1. Antoy ginawa nen Jehova parad kada sakey ed sikatayo?

SI Jehova ya mismo so angiyasingger ed kada sakey ed sikatayo pian magmaliw tayon lingkor to. (Juan 6:44) Labay ton ibaga, diad binilyon ya totoo ed interon mundo, walay anengneng ton marakdakep ed sika—anengneng toy pusom tan amta to ya sikatoy naar-arom no nakabat mo. (1 Awa. 28:9) Kanian kabkabat ka nen Jehova, natatalosan to ka, tan inar-aro to ka. Balibalin isipen awa?

2. Anton ilustrasyon so inusar nen Jesus pian natalosan tayo ya inar-aro nen Jehova so kada karnero To?

² Inar-aro ka nen Jehova tan inar-aro to met iray agagim. Pian natalosan tayo iya, inkompara nen Jesus si Aman Jehova ed sakey ya pastol ya walay 100 a karnero to. No nabalang so sakey ed saratan ya karnero, antoy gawaen to may pastol? “Itilak [to] ed kapalandeyan so 99 tan anapen to imay sakey a nababalang.” No nalmo la na pastol imay karnero, agto itan paspasen. Manliket ingen ta aromog to. Antoy naaralan tayod saya? Importante ed si Jehova so kada karnero to. Imbaga nen Jesus: “Aliwan makapaliket ed Amak a walad tawen no nabalang so anggan sakey ed sarayan angkekelag.”—Mat. 18:12-14.

3. Antoy aralen tayo ed sayan artikulo?

³ Agtayo labay ya sikatayo so rason ya onarawi ed kongregasyon so sakey ya agi. Anto sirin so gawaen tayo pian agtayo nasakitan iray agagi? Panon to balet no sikatayo so asakitan? Ebatan tayo iratan ya tepet diad sayan artikulo. Pero amtaen tayo nin unona no siopa iramay “angkekelag” ya tutukoyen nen Jesus diad Mateo kapitulo 18.

4. Siopay tutukoyen nen Jesus ya “angkekelag”?

⁴ Say tutukoyen nen Jesus ya “angkekelag” et amin ya disipulo to—antokaman so edad tayo. Singa tayo angkekelag ya “ugugaw”  ta labalabay tayoy paibangat ed si Jesus. (Mat. 18:3) Anggano nanduruma so kultura, inkatoo, tan kipapasen tayod bilay—amin tayo et walaay pananisia ed si Kristo kanian inar-aro to tayo.—Mat. 18:6; Juan 1:12.

5. Antoy nalilikna nen Jehova no walay mangigapol odino gagalaen ton sakitan iray lingkor To?

⁵ Inar-aro nen Jehova irayan “angkekelag.” Pian natalosan tayoy panangaro nen Jehova ed sikatayo, isipen pa no antoy nalilikna tayo ed saray angkekelag ya ugugaw. Amta tayo ya kakkaukolan na saray ugugaw so panangaro kanian aasikasoen tayo ra. Proprotektaan tayo ra ta agda ni sarag ya idepensa so sarili ra. Sakey ni, anggapo ni masyadon amta rad bilay tan dakel ni kaukolan dan aralen. No say naagrabiado et baleg lan too, makapasnok tayo. Pero mas ompetang so ulo tayo no ugaw so abiktima. Lapud ugugaw so pakanengneng nen Jehova ed sikatayo, ontan met so nalilikna to. Kanian labalabay to tayon protektaan. Diad tua, onsyodot tan onsanok ni ingen si Aman Jehova no walay siopaman ya mangigapol odino gagalaen ton sakitan so anggan sakey ed saray lingkor To.—Isa. 63:9; Mar. 9:42.

6. Base ed 1 Corinto 1:26-29, antoy pakanengneng na mundo ed saray disipulo nen Jesus?

⁶ Anto ni sakey ya rason akin et nibagan “angkekelag” iray disipulo nen Jesus? Diad mundo, siopa ray ipapasen ya atagtagey tan importante? Di ba iray mayayaman, sikat, tan saramay atagey so posisyon da? Say pakanengneng balet na mundo ed saray disipulo nen Jesus et aliwan importante tan anggapoy kana ra. (Basaen 1 Corinto 1:26-29.) Pero aliwan ontan so pakanengneng nen Jehova ed sikara.

7. Antoy labay nen Jehova ya nalikna tayo ed saray agagi?

⁷ Inar-aro nen Jehova so amin ya lingkor to—balo man ira ed katuaan odino abayag la ran manlilingkor ed sikato. Diad pakanengneng nen Aman Jehova, mabmabli so amin ya agagi tayo. Kanian ontan met komon so pakanengneng tayod sikara. Ipalikna tayo sirin so aro ed “amin ya agagi,” aliwa labat ya pinili. (1 Ped. 2:17) Sankanonot tan imamalasakit tayo ra. Kanian no naamtaan tayo ya walay asakitan tayo, agtayo itan ibabaliwala. Tan agtayo komon iisipen ya sensitibon maong iman ya agi tan pababalegen to ni problema imbes ya palabasen to la. Anto ray rason ya say sakey et mainomay day nasakitan? Wala ray agagi ya aliwliway impanugaw da kanian abebbeba so pakanengneng dad sarili ra. Say arum et balo nid katuaan, kanian aaralen da ni mibagay ed ugali na nanduruman agagi. Antokaman so rason, gawaen tayoy anggaay nayarian tayon mikareenan no walay asakitan tayo. Ontan met, no sika may toon main-inomay toy ombarong, awat mo ya kaukolan moy manguman ta aliwan marakep itan ya ugali. No aralen mon palabasen so lingo, mareen so nonot mo tan seguradon labalabay ka na agagi.

8. Anton kultura na saray Judio so akaapekton maong ed saray disipulo nen Jesus?

⁸ Tinukoy nen Jesus iray disipulo to ya “angkekelag” nen wala ray nantepet ed sikato ya: “Siopan talaga so manunaan ed Panarian na tawen?” (Mat. 18:1) Ontan so tepet da ta diad saman ya panaon et importantin maong ed saray Judio so posisyon. Onia ingen so imbaga na sakey ya scholar tungkol ed kultura da: “Importantin maong ed sikara so kagalangan, reputasyon, pagmaliw ya sikat, panangirayew, tan respeto na totoo. Akaparaan ni ra ingen ya ompatey parad satan.”

9. Antoy nepeg ya gawaen na saray disipulo nen Jesus?

⁹ Lapud ontan so kultura ya binalegan na saray disipulo nen Jesus, kaukolan day mansagpot pian nauman da itan ya ugali ra. Kanian oniay bilin nen Jesus ed sikara: “Samay sankamanunaan ed sikayo et magmaliw komon  a sankayugtanan, tan samay mangidadaulo et magmaliw a managserbi.” (Luc. 22:26) No isipen tayo ya sikatayoy “sankayugtanan” o bolirek, ituring tayon “mas atagey so arum.” (Fil. 2:3) No ontan so pakanengneng tayod arum, mas ap-apigeren tayoy panagtrato tayod sikara ta agtayo ra labay ya nasakitan.

10. Anton bilin nen apostol Pablo so lanang tayon tandaan?

¹⁰ Amin ya agagi tayo et walan walay balibalin ugali o kualidad da. No aratan so nengnengen tayo, mas mainomay tayon isipen ya mas atagey ira nen say sikatayo. Lanang tayo met ya tandaan iyan bilin nen apostol Pablo: “Siopay nanggawad sika a magmaong nen say arum? Diad tua, antoy walad sika ya agmo inawat? Natan, no inawat mo itan, akin et manpapasirayew ka a singa agmo itan inawat?” (1 Cor. 4:7) On, no tandaan tayo ya amin ya abilidad tayo et nanlapud si Jehova, agtayo manpasirayew. Singa bilang, no say sakey ya brother et maong ya manpaliwawa odino say sakey ya sister et dakel so iyaaralan toy Biblia, agto itan ilastog noagta ipaarap tod si Jehova so amin ya dayew.

11. Antoy naaralan tayod samay ilustrasyon nen Jesus tungkol ed sakey ya ari tan say aripen to?

¹¹ Kayarin binilin nen Jesus iray papatumbok to ya ag-ira manggagawa na pakagapolan na arum, inistorya to so ilustrasyon tungkol ed sakey ya ari tan say aripen to. Agla impabayaran na ari so balbaleg ya utang to may aripen ta aglan talaga makabayar. Pero nen anengneng na sayan aripen so kapara ton aripen ya akautang ed sikato na melmelag komparad utang to ed ari, pipiliten ton manbayar anta mikakasi kalamor. Nen naamtaan itan na ari, impaipriso to imay aripen ya agto amtay mangasi. Antoy naaralan tayod saya? Imbaga nen Jesus: “Ontan met so gawaen ed sikayo na Amak ed tawen, no agkayo manpeperdonaan a sanaagi manlapud kapusoan yo.”—Mat. 18:21-35.

12. Akin et aliwan sika labat so nasakitan no agka mamerdona?

¹² Lapud agto amtay mangasi imay aripen, aliwliway nansumpalan to. Pero aliwan sikato labat so naapektoan. Unona, asakitan to imay kapara ton aripen ta “impaipriso to.” Komadua, asakitan to met iray arum nin aripen ya akanengneng ed ginawa to. “Sanen anengneng na saray kapara ton aripen so agawa, naermenan iran maong.” On, saray gagawaen tayo et walay epekto tod arum. No agtayo perdonaen so toon akasakit ed sikatayo, diad tua aliwan sikatayo labat so apektado. Sasakitan tayo met imay toon agtayo labay ya perdonaen ta iwasan tayo la tan ambetebetel lay panagtrato tayod sikato. Sakey ni, nasakitan met iray agagi ta siempre, nailang ira no nalikas dan walay babarongan tayo ed saman ya too.

13. Antoy naaralan mo ed eksperiensya na sakey ya payunir?

¹³ No perdonaen tayo iray agagi, nalemewan tayo tan onlemew met so liknaan da. Naeksperiensya itan na sakey ya payunir ya si Crystal. * Sikatoy binmarong ed sister ya kakongregasyon to. Oniay nanonotan nen Crystal: “No maminsan, singa to ak sasaksaken ta ansakisakit ya mansalita. Kanian anggan diad panagpulong et agko labay ya nakaiba. Natatabangan ak laingen ya manpulong tan agak la maliket.” Pakalikna nen Crystal et walay rason ton mansinti ta naagrabiadon maong. Pero nilabanan to itan ya liknaan. Nampaabeba si Crystal tan inyaplika to imay bilin na Biblia ya abasa tod artikulon “Mamerdona Ka Manlapud Pusom,” ya walad Panag-bantayan ya Oktubre 15, 1999. Kanian pinerdona to iman ya sister. Oniay imbaga nen Crystal: “A-realize ko ya amin tayo pa et mansasagpot ya isulong so balon personalidad.  Tan kada agew et mabulos itayon peperdonaen nen Jehova. Nainawaan ak ya maong tan nakal so belat ed pusok. Pinmawil so liket ko ed panaglingkor.”

14. Base ed Mateo 18:21, 22, antoy singa mairap ya gawaen nen apostol Pedro, tan antoy naaralan mod ebat nen Jesus?

¹⁴ Amta tayo ya kaukolan tayoy mamerdona tan atan so dugan gawaen, pero ompan naiirapan tayon mamerdona. Ompan ontan met so alikna nen apostol Pedro. (Basaen so Mateo 18:21, 22.) Antoy makatulong ed sikatayo? Unona, isip mo no panon karakel so agawaan mo lan lingo pero mabulos to kan peperdonaen nen Jehova. (Mat. 18:32, 33) Anggan agtayo komon kanepegan so naperdona, kakasian to tayo. (Sal. 103:8-10) No si Jehova et peperdonaen to tayo, di perdonaen tayo met sirin so arum. Diad tua, obligado tayon manpeperdonaan ta ibabaga na Biblia ya obligasyon tayon aroen iray agagi. (1 Juan 4:11) Komadua, dalepdep mo iray maabig ya resulta no mamerdona ka—makaaral ed alimbawam imay agi ya akasakit ed sika, makatulong ka pian mansiansiay pankakasakey ed kongregasyon, agnaderal so pikakaarom ed si Jehova, tan onlemew so liknaan mo. (2 Cor. 2:7; Col. 3:14) Tan komatlo, ipikasim ed si Jehova ya tulongan to kan mamerdona pian nagawaan moy panlabayan to. Agmo aabuloyay Satanas ya deralen toy pikakaarom ed saray agagi. (Efe. 4:26, 27) Kaukolan tayoy tulong nen Jehova pian mansiansiay deen ed kongregasyon.

15. Base ed Colosas 3:13, antoy gawaen mo no singa agmo napalabas so ginawa na sakey ya agi?

¹⁵ Panon to no singa agmo lan talaga napalabas so lingo na sakey ya agi? Antoy gawaen mo? Dapat say sankanonot mo nin siansia et no panon kan makapikareenan. Ibagam ed si Jehova so naliliknam. Ipikasim ya tulongan to imay agi ya akasakit ed sika tan tulongan to ka met komon ya manpokus ed saray  maong ya ugali to—saray ugali ya labalabay met nen Aman Jehova ed sikato. (Luc. 6:28) No planom ya katongtongen imay agi, nonot mo nin maong no antoy ibagam tan no panon mon ibaga. Tan mas maabig no isipen mo ya agto ka ginagalan sakitan. (Mat. 5:23, 24; 1 Cor. 13:7) No katongtong mo la, marakep no agmo pandududaan so ibabaga to. Panon to balet no agto labay so mikareenan? “Itultuloy [mon] itepel” so agim, tan anosan mo. (Basaen so Colosas 3:13.) Agmo bubusolen, ta no andi, nadamay so pikakaarom ed si Jehova. Agmon balot aabuloyan ya nagapol ka odino ontunda ka lan manlingkor lapu labat ed ginawa na arum. Paneknekan mo ya anggan antoy nagawa et agnaapektoan so panangarom ed si Jehova.—Sal. 119:165.

16. Antoy responsabilidad na kada sakey ed sikatayo?

¹⁶ Misalsalamat tayo ta walay pribilehyo tayon manlingkor ya nankakasakey ed si Jehova bilang “sakey a pulok, a walaay sakey a managpastol.” (Juan 10:16) Oniay ibabaga na libron Organisadon Manggawa na Linawa nen Jehova, diad pahina 165: “Lapud minanabang ka ed satan a pankakasakey, responsabilidad mon pansiansiaen itan.” On, ipasal tayoy sarili tayo ya say pangipasen tayod saray agagi et “singa ed pangipapasen nen Jehova ed sikara.” Diad pakanengneng nen Jehova et singa tayo “angkekelag” ya ugugaw tan inar-aro to tayon amin. Kasin ontan met so pakanengneng tan naliliknam ed saray agagi? Tandaan mo, nanenengneng tan papablien nen Jehova so amin ya gagawaen mo pian natulongan tan naasikasom ira.—Mat. 10: 42.

17. Antoy determinadom ya gawaen?

¹⁷ Inar-aro tayo ray agagi, kanian agtayo ra labay ya sakitan. Tan komon et determinado tayon “agmangiyan na pakagapolan odino bengatlan makaamper” ed sikara. (Roma 14:13) Ipasen tayo ran mas atagey nen say sikatayo, tan perdonaen tayo ra manlapud puso. Ontan met, agtayo aabuloyan ya nagapol itayo lapud ginawa na arum. Imbes, desidido tayon “gawaen iray bengatlan mamapawala na kareenan tan saray bengatlan makapabiskeg ed sakey tan sakey.”—Roma 14:19.