AARALEN YA ARTIKULO 27
“Manilalo Kad si Jehova”
“Manilalo kad si Jehova; manpakpel ka tan pabiskeg moy linawam.”—SAL. 27:14.
KANSION 128 Mansungdo Anggad Anggaan
DIAD SAYAN ARTIKULO *
1. (a) Anton ilalo so inter nen Jehova ed sikatayo? (b) Antoy labay ya ibaga na “manilalo [ed] si Jehova”? (Nengnengen so “Kabaliksan na Salita.”)
BALIBALIN ilalo so inter nen Jehova ed amin ya mangaaro ed sikato. Asingsingger to lan ekalen so sakit, patey, tan amin ya sengegan na paneermen tayo. (Apo. 21:3, 4) Insipan to ya “saray mauyamo et tawiren day dalin” tan tulongan to ira ya gawaen itan ya Paraiso. (Sal. 37:9-11) No nagawa la itan, mas nakabkabat tan mas naar-aro tayoy Jehova. Talagan marakdakep itan ya ilalo! Pero akin et makapantiwala tayo ya talagan nagawa iratan? On ta no si Jehova so angisipan, tooren ton tooren! Kanian agtayo nadismaya no “manilalo [tayod] si Jehova.” * (Sal. 27:14) Nipanengneng tayo ya maniilalo tayo ed si Jehova no maanos tan malikeliket tayon alagaren so pakasumpal na gagala to.—Isa. 55:10, 11.
2. Antoy sakey ed saray sipan nen Jehova ya nagagawa la natan?
2 Dakdakel iray prueba ya talagan totooren nen Jehova iray sipan to. Imanoen tayo pa so sakey ya sipan nen Jehova ya nagagawa la natan diad makapakelkelaw ya paraan. Nabasa ed libron Apocalipsis ya diad panaon tayo et tiponen to iray totoo ya nanlapud amin ya nasyon, tribu, tan lenguahe, tan nankakasakey iran mandayew ed sikato. Sayan espisyal ya grupo et tinawag na Biblia ya “baleg ya ulop.” (Apo. 7:9, 10) Nagagawa la itan diad panaon tayo. Walay grupo na lalaki, bibii, tan ugugaw ya nandurumay lahi, lenguahe, tan situasyon dad bilay, pero sanaagi so turing dad sakey tan sakey. (Sal. 133:1; Juan 10:16) Makulikuli dan ipupulong so maong a balita ed siopaman ya labay toy ondengel. (Mat. 28:19, 20; Apo. 14:6, 7; 22:17) No kabiangan ka na baleg ya ulop, seguradon papablien mon maong so ilalo ya ipupulong mo.
3. Antoy labay nen Satanas ya nagawa?
3 Labay nen Satanas ya agka la manilalo ed si Jehova. Labay ton isipen mo ya agka inaro na Dios tan agto lanlamang tooren so sipan to. No napanisia to ka nen Satanas tan agka la manilalo ed si Jehova, onkapuy so liknaan mo tan ontabang ka met lan manlingkor ed Sikato. Ontan so ginawa na Diablo ed si Job. Dakel so ginawa ton pakana pian naekalan na ilalo si Job tan ontunda lan manlingkor ed si Jehova.
4. Antoy aralen tayo ed sayan artikulo? (Job 1:9-12)
4 Pantongtongan tayo ed sayan artikulo so nanduruman ginawa nen Satanas pian deralen so katooran nen Job. (Basaen so Job 1:9-12.) Insan tayo pantongtongan no antoy naaralan tayo ed alimbawa nen Job tan no akin ya importantin tandaan tayo ya inar-aro itayo nen Jehova tan talagan tooren toy sipan to.
DAKEL SO GINAWA NEN SATANAS PIAN NAEKALAN NA ILALO SI JOB
5-6. Anto ray biglan anguman ed bilay nen Job?
5 Maliket so bilay nen Job, aliwa labat ya lapud mayaman, noagta lapud kaaro to si Jehova tan maong so ulopan dan pamilya. (Job 1:1-5) Pero diad loob labat na sanagew, halos naandi so amin ya walad sikato. Apoolan tan atakew iray ayayep to. (Job 1:13-17) Insan inatey ya amin so samploran ananak to. Isip mo pa, no say ateng et inateyan na anggan sakey labat ya anak, ansakisakit itan. Kanian imadyin mo pay impakabigla tan sakit ya alikna nen Job tan say asawa to nen naamtaan dan inatey ya amin so ananak da. Agaylay ermen nen Job kanian dinmakmomo tan pinilat toy kawes to!—Job 1:18-20.
6 Insan say sinmublay ya ginawa nen Satanas, inikdan toy Job na makapabaing ya sakit. (Job 2:6-8; 7:5) Dati et respetado si Job ed lugar da tan sikato so kekerewan da na simbawa. (Job 31:18) Pero natan, iiwasan da la. Sikatoy inarawian na agagi to, tinaynan na kakaaro to, tan agla italtalek na saray mismon lingkor to!—Job 19:13, 14, 16.
Natatalosan na dakel ya Tasi natan so irap ya alikna nen Job nen dinmalan ed grabe iran subok (Nengnengen so parapo 7) *
7. (a) Siopay inisip nen Job ya nanlapuan na paniirap to, pero antoy agto ginawa? (b) Anton subok so posiblin dalanen na sakey ya Kristiano ya pareho ed nanengneng diad litrato?
7 Labay nen Satanas ya isipen nen Job ya si Jehova so nanlapuan na amin ya trahedyan dadalanen to. Singa bilang, nen saniiba ya mamangan ed saksakey ya abung so samploran ananak nen Job, angusar si Satanas na maksil ya dagem pian nageba itan ya abung. (Job 1:18, 19) Nampapelag met si Satanas na apoy “manlapud tawen” pian napoolan iray karnero tan managpastol nen Job. (Job 1:16) Nanlapud tagey imay apoy, pati samay maksil ya dagem, kanian inisip nen Job ya nanlapu iratan ed si Jehova. Say amta laingen nen Job, sikatoy dudusaen na Dios. Pero anggano onman so inisip to, sikatoy agbinmarong ed si Jehova. Say ninonot to la et say dakdakel ya bendisyon ya inter nen Jehova ed sikato nensaman. Imbaga to ya aliwan saray maong labat ya bengatla so awaten to manlapud Dios. Mabulos to met kuno ya awaten iray mauges ya bengatla. Kanian oniay imbaga to nin siansia: “Mantultuloy komon a narayew so ngaran nen Jehova.” (Job 1:20, 21; 2:10) Kanian anggano naandi ed si Job so kayamanan to, inatey iray ananak to, tan nansakit na grabe, sikatoy nansiansian matoor ed si Jehova. Pero agnin siansia tinundaan nen Satanas.
8. Antoy sinmublay ya ginawa nen Satanas ed si Job?
8 Angusar si Satanas na taloran lalaki pian ipalikna ed si Job ya anggapoy kana to. Kunwari et walay malasakit dad si Job. Pero nen pinasyar da, imbaga dad sikato ya dakdakel kunoy ginawa ton kaugsan kanian maniirap. (Job 22:5-9) Imbaga da met ya anggapoy gunggona na panggagawa toy kamaongan lapud ag-iratan kuno iimanoen na Dios. (Job 4:18; 22:2, 3; 25:4) Singa da ibabagad si Job ya sikatoy ag-inaro tan agtulongan na Dios, tan anggapoy kana na panmamatoor to. Anta pakaskasi la lanti situasyon to, onman ni imbagbaga ra. Say amta ra, naekalan lay ilalo si Job.
9. Akin et determinado si Job ya manmatoor ed si Jehova?
9 Imadyin mo pa iyan eksena: Akalespak ed dapol si Job tan agaylay panutot na saray sugat to. (Job 2:8) Maneermen nid saman lapud impatey na saray ananak to, tan ambelbelat so liknaan to lapud dinadalan ton subok. Insan natan, sikatoy aakusaan tan papaugesen na samay taloran lalaki! Antoy reaksion nen Job? Diad gapo, sikatoy ag-inmesel. (Job 2:13–3:1) Seguro, inisip da ya agmakasel si Job ta labay to lan ibeneg si Jehova. Pero alingo-lingo ra! Imadyin mo pay Job ya intangwa toy ulo to, insan oniay makpel ton imbaga ed samay taloran lalaki: “Anggad ompatey ak et agko ikbanan so integridad ko!” (Job 27:5) Akin et ontan la kabiskeg so pananisia nen Job? On ta nanilalo ed si Jehova. Amta to ya maar-aro so Dios kanian panampoten To lanlamang so paniirap to. Imbaga to ingen ya anggano ompatey, sikatoy bilayen lanlamang nen Jehova.—Job 14:13-15.
PANON TAYON NAALIG SI JOB?
10. Antoy naaralan tayo ed istoryay bilay nen Job?
10 Naaralan tayo ed istoryay bilay nen Job ya ag-itayo napilit nen Satanas ya taynan tayoy Jehova, tan nanenengneng nen Jehova so amin ya dadalanen tayo. Makatulong so naeksperiensya nen Job pian mas natalosan tayo iray nalalanor ya isyu. Pantongtongan tayo pa iray pigaran leksion ya naaralan tayo ed si Job.
11. Antoy ibabaga na Biblia ya nagawa no mabiskeg so tiwala tayod si Jehova? (Santiago 4:7)
11 Naaralan tayod alimbawa nen Job ya no mabiskeg so tiwala tayo ed si Jehova, naanosan tayo so anggan anton subok tan sarasarag tayon labanan si Satanas. No ontan so gawaen tayo, ipapaseguro na Biblia ya ibatikan itayo na Diablo.—Basaen so Santiago 4:7.
12. Panon ya akatulong ed si Job so ilalon kioli?
12 Dapat mabiskeg so pananisia tayo ya tua so ilalon kioli. Singa inaral ed imbeneg ya artikulo, uusaren nen Satanas so takot tayon ompatey pian agtayo la manmatoor ed si Jehova. Say amta nen Satanas, ibeneg la nen Job si Jehova no bilay to lay nalalanor. Pero alingo-lingoy Satanas! Anggano pakaskasi so situasyon nen Job tan singa asingger lay ipatey to, agton balot inikbanan so integridad o katooran to. Inanosan ton amin, ta amta ton maomaong ya Dios si Jehova. Tan kombinsidoy Job ya sikatoy tulongan na Dios pian nitepel to ray subok ya dadalanen to. Mabiskeg so pananisia to ya anggano ipatey to bilang so sakit to, andi bale ta sikatoy bilayen lanlamang na Dios diad arapen. On, talagan kombinsido si Job ya tua so ilalon kioli! No mabiskeg met so pananisia tayo ed ilalon kioli, agtayo natatakot ya ompatey, kanian manmatoor tayo anggan antoy nagawa.
13. Akin et importante ya amta tayo iray pakana ya inusar nen Satanas ed si Job?
13 Saramay pakana ya inusar nen Satanas ed si Job et sikato nin siansia so uusaren to natan, kanian dapat amta tayo no anto iratan. Imanoen iyan akusasyon nen Satanas: “Say too [aliwa labat ya si Job] et iter toy amin ya walad sikato parad bilay to.” (Job 2:4, 5) Singa ibabaga nen Satanas ya agtayon talaga inaroy Aman Jehova tan agtayo la manmatoor ed Sikato no bilay tayo lay nalalanor. Papapawayen met nen Satanas ya ag-itayo inaro na Dios tan anggapo lanlamang so gunggona na panlilingkor tayo ta agmet kuno iratan iimanoen nen Jehova. No tandaan tayo ya pakana iratan nen Satanas, agto tayo naloko.
14. Antoy maabig ya epekto ed sikatayo na saray subok? Mangiter na ilustrasyon.
14 Diad tua, no ondadalan tayo ed subok, diman tayo mas nakakabat so sarili tayo. Nen dinmalan si Job ed saray subok, anengneng to no anto ni ray papaaligwasen tod sarili to. Singa bilang, alikas to ya medyo atagey so pakanengneng tod sarili to kanian kaukolan toy manpaabeba. (Job 42:3) On, no walay subok, tandaan mo ya tsansam la itan pian mas nakabat moy sarilim. Oniay imbaga nen Brother Nikolay * ya walay graben sakit to tan impriso na gobierno: “Singa X-ray so prisoan, ta ditan mo nanengneng no anton talagay tuan inkatoom bilang Kristiano.” No amta tayo ray kakapuyan tayo, diman tayo mas napakiwas ya manggaway pananguman.
15. Siopay nepeg tayon dengelen, tan akin?
15 Si Jehova so nepeg tayon dengelen, aliwan saray kalaban. Ontan so ginawa nen Job. Dinengel ton maong si Jehova nen akitongtong ed sikato. Impaimano nen Jehova ed si Job iray nanduruman pinalsa, insan to tinepetan. Singa to ibabaga ed si Job ya, ‘Di ba, siak so nanggawa ed sarayan amin? No sarasarag ko irayan gawaen, di sarasarag ta ka met ya asikasoen. Agka mapaga, amtak so amin ya dinalan mo.’ Lapud satan, nampaabeba si Job tan lalo ton atalosan so kamaongan nen Jehova. Oniay kuan to: “Nadngelan ko lay nipaakar ed sika, balet natan et nanenengneng ta ka la.” (Job 42:5) Kasin imbaga itan nen Job ta dinmakep lay situasyon to? Andi. Diad tua, imbaga to itan legan ya akalespak ni ed dapol, manpapaotot ni ed karakel na pelsa to, tan maneermen ni ed impatey na ananak to. Pero ontan so imbaga to lapud aliklikna toy panangaro nen Aman Jehova.—Job 42:7, 8.
16. Base ed Isaias 49:15, 16, antoy nepeg tayon tandaan no ondadalan tayod subok?
16 Singa agawa ed si Job, dakel met natan so mangiinsulto ed sikatayo tan ipapalikna dan anggapoy kana tayo. Mauges so ibabaga ra tungkol ed sikatayo tan ed organisasyon tayo. (Mat. 5:11) Naaralan tayo ed istoryay bilay nen Job ya walay tiwala nen Jehova ya manmatoor tayo anggano ondadalan tayo ed saray subok. Tandaan tayo ya inar-aro to itayo tan agton balot paulyanan iramay maniilalo ed sikato. (Basaen so Isaias 49:15, 16.) Kanian no papaugesen itayo na saray kalaban, agtayo la iratan iimanoen. Ontan so ginawa na pamilya nen Brother James ya taga Turkey nen dinmalan ira ed saray graben subok. Oniay imbaga to: “No pinunuyan mi iray katilaan ya ikakayat na saray totoo tungkol ed saray Tasi, onkapuy so liknaan mi. Kanian say nampokusan mi et say ilalo tayo, tan nansiansia kamin aktibo ed panlilingkor mid si Jehova. Lapud satan, agnaandi so liket mi anggano dinmalan kamid subok.” On, aligen tayoy Job—si Jehova so dengelen tayo! Agtayo ompapayag ya pakapuyen na saray kalaban so pananisia tayo.
PABISKEGEN KA NA ILALO
Abendisyonan si Job lapud nanmatoor. Malikeliket iran sanasawa ed dakdakel ya bendisyon ya inter nen Jehova (Nengnengen so parapo 17) *
17. Antoy naaralan mo ed alimbawa na saray matoor ya lalaki tan bibii ya abitla ed Hebreo kapitulo 11?
17 Sakey labat si Job ed saray dakel ya lingkor nen Jehova ya nansiansian makpel tan matoor anggano dinmalan ira ed graben subok. Diad sulat nen apostol Pablo ed saray Hebreon Kristiano, binitla to so arum ed sarayan lingkor nen Jehova tan tinawag to ran “baleg a grupo na saray tasi.” (Heb. 12:1) Graben subok so dinadalan da, pero pinaneknekan da ya matoor ira ed si Jehova. (Heb. 11:36-40) Diad tua balet, agda anengneng so impakasumpal na amin ya sipan na Dios. Labay to kasin ibaga, asayang so impananos tan impanmatoor da? Andi. Segurado ira ya walad sikaray pabor nen Jehova, kanian baleg so tiwala ra ya nanengneng da lanlamang ya nasumpal iray sipan to diad arapen. (Heb. 11:4, 5) On, nanilalo irad si Jehova! Komon ta gawaen tayon inspirasyon so alimbawa ra pian determinado tayo met ya manilalo ed si Jehova.
18. Antoy determinasyon mo? (Hebreo 11:6)
18 Onuuges lan onuuges so situasyon na mundo. (2 Tim. 3:13) Nanduruman klase na subok tan problema so itutupak nen Satanas ed saray lingkor na Dios. Anggano anto ni tay subok ya onsabi, komon ta determinado tayon ag-ontunda ya manlingkor ed si Jehova, tan lanang tayon isipen ya “say paniilaloan tayo et mabilay a Dios.” (1 Tim. 4:10) Benendisyonan na Dios si Job ta nanmatoor. Prueba itan ya “si Jehova et maar-aro tan mapangasi.” (Sant. 5:11) Komon ta manmatoor tayo met ed si Jehova tan mantiwala tayo ya bendisyonan to “iramay masimoon a manaanap ed sikato.”—Basaen so Hebreo 11:6.
KANSION 150 Anapen so Dios Pian Niliktar
^ No subok so pantongtongan, seguro say nanonotan mon tampol et si Job. Antoy naaralan tayo ed sayan matoor ya lingkor na Dios? Say sakey ya leksion et ag-itayo napilit nen Satanas ya taynan tayoy Jehova. Naaralan tayo met ya sankanengneng nen Jehova so amin ya dadalanen tayo. Tan no panon ya benendisyonan nen Jehova si Job lapud nanmatoor, onsabi so panaon ya bendisyonan to itayo met tan ekalen ton amin so paniirap tayo. No kombinsido tayo ed satan, napakiwas tayo ya “manilalo [ed] si Jehova.”
^ KABALIKSAN NA SALITA: Say Hebreon salita ya impatalos ya “manilalo” et mankabaliksan na maliket ya panalagar o pantalaran ed pakagawa na saray sipan na Dios. Ipasabi to met so ideya ya baleg so tiwala tayo ed sikato.—Sal. 25:2, 3; 62:5.
^ Sinalatan so arum ya ngaran.
