1. Base ed 1 Pedro 5:2, anton pribilehyo so inmatalek nen Jehova ed saray elder?

 BALBALEG ya pribilehyo so inmatalek nen Jehova ed saray elder. Sikara so tinuro nen Jehova ya mangasikaso ed saray lingkor to. Malikeliket dan panseserbian iray agagi ra, tan makulikuli dan gagawaen so responsabilidad da bilang “managpastol a talagan manpastol” ed saray pinabpablin karnero nen Jehova. (Jer. 23:4; basaen so 1 Pedro 5:2.) Talagan regalo ed kongregasyon tayo irayan matoor ya lalaki!

2. Anto ran subok so aarapen na saray elder?

² Aliwan mainomay so kimey na saray elder tan wala ray subok ya aarapen da. Singa bilang, amayamay so kailangan dan gawaen pian naasikaso so interon kongregasyon. Alikna itan nen Brother Tony ya elder ed United States. Oniay imbaga to: “Nen kakkagapo na pandemic, talagan dakel so kimey pian naorganisa so aral tan panagpulong. Awat ak lan awat na responsabilidad. Iyuupot ko lay biskeg ko, pero agan talaga manunda so kimey. Agko nalilikas, napapaulyanan ko la manayay panagbasak na Biblia tan personal study’k. Ngalngali anggapo met lay panaon kon manpikasi.” Duma met so subok ed si Brother Ilir ya elder ed Kosovo. Nen walay guerra ed lugar da, nairapan kuno ya unoren iray instruksion na organisasyon. Oniay imbaga to: “Nen inyasain ak na branch office ya onla ed delikadon lugar pian ontulong ed saray agagi, natatakot ak. Singa aliwan praktikal imay ipapagawa ra.” Si Brother Tim, ya missionary ed Asia, et naiirapan ed karakel na kailangan ton sumpalen kada agew. Kuan to: “No maminsan, agko la amtay unaen ko lapud karakel na kimey, tan ngalngali ak la onsuko.” No wala ray onian aarapen na sakey ya elder, antoy makatulong ed sikato?

3. Balanglan elder tayo o andi, akin et maabig no aralen tayoy alimbawa nen Ukom Gideon?

 ³ Makaaral iray elder ed alimbawa nen Ukom Gideon. (Heb. 6:12; 11:32) Sikatoy inusar nen Jehova ya manprotekta tan manpastol ed saray lingkor To nensaman. (Ukom 2:16; 1 Awa. 17:6) Singa si Gideon, uusaren met nen Jehova iray elder natan ya mangasikaso ed saray lingkor To diad sayan mair-irap ya panaon. (Gawa 20:28; 2 Tim. 3:1) Pantongtongan tayoy inkamapaabeba, inkamaunor, tan inkaanos nen Gideon. Anggano aliwa tayon elder, makatulong iyan artikulo pian mas napabli tayo ray elder ed kongregasyon tayo, tan napakilos tayon suportaan irayan makukuli tan maespiritual ya brother.​—Heb. 13:17.

4. Antoy patunay ya mapaabeba si Gideon?

⁴ Mapaabeban too si Gideon. b Nen imbaga na anghel nen Jehova ed si Gideon ya sikato so apili ya manligtas ed saray Israelita ta papairapen ira na saray Midianita, oniay inyebat nen Gideon: “Say boleg ko [o pamilyak] so sankaraisetan ed Manases.” Imbaga to ingen ya anggapoy kana to no ikompara ed saray agagi to. (Ukom 6:15) Inisip nen Gideon ya agto kaya itan ya asainmin, pero baleg so tiwala nen Jehova ya sarag to itan. Diad tulong nen Jehova, agawaan nen Gideon so asainmin to.

5. Diad anto ran situasyon ya nasubok so inkamapaabeba na sakey ya elder?

⁵ Gagawaen na saray elder so anggaay nayarian da ya magmaliw ya mapaabeba. (Miq. 6:8; Gawa 20:18, 19) Agda ilalastog iray abilidad da tan saray marakep ya nagagawaan da. Tan tanggap da ya aliwa ran perpekto kanian walan-walay nagawaan dan lingo. Pero wala ray situasyon ya nasubok so inkamapaabeba na sakey ya elder. Singa bilang, ompan awat lan awat na asainmin pero na-realize to lanlamang ya agto manaya nagawaan iratan ya amin. Nasubok met so inkamapaabeba to no wala ray manbalaw o mankritiko ed sikato. Diad kabaliktaran balet, ompan wala ray mangirayew ed sikato ta walay marakep ya agawaan to. Diad onia ran situasyon, antoy naaralan na saray elder ed si Gideon?

6. Antoy naaralan na saray elder ed inkamapaabeba nen Gideon? (Nengnengen met so litrato.)

⁶ Manpatulong. No say sakey et mapaabeba, amta to ya walay limitasyon to kanian wala ray agto la nasarag ya gawaen. Mapaabeba si Gideon​—sikatoy kinmerew na tulong ed  arum. (Ukom 6:27, 35; 7:24) Ontan met so gagawaen na saray mapaabeban elder natan. Oniay imbaga nen Brother Tony, ya abitla ed parapo 2: “Lapud paraan na impamabaleg ed siak na atateng ko, agko amtay ontanggi ed responsabilidad anggano amtak ya agko la kaya. Kanian aminsan ya family worship mi, say pinilik ya topic et tungkol ed inkamapaabeba, tan tinepetan koy asawak no anto ray kaukolan kon i-improve ed sarilik. Binantayan ko met so video ed jw.org ya Ipasal, Panmatalekan, tan Pabiskegen so Arum a Singa Ginawa nen Jesus.” Manlapu lad saman, manpapatulong lay Tony ed arum ya agagi diad saray responsabilidad to. Antoy resulta? Oniay imbaga nen Tony: “Mas naaasikaso la ray kimey ed kongregasyon, tan agko la napapaulyanan so espiritualidad ko.”

7. No walay manbalaw ed saray elder, panon dan naalig si Gideon? (Santiago 3:13)

⁷ Ag-onsyosyodot no wala ray manbalaw. Say sakey nin subok ed saray elder et no wala ray mankritiko ed sikara. Antoy naaralan da ed alimbawa nen Gideon? Nen sikatoy kinuestion na saray Efraimita, nansiansian kalmado tan agto la pinabaleg so isyu. (Ukom 8:1-3) Ag-ira pinatolan nen Gideon. Amta to ya anggan sikaton mismo et aliwan perpekto. Kanian imbes ya onsyodot, dinengel toy reklamo ra tan kakkalmadon akitongtong, anggad kinmepa so petang na ulo ra. Ontan met so gagawaen na saray mapaabeban elder natan. No wala ray agagi ya manbalaw o manreklamo, kalmado iran ondengel tan mitongtong. (Basaen so Santiago 3:13.) Ontan so gagawaen da ta sankanonot day deen ed kongregasyon.

8. Antoy gawaen na saray elder no irayew ira na saray agagi? Mangiter na alimbawa.

⁸ Ipaarap so dayew ed si Jehova. Nen atalo nen Gideon iray Midianita, sikatoy inrayew na saray totoo, pero impaarap toy dayew ed si Jehova. (Ukom 8:22, 23) Panon ya naalig na saray elder so alimbawa nen Gideon? No walay agawaan dan marakep, bidbiren da ya agawaan da iman lapud tulong nen Jehova. (1 Cor. 4:6, 7) Singa bilang, no walay angibaga ed sakey ya elder ya agaylay dunong ton manpaliwawa, antoy ibaga to pian ag-onla ed sikato so atension? Sarag ton ibaga ya nanlapu lanlamang ed Biblia imay impaliwawa to. O ipaimano to ya amin tayo et ipapasal na organisasyon nen Jehova. Maabig sirin no isipen na saray elder no anto kasi epekto na panagpaliwawa ra. Kasin nairarayew si Jehova, o no maminsan et agda nalilikas ya ipapaarap da la manayay atension ed sarili ra? Imanoen pay eksperiensya na sakey ya elder, si Brother Timothy. Nen balobalo ni labat ya elder, labalabay toy man-public talk. Oniay imbaga to: “No manpaliwawa ak, andukdukey so introduksion tan komplikado iray ilustrasyon ya uusaren ko. Kanian manbilib iray agagi. Pero say aliwliwa, lapud walad siak so atension da, anggapo laingen so natitilak ed isip da ya tungkol ed Biblia o tungkol ed si Jehova.” A-realize nen Brother Timothy ya kailangan ton umanen so panagpaliwawa to pian si Jehova so nirayew, aliwan sikato. (Pro. 27:21) Antoy resulta? Oniay imbaga to: “Natan, say ibabaga la na saray agagi et no panon ya akatulong imay paliwawak pian nasarag day problema ya dadalanen da, tan lalo da kunon akabat si Jehova. Mas maliket ak ya onman lay komento ra, aliwan singa dati ya say pambiliban da et say panagpaliwawak.”

9. Panon ya asubok so inkamaunor tan pakpel nen Gideon? (Nengnengen so litrato ed apis.)

⁹ Nen nagmaliw ya ukom si Gideon ed Israel, asubok ya tampol so inkamaunor tan pakpel to. Sikatoy ingganggan nen Jehova ya igeba toy altar nen Baal, ya say akanggawa et say mismon ama to. Delikado iman! (Ukom 6:25, 26)  Ag-abayag, sikatoy amiduan ingganggan nen Jehova ya bawasan so bilang na sundalo to. (Ukom 7:2-7) Tan anggano pegley-labi, imbaga nen Jehova ya lusoben da la so kampo na kalaban.​—Ukom 7:9-11.

10. Diad anto ran situasyon ya nasubok so inkamaunor na sakey ya elder?

¹⁰ Saray elder et “akaparaan ya ontulok.” (Sant. 3:17) Uunoren da so ibabaga na Biblia tan agda pandududaan so instruksion na organisasyon nen Jehova, kanian maong iran alimbawa ed saray agagi. Pero wala ray situasyon ya nasubok so inkamaunor na sakey ya elder. Singa bilang, ompan nairapan ya man-adjust no mantutumbokan so instruksion ya iter na organisasyon o bigla labat iratan ya manguman. No maminsan, ompan walay naawat ton instruksion ya isipen ton aliwan praktikal o singa aliwan saman so sankaabigan ya gawaen. Odino ompan makaawat na asainmin ya nayarin pakaarestoan to. Diad sarayan situasyon, panon ya naalig na saray elder so inkamaunor nen Gideon?

11. Antoy gawaen na saray elder no makaawat iray instruksion?

¹¹ Kabisadoen so instruksion tan iyaplika itan. Espisipikon imbaga nen Jehova ed si Gideon no panon ton deralen so altar nen ama to, no iner to ipaalagey so balon altar parad si Jehova, tan no anton ayep so iyapay to. Agla kinuestion nen Gideon so instruksion​—basta no antoy imbaga nen Jehova, atan so ginawa to. Makakaawat met iray elder natan na saray sulat, announcement, tan guidelines ya nanlapud organisasyon nen Jehova. Wadtan iray espisipikon instruksion ya makatulong pian naprotektaan so espiritualidad na kongregasyon tan mansiansian safe iray agagi. Nakomendaan iray elder ta talagan uunoren da iratan, kanian lalo tayo ran naaaro. Amin tayo et minanabang ed inkamaunor da.​—Sal. 119:112.

12. No wala ray pananguman ed uksoyan na organisasyon, panon ya naiyaplika na saray elder so Hebreo 13:17?

¹² Manpasakop ed saray uksoyan; man-adjust no walay pananguman. Singa abitla nen niman, ingganggan nen Jehova si Gideon ya bawasan toy sundalo to​—manlapud 32,000 et nagmaliw labat lan 300! (Ukom 7:8) Seguro naisip nen Gideon, ‘Panon to la ’ya kasi? Dakel so kalaban mi, pero sikami datdaiset.’ Anggano ontan bilang so naisip to, inmunor nin siansia. Singa si Gideon, maunor met iray elder natan. No wala ray pananguman ed organisasyon, akaparaan iran man-adjust. (Basaen so Hebreo 13:17.) Singa bilang nen 2014, nandesisyon so Mananguley ya Ulop ya umanen so uksoyan na panagpaalagey na saray balon Kingdom Hall tan Assembly Hall. (2 Cor. 8:12-14) Nensaman, man-loan iray kongregasyon pian makapanpaalagey iray Kingdom Hall da. Pero natan, no walay lugar ya mankaukolan na Kingdom Hall o Assembly Hall, alaen la so pundo ed donasyon na amin ya kongregasyon ed interon mundo. Tan agla itan akadepende ed no kasin naipawil na kongregasyon so agastos o andi.  Nen naamtaan nen Brother José itan ya pananguman, agto natanggap. Naisip to kuno: ‘No oniay uksoyan, imposible ya walay naipaalagey ya anggan sakey ya Kingdom Hall. Mas maong ni may dati.’ Antoy akatulong ed si José pian nasuportaan to iyan uksoyan? Oniay imbaga to: “Anonotan ko may walad Proverbio 3:5, 6 ya kaukolan koy manmatalek ed si Jehova. Maong labat ta sinuportaan ko iyan uksoyan ta marakep so resulta. Mas dakel ya Kingdom Hall so nipapaalagey, tan talagan nauusar ed sankaabigan iray donasyon tayo ta aga nasisibletan iray agagin mairap so bilay da.”

13. (a) Kombinsido si Gideon ed anto? (b) Panon ya naalig na saray elder so alimbawa nen Gideon? (Nengnengen met so litrato.)

¹³ Makpel ya gawaen so ipapagawa nen Jehova. Inunor nen Gideon so ganggan nen Jehova anggano natatakot tan kaukolan ton irisgay bilay to. (Ukom 9:17) Pinaseguroan nen Jehova si Gideon ya talagan natalo to iray kalaban, kanian kombinsido ya sikatoy tulongan na Dios pian naprotektaan to iray Israelita. Atan ya alimbawa nen Gideon so aaligen na saray elder ed saray lugar ya bawal so kimey tayo. Makpel dan idadaulo so aral tan panagpulong na kongregasyon anggano amta ra ya posiblin arestoen, bugbogen, tan naekal ira ed trabaho. c No baleg a kairapan la, importante ya unoren na saray elder iray instruksion anggano napeligro ni so bilay da. Sarayan instruksion et nayarin tungkol ed no panon tayon ipulong so ambelbelat ya mensahe na panangukom, tan no panon tayon makaliktar ed iyataki na Gog na Magog.​—Eze. 38:18; Apo. 16:21.

14. Panon ya asubok so inkaanos nen Gideon?

¹⁴ Makapakesaw so asainmin nen Gideon bilang ukom, kanian importante ya sikatoy mapaot. Diad samay labi ya nilusob nen Gideon tan say 300 ya sundalo to iray Midianita, akatakas so arum ya kalaban da. Manlapud Lawak na Jezreel, inusilan da ra ya anggad Ilog Jordan. Antis iran makasabi ed satan ya ilog, ompan kaukolan da ni ondalan ed katakelan. (Ukom 7:22) Seguradon naknaksawan la ra kasabi dad  Jordan, pero binaliw da itan pian nituloy day panguusil da. Lapud ag-ira sinmuko, narel da tan atalo da iray kalaban.​—Ukom 8:4-12.

15. Diad anto ran situasyon ya nasubok so inkaanos na sakey ya elder?

¹⁵ Diad karakel na responsabilidad na sakey ya elder diad kongregasyon tan diad pamilya to, ompan no maminsan et nalikna to lay kesaw, nakewkew o nagurdo lay utek to, tan apektado lay emosyon to. Diad sarayan situasyon, panon ya naalig na saray elder so alimbawa nen Gideon?

16-17. (a) Antoy akatulong ed si Gideon pian ag-onsuko ed asainmin to? (b) Anto met so nailaloan na saray elder natan? (Isaias 40:28-31) (Nengnengen met so litrato.)

¹⁶ Mantiwala ka ya pabiskegen ka nen Jehova. Matalek si Gideon ya sikatoy ikdan nen Jehova na biskeg pian nagawaan toy asainmin to, tan talagan ontan so ginawa nen Jehova. (Ukom 6:14, 34) Inanosan nen Gideon tan saray sundalo to so ombatik pian nausilan da so duaran arari na Midian, ya nayarin akalugan ed kamelyo! (Ukom 8:12, 21) Lapud pursigido ira tan tinulongan ira nen Jehova, narel da ra. Makapanmatalek met iray elder ed si Jehova, say Dios ya “agbalot nakesawan odino onkapuy.” Seguradon ikdan to ra na biskeg ya kakkaukolan da.​—Basaen so Isaias 40:28-31.

¹⁷ Imanoen so eksperiensya nen Brother Matthew, ya membro na Hospital Liaison Committee. Oniay imbaga to ya akatulong ed sikato diad asainmin to: “Aminpigak lan apatunayan ya tua imay ibabaga na Filipos 4:13. No naknaksawan tan asagad ak la, manpikasi ak lad si Jehova ya ikdan to ak komon na kaaruman ya biskeg tan pansiansiaen ton alerto so nonot ko pian natulongan ko iray agagi. Kayarik ya manpikasi, naliliknak so espiritu nen Aman Jehova tan ombibiskeg ak.” Singa si Gideon, dakel ya subok so aarapen met na saray makukulin elder tayo natan. Pero akaparaan iran mansakripisyo pian napastolan day kongregasyon. Tua, kaukolan dan bidbiren ya walay limitasyon da, pero no kerewen day tulong nen Jehova, makapantiwala ira ya ikdan to ray biskeg pian nagampanan day asainmin da.​—Sal. 116:1; Fil. 2:13.

18. Bilang review, panon ya naalig na saray elder so alimbawa nen Gideon?

¹⁸ On, amayamay so naaralan na saray elder ed alimbawa nen Gideon! Importante ya mapaabeba ra no walay manbalaw o mangirayew ed sikara. Babalansien dan maong antis iran mangawat na kaaruman ya responsabilidad. Importante met ya maunor tan makpel ira, lalo la ta manasingger lay anggaan na sayan sistema. Tan kakkaukolan day mantiwala ya pabiskegen ira nen Jehova anggan anto ni tay subok ya arapen da. Misatsalamat tayo ed sarayan makukuli tan maar-aron pastol! Komon ta “itultuloy [tayon] pablien iray ontan a lalaki.”​—Fil. 2:29.