1. Antoy gawaen tayo natan ni labat pian makaligtas tayo ed agew nen Jehova?

 DIAD Biblia, no nabitla so “agew nen Jehova,” ontutukoy itan ed panaon ya deralen nen Jehova iray kalaban to tan iligtas to iray lingkor to. Nensaman, wala met la ray ontan ya ginawa nen Jehova. (Isa. 13:1, 6; Eze. 13:5; Sof. 1:8) Diad panaon tayo, onggapo so “agew nen Jehova” no deralen la na saray lider na gobierno so Makapanyarin Babilonia, tan manampot itan ed guerra na Armagedon. Pian makaligtas tayo ed satan ya “agew,” dapat natan ni labat et manparaan tayo la. Diad tua, say imbaga nen Jesus et “mansiansia [tayon] akaparaan” parad “baleg a kairapan.”​—Mat. 24:21; Luc. 12:40.

2. Akin et marakep no aralen tayo so 1 Tesalonica?

² Diad samay unonan sulat nen apostol Pablo ed saray agagi ed Tesalonica, sikatoy angusar na nanduruman ilustrasyon pian mabilabilay ed nonot da so agew nen Jehova tan mansiansia ran akaparaan. Amta nen Pablo ya aliwa nin saman ya panaon so isabi na agew nen Jehova. (2 Tes. 2:1-3) Pero pinaseseg to ray agagi ya manparaan tan isipen da ya singa la itan onsabi nabuas. Marakep no ontan met so isipen tayo natan. Aralen tayo sirin no antoy insulat nen Pablo tungkol ed (1) no panon ya onsabi so agew nen Jehova, (2) no siopa ray naderal ed satan ya agew, tan (3) no antoy gawaen tayo pian mansiansia tayon akaparaan tan makaligtas tayo.

3. Akin et nibagan singa matakew ed labi so isabi na agew nen Jehova? (Nengnengen met so litrato.)

³ “Singa matakew ed labi.” (1 Tes. 5:2) Atan so unonan angikomparaan nen Pablo ed isabi na agew nen Jehova. Maslak ya matakew et labi so pantatakew da ta nanaugip iray totoo. Agnaliklikas tan mapmaples so kilos da pian ag-ira naerel. Agmet nalikas  na maslak ya totoo so isabi na agew nen Jehova kanian nataktakot ira. Ompan nabigla met so arum ya tuan Kristiano ta mapmaples iray mantutumbokan ya nagawa. Pero ag-ira nataktakot ta amta ra ya say naderal labat et saray mauges.

4. Akin ya say agew nen Jehova et singa pampasakit na biin malukon?

⁴ “Singa pampasakit na biin malukon.” (1 Tes. 5:3) Say biin malukon et agto amta so eksakton oras na pananak to. Pero amta to ya onsabin-onsabi itan. No anak-anakan la, bigla labat ya manpasakit ya anggad ompaway so ugaw. Ontan met ed agew nen Jehova. Agtayo amta so eksakton agew tan oras na isabi to. Pero segurado tayo ya onsabin-onsabi itan. On, agnatalaranan na saray mauges so pangukom na Dios ed sikara tan agdan balot natakasan!

5. Akin et singa palbangon so isabi na baleg a kairapan?

⁵ Singa palbangon. Diad komatlon ilustrasyon nen Pablo, binitla to lamet so tungkol ed saray matakew ya labalabay day mantakew legan ya ambilunget ni. Pero dumay punto nen Pablo ed sayay komatlon ilustrasyon to. Singa to ikokompara so agew nen Jehova ed liwawa no manpalbangon la. (1 Tes. 5:4) Wala ray matakew ya agda aliklikas ya asabian la ra manayay liwawa, kanian anengneng na totoo so makapabaing ya gagawaen da tan narel ira. Ontan met so nagawa no baleg a kairapan. Natan et naiyayamot ni na saray mauges iray makapabaing ya gagawaen da ta “wala [rad] kabilungetan.” Pero diad agew nen Jehova, ditan naamtaan no siopa ray manggagaway mauges. Agtayo ra komon aaligen. Natan ni labat et iwasan tayo la ray kagagawa ya kabusol nen Jehova. Nanengneng komon ed kabibilay tayo so “kamaongan tan inkatunong tan katuaan.” (Efe. 5:8-12) Pantongtongan tayo natan so duaran ilustrasyon ya insulat nen Pablo tungkol ed no siopa ray naderal ed agew nen Jehova.

6. Akin et singa nanaugip iray maslak ya totoo natan? (1 Tesalonica 5: 6, 7)

⁶ “Saramay nanaugip.” (Basaen so 1 Tesalonica 5:6, 7.) Imbaga nen Pablo ya saramay naderal diad agew nen Jehova et singa ra nanaugip. Agda amtay nagagawa ed kaliberliber da tan agda nalilikas so oras. Maslak ya totoo natan et nanaugip ed espiritual. (Roma 11:8) Agda natatalosan no antoy labay ya ibaga na saray nagagawa ed mundo. Ag-ira manisia ya tanda iratan ya manbibilay tayo lad “kaunoran iran agew” tan asingsingger la so baleg a kairapan, kanian agda uumanen so kabibilay da. No walay makapabiglan nagawa ed mundo, nabangon met iray daiset kanian ondengel met ira no pulongan tayo ra. Pero anggad man labat. Mas labay day ompawil ya onugip. Say arum et manisia ya walay nagawan ukom na Dios, pero ibabaga ran mabayag ni. (2 Ped. 3:3, 4) Duma tayo balet ta uunoren tayoy bilin na Biblia ya mansiansia tayon aliing tan alerto kada agew.

7. Akin ya saramay naderal ed agew nen Jehova et singa ra abuek?

⁷ “Saramay abuek.” Imbaga nen Pablo ya saramay naderal ed agew nen Jehova et singa ra abuek. Say toon abuek et aga makapan-isip na duga tan padalus-dalos ya mandesisyon. Ontan ya ontan iray mauges ya totoo. Aliwan limpio so panagnonot da kanian agda labay so ondengel ed mensahe na Dios. Ipilit day labay da anggano amta ran aliwliwa so pansumpalan da. Balet sikatayo ran Kristiano, lanang itayon napapaseseg ya “mantultuloy itayon manlikas.” (1 Tes. 5:6) Labay ton ibaga, pansiansiaen tayon limpio so panagnonot tayo. Imbaga na sakey ya Bible scholar ya no say sakey ya too et limpioy panagnonot to, sikatoy agman-panic tan kalmado labat, kanian duga iray desisyon to. Akin et importante ya mansiansia tayon kalmado tan agtayo man-panic anggano dakel so mauges ya nagagawa natan? On ta no andi, ompan agtayo nalilikas et mibabali tayo la manaya ed politika tan ed saray isyu ed bansa o komunidad tayo. Legan ya manasingger so agew nen Jehova, seguradon lalon nasubok so neutralidad tayo tan i-pressure itayo na arum ya manpili tayoy panigan. Agtayo natatakot no antoy iyebat o gawaen tayo. Tulongan itayo na masanton espiritu na Dios pian kalmado tayo nin siansia, malinew so nonot tayo, tan makapandesisyon tayoy duga.​—Luc. 12:11, 12.

8. Base ed 1 Tesalonica 5:8, anto ran kualidad so makatulong pian mansiansia tayon aliing, tan singa iratan anto? (Nengnengen met so litrato.)

⁸ “Isulong tayoy samben ed pagew . . . tan say . . . hilmit.” Inkompara itayo nen Pablo ed sundalo ya lanang ya alerto tan akaparaan ya miguerra. (Basaen so 1 Tesalonica 5:8.) No walay guerra, aga nayarin kampante o relaks labat so sakey ya sundalo. Ontan met ed sikatayo ran Kristiano natan. Importante ya lanang tayon akaparaan parad agew nen Jehova. Agtayo eekalen so samben ed pagew tayo​—say pananisia tan aro. Seguradoen tayo met ya lanang ya akasulong ed sikatayo so espiritual ya hilmit—​say ilalo tayo. Balbaleg so nitulong na sarayan kualidad ed sakey ya Kristiano.

9. Panon ya proprotektaan na pananisia so simbolikon puso tayo?

⁹ Say samben ed pagew so manproprotekta ed puso na sakey ya sundalo. Proprotektaan met na pananisia tan aro so simbolikon puso tayo. Makatulong itan ya dua pian agtayo ontundan manlingkor ed Dios tan tuloytuloy tayon natumbok si Jesus. No walay pananisia tayo, agtayo pandudaan ya walay manatalaran ya premyo ed saramay interon puso ya manlilingkor ed si Jehova. (Heb. 11:6) Pananisia met so manpakilos ed sikatayon manmatoor ed Lider  tayon si Jesus anggano amayamay so subok. Say sakey ya makatulong pian naanosan tayo ray subok et no aralen tan aligen tayoy alimbawa na saray agagi ya nanmatoor anggano agaylay irap na bilay da o dinmalan ira ed graben isusumpa. Tan agtayo met natukson magmaliw ya materyalistiko no aligen tayo iray agagi ya pinasimpli day bilay da pian naiyuna da so Panarian. b

10. Diad panagpulong, akin et importante so panangaro ed Dios tan ed totoo?

¹⁰ Importante met so panangaro pian mansiansia tayon aliing tan alerto. (Mat. 22:37-39) No inaro tayoy Dios, akaparaan tayon “itepel . . . so irap parad maong a balita.” (2 Tim. 1:7, 8) Inaro tayo met so kapara tayon too kanian agtayo onsasawan manpulong, tan seseguradoen tayon anggapoy nalampasan ed teritorya tayo. Sasalien tayo ingen so arum ya paraan, singa say telephone witnessing tan letter-writing. Ayos labat ed sikatayo anggano paulit-ulit tayo ran pulongan, ta agtayo nanaekalan na pag-asa ya onsabi lanlamang so panaon ya manguman ira tan pilien da so manlingkor ed si Jehova.​—Eze. 18:27, 28.

11. Antoy gawaen tayo no inaro tayo ray agagi? (1 Tesalonica 5:11)

¹¹ Inar-aro tayo met iray agagi. Nipanengneng tayoy panangaro no “pasesegen tan pabiskegen [tayo] so sakey tan sakey.” (Basaen so 1 Tesalonica 5:11.) Singa tayo sundalo ya saniiba ya milalaban. Legan na guerra, aga naiwasan ya nasakitan na sundalo so kapara ton sundalo, pero siempre agto gagalaen ya sakitan. Ontan met ed sikatayo ran Kristiano. Agtayon balot gagalaen ya sakitan so sakey ya agi. Tan agtayo ombabawi no bilang ta nasakitan da tayo. (1 Tes. 5:13, 15) Nipanengneng tayo met so panangaro no rerespetoen tayo ray brother ya mangidadaulo ed kongregasyon. (1 Tes. 5:12) Nen sinulatan nen Pablo iray agagi ed Tesalonica, ngalngali sakey taon ni labat na kongregasyon da. Kanian anggapo ni masyadon eksperiensya na saray mangidadaulo ed sikara tan ompan wala ray aliwan desisyon da. Anggano onman, binilin nen Pablo iray agagi ya respetoen da ni ran siansia. No natan ni labat et kakkaukolan tayo lay panangigiya na saray elder,  di nagkalalo la no baleg ya kairapan la. Posiblin napultot so komunikasyon tayod world headquarters tan branch office. Kanian natan ni labat et ipasal tayo lan aroen tan respetoen iray elder. Antokaman so nagawa legan na baleg ya kairapan, agtayo manpopokus ed lingo ra. Agtayo lilingwanan ya si Jehova tan si Jesu-Kristo so mangigigiya ed sarayan matoor ya brother.

12. Panon ya proprotektaan na ilalo so panagnonot tayo?

¹² Proprotektaan na hilmit so ulo na sundalo. Say ilalo tayo ed arapen so manproprotekta met ed panagnonot tayo. No malinlinew itan ed isip tayo, ag-itayo natukso ed saray iyoopresi na sayan mundo ta amta tayon andi-kakanaan iratan. (Fil. 3:8) No ondadalan tayod subok, baleg so naitulong na ilalo pian kalmado tayo labat tan ag-onkapuy so espiritualidad tayo. Naeksperiensya itan nen Brother Wallace tan Sister Laurinda ya sanasawan Bethelite ed Africa. Diad loob labat na taloy simba et pareho iran inateyan na ateng. Diad saman et wala ni restriksion lapud COVID-19 pandemic, kanian ag-ira akasempet. Oniay insulat nen Wallace: “Sankanonot koy ilalon kioli, kanian imbes ya say natilak ed nonot ko et amay impanirap da antis iran ompatey, say iimadyinen ko et no antoy itsura da no bilayen la ra nen Jehova diad balon mundo. No maer-ermen ak, atan ya ilalo so manpapakalma ed siak.”

13. Antoy gawaen tayo pian naawat tayoy masanton espiritu nen Jehova?

¹³ “Agyo eerepen so apoy na espiritu.” (1 Tes. 5:19) Inkompara nen Pablo so masanton espiritu ed apoy ya walad puso tayo. No walad sikatayo so espiritu na Dios, mangapoy-apoy so seseg tayo ya gawaen so duga, tan makuli tayo ed kimey nen Jehova. (Roma 12:11) Antoy gawaen tayo pian naawat tayoy masanton espiritu? Espisipiko tayon kerewen itan no manpipikasi tayod si Jehova, basaen tan aralen tayo so Biblia, tan mansiansia tayon aktibo ed kongregasyon. No gawaen tayo iratan ya amin, nipanengneng tayo so “bunga na espiritu.”​—Gal. 5:22, 23.

14. Antoy agtayo gagawaen pian tuloytuloy tayon naawat so espiritu na Dios? (Nengnengen met so litrato.)

¹⁴ No inikdan itayo na Dios na masanton espiritu, manalwar tayo pian ag-itan ‘naerep.’  Tandaan tayo ya say pangiiteran labat nen Jehova na masanton espiritu et saramay malinis so iisipen tan kagagawa ra. Bawien itan nen Jehova no marutak lay panagnonot tan kagagawa tayo. (1 Tes. 4:7, 8) Agtayo met dapat ibabaliwala o “leleglemewen iray propesiya.” (1 Tes. 5:20) Diad sayan bersikulo, say tutukoyen na “propesiya” et saray mensahe ya inter nen Jehova panamegley na masanton espiritu. Kaiba ed satan so propesiya ya manbibilay tayo lad kaunoran iran agew tan say isabi na Armagedon. “Leleglemewen” tayo itan ya propesiya no diad isip tayo et singa tayo ipo-postpone so Armagedon ta iisipen tayon mabayag ni itan. Diad kabaliktaran, papepelesen tayoy isabi na Armagedon no ‘sankanonot tayo itan ya lanang,’ no malinis iray kagagawa tayo, tan no lanang tayon busy ed kimey nen Jehova.​—2 Ped. 3:11, 12.

15. Antoy gawaen tayo pian ag-itayo naloko na saray fake news tan propaganda na saray demonyo? (1 Tesalonica 5:21)

¹⁵ Asingsingger lan ideklara na saray kalaban na Dios ya wala lay “kareenan tan kaligenan” ed mundo. (1 Tes. 5:3) Diad satan ya panaon, onkalat ed interon mundo so propaganda na saray demonyo, tan dakel so naloko. (Apo. 16:13, 14) Antoy gawaen tayo pian ag-itayo naloko? Kaukolan tayon “seguroen [odino usisaen] . . . so amin a bengatla.” (Basaen so 1 Tesalonica 5:21.) Diad satan ya teksto, amay salitan Greek ya in-translate ya “seguroen” et nayari met ya i-translate ya “pruebaan.” Uusaren itan ya salita no say tutukoyen et say pansuri ed saray mablin metal, singa say gold o silver, no kasin tua itan o peke. Ontan met so nepeg tayon gawaen no walay narengel tayon balita o nabasa tayon impormasyon. Amtaen tayo no kasin tua itan o fake news labat. No kailangan itan ya gawaen na saray inmuunan Kristiano, di mas kailangan tayon gawaen itan natan ta manasingger lay baleg ya kairapan. Imbes ya panisiaan tayo so amin ya balita o impormasyon, manisip tayo nin maong ta ompan kontra itan ed ibabaga na Biblia tan na organisasyon nen Jehova. No agtayo bastabasta manisia, ag-itayo naloko ed saray propaganda ya ikalat na saray demonyo.​—Pro. 14:15; 1 Tim. 4:1.

16. Antoy iilaloan tayo ya seguradon nagawa, tan anto sirin so nepeg tayon gawaen natan?

¹⁶ Bilang sakey ya grupo, saray lingkor nen Jehova et makaligtas ed baleg ya kairapan. Pero bilang indibidual, “[agtayo] amta no antoy nagawa ed bilay [tayo] nabuas.” (Sant. 4:14) Balanglan mabilay tayo ni no onsabi so baleg ya kairapan o andi la, tandaan tayo ya awaten tayo so bilay ya andi-anggaan basta manmatoor tayo. Saray alanaan et manuley kaiba nen Kristo ed tawen. Tan say arum a karnero et manbilay ed paraison dalin. Lanang komon ya mabilabilay ed isip tayo so ilalo tayo tan mansiansia tayon akaparaan parad agew nen Jehova!