1-2. Anton baleg ya kagalangan so iiter nen Jehova ed saray matoor ya lingkor to?

 NO WALAY mantepet ed sika ya, ‘Antoy turing mod si Jehova?’ antoy iyebat mo ey? Seguro say ibagam, ‘Si Jehova so Amak, Dios ko, tan Kaarok.’ Odino, ompan wala ni ray nanonotan mon arum ya tawag ed si Jehova. Pero, kasin naisip mo met la ya si Jehova et Managsangkaili?

² Imbaga nen Arin David ya saray matoor ya lingkor nen Jehova et singa To sasangkailien ed tolda To ta kaaro so turing To ed sikara. Insulat nen David: “O Jehova, siopay nayarin magmaliw a sangkailim ed toldam? Siopay nayarin manayam ed masanton palandey mo?” (Sal. 15:1) On, no sangkailien to ka nen Jehova, labay ton ibaga, kaaro to ka. Balbaleg itan ya kagalangan!

LABALABAY TO TAYON SANGKAILIEN NEN JEHOVA DIAD TOLDA TO

3. Siopay sankaunaan ya sangkaili nen Jehova, tan antoy alikna nen Jehova tan sayan sangkaili to ed sakey tan sakey?

³ Nen anggapo ni pinalsa nen Jehova, bukbukor to. Pero nen pinalsa toy panguloan ya Anak to, singa to pinaloob diad tolda to so sankaunaan ya sangkaili to. Ibabaga na Biblia ya talagan ‘panlikliketan’ nen Jehova so Anak to. Anto met so alikna na sankaunaan ya sangkaili nen Jehova ey? ‘Malikeliket a naynay’ ed arapan na Ama to.—Pro. 8:30.

4. Siopa ni ray nagmaliw ya sangkaili nen Jehova diad tolda to?

 ⁴ Ag-abayag, amalsa si Jehova na arum nin anghel, tan pinaloob to met ira ed tolda to. Sarayan anghel et tinawag ya “ananak na Dios” tan malikeliket ira ta kaiba ray Jehova. (Job 38:7; Dan. 7:10) Abaybayag ya saray anghel labat so sangkaili nen Jehova. Pero nen pinalsa to ray totoo diad dalin, inimbitaan to met la ra ya magmaliw ya sangkaili to. Kaibad saratan iray matoor ya lingkor to ya singa si Enoc, Noe, Abraham, tan Job. Ibabaga na Biblia ya “nanakar [ira] a kaiba na tuan Dios.” Labay ton ibaga, maunor ira ed si Jehova, kanian inturing to ran kakaaro to.—Gen. 5:24; 6:9; Job 29:4; Isa. 41:8.

5. Antoy naaralan tayo ed samay propesiya ya walad Ezequiel 37:​26, 27?

⁵ Diad inlabas na dakel a taon, tuloytuloy ya iimbitaan nen Jehova iray kakaaro to diad tolda to. (Basaen so Ezequiel 37:​26, 27.) Diad samay propesiya ya insulat nen Ezequiel, nanengneng tayo ya talagan labalabay na Dios ya iyasingger so liknaan tod sikatayo. Imbaga ingen nen Jehova ya sikatoy misipanan ed saray matoor a lingkor to na “sakey a sipanan na kareenan.” Ayan propesiya et ontutukoy ed panaon ya mankasakey iray parad tawen tan parad dalin ya lingkor nen Jehova tan maniba ira diad tolda to bilang “sakey a pulok.” (Juan 10:16) Nagagawa la iyan propesiya natan!

ASIKASOEN TO TAYO NEN JEHOVA ANGGAN INER SO KULAAN TAYO

6. Kapigan tayo nagmaliw ya sangkaili nen Jehova diad tolda to, tan iner so kulaan to ’tan?

⁶ Diad panaoy Biblia, no walay nansangkaili ed sika diad tolda to, makapanpainawa ka, protektado ka ed petang na agew odino uran, tan nailaloan mo ya asikasoen to ka may nansangkaili ed sika. Nen indedika tayoy bilay tayo ed si Jehova, nagmaliw tayon sangkaili ed tolda to. (Sal. 61:4) Anto met so nailaloan tayo diad loob na tolda nen Jehova? Agnasabaan so espiritual ya naakan ditan. Tan malikeliket tayo met ta kaiba tayo ditan so arum nin sangkaili nen Jehova. Lapud kaaro to ra, kaaro tayo met ira. Say tolda nen Jehova et aliwan saksakey ya lugar so kulaan to. No asalim lay inmatendi ed espisyal ya kombension ed arum a bansa, seguradon dakel so akabat mon agagi ya nanlapud nanduruman lugar. Tan anengneng mo ya malikeliket ira ta wala rad tolda nen Jehova. On, inerman so kulaan tayo basta matoor tayon manlilingkor ed Dios, sangkailien to tayo diad tolda to.—Apo. 21:3.

7. Akin et nibaga tayon saray matoor ya lingkor nen Jehova ya inatey la et sangkaili to nin siansia diad tolda to? (Nengnengen met so litrato.)

 ⁷ Panon to balet iramay matoor ya lingkor nen Jehova ya inatey la? Nibaga kasin sangkaili to ni ran siansia diad tolda to? On! Akin et ontay nibaga tayo ey? On ta parad si Jehova, mabilay ira. Oniay imbaga nen Jesus: “Anggan si Moises et impaamta ton napaoli iray inaatey, diad samay salaysay nipaakar ed kiew a masabit, sanen tinawag to si Jehova a ‘say Dios nen Abraham tan Dios nen Isaac tan Dios nen Jacob.’ Sikato so Dios na saray mabilay, aliwan saray inaatey, lapud parad sikato et mabilay iran amin.”—Luc. 20:​37, 38.

ANTO RAY BENDISYON? TAN ANTOY GAWAEN TAYO?

8. Anto ray bendisyon no wala kad tolda nen Jehova?

⁸ Singa abitla nen niman, no wala kad loob na literal ya tolda, anggapoy pagam ta protektado ka. Ontan met so situasyon na saramay walad loob na tolda nen Jehova. Proprotektaan to rad espiritual, tan ag-ira mapagpaga ed arapen ta walay ilalo da. Basta kaaro tayoy Jehova tan wala tayod loob na tolda to, agnaderal so relasyon tayod sikato anggan anto ni tay gawaen nen Satanas. (Sal. 31:23; 1 Juan 3:8) Diad balon mundo, tuloytuloy to tayon protektaan ed espiritual tan protektaan to tayo met ed ipapatey.—Apo. 21:4.

9. Antoy iilaloan nen Jehova ya gawaen na saray sangkaili to?

⁹ Talagan baleg ya kagalangan ya sangkaili to tayo nen Jehova diad tolda to. Isip mo pa: Kaaro so turing na Dios ed sika, aliwan natan labat noagta nayarin anggad andi-anggaan. Antoy gawaen tayo pian tuloytuloy to tayon sangkailien? Singa onia ’tan ay: No walay angimbitad sika diad abung da, seguradon apipigeren moy kilos mo pian anggapoy nibaga to may anangkaili ed sika. Singa bilang, no diad kultura da et agda iloloob ed abung so sapatos o tsinelas da, di agmo met iloloob. Ontan met ed pagmaliw ya sangkaili nen Jehova. No labay tayoy mansiansia ed tolda to, gawaen tayo no antoy makapaliket ed sikato. No inar-aro tayoy Jehova, gawaen tayoy anggaay nayarian tayo pian ‘sikatoy napaliket tayon maong.’ (Col. 1:10) Tua, kaaro tayoy Jehova. Pero agtayo met lilingwanan ya sikato so Dios tan Ama tayo, kanian duga labat ya ipanengneng tayod sikato so aralem ya respeto. (Sal. 25:14) No sankanonot tayo ’tan, iwasan tayo ray kagagawa ya mamaermen ed sikato. On, baleg so respeto tayod si Jehova, kanian seguradoen tayo ya ‘mapaabeba tayon manakar a kaiba to.’—Miq. 6:8.

PATAS SO IMPANTRATO NEN JEHOVA ED SARAY ISRAELITA

10-11. Nen walad kaliberliber na Palandey Sinai iray Israelita, panon ya impanengneng nen Jehova ya sikatoy patas ya Dios?

¹⁰ Patas so panagtrato nen Jehova ed saray sangkaili to. Anggapoy mas papaboran to. (Roma 2:11) Mas natalosan tayo itan ya ugali nen Jehova no nengnengen tayo so impantrato to ed saray Israelita nen wala rad kaliberliber na Palandey Sinai.

¹¹ Nen imbulos nen Jehova iray Israelita manlapud impakaaripen dad Ehipto, wala ray tinuro ton saserdote ya manlingkor ed tabernakulo. Tan wala ra met so inyasain ton Levita ya manggawa na arum nin kimey ditan. Labay to kasin ibaga, mas papaboran nen Jehova iramay manlilingkor ed tabernakulo? Tan kasin mas nanaasikaso iramay Israelitan say tolda da et asingger ditan komparad saramay walad arawi? Andi! Patas so impangasikaso tod sikaran amin.

12. Anto ray patunay ya patas so impantrato nen Jehova ed amin ya Israelita? (Exodo 40:38) (Nengnengen met so litrato.)

 ¹² Kada Israelita et walay tsansa ton mikaaro ed si Jehova, wala man so asainmin tod tabernakulo o anggapo, tan asingger man o arawi ditan so tolda to. Prinotektaan tan inggiya nen Jehova so balang sakey ed sikara. Singa bilang, sinegurado nen Jehova ya nanengneng dan amin imay singa lusek ya lurem tan apoy ya walad tagey na tabernakulo. (Basaen so Exodo 40:38.) No onalis may lurem, anggan saramay walad sankaarawian et nanengneng da itan. Kanian makapan-impake ra, nabaklas day tolda ra, tan makapibansag iran ombuat kaibay arum nin Israelita. (Num. 9:​15-23) Narengel da met ya amin imay maksil ya tanol na duaran trumpeta. Atan so sinyales ya kaukolan da lay onalis. On, sinegurado nen Jehova ya anggapoy Israelita ya natilak. (Num. 10:2) Kanian anggano say sakey ya Israelita et asingger so tolda to ed tabernakulo, agto labay ya ibagan mas malet so relasyon tod si Jehova. Patas so impansangkaili nen Jehova ed amin ya Israelita. Ontan met so gagawaen to natan. Anggan iner so panaayaman tayo, amin tayo et aaroen, aasikasoen, tan proprotektaan nen Jehova.

PATAS SO PANAGTRATO NEN JEHOVA ED AMIN YA LINGKOR TO NATAN

13. Akin et nibagan patas so panagtrato nen Jehova ed saray lingkor to natan?

¹³ Wala ray agagin manaayam diad asingger ed world headquarters o diad asingger ed Bethel diad bansa ra. Tan say arum ya agagi et manlilingkor ed saratan ya pasilidad. Kanian nanenengneng da iray nanduruman kimey tan proyekto ya nagagawa ditan, tan nakakaiba dan mismo iray brother ya mangidadaulo. Say arum balet et manlilingkor bilang manangasikaso na sirkito, odino diad arum nin klase na special full-time service. No diad kaplesan et aliwan ontan so kipapasen mo, tandaan mo ya parepareho so panangaro  nen Jehova ed amin ya lingkor to. Sangkaili to ka kanian agto ka paulyanan, tan asikasoen to kan maong. (1 Ped. 5:7) Amin ya walad tolda nen Jehova et igigiya, proprotektaan, tan papakanen to ed espiritual.

14. Anto ni patunay ya patas si Jehova?

¹⁴ Sinegurado nen Jehova ya nabasa na amin ya totoo ed interon mundo so Salita to, say Biblia. Patunay lamet itan ya anggapoy mas papaboran to. Say Masanton Kasulatan et insulat ed taloran lenguahe—Hebreo, Aramaiko, tan Griego. Kasin saramay makabasa ed saratan ya lenguahe et mas maapit so relasyon dad si Jehova komparad saramay agda nabasa iratan ya lenguahe? Andi!—Mat. 11:25.

15. Anto ni sakey ya patunay ya anggapoy mas papaboran nen Jehova? (Nengnengen met so litrato.)

¹⁵ Aliwa labat ya saramay de-aral o saramay makabasa na Hebreo, Aramaiko, tan Griego so iimbitaan nen Jehova diad tolda to. Iiter nen Jehova so karunongan to diad amin ya klase na totoo ed interon mundo, edukado man o andi. Diad tua, say Biblia et ni-translate la ed libo-libon lenguahe. Patunay itan ya labay nen Jehova ya nakaaro so amin ya klase na totoo tan labay to ran minabang ed saray bilin to ya walad Biblia.—2 Tim. 3:​16, 17.

MANSIANSIA KAN SANGKAILI NEN JEHOVA

16. Base ed Gawa 10:​34, 35, antoy gawaen tayo pian lanang tayon makapaliket ed si Jehova?

¹⁶ Balbaleg ya kagalangan ya pinaloob to tayo nen Jehova diad simbolikon tolda to. No panagsangkaili so pantongtongan, anggapoy makatalo ed si Jehova. Maomaong, maar-aro, tan maas-asikaso ed saray sangkaili to. Tan anggapoy pipilien ton imbitaan. Welcome ed tolda to so amin a klase na totoo—anggan iner so panaayaman da, laki man o bii, akapan-aral man o andi, tan antokaman so apalabas, lahi, tribu, odino edad da. Pero siempre, say palooben to labat ed tolda to et saramay manguunor ed ganggan to ta makapaliket irad sikato.—Basaen so Gawa 10:​34, 35.

17. Iner tayo makaala na kaaruman ya impormasyon no siopa ray labay ya sangkailien nen Jehova diad tolda to?

¹⁷ Diad Salmo 15:​1, oniay intepet nen David: “O Jehova, siopay nayarin magmaliw a sangkailim ed toldam? Siopay nayarin manayam ed masanton palandey mo?” Impaisulat met lanlamang nen Jehova ed si David so ebat ed saratan ya tepet. Tan nabasa tayo itan ed ontutumbok ya bersikulo na Salmo 15. Pantongtongan tayo sirin so Salmo 15 diad ontumbok ya artikulo. Amtaen tayo no anto ray nepeg tayon gawaen pian lanang tayon makapaliket ed si Jehova tan mansiansia tayo ed tolda to.