1. Antoy sakey ya rason akin et tuloytuloy tayon makakapanlingkor ed si Jehova anggano dakdakel so problema tayo?

 IBABAGA na Biblia ya manbibilay tayo ed “mapeligro tan mair-irap a panaon.” (2 Tim. 3:1) Anggan sikatayo ran lingkor nen Jehova et naproproblema met ya singa saray totoo natan ed mundo. Tan say sakey nin subok et no walay onkontra ed pandadayew tayod Dios. Pero akin et tuloytuloy tayon makakapanlingkor ed si Jehova anggano dakel so problema tayo? Say sakey ya rason et lapud amta tayon si Jehova et “mabilay a Dios.”—Jer. 10:10; 2 Tim. 1:12.

2. Lapud mabilay ya Dios si Jehova, antoy sarag ton gawaen?

² Lapud mabilay ya Dios si Jehova, amta toy amin ya problema ya dadalanen tayo tan walan-walay gawaen to pian natulongan to tayo. (2 Awa. 16:9; Sal. 23:4) Lanang mo sirin ya isipen ya mabilay ya Dios si Jehova tan agto kan balot paulyanan. Diad tulong to, anggapo tay problema ya agmo nasarag. Apatunayan itan ya mismo nen Arin David.

3. Antoy punto nen David nen imbaga ton “si Jehova et mabilay”?

³ Kabkabat nen David si Jehova tan lanang ya manmamatalek ed sikato. Nen labay ya pateyen nen Arin Saul si David tan uusilan na arum nin kalaban to, kinmerew na tulong ed si Jehova. (Sal. 18:6) Inebatan na Dios so pikakasi to tan inliktar To ed saray kalaban to. Oniay imbaga nen David: “Si Jehova et mabilay!” (Sal. 18:46) Sipor lan manisia si David ya walay Dios. Kanian antoy punto to nen imbaga to ya “si Jehova et mabilay”? Singa to ibabaga ya lapud mabilay ya Dios si Jehova, Sikatoy lanang ya akaparaan ya ontulong ed saray lingkor To. On, apatunayan ya mismo nen David ya say Dios to et mabilay. Nen aliklikna nen David so tulong nen Jehova, lalon apakiwas ya tuloytuloy ya manlingkor tan mandayew ed sikato anggan antoy nagawa.—Sal. 18:​28, 29, 49.

4. No kombinsido tayo ya si Jehova et mabilay ya Dios, antoy epekto to ’tan ed sikatayo?

 ⁴ Singa si David, lalo tayo met ya onseseg ed panaglingkor no kombinsido tayo ya si Jehova et mabilay ya Dios. Nasarag tayo met iray subok tan agtayo ontabang ed panlilingkor tayo. Tan napakiwas tayo met ya mas lalon onapit ed si Jehova.

PABISKEGEN KA NA MABILAY YA DIOS

5. Akin et agtayo ontatakot anggano wala ray subok? (Filipos 4:13)

⁵ Baleg man o melag so problema tayo, nasarag tayo itan no isipen tayo ya si Jehova et mabilay tan sarasarag to tayon tulongan. Wala kasi problema ya agsarag ya solusyonan nen Jehova? Anggapo! Sikato so Makapanyarin-amin, kanian sarasarag to tayon ikdan na biskeg pian naanosan tayo ray subok. (Basaen so Filipos 4:13.) Katon no walay onsabin problema, agka komon ontatakot ta wadtan si Jehova ya onsuportad sika. No naliliknam ya tutulongan to ka anggan diad saray angkekelag ya subok, mas ombiskeg so tiwalam ya agto ka paulyanan no mas grabe la ran subok so onsabi.

6. Nen ugaw ni si David, anto ray agawa ed bilay to ya amabiskeg ed tiwala to ed si Jehova?

⁶ Walay duaran agawad bilay nen David ya lapud satan et mas lalon binmiskeg so tiwala tod si Jehova. Nen sikatoy ugaw ni tan papastolan to ray karnero nen tatay to, walay oso tan leon ya aningkat na karnero. Diad satan ya duaran inkagawa, makmakpel ton inusilan irayan masesebeg ya ayep tan inliktar to may karnero. Pero ag-inisip nen David ya asarag to iman ya bukor. Amta to ya agawaan to iman diad tulong nen Jehova. (1 Sam. 17:​34-37) Dinalepdep nen David iraman ya agawad bilay to tan agton balot nilingwanan, kanian lalon binmiskeg so tiwala to ya sikatoy tulongan nen Jehova anggan anto ni tay subok ya onsabi ed bilay to.

7. Nen kakantiawan nen Goliat iray sundalo na Israel, siopay nampokusan nen David? Tan antoy epekto to ’tan ed sikato?

⁷ Nen tinedyer lay David, wala may panaon ya linma ed kampo na saray sundalon Israelita. Asabian to ra ya natatakot ya maong ta walay higanten Filisteo ya say ngaran to et Goliat ya mangakantiaw ed sikara. (1 Sam. 17:​10, 11) Mankebbiew iran maong ta nampokus irad kabaleg nen Goliat tan diad pangakantiaw to. (1 Sam. 17:​24, 25) Pero si David, dumay nampokusan to. Nampokus ed si Jehova! Kanian nen iinsultoen nen Goliat iray sundalo na Israel, amta nen David ya say mismon iinsultoen to et si Jehova, say “mabilay a Dios.” (1 Sam. 17:26) Anonotan nen David may panaon ya sikatoy tinulongan nen Jehova pian napatey to may oso tan leon. Tan baleg so tiwala to ya sikatoy tulongan lamet na Dios pian natalo to iyan higante. Kanian makmakpel ya inmarap ed si Goliat. Diad tulong nen Jehova, atalo to iyan Filisteo! Aga alingo-lingoy David!—1 Sam. 17:​45-51.

8. No ondadalan tayod subok, antoy gawaen tayo pian lalon ombiskeg so tiwala tayod si Jehova? (Nengnengen met so litrato.)

⁸ Makpel tayo met ya arapen iray subok no tandaan tayo ya wadtan si Jehova ya akaparaan ya ontulong ed sikatayo. (Sal. 118:6) Ombiskeg so tiwala tayo ed si Jehova no isipen tayo ray ginawa to nensaman. Basam iray salaysay ed Biblia no panon ya inliktar nen Jehova iray lingkor to. (Isa. 37:​17, 33-37) Marakep met no basaen o bantayan mo iray report ed website tayo ya jw.org ta nanengneng mo ditan no panon ya tutulongan nen Jehova iray lingkor to natan. Tan isip mo met iramay panaon ya aliknam so tulong nen Jehova. Pero ompan ibagam, ‘Anggapo met ni  ginawa nen Jehova ya makapakelaw parad siak. Anggapoy nanonotan ko ya inliktar to ak ya singa onman ed si David nen inliktar tod oso tan leon.’ Pero diad tua, dakdakel lay ginawa nen Jehova parad sika. Singa bilang, sikato so nanggaway paraan pian magmaliw kayon sankaaro. (Juan 6:44) Tan no isipen mo, akin kasi et tuloytuloy ka nin makakapanlingkor ed si Jehova anggano dakdakel lan subok so dinadalan mo? On ta tutulongan ka na mabilay ya Dios! Kanian ipikasim ed si Jehova ya ipanonot tod sika iramay panaon ya inebatan to ray pikakasim, pinabiskeg to ka pian naanosan mo iray mair-irap ya situasyon, tan inter to no antoy kaukolan mo diad panaon ya kakkaukolan mo itan. No lanang mon isipen iratan, lalon ombiskeg so tiwalam ed si Jehova ya agto ka paulyanan anggan antoy nagawa.

9. Antoy nepeg tayon tandaan no ondadalan tayod subok? (Proverbio 27:11)

⁹ No ondadalan tayod subok, agtayo komon manpopokus ed sarili tayo. Manpokus tayo ed no antoy nalilikna nen Jehova. Imbaga na Diablo ya taynan tayoy Jehova no nanairapan ti la. (Job 1:​10, 11; basaen so Proverbio 27:11.) Gawam sirin so anggaay nayarian mo ya manmatoor ed si Jehova anggano nasusubok ka pian napatunayan mon matila so Diablo tan nipanengneng mo ya inar-arom si Jehova. Kasin problemam so pananap na pambilay? Kasin ngalngali anggapoy interesado ed teritorya yo? Kasin diad lugar yo et kontra so gobierno ed pandadayew tayo? Antokaman so subok ya dadalanen mo, tandaan mo ya tsansam itan pian napaliket moy puso nen Jehova. Tandaan mo met ya agto abuloyan ya nipaarap ka ed subok ya agmo nayarian. (1 Cor. 10:13) On, pabiskegen ka na mabilay ya Dios pian nasarag mo iray subok!

SAY MABILAY YA DIOS SO AKAULEY LAN MANGITER NA PREMYOM

10. Antoy gawaen na mabilay ya Dios parad saray lingkor to?

¹⁰ Maiter ya Dios si Jehova kanian segurado tayon ikdan ton ikdan na premyo iray lingkor  to. (Heb. 11:6) Natan ni labat et iikdan to tayo lay deen na nonot tan tutulongan to tayo ya magmaliw ya kontento. Tan diad arapen, awaten tayoy premyo ya bilay ya andi-anggaan. Talagan nailaloan tayo itan ta labalabay tan sarasarag to tayon ikdan na premyo. No lanang tayon isipen itan, ag-onkapuy so seseg tayo, ya singa saray matoor ya lingkor na Dios nensaman. Say sakey ya alimbawa et si Timoteo.—Heb. 6:​10-12.

11. Akin et ‘nansagpot tan nanseet’ si Timoteo parad kongregasyon? (1 Timoteo 4:10)

¹¹ Basaen so 1 Timoteo 4:10. ‘Nansagpot tan nanseet’ si Timoteo ta ‘say paniilaloan to et say mabilay ya Dios.’ Anto ray ginawa to parad si Jehova tan ed agagi? Ginawa toy anggaay nayarian to pian onaligwas diad panagbangat tan panagpaliwawa to ed kongregasyon, ya singa impaseseg ed sikato nen apostol Pablo. Binilin met nen Pablo ya ipanengneng toy maong ya alimbawa ed amin ya agagi, ugugaw man o maedad la. Tan diad tua, aliwan mainomay so asainmin to ta kaukolan ton simbawaen iray agagi ed kongregasyon ya mankaukolan na panangipetek. (1 Tim. 4:​11-16; 2 Tim. 4:​1-5) Ompan wala ray panaon ya agnanenengneng o agpapablien na arum ya agagi so pansasagpot nen Timoteo. Pero ayos labat, ta segurado si Timoteo ya si Jehova lay akauley ya ombales ed sikato.—Roma 2:​6, 7.

12. Akin et mansasagpot tan manseseet iray elder parad kongregasyon? (Nengnengen met so litrato.)

¹² Singa si Timoteo, kombinsido met iray elder natan ya nanenengneng tan papablien nen Jehova so amin ya pansasagpot da. Ishe-shepherding da ray agagi, manpaparaan iray paliwawa, tan idadaulo day panagpulong. Wala met iray elder ya ontutulong ed saray construction project tayo, tan say arum et manboboluntaryo ya ontulong ed saray agagin apektado na kalamidad. Wala met iray elder ya membro na Patient Visitation Group odino Hospital Liaison Committee. Sankanonot  na saray elder ya si Jehova so akanggawa na kongregasyon, aliwan too. Kanian iiter day sankaabigan da ed kada asainmin o kimey da ta segurado ira ya si Jehova lay akauley ya ombales ed sikara.—Col. 3:​23, 24.

13. Antoy nalilikna nen Jehova kada no nanenengneng ton mansasagpot tayo parad sikato?

¹³ Siempre, aliwan amin et nayarin magmaliw ya elder. Pero amin tayo et walan-walay niiter to ed si Jehova. Makakaliket si Jehova kada no iiter tayo so sankaabigan tayo ed sikato. Nanenengneng toy pandodonasyon tayo tan papablien to itan anggano melag labat so inter tayo. Pap-proud met si Aman Jehova kada no manpapakpel tayon mankomento diad aral anggano mabapbaing tayo. Tan seguradon makakaimis no agtayo la pinunuyan so lingo na arum tan no mabulbulos tayo ran peperdonaen. No say pakaliknam et singa datdaiset labat so nagagawaan mo parad si Jehova, agka mapaga ta papablien to iratan ya amin. Inar-aro to ka tan seguradoen ton walay premyom.—Luc. 21:​1-4.

MANSIANSIAN MAAPIT ED MABILAY YA DIOS

14. Akin et mas napakiwas tayon manmatoor ed si Jehova no malet ya kaaro so turing tayo ed sikato? (Nengnengen met so litrato.)

¹⁴ No lanang tayon sankanonot ya mabilay ya Dios si Jehova, mas napakiwas tayon manmatoor ed sikato. Ontan so ginawa nen Jose. Agto labay so manggaway imoral ta amta ton nasakitan toy Jehova no ontan so gawaen to. (Gen. 39:9) No lanang tayon manpipikasi tan manaaral na Biblia, naalig tayoy Jose. Sankanonot tayoy Jehova ed amin ya gagawaen tayo. No ontan so apasalan tayon gawaen, onelet lan onelet so pikakaaro tayo ed sikato. Tan singa si Jose, no malet ya kaaro so turing tayod si Jehova, agtayo labay ya sakitan so liknaan To.—Sant. 4:8.

15. Antoy agtayo aaligen ed saray Israelita? (Hebreo 3:12)

¹⁵ Diad kabaliktaran balet, no agtayo isipen ya mabilay ya Dios si Jehova, matmainomay tayoy makaarawi ed sikato. Ontan so agawad saray Israelita nen paarap irad Insipan ya Dalin.  Amta da ya walay Dios, pero sinmabi panaon ya agla ra manisian sarasarag nen Jehova ya iter so pankaukolan da. Say kuan da ni ingen: “Kasin walad sikatayo si Jehova odino andi?” (Exo. 17:​2, 7) Lapud ontan so inisip da, nanrebelde ra laingen ed Dios. Agtayo ra aaligen!—Basaen so Hebreo 3:12.

16. Antoy sakey ya subok ed pananisia tayo?

¹⁶ Diad tua, aliwan mainomay so mansiansian maapit ed si Jehova diad sayan mundo. Dakel so agmanisia ya walay Dios. Tan no siopa ra may manggagaway mauges, sikara ni ingen so maasenso so bilay da. No ontan so naoobserbaan tayo, talagan nasubok so pananisia tayo tan ompan naalig tayo ray Israelita. Anggano manisia tayon walay Dios, ompan agtayo la balet manisia ya sarasarag ton iter so pankaukolan tayo. Ontan so agawad samay nansulat na Salmo 73. Akaibeg ed saray manggagaway mauges ta mainawa so bilay da. Inisip to laingen ya anggapoy kakanaan na panlilingkor to ed Dios.—Sal. 73:​11-13.

17. Antoy gawaen tayo pian mansiansia tayon maapit ed si Jehova?

¹⁷ Antoy akatulong ed samay nansulat na Salmo 73 pian makapannonot na duga? Dinalepdep to no antoy nagawa ed saray mauges. (Sal. 73:​18, 19, 27) Tan inisip to met iray bendisyon ya nanaawat to lapud panlilingkor to ed Dios. (Sal. 73:24) Ontan met so gawaen tayo. Lanang tayon isipen iray bendisyon ya iiter nen Jehova ed sikatayo. Tan tepetan moy sarilim, ‘Anto la kasi bilay ko natan no agak manlilingkor ed si Jehova?’ No manpokus kad saray bendisyon, mas napakiwas kan manmatoor ed si Jehova. Tan singa samay nansulat na Salmo 73, nibagam met iya: “Parad siak, say iyasingger ed Dios et pankaabigan ko.”—Sal. 73:28.

18. Akin et anggapoy nepeg tayon pampagaan anggano anto ni tay nagawad arapen?

¹⁸ Antokaman so subok ya onsabi diad sayan kaunoran iran agew, anggapoy nepeg tayon pampagaan ta say Dios ya panlilingkoran tayo et “mabilay tan tuan Dios.” (1 Tes. 1:9) Lapud mabilay ya Dios si Jehova, nanenengneng toy amin ya dadalanen tayo tan manggawan-manggaway paraan pian natulongan to tayo. Agto pinaulyanan iray lingkor to nensaman, tan agto tayo met paulyanan natan. Asingsingger lay baleg a kairapan, pero anggapoy nepeg tayon takotan ta kaiba tayoy Jehova. (Isa. 41:10) On, manmatalek tayod si Jehova tan ibaga tayo: “Si Jehova so mananulong ko; agak ontakot.”—Heb. 13:​5, 6.