1. Antoy naaralan tayod samay insulat nen Arin Solomon diad Eclesiastes 7:20?

 INSULAT nen Arin Solomon: “Anggapoy matunong a too diad dalin a naynay a manggagaway maong tan agbalot mankakasalanan.” (Ecl. 7:20) Tua itan ta mankakasalanan itayon amin. (1 Juan 1:8) Kanian kakkaukolan tayoy panamerdona na Dios tan saray kapara tayon totoo.

2. Antoy naliknam no perdonaen ka na malet ya kaarom anggano asakitan mo?

² Kasin asalim la ya asakitan moy malet ya kaarom? Seguro, agka makaugip ta labay mo lan ompawil so datin ulopan yo, kanian kinatongtong mo tan nan-sorry ka. Antoy aliknam ey nen pinerdona to ka? Seguradon akainawa ka tan malikeliket ka.

3. Antoy aralen tayo ed sayan artikulo?

³ Si Jehova so Best Friend tayo. Pero no maminsan, nasasakitan tayoy Jehova ed saray gagawaen o ibabaga tayo. No ontan so nagawa, akin et segurado tayo ya akaparaan ya mamerdona si Jehova? Antoy pandumaan na panamerdona nen Jehova tan panamerdona na too? Tan siopa ray peperdonaen nen Jehova?

4. Akin et segurado tayo ya akaparaan ya mamerdona si Jehova?

⁴ Ipapaseguro na Biblia ya akaparaan ya mamerdona si Jehova. Nen indeskribe nen Jehova so sarili to ed si Moises diad Palandey Sinai, oniay imbaga To panamegley na sakey ya anghel: “Jehova, Jehova, a Dios a mapangasi tan maabagey,  matantan a manpasnok tan abalbaleg ed matoor a panangaro tan katuaan, a mangipapatnag na matoor a panangaro ed saray nilibo, mameperdona na impakalingo, impakasumlang, tan kasalanan.” (Exo. 34:6, 7) On, maomaong tan makasi ya Dios si Jehova tan lanang ya akaparaan ya mamerdona ed saray magbabawin nankasalanan.—Neh. 9:17; Sal. 86:15.

5. Base ed Salmo 103:13, 14, antoy gagawaen nen Jehova lapud kabkabat to itayo?

⁵ Kabkabat itayo nen Jehova lapud sikato so Amalsa ed sikatayo. Diad tua, kabisado to so amin ya detalye na kada too ed sayan mundo. (Sal. 139:15-17) Amta to no anto ray ag-inkaperpekto ya atawir tayo ed atateng tayo. Amta to ingen so amin ya agawa ed bilay tayo tan no antoy epekto na saratan ed inkatoo tayo. Lapud kabkabat itayo nen Jehova tan ikokonsidera toy amin ya detalye ed bilay tayo, papanengnengan to tayoy panangasi.—Sal. 78:39; basaen so Salmo 103:13, 14.

6. Antoy ginawa nen Jehova ya prueba ya talagan sikatoy akaparaan ya mamerdona?

⁶ Walay ginawa nen Jehova ya prueba ya talagan sikatoy akaparaan ya mamerdona. Nen nankasalanan so inmunan ateng tayo ya si Adan, amta nen Jehova ya amin tayo et magmaliw ya aripen na kasalanan tan patey. (Roma 5:12) Anggapoy too ya naibulos toy sarili to odino say kapara ton too ed satan ya dusa. (Sal. 49:7-9) Pero lapud maar-aro tan makasi so Dios, sikato lay nanggawa na paraan pian naibulos tayod kasalanan tan patey. Ibabaga na Juan 3:16 ya imbaki toy alenleneg ya Anak to pian nadondon tayo. (Mat. 20:28; Roma 5:19) Inako nen Jesus so dusa ya para komon ed sikatayo. Ginawa to itan pian amin ya mangipanengneng na pananisia ed sikato et naibulos ed ipapatey. (Heb. 2:9) Seguradon ansakisakit ed si Jehova ya nanengneng toy inar-aro ton Anak ya manpapanabos ed panamairapan a poste ya anggad inatey. Isip mo pa: No agto tayo labay ya perdonaen nen Jehova, ibaki to ni kasi so Anak to ya ompatey parad sikatayo?

7. Diad Biblia, siopa ray nanonotan mon mabulbulos ya pinerdona nen Jehova?

⁷ Dakdakel so nabasa tayod Biblia ya mabulbulos a pinerdona nen Jehova. (Efe. 4:32) Siopa ray nanonotan mo? Seguro si Arin Manases. Grabe iray kasalanan ya ginawa to.  Indaulo toy pandayew ed dios na saray pagano. Pinatey to ray mismon ananak to lapud imbagat to ra ed saray dios-diosan. Angiyan ni ingen na imahen diad loob na sagradon templo nen Jehova! Oniay impandeskribe na Biblia ed ginawa to: “Alablabas so ginawa ton kaugsan diad pakanengneng nen Jehova, a sinakitan toy liknaan To.” (2 Awa. 33:2-7) Balet nen impapuson nagbabawi si Manases, sikatoy mabulbulos ya pinerdona nen Jehova. Impawil to ni ingen ed posisyon to bilang ari. (2 Awa. 33:12, 13) Tan seguro, say sakey nin naisip mo et si Arin David. Grabe met iray ginawa ton kasalanan. Sikatoy akirelasyon ed si Bat-sheba tan impapatey toy Urias. Balet nen impatua nen David iray kasalanan to tan nagbabawi, pinerdona nen Aman Jehova. (2 Sam. 12:9, 10, 13, 14) On, talagan akaparaan ya mamerdona si Jehova. Tan singa pantongtongan tayo ed ontutumbok iran parapo, say panamerdona nen Jehova et duma ed panamerdona na too.

8. Anton klase na Ukom si Jehova, tan antoy epekto na satan ed panamerdona to?

⁸ Si Jehova so “Ukom na interon dalin.” (Gen. 18:25) Nibagan marunong so sakey ya ukom o judge no kabisado to iray ganggan tan natatalosan ton maong iratan. Ontan ya ontan si Aman Jehova. Diad tua, sikatoy aliwa labat ya Ukom, sikato met so Manangiter na Ganggan. (Isa. 33:22) Sikato sirin so makaamta no anton talagay duga tan aliwa. Anto ni so dapat ya gawaen na sakey ya judge pian duga so pangukom to? Kaukolan ton amtaen so amin ya detalye na kaso antis ya mandesisyon. Nibaga tayo sirin ya si Jehova so sankarunongan ya Ukom ta amta to so amin ya nagagawa.

9. Anto ray amta nen Jehova ya makatulong diad pandesisyon to no kasin perdonaen toy sakey ya nankasalanan?

⁹ Duma si Jehova ed saray totoon judge ta amta to so amin ya detalye na anggan anton kaso. (Gen. 18:20, 21; Sal. 90:8) Say too ya judge et akadepende labat ed saray narerengel o nanenengneng ton impormasyon o ebidensya. Pero duma si Jehova. Ta no mankasalanan so sakey ya too, amta To no kasin epekto itan na atawir ton ugali na atateng to, impanugaw to, no iner binmaleg, tan no kasin walay sakit tod emosyon o isip. Nababasa met nen Jehova so puso, kanian amta to no akin ya onman so ginawa na sakey ya too. On, anggapon talagay niyamot tayo ed si Jehova. (Heb. 4:13) Kanian no pinerdona nen Jehova so sakey ya nankasalanan, agnakuestion so desisyon to lapud amta to so amin ya detalye.

10. Akin et segurado tayo ya lanang ya duga tan patas so panangukom nen Jehova? (Deuteronomio 32:4)

¹⁰ Makaseguro tayo ya lanang ya duga tan patas so desisyon nen Jehova. Anggapoy papanigan o papaboran to. No sikatoy mandedesisyon no kasin perdonaen to so sakey, agto itan ibabase ed itsura, kayamanan, pribilehyo, o abilidad na nankasalanan. (1 Sam. 16:7; Sant. 2:1-4) Anggapon balot so makataktakot ed si Jehova tan sikatoy agan balot nasuholan. (2 Awa. 19:7) Saray desisyon to et ag-akabase ed emosyon. (Exo. 34:7) Segurado tayo sirin ya lanang ya duga tan patas so panangukom nen Jehova lapud agnaparaan so pakatalos tan pakatebek to.—Basaen so Deuteronomio 32:4.

11. Akin et espisyal so panamerdona nen Jehova?

¹¹ Amta na saray nansulat ed Hebreon Kasulatan ya espisyal so panamerdona nen Jehova. Base ed sakey ya reperensya, angusar ira na Hebreon termino ya “ontutukoy labat ed  panamerdona na Dios, tan agdan balot itan inusar pian ideskribe so panamerdona na sakey ya too ed kapara ton too.” Akin kasi? On ta si Jehova labat so walaan na autoridad ya mangiter na kompleton panamerdona ed sakey ya magbabawin nankasalanan. Antoy nagawa no perdonaen nen Jehova so sakey ya too?

12-13. (a) Antoy nalikna na sakey no sikatoy pinerdona la nen Jehova? (b) Panon kabayag so bisa na panamerdona nen Jehova?

¹² No kombinsido itayo ya pinerdona itayo la nen Jehova, ibabaga na Biblia ya ‘makainawa’ tayo. Magmaliw ya mareen so nonot tayo tan nawalaan tayoy malinis ya konsiensia. Nalikna tayo labat itan no “si Jehova a mismo” so amerdona ed sikatayo. (Gawa 3:19) No pinerdona itayo la nen Jehova, ompawil ed dati so relasyon tayod sikato, tan say pantrato tod sikatayo et singa agtayo nankasalanan.

¹³ Sakey ni, aglan balot isumbat nen Jehova ed sikatayo so agawaan tayon kasalanan, tan agto tayo la dusaen lamet lapud satan. (Isa. 43:25; Jer. 31:34) Ibantak to ray kasalanan tayo “no panoy kaarawi na bubutayan na agew manlapud seselekan to.” * (Sal. 103:12) No isipen tayoy inka-espisyal na panamerdona nen Jehova, seguradon misalsalamat tan mandinayew tayo ed sikato. (Sal. 130:4) Pero say tepet, siopa ray peperdonaen nen Jehova?

14. Anto la ray naaralan tayo tungkol ed panamerdona nen Jehova?

¹⁴ Singa naaralan tayo lad inmuunan parapo, say panamerdona nen Jehova et ag-akadepende ed no kasin baleg o melag so kasalanan na sakey. Naaralan tayo met ya agtayo nakuestion so desisyon to ta sikato so Amalsa, Manangiter na Ganggan, tan sankarunongan ya Ukom. Pero anto ray ikokonsidera nen Jehova antis ya mamerdona?

15. Base ed Lucas 12:47, 48, antoy sakey ya ikokonsidera nen Jehova?

¹⁵ Say sakey ya ikokonsidera nen Jehova et no kasin amta na nankasalanan ya aliwa imay ginawa to. Atan imay punto nen Jesus ya walad Lucas 12:47, 48. (Basaen.) No gagalaen  na sakey ya too so manggawa na mauges anggano amta to ya nasakitan toy Jehova, ambelat so kasalanan to. Kanian ompan sikatoy agperdonaen nen Jehova. (Mar. 3:29; Juan 9:41) Pero no maminsan, wala ni ran siansiay gagawaen tayo anggano amta tayon mauges iratan. Kasin naperdona itayo ni nen Jehova? On, ta wala ni sakey ya ikokonsidera to.

16. Anto so panagbabawi, tan akin et importante itan pian perdonaen itayo nen Jehova?

¹⁶ Say sakey nin ikokonsidera nen Aman Jehova et no kasin impapuso so pagbabawi na nankasalanan. Antoy labay ya ibaga na panagbabawi? Say panagbabawi et ontutukoy ed panguman na isip, ugali, o direksion na bilay. Kaiba ed satan so pakalikna na graben ermen tan pakakakonsiensia lapud antam ya mauges so ginawam o agmo agawaan so duga. No say sakey et talagan magbabawi, agto labat panermenan ya akapanggawa na mauges, noagta panermenan to met ya kinmapuy so relasyon tod si Jehova kanian akapankasalanan. Anggano seryoson kasalanan so ginawa nen Arin Manases tan Arin David, pinerdona ira nen Jehova lapud anengneng to ya impapuso so impagbabawi ra. (1 Ara. 14:8) On, antis ya mamerdonay Jehova, dapat walay nanengneng ton ebidensya ya talagan magbabawi so nankasalanan. Kasin no panermenan tayoy kasalanan tayo et nibagan magbabawi tayo la? Andi. Dapat walay gawaen tayo. * Tan atan so sakey nin ikokonsidera nen Jehova.

17. Anto ray nepeg ya gawaen na sakey pian nagawaan toy panlabayan nen Jehova? Tan akin et importante itan pian agtayo la naulit iray kasalanan tayo? (Isaias 55:7)

¹⁷ Say sakey nin importantin ikokonsidera nen Jehova et no kasin intunda la na nankasalanan iray mauges ya kagagawa to tan gagawaen to la no antoy panlabayan nen Jehova. (Basaen so Isaias 55:7.) Pian nagawaan to itan, kaukolan ton pasimbaloen so panag-isip to tan manpaigiya ed kanonotan nen Jehova. (Roma 12:2; Efe. 4:23) Dapat desidido pian agto la napawil iray datin kagagawa to. (Col. 3:7-10) Siempre, say manunan basiyan nen  Jehova diad pamerdona to et no kasin talagan manisia tayo ed dondon bagat nen Kristo. Perdonaen tan linisan to tayo ed saray kasalanan tayo base ed satan ya dondon bagat no nanengneng to ya talagan gagawaen tayoy anggaay nayarian tayon umanen so kabibilay tayo.—1 Juan 1:7.

18. Anto ray naaralan tayo tungkol ed panamerdona nen Jehova?

¹⁸ Rebyuen tayo pan magano so pigaran importantin punto ya naaralan tayo. Diad interon uniberso, anggapoy makapipara ed panamerdona nen Jehova. Akin et nibaga tayo itan? Unona, sikatoy lanang ya akaparaan ya mamerdona. Komadua, amta toy amin ya detalye tungkol ed sikatayo. Kabkabat to itayo tan sikato so talagan makaamta no say sakey et tuan magbabawi. Tan komatlo, no mameperdona si Jehova, singa to buburalen so ginawa tayon kasalanan kanian singa ag-itayo nankasalanan. Lapud satan, malinis so konsiensia tayo tan walad sikatayoy pabor na Dios.

19. Akin et walay rason tayon manliket anggano aliwa tayon perpekto tan makakagawa tayo nin siansiay kasalanan?

¹⁹ Siempre, lapud aliwa tayo nin perpekto, walan-walay nagawaan tayon kasalanan. Balet walay makapaseseg ya ibabaga na Kaunawaan sa Kasulatan, Tomo 2, pahina 712: “Lapud mapangasi si Jehova, ikokonsidera toy kakapuyan na saray lingkor to. Kanian ag-ira nepeg ya tuloytuloy ya nakokonsiensia ed saray lingo ra ya resulta na atawir dan kasalanan. (Sal 103:8-14; 130:3) Basta gagawaen day anggaay nayarian dan unoren so Dios, walay rason dan magmaliw ya maliket. (Fil 4:4-6; 1Jn 3:19-22).” Talagan makapalemew itan na liknaan!

20. Antoy aralen tayo ed onsublay ya artikulo?

²⁰ Misalsalamat tayo ta akaparaan ya mamerdona si Jehova no talagan pagbabawian tayo iray agawaan tayon kasalanan. Panon tayo balet ya naalig so panamerdona nen Jehova? Anto ray pamparehoan tan pandumaan na panamerdona tayo ran totoo ed panamerdona nen Jehova? Tan akin et importantin naamtaan tayo itan? Naebatan iratan ya tepet diad onsublay ya artikulo.