1, 2. (a) Anton pasakbay so angisalba ed bilay na dakel? (Nengnengen so litratod gapo na artikulo.) (b) Panon ya igigiya na Dios iray totoo to pian nisalbay bilay da?

“STOP, LOOK, LISTEN.” Dakel so bilay ya nisalba lapud saratan ya salita. Masulok ya 100 taon lay apalabas, akasulat iratan ed angkabaleg a karatula diad saray crossing na riles na tren diad North America. Antoy gagala? Pian agbastabasta ombaliw ed riles iray luluganan tan ag-ira nadumbo na mapmaples ya tren. On, wala ray nisalban bilay lapud inimano dan maong itan a pasakbay.

² Mas ni so gagawaen nen Jehova nen say pangipaskil na saray karatula bilang pasakbay. Sikatoy singa akaalagey ed arapan na totoo to ya ituturo toy dalan paonlad bilay ya anggapoy anggaan, tan iyaarawi to rad peligro. Ontan met, sikatoy singa maaron pastol ed pulok to, igigiya to ray karnero to ed dugan dalan tan papasakbayan to ra pian napaliisan da ray mapeligron dalan.​—Basaen so Isaias 30:20, 21.

3. Akin et ompapatey iray totoo?

³ Manlapu la nensaman, mangitatarya si Jehova na saray espisipikon  instruksion odino panangigiya. Singa bilang, malinew iray instruksion ya inter to diad hardin na Eden pian igiya iray totoo a manliket tan manbilay ya anggapoy anggaan. (Gen. 2:15-17) No inunor komon nen Adan tan Eva so panangigiya to, agkomon agawa iray makapaermen ya resulta​—say bilay ya napnoy kairapan tan manampot ed ipapatey ya anggapoy ilalo. Imbes ya unoren toy Dios, dinengel nen Eva so simbawa ya singa manlalapu ed sakey ya abeban klase na ayep. Insan dinengel met nen Adan so imbaga nen Eva, anta too labat. Pareho dan imbaliwala so panangigiya na maaron Ama ra. Lapud satan, amin ya totoo et ompapatey.

4. (a) Akin et kaukolan so kaaruman ya totontonen kayari na Delap? (b) Panon ya impatnag na anguman a situasyon so kanonotan na Dios?

⁴ Diad panaon nen Noe, angiter na panangigiya so Dios kanian nisalba so bilay. Kayari na Delap, espisipiko ya insebel nen Jehova so dala. Akin ya kaukolan itan? Lapud anguman lay situasyon. Inabuloyan la nen Jehova ya kanen na totoo so karne na ayep. Kanian kaukolan iray balon ganggan: “Say agyo labat nepeg a kanen et say karne a nandala, ta say dala et bilay.” (Gen. 9:1-4, NW) Napatnagan ed anguman ya situasyon no antoy panmoria na Dios ed bilay ya kayarian to. Bilang say Amalsa tan Manangiter na Bilay, sikato labat so makanepegan a manggawa na totontonen nipaakar ed bilay. Alimbawa, ingganggan to ray totoo ya agda papateyen so kapara dan too. Ipapasen na Dios ya sagrado so bilay tan dala, tan singilen toy sakey a too no sumlangen toy ganggan nipaakar ed bilay tan dala.—Gen. 9:5, 6.

5. Antoy aralen tayo, tan akin?

⁵ Imanoen tayo pay pigaran alimbawa no panon ya tuloytuloy ya mangiiter na panangigiya so Dios diad apalabas iran siglo. Napabiskeg ed saya so determinasyon tayon unoren so panangigiya nen Jehova a mamaarap ed balon mundo.

6. Akin et kaukolan na saray totoo na Dios iray ganggan ya niiter panamegley nen Moises, tan antoy nepeg ya gawaen na saray Israelita?

⁶ Diad panaon nen Moises, kaukolan so malinew ya totontonen ed dugan kondukta tan paraan na panagdayew. Akin ey? Lapud anguman lamet so situasyon. Masulok ya duaran siglo ya nambilay iray ilalak nen Jacob ed pananguley na Ehipto ya napnoy panagdayew ed saray inatey, idolo, tan arum ni ran sisiaen tan kagagawa ya mamapabanday ed Dios. Nen nibulos iray totoo na Dios ed maruksan pananguley na Ehipto, kaukolan iray balon totontonen. Aliwa lan aripen iray totoo na Dios noagta bulos la ra bilang nasyon ya igigiya na Ganggan nen Jehova. Base ed arum ya reperensya, say Hebreon salita parad “ganggan” et mitukoyan ed salitan “mangiwanwan, mangigiya, mangibangat.” Say Mosaikon Ganggan et singa padir ya namprotekta ed sikara manlapud abebbeban moralidad tan paraan na panagdayew na arum ya nasyon. Nen dinmengel ed Dios so Israel, abendisyonan so nasyon. Nen imbaliwala ra, mauges so nansumpalan da.​—Basaen so Deuteronomio 28:1, 2, 15.

7. (a) Ipaliwawa no akin ya angiter na panangigiya si Jehova ed saray totoo to. (b) Panon a nagmaliw a manangibangat na Israel so Ganggan?

⁷ Wala ni arum a rason no akin ya kaukolan so panangigiya. Ipapabitar na Ganggan so sakey ya importantin nagawa nipaakar ed linawa na Dios. Satan imay isabi na Mesias, si Jesu-Kristo. Impalinew na Ganggan ya saray Israelita et aliwan perpekto. Indanet met na satan ya kaukolan day dondon, say perpekton bagat ya sigpot a makabayar ed kasalanan. (Gal. 3:19; Heb. 10:1-10) Niarum ni, akatulong so Ganggan pian naprotektaan so linya na kapolian ya panlapuan na  Mesias tan pian nabidbir no sikatoy sinmabi la. On, say Ganggan et nagmaliw ya temporaryon “manangibangat” pian nitonton itayo ed Kristo.—Gal. 3:23, 24.

8. Akin et nepeg tayon paigiya ed saray prinsipyo ed Mosaikon Ganggan?

⁸ Bilang Kristiano, minabang tayo met ed saray totontonen ya walad Ganggan ya niiter ed nasyon na Israel. Panon? Sarag tayon imanoen a maong iray manunan prinsipyo ed Ganggan. Anggano ag-itayo la sakop na saraman a ganggan, sarag tayon ipasen iratan bilang napanmatalkan a giya ed inagew-agew a bilay tayo tan ed panagdayew tayo ed masanton Dios, si Jehova. Impaisulat to iratan a ganggan diad Biblia pian makaaral itayo, nigiya ed saray prinsipyo, tan naapresya tayo iray atagey ya estandarte ed moral parad saray Kristiano. Imanoen pay imbaga nen Jesus: “Nadngelan yo a nikuan, ‘Agka mikakalugoran.’ Balet ibagak ed sikayo a siopaman a naynay ya onlilinggis ed sakey a bii tekep na pampilpilalek ed sikato et akikalugoran la ed sikato dia ed puso to.” Kanian, aliwa labat lan say mismon pikakalugoran so paliisan tayo noagta ontan met ed pampilalek ya manggaway seksual ya imoralidad.—Mat. 5:27, 28.

9. Akin ya kaukolan so balon panangigiya na Dios?

⁹ Nen sinmabi Jesus bilang Mesias, kaukolan so balon panangigiya na Dios tan kaaruman iran paraan pian nipaamta so gagala nen Jehova. Kaukolan itan lapud anguman la lamet so situasyon. Nen 33 C.E., aliwa lan say nasyon na Israel so aabobonan na Dios noagta say Kristianon kongregasyon la.

10. Akin ya niiter iray balon ganggan ed Kristianon kongregasyon, tan antoy pidumaan na saraya ed ganggan ya niiter ed saray Israelita?

¹⁰ Legan na inmunan siglo, saray totoo na Dios ya mangiyaaplika ed saray uksoyan parad Kristiano et akaawat na balo odino pinalaknab iran instruksion ed panagdayew tan kondukta. Sarayan dedikadon lingkor na Dios et walad sakop na balon sipanan. Say Mosaikon Ganggan et niiter ed saksakey a bansa—say nasyon na Israel. Balet say espiritual ya Israel et tugyopen na totoon nanlapud nanduruman bansa tan kultura. Talagan “say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.” (Gawa 10:34, 35) Legan ya walad Insipan a Dalin iray Israelita, sikaray inggiya na Mosaikon Ganggan ya akaukit ed bato. Parad espiritual ya Israel balet, say “ganggan na Kristo” et manunan nibase ed saray prinsipyo ya akaukit ed puso. Onaplika ed saray Kristiano so “ganggan na Kristo” tan minabang irad satan, inerman so panaayaman da.​—Gal. 6:2.

11. Anton duaran aspekto na bilay na Kristiano so apektaen na “ganggan na Kristo”?

¹¹ Minabang a maong so espiritual ya Israel ed panangigiya na Dios panamegley na Anak to. Antis ya niletneg so balon sipanan, angiter si Jesus na duaran importantin ganggan. Say sakey et nipaakar ed panagpulong. Tan say sakey et nipaakar ed kondukta na papatumbok to tan no panon dan tratoen iray kapananisiaan da. Saratan ya ganggan et parad amin ya Kristiano, kanian onaplika itan ed amin ya tuan managdayew natan, balanglan say ilalo da et diad tawen odino diad dalin.

12. Antoy balo nipaakar ed panagpulong?

¹² Imanoen pay pangipulong ed maong a balita ya ingganggan nen Jesus ed saray papatumbok to. Say paraan tan kalaknab na panagpulong a kimey et balo nid saman. Diad akauna iran siglo, inawat iray totoo manlapud arum ya nasyon nen linma ra ed Israel ya manlingkor ed si Jehova. (1 Ara. 8: 41-43) Ontan so agawa antis ya ingganggan nen Jesus imay walad Mateo 28:19, 20. (Basaen.) Ingganggan to ray disipulo to ya “onla” ed amin a totoo. Nen Pentecostes 33 C.E., walay ebidensya ya inuman nen Jehova so paraan to, say pampulong ed interon mundo. Pinabiskeg na masanton espiritu to so manga 120 a membro na balon kongregasyon pian mamilagron makapansalita na nanduruman lenguahe ed saray Judio tan proselita. (Gawa 2:4-11) Insan linmaknab so teritorya anggad saray Samaritano. Tan nen 36 C.E., lalon linmaknab itan ed saray ag-asegat ya Gentil. Nayarin nibaga ya say kaukolan a pulongan et linmaknab manlapud “ilog” na saray Judio anggad nagmaliw a “dayat” na totoo.

13, 14. (a) Panon ya iyaplika so “balon ganggan” nen Jesus? (b) Antoy naaralan tayo ed alimbawa nen Jesus?

¹³ Imanoen tayo natan so paraan na panagtrato tayo ed saray kapananisiaan tayo. Inter nen Jesus so “balon ganggan.” (Basaen so Juan 13:34, 35.) Satan a ganggan et aliwa labat lan basta pangaro ed saray agagi diad inagew-agew ya kabibilay, noagta mabulos tayon iter so bilay tayo parad sikara. Ag-itan binitla ed Mosaikon Ganggan.​—Mat. 22:39; 1 Juan 3:16.

¹⁴ Si Jesus so sankaabigan ya alimbawa ed saya. Nansakripisyo lapud inaro to ray disipulo to. Lapud satan a panangaro et sikatoy inatey parad saray disipulo to tan akaparaan si Jesus ya manggawad satan. Tan iilaloan to ya mabulos met itan ya gawaen na saray disipulo to, pati sikatayo. Nayarin manirap odino ompatey ti ni ingen parad saray kaagian tayo.​—1 Tes. 2:8.

15, 16. Anto ray balon situasyon tayo natan, tan panon itayon igigiya na Dios?

¹⁵ Manlapu la nen tinuro so “matoor tan makabat ya aripen,” itataryaan nen Jesus iray totoo to na espiritual a naakan diad dugan panaon. (Mat. 24:45-47) Kaibad satan iray importantin panangigiya parad saray balon situasyon.

¹⁶ Manbibilay tayo ed ibabaga na Biblia ya “kaunoran iran agew,” tan onsublay lay kairapan ya agnin balot agawa. (2 Tim. 3:1; Mar. 13:19) Sakey ni, manlapud tawen et nibantak lay Satanas tan saray demonyo to diad dalin, kanian pakaskasi la ray manaayam diad dalin. (Apo. 12:9, 12) Niganggan itayo met ya sumpalen so importante tan malaklaknab a panagpulong a kimey, ya sabien iray nanduruman totoo tan lenguahe!

17, 18. Antoy nepeg ya reaksion tayo ed saray naaawat tayon panangigiya?

¹⁷ Kaukolan tayon usaren iray tulong ya itatarya na organisasyon na Dios parad panagpulong. Maliket mo kasin uusaren iratan? Kasin alerto ka ed saray panangigiya ya naaawat tayo diad saray aral no panon irayan epektibon usaren? Kasin ipapasen mo iratan ya instruksion bilang panangigiya ya nanlapud Dios?

¹⁸ Pian tuloytuloy tayon naawat so panamendisyon na Dios, kaukolan tayon imanoen a maong so amin ya panangigiya ya naaawat tayo diad Kristianon kongregasyon. No maunor tayo la natan, agti la nairapan ya unoren iray panangigiya legan na “baleg a kairapan,” ya maneral ed interon mauges a mundo nen Satanas. (Mat. 24:21) Kayari na satan, kaukolan tayo ray balon panangigiya parad pambilay ed balon mundo ya anggapo lan balot so impluensya nen Satanas.

19, 20. Anto ran lukot so nalukasan, tan antoy resulta?

¹⁹ Kaukolan na nasyon na Israel so balon panangigiya diad panangidaulo nen Moises, tan kaukolan met itan na Kristianon  kongregasyon ya igigiya na “ganggan na Kristo.” Ontan met, ipapaamtad sikatayo na Biblia ya wala ray nalukasan ya lukot ya mangigiyad sikatayo no panon so pambilay ed balon mundo. (Basaen so Apocalipsis 20:12.) Nayarin naamtaan ed sarayan lukot iray kakaukolanen nen Jehova ed saray totoo diad satan a panaon. No aralen iraya, naamtaan na amin ya totoo, kaiba la ray napaoli, so linawa na Dios parad sikara. Panamegley na sarayan lukot, seguradon onlaknab so pakatalos tayod kanonotan nen Jehova. Lapud igiya ira na onlalaknab ya pakatalos ed impuyan a Salita na Dios, pati saray naamtaan ni ed saray balon lukot, seguradon aroen, respetoen, tan igalang na saray manayam ed Paraison dalin so balang sakey. (Isa. 26:9) Isipen pa labat so programa na panagbangat ya gawaen diad panangigiya na Ari, si Jesu-Kristo!

²⁰ Saramay mangunor ed “saray akasulat ed saray lukot” et manbilay ya anggapoy anggaan. Permanentin isulat nen Jehova ed “lukot na bilay” iray kangaranan na saramay mansiansian matoor ed sikato anggad unor ya subok. Nayarin ontan so naawat tayon ilalo! Kanian no imanoen tayon maong so Salita na Dios, talosan so kabaliksan na satan parad sikatayo, tan unoren so panangigiya na Dios natan, nailaloan tayoy makaliktar ed baleg a kairapan, tan panliketan tayon aralen ed andi-anggaan so nipaakar ed sankarunongan tan maaron Dios tayo, si Jehova.​—Ecl. 3:11; Roma 11:33.