amin. Tandaan tayo ya uusaren to ray agagi pian pabiskegen so liknaan tayo. (Basaen so Mateo 12:48-50.) Misalsalamat tayod si Jehova ed amin ya tulong to, tan say sakey a paraan ya makabales tayod kamaongan to et no agtayo met paulyanan iray agagi. Antokaman so naliliknam, agmon balot lilingwanan ya agmo bukbukor, ta lanang mon kaiba si Jehova!