Taga Estonia iray atateng ko, pero inmalis ira ed Germany nen World War II, tan ditan ak inyanak. Pero ag-abayag, dia kami lad Canada nanayam. Say abung mi et asingger ed Ottawa, Canada. Lapud mairap so bilay mi, diad mismon abung mi so kawalaan na saray alaga min manok. Ayos labat ta lanang ya walay almusal min iknol.

Aminsan, wala ray Tasi nen Jehova ya linmad abung mi tan imbasa rad si Nanay ko so Apocalipsis 21:3, 4. A-touch ya maong si Nanay ko, kanian akaakis. Nanaral iray Biblia kaibay Tatay, tan mapmaples iran inmaligwas ya anggad abautismoan ira.

Aga masyadon maka-English si Nanay tan Tatay, pero masetseseg ira. Labi so trabaho nen Tatay ed pabrika diad Sudbury, Ontario. Pero kada Sabado, seseguradoen nen Tatay ya makapanpulong ira, tan ipipila da kami nen ading kon si Sylvia. Sinimba ya walay schedule mi ya man-family study tan aaralen mi so Panag-bantayan. Imbangat ak nen Nanay tan Tatay ya aroen koy Jehova. Kanian nen 1956 nen samploy taon ko, indedikak lay bilay ko ed si Jehova. Anengneng kon mismo ed sikara ya inar-aro day Jehova, kanian sikara so inspirasyon ko.

Ka-graduate kod high school, medyo kinmapuy so seseg ko. Naisip ko ya no manpayunir ak, agak makatipon tan agko nagawaan may pangarap ko ya makapasyar ed nanduruman bansa. DJ (o disc jockey) ak ed sakey ya istasyon na radyo. Nai-enjoy koy trabahok. Pero lapud panlabi ak, agak la makakapiaral, tan saray worldly so lanang kon kaiba. Nakokonsiensia ak, kanian inmekal ak.

Ag-abayag, nanayam ak lad Oshawa, Ontario. Akaarok diman si Ray Norman tan say agi ton si Lesli, tan arum ni ran payunir. Mabaibait irad siak. Malikeliket ira ed pampapayunir da, kanian apaisip ak no antoy planok ed bilay ko. Pinaseseg da ak met ya manpayunir, ya anggad nan-aplay ak nen Setyembre 1966. Malikeliket ak, pero manguman manayay bilay ko.

Nen high school ak, angipasa ak lay application ko ed Bethel diad Toronto, Canada. Insan nen payunir ak la, atawag ak ya manlingkor na apat taon diad Bethel. Pero diad saman, wala lay pan-gustok ed si Lesli. Inisip ko ya no man-Bethelite ak, ompan agko la nanengneng si Lesli. Kanian impikasik ya maong ed si Jehova ya tulongan to ak ya mandesisyon. Pinilik so manlingkor ed Bethel, tan nampatanir ak ed si Lesli ya maer-ermen so pusok.

 Naasain ak ed Laundry Department tan asalik met so nantrabaho bilang secretary. Abalitaan ko ya na-assign si Lesli ya espisyal payunir diad Gatineau, Quebec. Sikato so sankanonot ko nin siansia, tan lanang kon naiisip no kasin duga ya pinilik so Bethel. Pero, asurprisa ak nen naamtaan ko ya say agi nen Lesli ya si Ray et atawag met ed Bethel. Nagmaliw kami ingen ya san-roommate! Malikeliket ak ta walay koneksion ko la lamet ed si Lesli. Nankasal kami nen Pebrero 27, 1971. Atan so sampot ya agew na apat taon ya asainmin kod Bethel.

Nanlingkor kami nen Lesli ed sakey ya French congregation diad Quebec. Kayari pigay taon, asurprisa ak ta naimbitaan ak ya manlingkor bilang manangasikaso na sirkito anta 28 ko ni labat! Pakaliknak et ugaw ak ni, tan kulang ak ni na eksperiensya. Pero dinalepdep ko may walad Jeremias 1:7, 8, kanian binmiskeg so liknaan ko. Say sakey nin sankanonot ko et si Lesli. Walay trauma tod panagbiahe ta aminpiga to lan asali ya naaksidente lawari, tan irap ton alaen so ugip to. Naisip mi laingen ya ompan agmi nasarag so kimey ed sirkito. Pero oniay imbaga nen Lesli ed siak: “No walay labay nen Jehova ya ipagawad sikata, di salien ta labat.” Kanian inawat mi, tan nanliketan mi so kimey ed sirkito diad loob na 17 ya taon.

Amayamay so kimey ed sirkito, kanian ngalngali anggapoy panaon kod si Lesli. Pero walay imbangat nen Jehova ed siak. Aminsan ya kabuasan na Lunes, walay nan-doorbell. Kalukas mi, anggapoy too pero walay baskit ya walay tablecloth to, prutas, cheese, tinapay, alak, tan wine glass. Anggapoy akaiyan no siopay nanlapuan to, pero walay papel ya say akasulat et, “Itagar moy asawam ya man-piknik.” Balibali ya tuay man-piknik ed saman ya agew ta maliwliwawa so tawen. Pero imbagak ed si Lesli ya aleg ni ta kaukolan koy manparaan na paliwawa. OK labat kuno ed sikato, pero alikas ko ya maermen. Kayurong kod lamisaan, agak lanlamang makapanpokus ed pampaparaan ko ta nakokonsiensia ak. Anonotan ko may walad Efeso 5:25, 28. Singa ibabagad siak nen Jehova ya isipen ko met so pankaukolan nen asawak. Kayarik ya nampikasi, imbagak ed si Lesli, “Gala sirin.” Ay, manliket ya maong! Nananap kami na marakdakep ya lugar diad gilig na ilog. Imbilkag mi may table cloth tan nan-date kami. Agmi man nalinglingwanan! Naikdan koy panaon si Lesli tan naiparaan ko nin siansiay paliwawak.

Malikeliket kami ed asainmin mi tan dakdakel so nakar min lugar. Aliber mi manlapud British Columbia anggad Newfoundland. Aya la may pangarap ko nen ugaw ak ni. Naisip ko met so man-Gilead, pero agko labay so man-missionary. Espisyal so pakanengneng kod saray missionary, tan singa agak kualipikado. Sakey ni, natatakot ak ta ompan ibaki da kamid Africa, ya diad saman et apektadoy nanduruman sakit tan walay guerra. Kontento ak lad asainmin kod Canada.

Nen 1992, nen bulos la lamet ya makapanpulong iray Tasi nen Jehova ed saray bansa ya datin parte na Soviet Union, tinepetan da kami no labay mi onalis ed Estonia tan magmaliw ya missionary. Asurprisa kami, pero impikasi min maong. Naisip mi lamet, ‘No walay labay nen Jehova ya ipagawad sikata, di salien ta labat.’ Kanian inawat mi. Say kuan kod sarilik, ‘Andi bale ta aliwan diad Africa.’

Inaral mi so mansalita na Estonian. Kayari pigaran bulan manlapud insabi mi, inyasain da kami ed kimey ed sirkito. Manga 46 ya kongregasyon tan grupo so bisitaen mi diad Estonia, Latvia, Lithuania, tan anggan diad Kaliningrad, Russia. Labay ton ibaga, aralen mi met so mansalitay Latvian, Lithuanian, tan Russian. Mair-irap so manaral na lenguahe. Pero tinulongan kami na saray agagi tan a-touch ira ed pansasagpot min manaral na lenguahe ra. Nen 1999, wala lay branch office ed Estonia, tan na-assign ak ya manlingkor ya membro na Branch Committee kaibay Toomas Edur, Lembit Reile, tan Tommi Kauko.

Dakel so akabat min Tasi ya asali day in-deport ed Siberia. Anggano apairap irad prisoan tan abaybayag iran nisian ed pamilya ra, ag-abalang so liket dad panaglingkor tan say seseg dad ministeryo. Naaralan mi ed alimbawa ra ya say liket tayo et ag-akadepende ed situasyon, tan makapananos tayo anggano sankairapan la tay subok.

Agmi aliklikas so ilalabas na agew ta busy kamin maong tan mataltalag kamin makapan-bakasyon. Wala may panaon ya lanang ya naksawan si Lesli. Agmi naisip ya wala la manayay sakit to kanian onman so nalilikna to. Say tawag ed sakit to et fibromyalgia. Inisip mi ya mas maong amo no ompawil kami lad Canada. Pero naimbitaan kamin manaral ed branch school diad Patterson, New York, U.S.A. Alanganin kami balet lapud sakit nen Lesli. Pero, impikasi min maong ed si Jehova tan inawat mi so imbitasyon. Benendisyonan toy desisyon mi. Legan min wadman, akapampa-doktor si Lesli ya anggad pinmawil lad normal so liknaan to.

Aminsan ya labi nen 2008, nen akapawil kami la ed Estonia, wala lamet so naawat min surprisa. Tinawagan ak na world headquarters tan tinepetan da ak no labay mi manlingkor ed Congo. Agko amtay ibagak, lalo la ta imbaga ra ya kaukolan dan naamtaan so desisyon mi diad ontumbok ya agew. Agko ni imbagad si Lesli ta amtak ya agto iman pakaugipan. Pero siak so aga akaugip ta sanlabi ak ya nampikasi.

Kaimbuasan to, imbagak lad si Lesli. Parehoy naisip mi. Kuan mi: “Papaonlaen to ta nen Jehova diad Africa. Salien ta labat pian naamtaan ta no sarag ta tan na-enjoy ta.” Kanian anggano 16 ya taon kami lad Estonia, inawat mi so asainmin ya onlad Congo. Marendeen tan marakdakep so branch office ed Kinshasa. Say sakey ed saray sankaunaan ya in-displey nen Lesli diad kuarto mi et amay card ya awi-awit ton lanang manlapu la nen tinaynan mi so Canada. Say akasulat ditan et “Anggan iner ka intanem, gawam so anggaay nayarian mon  manrosas.” Nen akabat mi ray agagi, nen wala la ray Bible study mi, tan nen asali mi lay bilay na missionary, malikeliket kami! Asalik met so nan-branch visit ed manga 13 ya bansa ed Africa. Balbaleg iman ya pribilehyo mi nen Lesli ya pasesegen iray agagi ed nanduruman Bethel. Anengneng mi so dakep na nanduruman kultura tan ugali na saray agagi tayo. Kanian no dati et mapagpaga ak, natan et misatsalamat ak ed si Jehova ya imbaki to kami ed Africa.

Diad Congo, impasali dad sikami so nanduruman klase na panangan, anggan saray nanduruman insekto. Say amta mi agmi napaloob. Pero nen anengneng mi ya labalabay na saray agagi, sinali mi, tan masamit manaya!

Wala ray lugar diad Congo ya dakel so grupon rebelde ed gobierno. Linma kami ditan pian pasesegen iray agagi tan naiyawitan mi ra na saray pankaukolan da. Lulusoben na saray rebelden grupo iray baryo tan sasakitan da iray bibii tan ugugaw. Mair-irap so bilay na maslak ya agagi. Pero apaseseg kamid alimbawa ra ta mabisbiskeg so pananisia ra ed kioli, inar-aro day Jehova, tan matoor ira ed organisasyon to. Apaisip kami laingen no kasin onman kabiskeg so pananisia mi tan no antoy motibo mi ed panlilingkor mid si Jehova. Aderal so abung na arum ya agagi, tan atakew so tanem da. Anengneng kod situasyon da ya talagan matmainomay ya nabalang iray materyal ya bagay, tan say mas importante et say espiritual ya kayamanan. Anggano mair-irap so dadalanen na saray agagi, kokkontento rad bilay da tan ag-iran balot nanreklamo. Naaralan mid sikara ya anggano wala ray problema tan sakit tayo, marakep no mansiansia tayon positibo.

Nen medyo abayag kami lad Africa, asurprisa kami lamet ta walay naawat min balon asainmin. Papaonlaen da kami ed Hong Kong branch. Agmin balot naisip ya manayam kamid Asia. Pero lapud aminpiga mi lan asali so tulong nen Jehova ed akauna la ran asainmin mi, pinmayag kami anggano agmi amta no antoy sabien mi ed Hong Kong. Amta mi ya nailiw mi iray kakaaro mi tan saray marakdakep ya lugar ed Africa. Agmi apokpokan so onakis nen nampatanir kami nen 2013.

 Aseksek tan matoon syudad so Hong Kong kanian nan-adjust kamin maong. Mair-irap met so lenguahe da ya Chinese. Pero maar-aro iray agagi tan masamsamit so panangan. Maaligwas so kimey tayo ed Hong Kong pero binmili ya maong so presyo na dalin tan bilding. Kanian imbes ya paawangen so branch office tayo diman, nandesisyon so Mananguley ya Ulop ya ilako la so arum ya property, tan say arum ya kimey ditan et asikasoen lad arum ya lugar. Insan nen 2015, inyasain da kami ed South Korea, tan wadia kami ni anggad natan. Kaukolan mi la lamet so manaral na balon lenguahe. Bakil ni panag-Korean mi, pero makomenda iray agagi. Ibabaga ra ya nan-improve kami lan maong.

Kada walay balon asainmin mi, aliwa pan mainomay ya lanang so mikaaro. Pero apatunayan mi ya mas marakep no sikami lay unonan mangimbita ed saray agagi pian nakabat mi la ran tampol. Naobserbaan mi ya anggano wala ray pandurumaan tayo, mas dakel nin siansia so pamparehoan tayo. A-realize mi met ya ginawa itayo nen Jehova ya sarasarag tayoy mangaro. Duga imay ibabaga na Biblia ya ‘ilukas tayon maong so puso tayo.’ Agtayo sirin natatakot ya aruman labat so kakaaro tayo.​—2 Cor. 6:11.

Naaralan mi ya awaten so nanduruman klase na totoo tan agkami manlalabi, ya singa si Jehova. Naaralan mi met ya marakep no malikas tayo ed panangigiya tan panangaro to. No onkakapuy so liknaan mi odino iisipen mi no kasin tanggap kami na agagi, babasaen mi lamet iray makapaseseg ya card o sulat na saray kakaaro mi. Lanang ya eebatan nen Jehova iray pikakasi mi. Patunay itan ya inar-aro to kami tan labay ton mantultuloy kami ed asainmin mi.

Diad inlabas na saray taon, naaralan mi nen Lesli ya importantin walay panaon mid sakey tan sakey anggano busy kamin maong. Tan no wala ray nagawaan min lingo, naaralan mi ya mas marakep no iyelek mi labat, lalo lad panaaral mi na balon lenguahe. Tan kada labi, man-isip kami nen Lesli no antoy makapaliket ya agawa ed sanagew tan pisalamatan mi si Jehova.

Diad tua, agkon balot naimadyin so sarilik ya man-missionary o manayam ed arum ya bansa. Pero maong labat ta agko tinanggian si Jehova, kanian anengneng kon mismo ya anggapoy imposible ed sikato. Nanonotan ko may imbaga nen Jeremias. Kuan to: “Kinombinse mo ak, O Jehova.” (Jer. 20:7) On, dakdakel so surprisa tan bendisyon nen Jehova ed sikami. Tinupad to may pangarap ko ya makalugan ed eroplano. Tan mas ni ingen so agawa nen samay pangarap ko nen ugaw ak ni, ta dakdakel ya lugar so nakar mi nen Lesli. Diad tua, akapan-branch visit kami ed limaran kontinente. Misatsalamat ak met ed si Lesli ta masuportan asawa.

Antokaman so asainmin mi, lanang min iisipen ya gagawaen mi itan lapud inar-aro mi si Jehova. Saray bendisyon ya nanaawat tayo natan et patunay ya makapaliket so bilay ya andi-anggaan, lalo la ta diad satan et ‘ilukas nen Jehova so lima to tan peneken toy pirawat na balang mabilay ya bengatla.’​—Sal. 145:16.