1. Antoy ipapaseguro nen Jehova ed saray magbabawin nankasalanan?

 SI Jehova so Amalsa ed sikatayo. Sikato met so Manangiter na Ganggan, tan Ukom. Pero nabasa met ed Biblia ya sikato so maar-aron Ama tayo ed tawen. (Sal. 100:3; Isa. 33:22) No bilang ta akagawa tayoy kasalanan pero pagbabawian tayo itan, sarag to tayon perdonaen. Tan diad tua, labalabay to tayon perdonaen. (Sal. 86:5) Oniay impaisulat to ed si propetan Isaias: “Anggano saray kasalanan yo et ambalbalanga, napaputi iratan a singa niebe.”—Isa. 1:18.

2. Antoy nepeg tayon gawaen pian agnaderal so relasyon tayod arum?

² Lapud aliwa itayon perpekto, walan-walay naibaga o nagawaan na arum ya makasakit ed sikatayo. (Sant. 3:2) Pero agnaderal so relasyon tayod sikara no aralen tayoy mamerdona. (Pro. 17:9; 19:11; Mat. 18:21, 22) No asakitan tayo ed imbaga o ginawa na arum, labay nen Jehova ya mamerdona tayo. Ontan so labay ton gawaen tayo lapud sikaton mismo et mabulos a mameperdona. (Col. 3:13) Diad tua, “baleg so panamerdona to.”—Isa. 55:7.

3. Antoy aralen tayo ed sayan artikulo?

³ Aralen tayo ed sayan artikulo no panon tayon naalig so panamerdona nen Jehova anggano ag-itayo perpekto. Ebatan tayo irayan tepet: Anto ran kasalanan so nepeg tayon ipaamta ed saray elder? Akin et labay nen Jehova ya mamerdona tayo? Tan antoy naaralan tayo ed saray agagi ya amerdona anggano naagrabiado tan asakitan iran maong ed ginawa na arum?

4. (a) Antoy nepeg ya gawaen na sakey ya Kristiano no akagaway seryoson kasalanan? (b) Antoy responsabilidad na saray elder no katongtongen da la imay akagawa na seryoson kasalanan?

⁴ No walay akagawa na seryoson kasalanan, nepeg itan ya naamtaan na saray elder. Nabasa ed 1 Corinto 6:9, 10 so pigaran alimbawa na ontan iran kasalanan. Ambelat iratan ya kasalanan lapud kontran talaga iratan ed ganggan na Dios. No say sakey ya Kristiano et akagawa na seryoson kasalanan, nepeg ton ipatua itan ed si Jehova tan nepeg ton ipaamta ed saray elder. (Sal. 32:5; Sant. 5:14) Antoy responsabilidad na saray elder? Tua ya si Jehova labat so walaan na autoridad ya mangiter na kompleton panamerdona ed sakey ya nankasalanan, tan gawaen to itan base ed dondon bagat nen Jesus. * Pero inter nen Jehova ed saray elder so responsabilidad ya amtaen base ed Biblia no kasin kaukolan ya ekalen ed kongregasyon so nankasalanan. (1 Cor. 5:12) Pian nagawaan da itan, nia ray pigaran tepet ya kaukolan dan ikonsidera: Kasin ginagala toy mankasalanan? Kasin implano to itan ya gawaen tan inyamot to? Kasin abayag tan paulit-ulit to itan ya ginawa? Say sankaimportantian, wala kasi pakanengnengan ya talagan impapuson magbabawi tan pinerdona la nen Jehova?—Gawa 3:19.

5. Antoy maabig ya epekto na pitongtong na saray elder ed sakey ya nankasalanan?

⁵ Diad pitongtong na saray elder ed sakey ya akagaway kasalanan, seguroen da ya say desisyon da diad dalin et pareho ed no antoy desisyon ed tawen. (Mat. 18:18) Akin et parad pankaabigan na kongregasyon iya? Lapud sayan uksoyan et naseguro ya naekal ed kongregasyon iray agmagbabawin nankasalanan tan naprotektaan iray mabmablin karnero nen Jehova. (1 Cor. 5:6, 7, 11-13; Tito 3:10, 11) Ompan makatulong met itan pian napakiwas ya magbabawi imay nankasalanan tan awaten toy panamerdona nen Jehova. (Luc. 5:32) Ipikasi na saray elder imay magbabawin nankasalanan, tan kerewen dad si Jehova ya tulongan To komon ya onabig ed espiritual.—Sant. 5:15.

6. No say sakey et adispelo, kasin naperdona ni nen Jehova? Ipaliwawa.

⁶ Panon to no diad pitongtong na saray elder ed samay nankasalanan et anengneng da ya agmagbabawi? No ontan, sikatoy nadispelo. No bilang ta walay alabag ton batas na gobierno, sikatoy ag-iyagel na saray elder. Inikdan nen Jehova na autoridad iray gobierno ya mangipataw na sentensia tan dusa ed siopaman ya ag-onunor ed batas da, balanglan magbabawi odino andi. (Roma 13:4) Pero no diad ilabas na panaon et pagbabawian toy ginawa to tan manguman, sikatoy mabulos ya perdonaen nen Jehova. (Luc. 15:17-24) Perdonaen nen Jehova itan ya too anggan panon kabelat so kasalanan to.—2 Awa. 33:9, 12, 13; 1 Tim. 1:15.

7. Akin et nibagan sarag tayo met ya perdonaen so sakey ya akagaway kasalanan ed sikatayo?

⁷ Maong labat ta aliwan sikatayo so mandesisyon no kasin say sakey ya nankasalanan et perdonaen nen Jehova o andi. Pero walay kaukolan tayo met ya desisyonan. Wala ray situasyon ya sikatayon mismo so abiktima tan naagrabiado lapud kasalanan ya ginawa na sakey ya too. No bilang ta onkerew na perdona, kasin perdonaen tayo anggano seryoson kasalanan so ginawa to? Panon to balet no ag-onkerew na perdona? Sarag tayo nin siansia ya perdonaen. Nagawaan tayo itan no ag-itayo la manem-em na sakit na linawa ed  sikato. Pero diad tua, aliwa itan ya mainomay a gawaen tan kaukolan ya palabasen so panaon, lalo la no asakitan tayon maong. Marakep imay imbaga na sakey ya artikulo ed Say Panag-bantayan ya Setyembre 15, 1994. Indanet ed sayan artikulo ya no mamerdona tayo, agto labay ya ibaga ya kokonsintien tayo imay nankasalanan. Imbes, ipapalima tayo lad si Jehova iray bengatla. Sikato so sankarunongan ya Ukom ed interon uniberso, tan seguroen to ya naawat tayo lanlamang so hustisya diad dugan panaon. Akin et labay nen Jehova ya mamerdona tayo tan ipalima tayo lad sikato so pangiter na hustisya?

8. Antoy epekto ed sikatayo no talagan papablien tayoy panangasi nen Jehova?

⁸ No mamerdona tayo, pakapatnagan itan ya papablien tayoy panangasi nen Jehova. Diad sakey ya ilustrasyon nen Jesus, inkompara toy Jehova ed sakey ya ari ya agto la impabayaran so balbaleg ya utang na aripen to lapud aglan talaga makabayar. Pero sayan aripen et agto kinasian so kapara ton aripen ya akautang ed sikato na melag. (Mat. 18:23-35) Antoy naaralan tayod sayan ilustrasyon? Amin tayo et papanengnengan nen Jehova na panangasi. No talagan papablien tayoy panangasi nen Jehova, dapat kasian tan perdonaen tayo met so arum. (Sal. 103:9) Oniay imbaga na The Watchtower pigaran dekada lay apalabas: “Anggano paulit-ulit tayo nin perdonaen so kapara tayon too, agtayon balot napantayan so panamerdona tan panangasi na Dios ed sikatayo ya iiter to base ed dondon bagat nen Kristo.”

9. Siopay papanengnengan nen Jehova na panangasi? (Mateo 6:14, 15)

⁹ Naperdona iramay amta ray mamerdona. Say papanengnengan labat nen Jehova na panangasi et saramay mapangasi. (Mat. 5:7; Sant. 2:13) Indanet itan nen Jesus nen imbangat to ray disipulo to ya manpikasi. (Basaen so Mateo 6:14, 15.) Diad libron Job, walay espisipikon impagawa nen Jehova ed si Job ya pakapatnagan ya talagan importante ed Sikato so panamerdona. Asakisakitan si Job ed saray imbaga nen Elifaz, Bildad, tan Zofar. Pero ingganggan nen Jehova si Job ya ipikasi to ran talo. Inunor itan nen Job. Lapud kinasian to ra, sikatoy benendisyonan nen Jehova.—Job 42:8-10.

10. Akin et sikatayo lanlamang so kaskasian no agtayo mamerdona? (Efeso 4:31, 32)

¹⁰ Sikatayo lanlamang so kaskasian no agtayo mamerdona. Labay nen Jehova ya ekalen tayod puso tayo so sakit na linawa pian nainawaan tayo. (Basaen so Efeso 4:31, 32.) Bibilinen to tayo ya ‘tundaan tayo lay manpasnok tan paliisan tayoy onsanok.’ (Sal. 37:8) Parad pankaabigan tayo lanlamang itan ya bilin. Ta no agtayo itan gawaen, ag-ondeen so nonot tayo tan naapektoan met lay laman tayo. (Pro. 14:30) No maneem-em kay sakit na linawa, say antam et makakabawi ka ed samay toon babarongan mo, pero diad tua et andi. Singa ka oniinum na samal ya say iisipen mon ompatey et sikato. Kanian anggapoy maabig ya resulta no manem-em kay sakit na linawa. Tandaan mo ya parad pankamaongan mo lanlamang no mamerdona ka. (Pro. 11:17) Ondeen so nonot tan pusom, tan agka ontabang ed panaglingkor mod si Jehova.

11. Antoy ibabaga na Biblia tungkol ed ibawi? (Roma 12:19-21)

¹¹ Si Jehova so makanepegan ya ombales. Agto itayo inikdan na autoridad ya ombawi no walay nankasalanan ed sikatayo. (Basaen  so Roma 12:19-21.) Lapud agtayo perpekto, limitado so pakatalos tayo, aliwan singa si Jehova ya amta toy amin ya nagagawa kanian lanang ya patas so panangukom to. (Heb. 4:13) Tan no maminsan, mimila so emosyon tayo kanian aliwa iray desisyon tayo. Oniay impaisulat nen Jehova ed si Santiago: “No say too et manpapasnok, agto nipatnag so inkatunong na Dios.” (Sant. 1:20) Makaseguro tayo ya no si Jehova so ombales, duga so pangukom to tan talagan iter toy hustisya.

12. Panon tayon nipanengneng ya baleg so tiwala tayo ya iter nen Jehova so hustisya?

¹² Labay nen Jehova ya mantiwala tayo ya iter toy hustisya. No ipalima tayo lad si Jehova so amin a bengatla, ipapanengneng tayo ya baleg so tiwala tayo ya sarasarag ton buralen so amin ya epekto na kasalanan. Insipan to ya diad balon mundo, “agla nanonotan iray apalabas a bengatla tan agla iratan mansiansia ed puso.” On, paabigen to so amin ya sugat ed puso tayo. (Isa. 65:17) Pero panon to no asakisakitan tayo ed ginawa na sakey a too? Talaga kasin sarag tayon perdonaen tan lingwanan lay ginawa to? On, sarag tayo! Nengnengen tayo pa no panon itan ya agawaan na saray agagi tayo.

13-14. Antoy naaralan mo ed impamerdona nen Tony ed si Jose?

¹³ Dakel ya agagi tayo so mabulos ya amerdona anggano asakisakitan ira ed ginawa na arum. Antoy maabig ya epekto ed sikara nen amerdona ira?

¹⁴ Imanoen so eksperiensya nen Tony * ya taga Pilipinas. Nen aliwa nin Tasi si Tony, say kuya to et pinatey na sakey ya laki ya say ngaran to et Jose. Masibesibeg ya too si Tony kanian labay toy ombawi. Naaresto tan apriso si Jose lapud krimen ya ginawa to. Kalabas na pigaran taon, nibulos ed prisoan si Jose. Nen naamtaan nen Tony, labay ton tugisen tan pateyen kanian angaliw na paltog. Pero naiyaralan na saray Tasi si Tony. Oniay imbaga to: “Naamtaan kod panaaral ko ya kaukolan kon umanen iray aliwliwan ugalik tan kagagawak, tan kaukolan kon ekalen so sanok diad pusok.” Asabi panaon ya abautismoan si Tony, tan diad inlabas na saray taon et  nagmaliw ya elder. Imadyin mo pay alikna to nen naamtaan ton nan-Tasi met manayay Jose! Nen akapannengneng ira, nilakap day sakey tan sakey! Tan imbaga nen Tony ed si Jose ya aperdona to la. Antoy alikna nen Tony? Agaylay liket to! Diad tua, imbaga to ya agto anggan nadeskribe ed salita so liket ya alikna to. Benendisyonan nen Jehova si Tony ta sikatoy mabulos ya amerdona.

15-16. Antoy naaralan mo ed impamerdona nen Peter tan Sue?

¹⁵ Nen 1985, legan ya walad aral si Peter tan Sue, walay biglan sinmabog ed Kingdom Hall. Wala manayay angitanem na bomba. Apuroan ya maong si Sister Sue, tan naapektoan so pakanengneng tan pakadngel to. Abalang met so pakasingob to. * Say kuan dad sarili da, ‘Siopa kasi nanggawa ed saya, akin et nitepel ton gawaen iya?’ Kalabas na dakel ya taon, amay laki ya angitanem na bomba ya aliwan Tasi nen Jehova et naaresto tan asentensiaan ya napriso legay bilay. Nen atepetan si Peter tan Sue no kasin aperdona da la iyan laki, oniay imbaga ra: “Ibabangat itayo nen Jehova ya agtayo dapat maneem-em na sanok tan sakit na linawa. Ta no andi, naapektoan so laman, emosyon, tan isip tayo. Kanian kayari na saman ya agawa, impikasi min tampol ed si Jehova ya tulongan to kamin mamerdona pian walay deen na nonot mi.”

¹⁶ Kasin agnairapan ya mamerdona si Peter tan Sue? Andi met. Oniay kuan nen Peter: “No maminsan, ompapawil so sakit na linawa mi, lalo la no nanairapan si Sue lapud saray injury to. Pero aliwan satan so pampopokusan mi, kanian nagunoyan et naandi lay sakit na linawa mi. Diad tua, no bilang ta onsabi so agew ya man-Tasi imay angitanem na bomba, sikatoy maliket min i-welcome. Naaralan mid sayan agawa ya parad pankaabigan tayo iray prinsipyo na Biblia. No iyaplika tayo iratan, nainawaan tayo. Sankanonot mi met ya andi bale ta asingsingger lan ekalen nen Jehova so amin ya aliwliwan epekto na saman ya agawa.”

17. Antoy naaralan mo ed impamerdona nen Myra?

 ¹⁷ Nen naamtaan nen Myra so katuaan, wala lay asawa to tan duara lay anak da. Ag-inawat na asawa to so katuaan. Tan kalabas na panaon et nambii tan tinaynan toy pamilya ra. Oniay imbaga nen Myra: “Nen tinaynan to ak nen asawak tan say duaran ananak mi, aliknak met imay alikna na saramay trinaidor na asawa da. Agak makapanisia tan maer-ermen ak. Ibabaing tan tetetelen koy sarilik. Talagan ansakisakit so linawak.” Anggano nan-divorce la ra, agbastabasta nakal so sakit ya nalilikna nen Myra. Oniay imbaga to: “Pigaran bulan ya maguloguloy isip ko. Tan alikas ko ya naapektoan lay relasyon kod si Jehova tan ed arum.” Imbaga nen Myra ya natan et anggapo lay sakit na linawa to ed samay datin asawa to. Imbaga to met ya komon et manlingkor met ed si Jehova. On, agla nampokus si Myra ed apalabas. Anggano single mother, apabaleg tod katuaan so duaran ananak to. Natan et malikeliket ya manlilingkor ed si Jehova kaibay ananak to tan say pamilya ra.

18. Bilang Sankatagyan ya Ukom, antoy seguradon gawaen nen Jehova?

¹⁸ Maong labat ta ag-inter nen Jehova ed sikatayo so autoridad ya mangukom ed kapara tayon too. Si Jehova so manggawa ed satan ta sikato so Sankatagyan ya Ukom. (Roma 14:10-12) Baleg so tiwala tayo ya say pangukom to et lanang ya akabase ed perpekton estandarte to. (Gen. 18:25; 1 Ara. 8:32) On, seguradon duga tan patas so pangukom nen Jehova.

19. Antoy nagawad arapen lapud perpekto so hustisya nen Jehova?

¹⁹ Labalabay tayo lan onsabi so panaon ya ekalen la nen Jehova so amin ya aliwliwan epekto na kasalanan tan patey. No nagawa la itan, onabig la so amin ya literal ya sugat tayo tan anggan saray sugat ed puso tayo. (Sal. 72:12-14; Apo. 21:3, 4) Agtayo la nanonotan iray aliwliwan agawa ed apalabas. Legan tayon aalagaren itan, misatsalamat tayod si Jehova lapud ibabangat to tayon mabulbulos ya mamerdona ya singa sikato.