1. Diad Salmo 18:​46, antoy angikomparaan nen David ed si Jehova?

 DIAD sayan mundo, wala ray subok ya bigla labat ya onsabi tan ompan lapud satan et manguma-uman so bilay tayo. Pero maong labat ta wadtay Jehova ya ontulong ed sikatayo! Diad imbeneg ya artikulo, naaralan tayo ya si Jehova et mabilay ya Dios tan labalabay to tayon tulongan. Kada no nalilikna tayoy tulong to, diman tayo lalon napapatunayan ya “si Jehova et mabilay,” ya singa imbaga nen David. (Basaen so Salmo 18:46.) Pero naimano yo ya kayari itan ya imbaga nen David, tinawag toy Jehova ya “Batok”? Akin et inkompara toy Jehova ed bato, sakey ya bagay ya aliwan mabilay, anta kapkapangibaga to balet ya si Jehova et mabilay?

2. Antoy pantongtongan tayo ed sayan artikulo?

² Pantongtongan tayod sayan artikulo no akin ya diad Biblia et tinawag si Jehova ya bato tan no antoy naaralan tayod satan. Pantongtongan tayo met no antoy gawaen tayo pian nipanengneng tayon sikato so Bato tayo. Insan tayo pantongtongan no panon tayon naalig iray kualidad nen Jehova.

AKIN ET SINGA BATO SI JEHOVA?

3. Antoy rason akin et inkompara na Biblia si Jehova ed “bato”? (Nengnengen so litrato.)

³ Inkompara na Biblia si Jehova ed “bato” pian mas natalosan tayo ray kualidad to. Maslak et ibabaga itan na saray lingkor nen Jehova no sikatoy irarayew da lapud makapadinayew iran kualidad to. Say unonan pakabasaan ya si Jehova et “Bato” et diad Deuteronomio 32:4. Nen manpipikasi si Hana, imbaga to ya “anggapoy bato a singa say Dios mi.” (1 Sam. 2:2) Tinawag met nen Habacuc si Jehova ya “say Batok.” (Hab. 1:12) Imbaga met na samay nansulat na Salmo 73 ya “say Dios so bato na pusok.” (Sal. 73:​26, paimanod leksab) Tan anggan si Jehova et tinawag toy sarili to ya bato. (Isa. 44:8)  Pantongtongan tayoy taloran kualidad nen Jehova ya mipara ed bato tan amtaen tayo no anto ray gawaen tayo pian nipanengneng tayon sikato so “Bato tayo.”—Deu. 32:31.

4. Akin et singa baton salimbengan si Jehova? (Salmo 94:22)

⁴ Sasalimbengan to tayo nen Jehova. No maksil so bagyo tan akanengneng kay kuweba, seguradon ombatik kan tampol diman pian makasirom ka. Si Jehova et singa kuweba o baleg ya bato ya manasalimbeng ed sikatayo no ondadalan tayod singa bagyon problema. (Basaen so Salmo 94:22.) Proprotektaan to tayo ta agto labay ya naderal so relasyon tayo ed sikato. Ipapaamta to met ed sikatayo ya temporaryo labat iray subok ya dadalanen tayo natan, ta diad arapen et ekalen to so amin ya sengegan na problema tan paniirap tayo.—Eze. 34:​25, 26.

5. Panon tayon nipanengneng ya si Jehova so baton salimbengan tayo?

⁵ Nipanengneng tayo ya si Jehova so baton salimbengan tayo no sikaton tampol so batikan tayo no walay onsabin subok. Panon tayo itan ya gawaen? Manpikasi tayod sikato. No manpikasi tayo, ikdan to tayoy ‘kareenan ya manbantay ed puso tan nonot tayo.’ (Fil. 4:​6, 7) Ontan so ginawa nen Brother Artem nen sikatoy apriso lapud pananisia to. Aminpiga kunon tinepet-tepetan, minaltrato, tan tinaktakot na imbestigador. Oniay imbaga to: “Aburido ak la kada no ipatawag to ak may imbestigador. . . . Pero lanang ak ya manpipikasi ed si Jehova. Ibabagak ed sikato ya pakalmaen to ak komon tan tulongan to ak pian amtak no antoy iyebat ko. . . . Kanian anggano antoy gawaen to may imbestigador, agto ak nataktakot. . . . Alikliknak so tulong nen Jehova. Singa walay baleg ya bato ed arapan ko ya manproprotekta ed siak.”

6. Akin et nailaloan tayoy Jehova? (Isaias 26:​3, 4)

⁶ Nailaloan tayo si Jehova. Si Jehova et singa balbaleg ya bato o palandey ya agan balot onalis, wadtan labat parad sikatayo. Makapantiwala tayod si Jehova ta sikato so “andi-anggaan a Bato.” (Basaen so Isaias 26:​3, 4.) Lapud anggapoy anggaan na bilay to, sarasarag ton tooren iray sipan to, tan lanang ya wadtan ya ondengel ed saray pikakasi tayo tan ontulong ed sikatayo. Agtayo met natatakot ya taynan to tayo ta sikatoy matoor ed saray lingkor to. (2 Sam. 22:26) Agton balot lingwanan iray ginawa tayo parad sikato tan seguradoen to ya ikdan to tayoy premyo.—Heb. 6:10; 11:6.

7. Antoy epektod sikatayo no lanang tayon mandedepende ed si Jehova? (Nengnengen met so litrato.)

⁷ Ipapanengneng tayon si Jehova so Bato tayo no lanang tayon mandedepende ed sikato. Uunoren tayo met iray ganggan to anggano mairap ta amta tayon pankaabigan tayo iratan. (Isa. 48:​17, 18) Kada no nalilikna tayoy tulong to, lalon ombiskeg so tiwala tayod sikato. Kanian anggan anto ni tay subok ya onsabi, kombinsido tayo ya agto tayo paulyanan. Diad tua, lalo tayon napatunayan ya talagan nailaloan si Jehova no anggapo lay arum ya naasinggeran tayo. Ontan so agawad si Brother Vladimir. Kuan to: “Nen wala ak ed prisoan, diman ko laingen aliklikna ya lalo ak ya inmapit ed  Dios. Bukbukor ko tan amtak ya si Jehova labat so makatulong ed siak, kanian lalo ak ya nantiwala ed sikato.”

8. (a) Akin et nibaga tayon agbalot manguman si Jehova? (b) Antoy epektod sikatayo no lanang tayon dalepdepen ya si Jehova et singa mabiskeg ya bato? (Salmo 62:​6, 7)

⁸ Mabisbiskeg si Jehova tan agbalot manguman. Say balbaleg ya palandey et agbalot nagalaw anggan antoy nagawad kaliberliber to. Ontan met si Jehova, agan balot manguman so ugali tan gagala to. (Mal. 3:6) Anggano nanrebelde si Adan tan Eva, desidido si Jehova ya ituloy so gagala to parad totoo. ‘Agnayarian ya iburi nen Jehova so inkasikato,’ kuan nen apostol Pablo. (2 Tim. 2:13) Labay ton ibaga, anggano manguman lan amin tan anggano anto ni tay gawaen na arum, amay akabat mon Jehova, sikato ni man ya siansia. No antoy imbaga to, gawaen to tan agton balot iyabebay estandarte to. Lapud mabisbiskeg si Jehova tan agbalot manguman, makapantiwala tayo ya sarasarag to tayon tulongan no walay problema tayo tan tooren toy amin ya insipan to.—Basaen so Salmo 62:​6, 7.

9. Antoy naaralan mod si Tatyana?

⁹ Nipanengneng tayo ya si Jehova so Bato tayo no lanang tayon dalepdepen iray ugali to tan say gagala to parad totoo. No ontan so gawaen tayo, kalmado tayo labat tan makapanmatoor tayo anggano wala ray aanosan tayon subok. (Sal. 16:8) Ontan so ginawa nen Sister Tatyana nen aka-house arrest lapud pananisia to. Kuan to: “Bukbukor kod abung. . . . Diad unaan, talagan mairap. Maer-ermen ak.” Pero inisip to kunoy Jehova tan say gagala To parad totoo, kanian nagmaliw ya kalmado tan atalosan to ya kaukolan toy manmatoor. Kuan to: “Atalosan ko ya agawa yad siak ta inar-arok si Jehova. Manlapu lad saman, aliwa lan sarilik so sankanonot ko.”

10. Antoy gawaen mo pian natan ni labat et nipanengneng mo la ya si Jehova so Bato ya panmamatalekan mo?

¹⁰ Diad ontutumbok iran agew, seguradon wala ni ray mas mairap ya subok ya dalanen tayo, tan nasarag tayo labat iratan diad tulong nen Jehova. Kanian pabiskegen tayo la natan so tiwala tayod sikato. Panon tayon gawaen itan? Basam iray salaysay ed Biblia, ontan met ed saray eksperiensya na agagi natan. Legan mon babasaen iratan, nengneng mo no panon ya susuportaan nen Jehova iray lingkor to. Tan dalepdep mo no panon dan impanengneng ya si Jehova so bato ra. No ontan so gawaen mo, nipanengneng mo met ya si Jehova so Bato ya panmamatalekan mo.

ALIGEN IRAY KUALIDAD NEN JEHOVA

11. Akin et labay tayon aligen iray kualidad nen Jehova? (Nengnengen met so kahon ya “ Parad Saray Kabataan ya Brother.”)

¹¹ Natan ya apantongtongan tayo la no akin ya tinawag na Biblia si Jehova ya bato, pantongtongan tayo met no panon tayon naalig iray kualidad to. No gawaen tayoy anggaay nayarian tayo ya aligen si Jehova, seguradon napabiskeg  tayo ray agagi. Singa bilang, nginaranan nen Jesus si Simon ya Cefas (impatalos a “Pedro”), ya say labay ton ibaga et “Sakey a Bato.” (Juan 1:42) Akin et ontay inngaran nen Jesus ed sikato? On ta labay nen Jesus ya pabiskegen nen Pedro so kongregasyon. Diad Biblia, saray elder ed kongregasyon et inkompara ed “anino na sakey a baleg a bato” ta sikara so iilaloan nen Jehova ya manprotekta ed saray agagi. (Isa. 32:2) Pero siempre, anggano aliwa tayon elder, sarag tayon aligen iray kualidad nen Jehova.—Efe. 5:1.

12. Panon tayon nipanengneng ya napansalimbengan tayo na saray agagi?

¹² Ipanengneng mo ya napansalimbengan ka. Wala ray panaon ya kaukolan tayoy mangiter na literal ya salimbengan o siroman na saray agagi. Singa bilang, ompan apektado ira na kalamidad, gulo, o guerra kanian kaukolan day napanayaman. Lalon oniirap so bilay ed sayay “kaunoran iran agew” kanian mas kakkaukolan tayo natan so sakey tan sakey. (2 Tim. 3:1) Samboten tayo sirin so kada pankanawnawa ya tulongan iray agagi. Ipalikna tayod sikara ya inar-aro tayo ra tan pabiskegen tayo rad espiritual. Say sakey ya paraan pian nagawaan tayo itan et no i-welcome tayo ra diad Kingdom Hall tan ipalikna tayon pamilya so turing tayod sikara. Makapa-stress so bilay ed sayan mundo, tan maslak ed saray totoo et aliwliway ugali da. Kanian diad aral, labay tayon nainawaan iray agagi, onligen so liknaan da, tan nalikna ra ya walay mangaaro ed sikara.

13. Panon ya nipanengneng na saray elder ya napansalimbengan ira na saray agagi? (Nengnengen met so litrato.)

¹³ Nipanengneng na saray elder ya napansalimbengan ira na saray agagi no tulongan da ra ed saray dadalanen dan subok. No walay kalamidad o emergency, manggagawan tampol na paraan iray elder pian naasikaso iray agagi.  Akaparaan met iran mamaseseg tan manbilin base ed Biblia. No say sakey ya elder et mauyamo, amta toy milikna, tan akaparaan ya ondengel, agnababaingan iray agagi ya onasingger ed sikato tan nalikna ra ya walay manmamalasakit ed sikara. Kanian no bilang ta simbawaen to ra base ed Biblia, mainomay da itan ya awaten tan iyaplika.—1 Tes. 2:​7, 8, 11.

14. Panon tayon nipanengneng ya nailaloan tayo?

¹⁴ Ipanengneng mo ya nailaloan ka. Labay tayon nalikna na agagi ya lanang tayon wadtan parad sikara, lalo la no kaukolan day tulong. (Pro. 17:17) Kanian panon tayon nipanengneng ya nailaloan da tayo? Aligen tayoy Jehova. Singa bilang, no walay imbaga tayo ya gawaen tayo parad sikara, tooren tayo. No walay nantongtongan ya oras, agtayo komon naaatrasado. (Mat. 5:37) No abalitaan tayo ya walay agin mankakkaukolan, alisto tayo komon ya ontulong. Tan no akaawat tayoy asainmin, seguradoen tayo ya gawaen tayo itan base ed instruksion.

15. Antoy epekto ed agagi no amta ran nailaloan iray elder?

¹⁵ Antoy epekto ed agagi no amta ran nailaloan da iray elder? Ag-ira nababaingan ya kontaken so group overseer da o arum nin elder no kaukolan day tulong. No akaparaan ya ontulong iray elder, nalikna na agagi ya mabmabli ira ed kongregasyon. Tan no ibabase na saray  elder so simbawa ra diad Biblia tan ed saray publikasyon ya nanlapud matoor ya aripen, mas pantiwalaan ira na agagi ta amta ran agda itan imbase ed sarili dan opinyon. No tooren na saray elder iray insipan da tan no agda iistoryaen ed arum iray kompidensyal ya impormasyon, mas ombiskeg so tiwala na agagi ed sikara.

16. Antoy epektod sikatayo tan ed arum no itultuloy tayon pabiskegen so espiritualidad tayo?

¹⁶ Itultuloy mon pabiskegen so espiritualidad mo. Magmaliw tayon maong ya alimbawa ed kongregasyon no maunor tayod si Jehova tan lanang tayon ibabase ed Biblia iray desisyon tayo. No maaral tayoy Biblia tan tuloytuloy tayon pabiskegen so pananisia tayod si Jehova, makapanmatoor tayod sikato. Agtayo met basta-basta naimpluensyaan na saray palson bangat tan panagnonot na totoo. (Efe. 4:14; Sant. 1:​6-8) Tan no mabiskeg so pananisia tayod si Jehova tan ed saray sipan to, mansiansia tayo labat ya kalmado anggano wala ray makasabi ed sikatayon mauges ya balita. (Sal. 112:​7, 8) No mabiskeg tayod espiritual, mas natulongan tayo ray agagi ya ondadalan ed subok.—1 Tes. 3:​2, 3.

17. Anto ray gagawaen na saray elder pian mansiansian kalmado tan mabiskeg ed espiritual iray agagi?

¹⁷ Ibabaga na Biblia ya saray elder et nepeg ya ‘maadia ed saray kagagawa ra, limpioy kanonotan da, mauksoy, tan makatunongan ira.’ (1 Tim. 3:​1-3) ‘Maapit dan tutumboken so napanmatalkan a salita diad paraan na panagbangat da,’ kanian napapabiskeg day kongregasyon. (Tito 1:9) Lapud maong ya alimbawa na saray elder tan ed panshe-shepherding da, napapaseseg da ray agagi ya lanang ya miaral, manpulong, tan man-personal study. No walay problema na saray agagi tan mapagpaga ira, papakalmaen ira na saray elder tan ipapanonot dad sikara ya say pampokusan da et si Jehova tan saray sipan to.

18. Akin et labalabay tayon irayew si Jehova tan lalon onapit ed sikato? (Nengnengen met so kahon ya “ Antoy Gawaen Mo Pian Lalo Kan Onapit ed si Jehova?”)

¹⁸ Kayari tayon apantongtongan iray balibalin kualidad nen Jehova, singa tayo si Arin David nen imbaga ton, “Narayew komon si Jehova, say Batok.” (Sal. 144:1) On, lanang tayon nailaloan si Jehova. Anggad itatken tayo, makapantiwala tayo ya tuloytuloy to tayon tulongan pian mansiansia tayon mabiskeg ed espiritual. Kanian nibaga tayo met ya, “Si Jehova . . . so Batok.”—Sal. 92:​14, 15.