1. Anton mensahe so impulong na saray disipulo nen Jesus diad Jerusalem?

DAKDAKEL so totoo ed Jerusalem. Nanlapu rad nanduruman bansa, tan nanduruma met so lenguahe ra. Pero walay makapakelaw ya agawa. Wala ray Judio ya akapansalita na nanduruman lenguahe! Abigbigla iray totoon wadman. Pero mas abigla ira ed mensahe ya impulong na sarayan Judio tan ed imbaga nen apostol Pedro. Say sakey ya mensahen impulong da et niliktar so sakey ya too no ipanengneng toy pananisia ed si Jesu-Kristo. Grabe so epekto na satan ya mensahe ed saramay wadman, kanian intepet da: “Antoy nepeg min gawaen?” Oniay ebat nen Pedro: “Manpabautismo so kada sakey ed sikayo.”—Gawa 2:37, 38.

2. Antoy aralen tayo ed sayan artikulo? (Nengnengen so litrato ed apis.)

² Makapalikliket so sinmublay ya agawa. Manga 3,000 so nampabautismo ed saman ya agew tan nagmaliw iran disipulo nen Kristo! Atan la so gapoan na impasyan kimey ya panagbangat ya ingganggan nen Jesus ed saray papatumbok to, tan anggad natan et tuloytuloy tayo nin gagawaen itan. Pero diad panaon tayo, agmanpabautismon tampol so sakey ya too diad mismon agew kayari ton naamtaan so katuaan. Ompan onlabas ni so pigaran bulan o taon ni ingen antis ya manpabautismo so iyaaralan. Talagan kaukolan so panaon tan sagpot diad pangiyaral na Biblia, tan seguradon antam itan no walay iyaaralan mo. Diad sayan artikulo, aralen tayo no panon mon natulongan so Bible study’m pian napakiwas ya manpabautismo.

3. Base ed Mateo 28:19, 20, antoy nepeg ya gawaen na Bible study pian onaligwas ya anggad manpabautismo?

³ Pian onaligwas so iyaaralan ya anggad manpabautismo, nepeg ton iyaplika iray ibabangat na Biblia. (Basaen so Mateo 28:19, 20.) No iyaaplika to ray nanaaralan to, aaligen to imay “makabat a too” diad ilustrasyon nen Jesus ya nankotkot na aralem pian niletneg toy pundasyon na abung to diad balbaleg a bato. (Mat. 7:24, 25; Luc. 6:47, 48) Antoy gawaen tayo pian natulongan tayon iyaplika to ray nanaaralan to? Pantongtongan tayoy taloran suggestion.

4. Panon tayon natulongan so iyaaralan ya tuloytuloy ya onaligwas anggad onkualipikan manpabautismo? (Nengnengen met so kahon ya “ Tulongan so Iyaaralan Mo Pian Nawalaan na Saray Goal tan Nagawaan To Iratan.”)

⁴ Tulongan moy iyaaralan mo ya nawalaan na goal. Akin et importante itan? Imanoen iyan ilustrasyon: No arawi so biahien mo, ompan labay moy man-stop over sagpaminsan diad mararakep iran lugar ya nadalan mo. Ta no ontan, aliwan makapabanal so manbiahe tan agmo isipen ya arawrawi ni. Mipara itan ed iyaligwas na iyaaralan. No wala ray goal to tan nagagawaan to iratan, diman to nalikna ya ag-arawi ya sikatoy nabautismoan. Usar moy kahon ya “Salim Iyan Gawaen” diad libron Panliketan so Bilay ya Anggapoy Anggaan! pian natulongan moy Bible study’m ya onaligwas. Kada nasumpal yo so sakey ya leksion, pantongtongan yo no panon ya makatulong so goal ya walad kahon pian niyaplika toy inaral yo. No walay iisipen mon arum ya goal ya makatulong ed sikato, isulat mo itan diad leksab na “Arum Ni.” Agyo lilingwanan ya pantongtongan iyan kahon pian nipurek mod Bible study’m no anto ray goal ya nagawaan ton tampol, pati saray goal ya kaukolan nin palabasen so panaon antis ton nagawaan.

5. Base ed Marcos 10:17-22, antoy imbaga nen Jesus a nepeg ya gawaen na samay mayaman ya laki, tan akin et imbaga to iman?

 ⁵ Tulongan mon manguman so iyaaralan mo. (Basaen so Marcos 10:17-22.) Amta nen Jesus ya aliwan mainomay parad samay mayaman ya laki ya ilako so amin ya kayarian to. (Mar. 10:23) Pero agnan-alangan si Jesus, diretsaan ton imbaga ed samay laki ya kaukolan ton umanen so kabibilay to. Akin ey? On ta ‘alikna nen Jesus so panangaro ed sikato.’ No maminsan, ompan manaalangan tayo ya ibaga ed Bible study tayo ya wala ray kaukolan ton umanen ta iisipen tayon mairap to ni itan ya gawaen. Tua, kaukolan so panaon pian say sakey et nalakseb to ray aliwliwan kagagawa tan ugali to, diad ontan et nisulong toy balon personalidad. (Col. 3:9, 10) Pero no agmo la pababayagen ya ibagad sikato iray kaukolan ton umanen, mas baleg so posibilidad ya manguman ya tampol. Sakey ni, diman to nanengneng ya walay malasakit mod sikato.—Sal. 141:5; Pro. 27:17.

6. Akin et importantin tepetan moy iyaaralan mo no antoy nibaga o opinyon tod aaralen yo?

⁶ Importante ya tepetan moy iyaaralan mo no antoy nibaga odino opinyon to ed topic ya aaralen yo. Ditan mo nanengneng no kasin natatalosan tan papanisiaan to iratan. No gagawaen mo itan ya lanang, mas mainomay mo lan itongtong ed sikato iray onsublay ya topic ya ompan mairap ton awaten. Wala ray tepet diad libron Panliketan so Bilay ya Anggapoy Anggaan! ya makatulong pian naamtaan moy iisipen na Bible study’m. Singa bilang, diad leksion 04 et oniay tepet: “Anto kasi nalikna nen Jehova no usaren o bitlaen moy ngaran to?” Diad leksion 09 et oniay tepet: “Anto ray labay mon ipikasi?” Ompan diad unaan et agmakaebat ya tampol so iyaaralan mo ed saratan ya tepet. Maabig no ipaimanom ed sikato iray teksto tan litrato ya walad libro pian natulongan mon manisip.

7. Panon tayon usaren so eksperiensya na arum pian napaseseg so Bible study tayo?

⁷ No natatalosan la na iyaaralan mo no antoy kaukolan ton umanen, istoryam o ipabantay mod sikato so eksperiensya na arum pian napaseseg. Singa bilang, no ngalngali agmakapiaral so Bible study’m, ipabantay moy video ya Inaro Ak nen Jehova ya nanengneng ed seksion ya “Diskobrien” diad leksion 14. Diad maslak ya leksion na libron Panliketan so Bilay ya Anggapoy Anggaan! et wala ray naromog mon eksperiensya diad seksion ya “Dakel Ni Naaralan Mo” odino diad “Diskobrien.” * Pero agmo ikokompara ed arum so Bible study’m tan ibagam ya, “No asarag to, di nasarag mo met.” Paulyan mo ya sikaton mismo so makaisip ed satan. Pantongtongan yo no antoy akatulong ed samay agi diad video pian niyaplika to ray bangat na Biblia. Ompan sarag mon ipaimano so teksto ya akatulong ed samay agi odino no antoy praktikal ya ginawa to. Anggad posible, say idanet mo et no panon ya tinulongan nen Jehova iman ya agi.

8. Panon tayon natulongan so iyaaralan tayo ya naaro toy Jehova?

⁸ Tulongan moy iyaaralan mo ya naaro toy Jehova. Panon? Lanang mon ipaimano ed sikato iray kualidad nen Jehova. Kaukolan ton natalosan ya si Jehova et maliket a Dios, ya akaparaan ya ontulong ed saray mangaaro ed Sikato. (1 Tim. 1:11; Heb. 11:6) Ipanengneng mod Bible study’m ya sikatoy inar-aro nen Jehova—maong so pansumpalan to no unoren to ray ganggan To. (Isa. 48:17, 18) No diman to mas naaaro si Aman Jehova, mas mainomay  to lan unoren iray ganggan to tan napakiwas ya manguman.—1 Juan 5:3.

9. Base ed Marcos 10:29, 30, antoy makatulong ed iyaaralan pian akaparaan ya mansakripisyo?

⁹ Pian onaligwas so iyaaralan anggad manpabautismo, wala ray kaukolan ton isakripisyo. Singa samay mayaman a laki ya abitla nen niman, ompan wala ray iyaaralan ya baleg so kaukolan dan isakripisyo. No say trabaho da et kontra ed saray prinsipyo na Biblia, ompan kaukolan day mananap na arum. Ontan met, ompan kaukolan dan pultoten so pikakaaro da ed saramay agmangaaro ed si Jehova. Wala met iramay intakwil na pamilya ra ta kabusol da iray Tasi. Amta nen Jesus ya baleg iratan ya sakripisyo tan aliwan mainomay. Pero insipan to ya siopaman ya mandesisyon ya ontumbok ed sikato et agto itan pagbabawian ta sikatoy nabendisyonan na maar-aron espiritual ya pamilya. (Basaen so Marcos 10:29, 30.) Antoy gawaen mo pian talagan nanengneng na Bible study’m ya tua itan ya sipan nen Jesus?

10. Antoy naaralan mo ed imbaga nen Manuel?

¹⁰ Kaaroen so iyaaralan mo. Importantin nalikna to ya imamalasakit mo. Akin? Imanoen so imbaga nen Manuel ya taga Mexico. Oniay nanonotan to nen iyaaralan ni na Biblia: “Antis kamin onggapo, kukumustaen to ak ni may mangiyaaral ed siak. Agak nababaingan ed sikato ta paulyanan to ak labat ya mangistorya. Sankaliknak ya walay malasakit tod siak.”

11. Antoy epekto ed iyaaralan mo no lanang mon nakakaiba?

¹¹ Singa si Jesus, nepeg ya walay panaon mo ya nakaiba iray iyaaralan mo. (Juan 3:22) Singa bilang, sarag mon imbitaan ed abung mo so progresibon Bible study’m pian mankape, mangan, odino manbantay kayoy JW Broadcasting®. Ontan met, no wala ray selebrasyon o holiday ya kontra ed Biblia ya selebraan na saray kapamilya o kakaaro to, seguradon naliketan no itagar mo ed abung yo. “Makakaaral  ak tungkol ed si Jehova aliwan legan labat na Bible study mi,” so kuan nen Kazibwe ya taga Uganda. “Dakel met so nanaaralan ko no kaibak imay mangiyaaral ed siak. Anengneng ko ya talagan inar-aro nen Jehova iray lingkor to tan malikeliket ira. Labay ko ya onman met so bilay ko.”

12. Akin et maabig no mangitagar tayoy nanduruman agagi no mangiyaral tayo?

¹² Mangitagar na nanduruman agagi no mangiyaral. Ompan no maminsan et iisipen tayon mas marakep no apasakey lay itagar tayon man-Bible study odino bukor tayo labat la pian aliwa lan maabala. Pero tandaan tayo ya mas natulongan so Bible study tayo no mangitagar tayoy nanduruman agagi. “Aliwan apasakey so paraan na panagbangat na saramay agagi ya itatagar to may angiyaral ed siak,” so kuan nen Dmitrii ya taga Moldova. “Kanian anengneng koy nanduruman anggulo na aaralen mi. Agak met la nababaingan nen first time koy akiaral ta dakel lay kabat kon agagi.”

13. Akin et importantin pasesegen so Bible study tayo ya miaral?

¹³ Paseseg moy iyaaralan mo ya miaral. Akin et importante itan? On ta ingganggan a mismo nen Jehova ya nepeg ya mantitipon iray lingkor to, tan parte itan na panagdayew tayo. (Heb. 10:24, 25) Sakey ni, saray agagi so espiritual ya pamilya tayo. Kanian diad aral, singa tayo walad sakey ya abung tan saniiba tayon mamangan na mananam iran putahe. Say iyatendi ed saray aral et sakey ed saray sankaimportantian ya gawaen na Bible study pian onaligwas anggad bautismo. Pero ompan aliwa itan ya mainomay parad sikato. Panon ya makatulong so libron Panliketan so Bilay ya Anggapoy Anggaan! pian napaseseg moy Bible study’m ya miaral, anggano wala ray makakaamper ed sikato?

14. Antoy gawaen tayo pian napaseseg tayoy Bible study tayo ya miaral?

¹⁴ Usar moy leksion 10 na libron Panliketan so Bilay ya Anggapoy Anggaan! pian napaseseg moy Bible study’m ya miaral. Antis ya akompleto iyan libro, impasali ed pigaran agagi so leksion 10, tan imbaga da ya akatulong itan pian miaral so Bible study da. Pero siempre, agmo la aalagaren ya nasabi yo ni so leksion 10 antis mon itagar ya miaral so Bible study’m. Imbitaan mo lan tampol, tan ipanonot mon lanang kada manaral kayo. Nandurumay probleman dadalanen na saray Bible study. Kanian nengneng mo no anton tulong so kaukolan na Bible study’m, tan manisip kay paraan no panon mon natulongan. Agka nadidismaya no agmakaatendi ya tampol. Anosan mo labat tan agka onsasawan mangimbita.

15. Anto ray nayarin pakakatakotan na saray iyaaralan tayo?

¹⁵ Kasin natatakot ka met nensaman ya magmaliw ya Tasi? Ompan natatakot kan manpulong ed kaabungan odino mapaga ka ya busolen ka na saray kapamilyam o kakaarom. No ontan so dinalan mo, seguradon natalosan mo ray pakakatakotan na Bible study’m. Imbaga nen Jesus ya posiblin nalikna itan na saray patumbok to. Pero pinaseseg to ra ya ag-ira manpapadaeg ed takot da, ta no andi, ontunda la ran manlingkor ed si Jehova. (Mat. 10:16, 17, 27, 28) Panon ya tinulongan nen Jesus iray papatumbok to pian nalabanan da ray pakakatakotan da? Tan antoy gawaen mo pian naalig moy alimbawa to?

16. Panon tayon ipasal ya manpulong so iyaaralan tayo?

¹⁶ Ipasal mon manpulong so iyaaralan mo. Seguro mannerbiyos met iray disipulo nen Jesus nen imbaki to ran manpulong, pero seguradon  binmiskeg so liknaan da nen imbaga nen Jesus no siopa ray pulongan da tan no antoy ipulong da. (Mat. 10:5-7) Panon mon naalig si Jesus? Tepetan moy iyaaralan mo no siopa ray labay ton pulongan. Singa bilang, tepetan mo, ‘Siopay iisipen mo ya antam ya makatulong ed sikato yay inaral ta?’ Insan mo tulongan ya iparaan no antoy ibaga to pian nipulong to itan diad simplin paraan. No posible, manpraktis kayo tan usar yo imay walad “Ibabaga na Arum” tan “No Itepet na Arum” ed libron Panliketan so Bilay ya Anggapoy Anggaan! Kada no manpraktis kayo, ipasal moy iyaaralan mo ya usaren toy Biblia no onebat, tan gawaen to itan diad simpli tan marespeton paraan.

17. Panon ya makatulong so Mateo 10:19, 20, 29-31 pian napaseseg tayoy iyaaralan tayo ya manmatalek ed si Jehova?

¹⁷ Tulongan moy iyaaralan mo ya manmatalek ed si Jehova. Impaseguro nen Jesus ed saray disipulo to ya tulongan ira nen Jehova ta inar-aro To ra. (Basaen so Mateo 10:19, 20, 29-31.) Ipasegurom ed iyaaralan mo ya sikatoy tulongan met nen Jehova. Kada no manaral kayo, ipilam ed pikakasim iray goal to pian naibangat mon manmatalek ed si Jehova. “Kada no manaral kami, kaiban naynay ed pikakasi na samay angiyaral ed siak iray goal ko,” so kuan nen Franciszek ya taga Poland. “Nen anengneng ko ya inebatan nen Aman Jehova iray pikakasi to, nampikasi ak met lad si Jehova. Nen balo ak nid trabahok, impikasik ya tulongan ak nen Jehova diad pampatanir ko ya kaukolan koy day off pian makaatendi ak ed saray aral tan kombension tayo, tan inebatan itan nen Aman Jehova.”

18. Antoy nalilikna nen Jehova ed pansasagpot tayon mangiyaral na Biblia?

¹⁸ Inar-aro nen Jehova iray Bible study tayo. Tan inar-aro to tayo met, ta amta toy pansasagpot tayon tulongan iray Bible study tayo ya mikaaro ed sikato. (Isa. 52:7) No bilang anggapo ni iyaaralan mo natan, natulongan mo nin siansia iray Bible study ya onaligwas anggad manpabautismo ira no mila ka ed saray agagi ya walay iyaaralan da.