DAKEL so makaamta ed samay akasulat ed Biblia ya impasak si Jesus ed sakey a poste diad pegley na duaran kriminal. (Mat. 27:35-38) Pero wala ray mangikuestion ed satan. Ibabaga ra ya imposiblin abuloyan na saray Romano ya iponpon so bangkay nen Jesus.—Mar. 15:42-46.

Agpanisiaan na arum ya naikdan ni na desentin ponpon so sakey ya impasak ed poste. Iisipen da ya imposible itan ta kriminal iray ipapasak ed poste. Diad magasin ya Smithsonian et impaliwawa na sakey a journalist ya si Ariel Sabar no akin ya ontan so papanisiaan na arum. Imbaga to: “Say ipapasak labat na saray Romano et saramay salot ed komunidad. Kanian wala ray eksperto ya mangibabagan imposible ya ompayag iray Romano ya naikdan iray desentin ponpon.” Diad tua et labalabay na saray Romano ya niiyan ed kababaingan iray kriminal, kanian maslak et agda la iyepas iray bangkay ed poste pian kanen la ditan na saray ayayep. No walay nakera, basta da labat ibuntok ed kawalaan na arum nin bangkay.

Balet walay adiskobre na saray arkeologo ya onsusuporta ed samay ibabaga na Biblia ya say bangkay nen Jesus et imponpon. Nen 1968, walay akotkot dan pukepukel na sakey a lakin impasak na saray Romano ed panaon ya wadiad dalin si Jesus. Akotkot da itan ed ponponan na sakey a Judion pamilya ya asingger ed Jerusalem. Akaiyan itan ed singa melag ya kaban ya pangikakargaan day pukel nensaman, tan walay pukel na mukor ya wadtan. Akapasak itan ed tabla, tan say pasak ya inusar et 4.5 inches so kabaleg to. “Say akan-mukor ed saya et sakey ya laki ya say ngaran to et Yehochanan,” so kuan nen Ariel Sabar. “Tan akatulong itan pian napatunayan ya posiblin tua imay ibabaga na Ebanghelyo ya say bangkay nen Jesus et imponpon.” Kanian “ipapanengneng na samay mukor nen Yehochanan ya diad panaon nen Jesus et ompapayag met iray Romano ya naikdan na desentin ponpon so sakey a Judio anggano sikatoy impasak.”

Nanduruma met so iisipen dan posisyon na impangipasak ed si Jesus base ed samay akotkot dan mukor nen Yehochanan. Balet say malinew, wala ray impasak ya kriminal ya naikdan na desentin ponpon tan aglabat basta imbantak so bangkay da. Papaneknekan na saray adiskobre na saray arkeologo ya duga imay ibabaga na Biblia ya say bangkay nen Jesus et imponpon.

Diad tua, impropesiya la nen Jehova ya say bangkay nen Jesus et iponpon ed lubok na sakey a toon mayaman. Tan siempre, no antoy imbaga na Dios, sikatoy nagawa.—Isa. 53:9; 55:11.