1. Antoy nitulong ed sikatayo na Salmo 15:​1-5?

 NAARALAN tayo diad imbeneg ya artikulo ya saramay angidedika labat na bilay da ed si Jehova tan walaan na maapit ya relasyon ed sikato so nayarin magmaliw ya sangkaili to. Antoy gawaen tayo sirin pian mansiansian maapit so relasyon tayo ed si Jehova? Naamtaan tayod Salmo 15 no anto ray kaukolan tayon gawaen pian magmaliw tayon maapit ya kaaro nen Jehova.—Basaen so Salmo 15:​1-5.

2. Antoy nayarin sankanonot nen David nen binitla toy tolda nen Jehova?

² Oniay imbaga nen David ed gapo na Salmo 15: “O Jehova, siopay nayarin magmaliw a sangkailim ed toldam? Siopay nayarin manayam ed masanton palandey mo?” (Sal. 15:1) Nen binitla nen David so “tolda” nen Jehova, nayarin say sankanonot to et say tabernakulo, ya diad saman et wala nid Gibeon. Binitla to met so “masanton palandey” na Dios, ya nayarin say tutukoyen to et say Palandey Sion ed Jerusalem. Ngalngali 10 kilometro so kaarawi to ’ya ed Gibeon. Ditan so angipaalageyan nen David na tolda ya pangikargaay kaban na sipanan legan ya anggapo ni permanentin pangikargaan ed satan.—2 Sam. 6:17.

3. Akin et importante ya aralen tayo so Salmo 15? (Nengnengen met so litrato.)

³ Aliwan amin ya Israelita et makapanlingkor ed tabernakulo, tan saray atagey ya saserdote labat so makaloob ed kulaan na kaban na sipanan. Balet diad samay simbolikon tolda nen Jehova, makaloob so amin ya matoor a manlilingkor ed sikato tan tuloytuloy to ran sangkailien no mansiansia ran kaaro to. Balbaleg itan ya pribilehyo! Agtayo labay ya napalampas itan. Aralen tayo sirin so Salmo 15, ta nabasa ditan iray kualidad ya kaukolan tayon ipanengneng pian mansiansia tayon kaaro nen Jehova.

 MANAKAR YA ANDIAY PAKABALAWAN TAN GAWAEN SO DUGA

4. Akin et aliwan sapat so pampabautismo pian nakaaro tayoy Jehova? (Isaias 48:1)

⁴ Nabasa tayo diad Salmo 15:2 ya kaaro na Dios iramay “manaakar ya andiay pakabalawan” tan “manggagawa na duga.” Ipapanengneng na saray salitan “manaakar” tan “manggagawa” ya dapat et tuloytuloy itan ya gawaen na sakey. Pero makapanakar tayo kasi ya “andiay pakabalawan” anggano aliwa tayon perpekto? On! Parad si Jehova et ‘andian tayoy pakabalawan’ no gagawaen tayoy anggaay nayarian tayo ya onunor ed sikato anggano nalilingo tayo no maminsan. Nen indedika tayoy bilay tayo ed si Jehova tan nampabautismo tayo, gapoan labat itan na pikakaaro tayo ed sikato. Nensaman, anggano say sakey et Israelita, agto labay ya ibagan sangkailien la nen Jehova. Wala ray mandadayew ed sikato balet ta “aliwan diad katuaan tan inkatunong.” (Basaen so Isaias 48:1.) Kanian no labay na sakey ya Israelita ya sangkailien nen Jehova, kaukolan ton amtaen tan tumboken iray ganggan To. Ontan met natan. Pian nakaaro tayoy Dios, aliwan sapat so pampabautismo tan piulop ed saray agagi. Kaukolan ya tuloytuloy tayon ‘gawaen so duga.’ Panon tayon nagawaan itan?

5. Panon tayon nipanengneng ya uunoren tayoy Jehova diad amin ya gagawaen tayo?

⁵ Say ‘panakar ya andiay pakabalawan’ tan ‘panggaway duga’ et aliwa labat ya basta piaral ed Kingdom Hall. (1 Sam. 15:22) Say labay nen Jehova et onunor tayo ed sikato diad amin ya gagawaen tayo anggano bukbukor tayo. (Pro. 3:6; Ecl. 12:​13, 14) Importante ya onunor tayod si Jehova anggano diad melag iran bengatla. No ontan so gawaen tayo, mas nipalikna tayod sikato ya talagan inar-aro tayo kanian mas naar-aro to tayo met.—Juan 14:23; 1 Juan 5:3.

6. Base ed Hebreo 6:​10-12, antoy gawaen tayo anggano dakel lay agawaan tayo parad si Jehova nensaman?

 ⁶ Mabmabli ed si Jehova so amin ya ginawa tayo parad sikato nensaman tan agto iratan lingwanan. Pero pian mansiansia tayod tolda to, agtayo dapat mankokontento ed saray agawaan tayo ed apalabas. Atan so punto na Hebreo 6:​10-12. (Basaen.) Tua, aglingwanan nen Jehova so impanmatoor tayo nensaman, pero labay to ya itultuloy tayoy manlingkor ed sikato diad interon puso “anggad sampot.” “No ag-itayo onkesaw” ya manlingkor ed si Jehova, ituring to tayon kaaro anggad angga.—Gal. 6:9.

MANSALITA NA KATUAAN MANLAPUD PUSO

7. Antoy labay ya ibaga na pansalita na katuaan manlapud puso?

⁷ No say sakey et labay toy magmaliw ya sangkaili nen Jehova diad tolda to, kaukolan toy ‘mansalita na katuaan manlapud puso.’ (Sal. 15:2) Kasin say labay ton ibaga ’ya et amay basta agtayo mantila, duga la? Andi. Labay nen Jehova ya matua tayo ed amin ya ibabaga tan gagawaen tayo. (Heb. 13:18) Tandaan tayo ya “kabusol nen Jehova so sakey a mapalikdo, balet Sikatoy maapit a kaaro na maptek a too.”—Pro. 3:32.

8. Antoy agtayo labay ya pagmaliwan?

⁸ Panon to no say sakey et uunoren to so Dios no walay makakanengneng pero manggagawa balet na aliwa no bukbukor to la? (Isa. 29:13) Say ontan ya too et lolokoen toy arum ta mankunkunwari labat. Ompan panduaruwaan to so arum ya ganggan nen Jehova. (Sant. 1:​5-8) Kanian ayos labat ed sikato no agto unoren so arum ya ganggan. Tan no singa anggapo met so mauges ya resulta na gagawaen to, ompan natukson manggawa na mas seryoson kasalanan. Ag-awaten nen Jehova so panagdayew na ontan ya too. (Ecl. 8:11) Agtayo labay ya ontay pagmaliwan tayo. Gawaen tayo sirin so anggaay nayarian tayo ya magmaliw ya matua ed amin a bengatla. On, ‘mansalita tayo na katuaan manlapud puso.’

9. Antoy agawa nen akabat nen Jesus si Natanael, tan antoy naaralan tayo ed saya? (Nengnengen met so litrato.)

⁹ Say sakey ya patunay ya talagan importante so ‘mansalitay katuaan manlapud puso’  et amay salaysay ed Biblia nen impakabat nen Felipe si Natanael ed si Jesus. Diad saman labat akabat nen Jesus si Natanael, pero oniay imbaga nen Jesus: “Nengneng yo, sakey a tuan Israelita, ya agmamapalikdo.” (Juan 1:47) Matua met iray akadkauna lan disipulo nen Jesus, pero pambiliban toy nikadkaduman inkamatua nen Natanael. Siempre, aliwa met ya perpekto si Natanael, pero anggapon balot so nanengneng ed sikato ya pankunkunwari. Pandinayewan nen Jesus itan ya ugali to! Komon ta ontan met so nibaga nen Jesus ed sikatayo.

10. Akin et importante ya kontrolen tayoy dila tayo? (Santiago 1:26)

¹⁰ Nanengneng ed Salmo 15 ya importante ed si Jehova no panon so pantrato tayod arum. Nabasad Salmo 15:3 ya say sangkaili nen Jehova et “agto uusarey dila to pian deralan so arum, agmanggagaway mauges ed kapara ton too, tan agto dederalan [o “iiyan ed kababaingan,” paimanod leksab] so kakaaro to.” No agtayo kontrolen so dila tayo tan deralan tayoy arum, nasakitan ira tan agto tayo la labay nen Jehova ya sangkailien ed tolda to.—Basaen so Santiago 1:26.

11. No say sakey ya agi et dineralan toy arum tan agto itan pagbabawian, antoy nagawad sikato?

¹¹ Espisipikon binitla nen David ya aglabay nen Jehova ya sangkailien so toon dederalan toy arum. Seryoso itan ta gagagalaen toy mangikayat na tila pian naderal so reputasyon na arum. No say sakey ya Kristiano et dineralan toy arum tan agto itan pagbabawian, sikatoy ekalen ed kongregasyon.—Jer. 17:10.

12-13. Anto ran situasyon ya iiyan tayo la manaya ed kababaingan iray kakaaro tayo? (Nengnengen met so litrato.)

¹² Ibabaga met na Salmo 15:3 ya say sangkaili nen Jehova et ‘agmanggagaway mauges ed kapara ton too tan agto iiyan ed kababaingan iray kakaaro to.’ Anto ray situasyon ya iiyan tayo la manayad kababaingan iray kakaaro tayo?

 ¹³ No maminsan, ompan agtayo nalilikas ya wala la ray iistoryaen tayod arum ya lapud satan et iiyan tayo la manaya ed kababaingan so kaaro tayo. Isipen irayan situasyon: (1) walay sister ya tinmunda lad pampapayunir to (2) walay sanasawan Bethelite ya a-reassign, tan (3) impaamta ed kongregasyon ya walay sakey a brother ya aliwa lan elder odino ministeryal a lingkor. Diad sarayan situasyon, duga kasi ya panistoryaan tayo iray iisipen tayon rason no akin ya onman so agawa anta agtayo met amta so amin ya detalye? Andi, agtayo itan gagawaen. No labay tayoy mansiansia ed tolda nen Jehova, ‘agtayo manggagaway mauges ed kapara tayon too tan agtayo iiyan ed kababaingan iray kakaaro tayo.’

PAGALANGAN IRAMAY ONTATAKOT ED SI JEHOVA

14. Siopa ray “karimdimla” ya nepeg ya ipulisay na saray sangkaili nen Jehova?

¹⁴ Ibabaga na Salmo 15:4 ya say kaaro nen Jehova et “ipupulisay toy siopaman a karimdimla.” Panon tayon amta no siopa ray “karimdimla”? Aliwa tayon perpekto kanian aliwan sikatayo so mangibaga no kasin say sakey et karimdimla odino andi. Ompan say pipilien tayo labat ya kaiba et iramay labalabay tayoy ugali ra pero ompan nasyosyodotan tayod arum lapu labat ta agtayo ra kasundo. Andi, say ipulisay tayo labat et saramay “karimdimla” ed pakanengneng nen Jehova. (1 Cor. 5:11) Karimdimla ed sikato iramay manggagaway kasalanan ya agmagbabawi, ontan met ed saramay anggapoy respeto dad pananisia tayo, tan saramay gagagalaen dan pakapuyen so espiritualidad tayo.—Pro. 13:20.

15. Antoy sakey ya paraan ya napagalangan tayo “iramay ontatakot ed si Jehova”?

¹⁵ Ibabaga met na Salmo 15:4 ya ‘pagalangan tayo iramay ontatakot ed si Jehova.’ Labay ton ibaga, panengnengan tayoy kamaongan tan respeto iray kakaaro nen Jehova. (Roma 12:10) Say sakey ya paraan pian nagawaan tayo itan et abitla lanlamang ed Salmo 15:4. Nabasa ditan ya say sangkaili nen Jehova et “agto bebenegan so sipan to, anggano pakairapan to itan.” No agtayo tooren so sipan tayo, nasakitan tayoy arum. (Mat. 5:37) Singa bilang, importante ed si Jehova ya tooren na sanasawa so sipanan da. Tan naliliketan met no gagawaen na saray atateng so anggaay nayarian da pian natoor day imbaga ra ed anak da. On, no inaro tayoy Dios tan say kapara tayon too, gawaen tayoy anggaay nayarian tayo ya tooren iray sipan tayo.

16. Anto ni sakey ya paraan pian napagalangan tayo iray kakaaro nen Jehova?

¹⁶ Say sakey nin paraan pian napagalangan tayo iray kakaaro nen Jehova et no maparawes tan maiter tayo. (Roma 12:13) Tua, nakakaiba tayo ray agagi kada no mimiaral tan manpupulong tayo. Pero duman-duma no nakaiba tayo met ira ed arum ya panaon ta mas nakabkabat tan nakaaro tayo ra, tan mas ombiskeg met so relasyon tayo ed si Jehova. Tan diad tua no maparawes tayo, aaligen tayoy Jehova.

AG-AAROEN SO KUARTA

17. Akin et abitla so kuarta ed Salmo 15?

¹⁷ Diad sampot ya bersikulo na Salmo 15, nabasa tayo ya say sangkaili nen Jehova et “agto ipapautang a walay tubo so kuarta to, tan agmangaawat na pasuksok sumpad andiay kasalanan.” (Sal. 15:5) Akin et abitlay kuarta ed sayan salmo? On ta no say sakey et maaro ed kuarta, anggapo lay pibabali tod arum tan naapektoan met so relasyon to ed Dios. (1 Tim. 6:10) Diad panaon na Biblia, wala ray Israelita ya tutuboan day ipapautang da ed saray mairap-bilay. Tan wala met iray ukom ya mangaawat na pasuksok kanian mas  napapaboran iray mayayaman tan kaskasian laingen iray biktima ra. Kabkabusol nen Jehova so onia ran kagagawa.—Eze. 22:12.

18. Anto ray itepet tayod sarili tayo pian nausisa tayo no kasin balanse so pakanengneng tayod kuarta? (Hebreo 13:5)

¹⁸ Marakep sirin no usisaen tayoy sarili tayo no kasin balanse so pakanengneng tayo ed kuarta. Tepetan moy sarilim: ‘Kasin puros kuarta so sankanonot ko tan no antoy onsublay ya saliwen ko? No akautang ak, kasin manbabayar ak ya tampol odino andi ta iisipen kon makuarta met may inutangan ko? Kasin atagtagey so pakanengneng kod sarilik ta dakel so kuartak? Kasin mair-irap koy mangiter? Kasin materyalistiko so pakanengneng ko ed sakey ya agi lapu labat ta mayaman? Kasin say labalabay ko labat ya kaaro et iramay makuarta tan agko masyadon papansinen iray mairap-bilay?’ Importante ya itepet tayo iraya ed sarili tayo ta labay tayoy mansiansia ed tolda nen Jehova bilang sangkaili to. Balbaleg itan ya kagalangan. Agtayo labay ya naandi itan ed sikatayo lapu labat ed kuarta. No aliwa tayon maaro ed kuarta, agto tayon balot paulyanan nen Jehova.—Basaen so Hebreo 13:5.

INAR-ARO NEN JEHOVA IRAY SANGKAILI TO

19. Akin et labay nen Jehova ya gawaen tayon amin iramay walad Salmo 15?

¹⁹ Akin et labay nen Jehova ya gawaen tayon amin iramay walad Salmo 15? Say ebat et nabasad sampot na satan ya salmo. Kuan to: “Siopaman a manggagawa ed sarayan bengatla et agbalot nagalaw.” (Sal. 15:5) Labay ton ibaga, no gawaen na sakey iramay walad akadkaunan bersikulo, sikatoy bendisyonan tan protektaan nen Jehova. On, labay nen Jehova ya maliket tayo, tan parad pankaabigan tayo lanlamang iray ganggan to.—Isa. 48:17.

20. Antoy tatalaranan na saray sangkaili nen Jehova?

²⁰ Tatalaranan la na saray sangkaili nen Jehova iray nagawad arapen. Saray alanaan et manayam ya kaiba nen Jesus ed tawen ta sikatoy ‘angiparaan na pasen’ ditan parad sikara. (Juan 14:2) Saramay parad dalin balet et tatalaranan da lan nagawa imay insipan na Dios ya nabasa ed Apocalipsis 21:3. On, balbaleg a kagalangan ya kaaro tayoy Jehova, tan labalabay to tayon sangkailien ed tolda to anggad angga!