1-2. Base ed Salmo 25:14, antoy gawaen tayo no labay tayon nakaaro si Jehova?

 NO SIKAY natepetan, antoy aanapen mo ed sakey ya kaaro? Seguro, say labay mo et amay imamalasakit to ka tan wadtan ya lanang no kaukolan moy tulong to. Si Jehova ey, antoy aanapen to ed sakey ya kaaro? Ibabaga na pinagkateman teksto tayo ya labalabay nen Jehova ya kaaro iramay “ontatakot ed sikato.”​—Basaen so Salmo 25:14.

² Importante sirin ya walay takot tayod si Jehova, balanglan abayag tayo lan manlilingkor ed sikato o agano ni. Anto kasi koneksion na takot ed pikakaaro tayod si Jehova? Antoy labay ya ibaga na itakot ed Dios? Antoy gawaen tayo pian nalikna tayo itan ya takot? Antoy naaralan tayo ed si Obadias, ed Atagey ya Saserdoten si Jehoiada, tan ed si Arin Jehoas?

3. Diad anto ran situasyon ya nalikna tayoy takot, tan akin et proteksion itan ed sikatayo?

³ Wala ray situasyon ya maong so epekto na itakot ta makaiwas tayod peligro. Singa bilang, no walay bangin, agtayo onlad tambib ta antakot tayoy napelag. Agtayo bastabasta ombabasil ed karsada ta antakot tayoy naaksidente. Tan asikasoen tayoy panagsalita o kagagawa tayo ta antakot tayon nasakitan so liknaan na kaaro tayo. On, proteksion ed sikatayo so ontan ya klase na takot ta atan so manpakilos ed sikatayo ya mandesisyon na duga.

4. Anton klase na takot so labay nen Satanas ya nalikna tayo ed si Jehova?

⁴ Duman klase na takot so labay nen Satanas ya nalikna tayo ed si Jehova. Papapawayen nen Satanas ya si Jehova et maruksa, panlikliketan ton dusaen iray totoo, tan agtayo kunon balot napaliket so Dios anggan antoy gawaen tayo. (Job 4: 18, 19) Labay nen Satanas ya ontan so pakanengneng tayod si Jehova pian ontunda tayo lan mandayew ed tuan Dios. Pero ag-itayo naloko nen Satanas no amta tayo so labay ya ibaga na itakot ed si Jehova. Anto sirin itan?

5. Antoy labay ya ibaga na itakot ed Dios?

⁵ Say sakey ya too ya walay takot tod Dios et inar-aro toy Jehova kanian agto labay ya nasakitan. Alwaran toy kagagawa to ta amta to ya no manggawa na aliwa, naderal so pankakaaro da. Ontan so alikna nen Jesus. Ibabaga na Biblia ya “walay takot tod Dios.” (Heb. 5:7) Labay to kasin ibaga, mankebbiew tan natatakot si Jesus ed si Jehova? Andi. (Isa. 11:2, 3) Imbaga na Biblia ya walay takot tod Dios ta antakot ton napaermen so Ama to. Inar-aro toy Aman Jehova kanian lanang ton uunoren. (Juan 14:21, 31) Ontan met so nalilikna tayo ed si Jehova. Balbaleg so respeto tayo ed Dios ta agnaparaan so panangaro, karunongan, hustisya, tan pakapanyari to. Imamalasakit to tayon maong tan labalabay to tayon ibangat. No agtayo awaten so panangigiya to, sikatoy napaermen tayo. Pero no unoren tayoy bangat to, napaliket tayoy puso to.​—Sal. 78:41; Pro. 27:11.

6. Antoy sakey ya makatulong pian nalikna tayoy takot ed Dios? (Salmo 34:11)

⁶ Agnisipor ya walay takot tayod si Jehova. Wala ray nepeg tayon gawaen pian nalikna tayo itan. (Basaen so Salmo 34:11.) Say sakey ya makatulong et no obserbaan tan aralen tayo ray pinalsa na Dios. No ontan so gawaen tayo, lalo tayon natalosan so karunongan, pakapanyari, tan panangaro to kanian lalo tayon narespeto tan naar-aro. (Roma 1:20) Oniay imbaga nen Sister Adrienne: “No onnenengneng ak ed saray palsa nen Jehova, nabibilib ak ed karunongan to. Diman ko nari-realize ya amta to no antoy duga parad siak ta sikato so sankarunongan.” Kanian oniay adalepdep to: “No manggawa ak na aliwa, napabarong koy Aman Jehova. Agko labay ya nasakitan koy liknaan to ta sikato so nanlapuan na bilay ko.” Singa si Adrienne, anto kasi no diad loob na sakey simba et walay eskedyul mon obserbaan tan aralen so sakey ya pinalsa nen Jehova? No lanang mo itan ya gawaen, lalom ya narespeto tan naar-aro si Aman Jehova.​—Sal. 111:2, 3.

7. Akin et makatulong so pikakasi pian nalikna tayoy respeto tan takot ed si Jehova?

⁷ Makatulong met so lanang ya pampikasi pian nalikna tayoy respeto tan takot ed si Jehova. Akin ey? No lanang tayon manpipikasi, mas magmaliw ya tudtua si Jehova ed sikatayo. Kada no onkekerew tayo ed sikato na biskeg pian naanosan tayoy subok, nanonotan tayo ya anggapoy limitasyon na pakapanyari to. Kada no misasalamat tayo ed sikato ed impangiter toy dondon, nanonotan tayoy kabaleg na panangaro to ed sikatayo. Tan kada no mikakasi tayod si Jehova ya tulongan to tayod problema tayo, nanonotan tayo ya sikato so sankarunongan ed amin. No ontan so karga na saray pikakasi tayo, ombaleg so respeto tayod si Jehova. Tan mas desidido tayon gawaen so duga ta agtayo labay ya naderal so pikakaaro tayod sikato.

8. Antoy gawaen tayo pian agnaekal ed puso tayo so takot ed si Jehova?

⁸ Diad Biblia, wala ray maong tan mauges ya alimbawa. Impaisulat iratan nen Jehova pian pakaaralan tayo. Maabig no i-personal study tayo iratan ta ontulong itan pian agnaekal ed puso tayo so takot ed si Jehova. Pantongtongan tayo natan so duaran matoor ya lingkor nen Jehova​—si Obadias ya opisyal ed palasyo nen Arin Ahab tan say Atagey ya Saserdoten si Jehoiada. Insan tayo  pantongtongan no antoy naaralan tayo ed si Arin Jehoas na Juda, ya maong met ed gapo pero agnansiansian matoor ed si Jehova.

9. Anto ran kualidad so impanengneng nen Obadias lapud matakot ed Dios? (1 Arari 18:3, 12)

⁹ Nen first time ya abitla si Obadias b ed Biblia, oniay deskripsion ed sikato: “Si Obadias et tatakotan ton maong si Jehova.” (Basaen so 1 Arari 18:3, 12.) Anto ran kualidad so impanengneng to lapud matakot ed Dios? Sikatoy matua tan napantiwalaan, kanian sikato so apilin mangasikaso ed sankaabungan na ari. (Ikompara so Nehemias 7:2.) Say takot to met ed Dios so nampakilos ed sikato ya manpakpel. Akin et kaukolan toy manpakpel? On ta say amo to et si Arin Ahab. Mauge-uges iyan ari! “Diad pakanengneng nen Jehova, [sikatoy] mas mauges nen say amin ya [ararin] akaunad sikato.” (1 Ara. 16:30) Sankaruksaan met so asawa nen Ahab ya si Jezebel. Say dios na sayan bii et si Baal tan kabkabusol toy Jehova kanian sinali ton ekalen so dugan panagdayew ed Israel. Dakel ingen ya propeta nen Jehova so impapatey to. (1 Ara. 18:4) On, talagan mair-irap so situasyon nen panaon nen Obadias pero sikatoy makpel ya nandayew ed si Jehova.

10. Antoy patunay ya makmakpel si Obadias?

¹⁰ Antoy sakey ya patunay ya makmakpel si Obadias? Nen tutugisen nen Jezebel iray propeta na Dios, inyamot nen Obadias ed ungib so 100 ya propeta nen Jehova ya “tunggal 50, tan sinuplayan [to] ray tinapay tan danum.” (1 Ara. 18:13, 14) No naamtaan nen Jezebel so gagawaen nen Obadias, seguradon ipapatey to! Siempre, too met labat si Obadias tan agto labay so ompatey. Pero sikatoy akaparaan ya mangirisga ed bilay to ta inar-aro toy Jehova tan saray kapara ton lingkor na Dios.

11. Panon ya aaligen na saray lingkor nen Jehova natan so alimbawa nen Obadias? (Nengnengen met so litrato.)

¹¹ Dakel ya lingkor nen Jehova natan so manaayam ed bansa ya bawal so kimey tayo. Singa si Obadias, rerespetoen day gobierno, pero desidido iran ag-itunda so pandadayew dad si Jehova. (Mat. 22:21) Inar-aro tayo irayan makmakpel ya agagi! Matakot ira ed Dios,  kanian sikato so uunoren da imbes ya saray totoo. (Gawa 5:29) Katon anggano bawal so kimey tayo, itutuloy day manpulong tan miaral diad maingat ya paraan. (Mat. 10:16, 28) Sankanonot da so espiritualidad na agagi kanian seseguradoen da ya walay espiritual ya naakan da. Ontan so ginawa nen Brother Henri ya manaayam ed sakey ya bansa ed Africa. Nen imbawal so kimey tayo nensaman ed satan ya bansa, namboluntaryo si Henri ya sikato so mangibunog na literatura ed saray agagi. Insulat to: “Mabaing ak, kanian amtak ed sarilik ya agko man agawaan no anggapoy takot kod si Jehova. Akapampakpel ak ta mas antakot koy Dios nen say too.” Sika ey, no ibawal lay kimey ed lugar yo, kasin manpakpel ka tan gawaen mo met imay ginawa nen Henri? Sarasarag mon gawaen itan no walay takot mod Dios.

12. Antoy patunay ya matoor ed si Jehova so Atagey ya Saserdoten si Jehoiada tan si asawa to?

¹² Say Atagey ya Saserdoten si Jehoiada et matakot ed Dios. Atan so nampakilos ed sikaton manmatoor tan suportaan so dugan panagdayew. Lalon apatunayan so katooran tod si Jehova nen say trono ed Juda et sinamsam nen Atalia ya anak nen Jezebel. Antako-takot na saray totoo si Atalia ta maruksa. Nen inatey so anak to ya si Arin Ahazias, impapatey to so amin ya apo to ta labay to ya sikato so man-reyna! (2 Awa. 22:10, 11) Pero walay sakey ya ag-inatey​—si Jehoas, ya baby ni ed saman. Sikatoy intakas na asawa nen Jehoiada ya si Jehosabeat. Inyamot day Jehoas tan sikara lay amabaleg ed sikato. Lapud sayan ginawa ra, nantultuloy so pamilya nen David—​say pamilya ya panlapuan na arari ed Juda. Anggano masiken lay Jehoiada, sikatoy agtinmakot ed si Atalia tan nanmatoor ed si Jehova.​—Pro. 29:25.

13. Nen pitoy taon nen Jehoas, panon lamet ya pinatunayan nen Jehoiada ya sikatoy matoor ed si Jehova?

¹³ Nen pitoy taon nen Jehoas, pinatunayan lamet nen Jehoiada ya sikatoy matoor ed si Jehova. Walay ginawa ton plano. No maong so pansumpalan to yan plano, magmaliw ya ari si Jehoas, say makanepegan ya manuley ed Juda ta apo nen David. Pero no ompalpak itan, seguradon ipapatey nen Atalia si Jehoiada. Diad tulong nen Jehova, maong so nansumpalan na plano nen Jehoiada. Lapud sinmuporta iray pangulo na saray sundalo tan saray Levita, indeklaran ari si Jehoas, tan impapatey nen Jehoiada si Atalia. (2 Awa. 23:1-5, 11, 12, 15; 24:1) Insan nanggawa si Jehoiada na “sipanan ed baetan nen Jehova tan say ari tan amin a totoo, a mansiansia ra bilang totoo nen Jehova.” (2 Ara. 11:17) Angipuesto met si Jehoiada na “saray bantay diad saray puerta na abung nen Jehova, pian agmakaloob so siopaman ya aliwan malinis.”​—2 Awa. 23:19.

14. Panon ya apagalangan si Jehoiada lapud pinagalangan toy Jehova?

¹⁴ Nilasus taon antis ya nambilay si Jehoiada, walay onian imbaga nen Jehova: “Saramay mamapagalang ed siak et pagalangan ko.” (1 Sam. 2:30) Si Jehoiada ey, kasin pinagalangan nen Jehova? On! Singa bilang, impairekord nen Jehova iray maong ya ginawa na sayan lingkor to pian pakaaralan tayo. (Roma 15:4) Insan nen inatey si Jehoiada, sikatoy “imponpon da diad Syudad nen David a kaiba na saray arari, lapud maabig so ginawa to diad Israel nipaakar ed tuan Dios tan ed abung To.” Talagan espisyal tan balbaleg itan ya kagalangan!​—2 Awa. 24:15, 16.

15. Antoy naaralan tayo ed salaysay tungkol ed si Jehoiada? (Nengnengen met so litrato.)

¹⁵ No takot ed Dios so pantongtongan,  antoy naaralan tayo ed salaysay tungkol ed si Jehoiada? Makaaral iray elder ed alimbawa to. Nipanengneng day katooran dad si Jehova no lanang iran alerto pian naprotektaan tan naasikaso day kongregasyon. (Gawa 20:28) Patunay met iyan salaysay ya anggan saray maedad la ya matoor tan matakot ed Dios et sarag ya usaren nen Jehova pian nagawa so panlabayan to. Papablien ira nen Jehova anggano matatken la ra. Makaaral met iray kabataan ed impantrato nen Jehova ed si Jehoiada. Naalig tayoy Jehova no respetoen tan aroen tayo iray agagin maedad la, lalo la iramay abaybayag lan matoor ya manlilingkor ed si Jehova. (Pro. 16:31) Tan makaaral tayon amin ed saray pangulo na sundalo tan saray Levita ya sinmuporta ed si Jehoiada. Komon ta matoor tayon suportaan iray mangidadaulo ed kongregasyon tan manpasakop tayo ed sikara.​—Heb. 13:17.

16. Antoy patunay ya makapuy ya ari si Jehoas?

¹⁶ Maong ya impluensya si Jehoiada ed si Arin Jehoas. Kanian nen ugaw ni Jehoas, sikatoy “nanggaway duga ed pakanengneng nen Jehova.” (2 Ara. 12:2) Pero nen inatey lay Jehoiada, say dinengel nen Jehoas et saray apostatan prinsipe. Lapud satan, sikato tan saray sakop to et “nanlingkor ed saray sagradon poste tan saray idolo.” (2 Awa. 24:4, 17, 18) Anggano ansakisakit itan ed si Jehova, sikatoy “lanang a mangibabaki . . . na saray propeta pian ompawil irad sikato,  . . balet agda labay so ondengel.” Pati say anak nen Jehoiada ya si Zacarias et agda italtalek  anta propeta nen Jehova tan saserdote. Diad tua, impapatey nen Arin Jehoas si Zacarias, anta kapinsan to! Anggapoy utang na loob to ed pamilya ya nanligtas na bilay to!​—2 Awa. 22:11; 24:19-22.

17. Antoy nansumpalan nen Jehoas?

¹⁷ Lapud aliwan matakot ed Dios si Jehoas, aliwliway nansumpalan to. Tinmua ed sikato iyan abaybayag lan imbaga nen Jehova: “Saramay mamapabanday ed siak et namudmora.” (1 Sam. 2:30) Nen akiguerra so Sirya ed Juda, say “baleg ya armada” nen Jehoas et atalo anta datdaiset so sundalo na kalaban. Apuroan si Jehoas tan “grabe sugat to.” Nen inmatras la ray Siryano, saray mismon lingkor nen Jehoas so amatey ed sikato bilang bales ed impamatey tod si Zacarias. Lapud agaylay uges to, sikatoy ag-imponpon “diad ponponan na saray arari.”​—2 Awa. 24:23-25; nengnengen so “anak ni Barakias” ed study note na Mateo 23:35 ed nwtsty-TG.

18. Base ed Jeremias 17:7, 8, antoy gawaen tayo pian agtayo naalig si Jehoas?

¹⁸ Si Jehoas et singa kiew ya ataptapew so lamot to tan atukoran labat kanian akaalagey. No ekalen mo may tukor tan ondagem labat na daiset, magangganon natumba so ontan ya kiew. Ontan so agawa ed si Jehoas. Nen anggapo lay Jehoiada ya onsusuporta ed sikato, agangganon naimpluensiaan na saray apostata, tan tinaynan toy Jehova. Antoy naaralan tayo ed saya? Say takot tayo ed Dios et agkomon akadepende ed maong ya impluensya na saray agagi tan ed panamaseseg na saray kapamilya tayo. Kaukolan tayon pabiskegen ya mismo so espiritualidad tayo. Say panangaro tan takot tayod si Jehova et akadepende ed kuli tayon man-personal study, mandalepdep, tan manpikasi.​—Basaen so Jeremias 17:7, 8; Col. 2:6, 7.

19. Antoy labay nen Jehova ya gawaen tayo?

¹⁹ Diad tua, ag-ipagawa nen Jehova so agtayo sarag. Diad Eclesiastes 12:13, onia labat kasimpli so labay ton gawaen tayo: “Takotan moy tuan Dios tan unor mo ray ganggan to, ta saya so manunan obligasyon na too.” No walay takot tayod Dios, naalig tayoy pakpel tan katooran nen Obadias tan Jehoiada. Nasarag tayoy anggan anton subok tan mansiansia tayon kaaro si Jehova anggad angga!