1-2. Base ed Gawa 8:27-31, 35-38, antoy amakiwas ed Etiopen opisyal ya manpabautismo?

KASIN labay moy manpabautismo pian magmaliw kan disipulo nen Kristo? Dakel so apakiwas ya manpabautismo lapud panangaro tan apresasyon da. Imanoen so alimbawa na opisyal ya nanlingkor ed reyna na Etiopia.

² Say Etiopen opisyal et nampabautismon tampol nen atalosan to so ibabaga na Kasulatan. (Basaen so Gawa 8:27-31, 35-38.) Antoy amakiwas ed sikato? Mapatnag ya papablien to lay Salita na Dios ta diad saman et babasaen to so libro na Isaias legan ya akalugan ed karwahe. Tan nen impaliwawa nen Felipe ed sikato so maong a balita, naapresya to so ginawa nen Jesus parad sikato. Balet akin ya linma iyan opisyal ed Jerusalem? Lapud wala lay panangaro to ed si Jehova tan linma diman pian mandayew. Mapatnag ya tinaynan la na sayan opisyal so abangonan ton relihyon tan pinili toy mikasakey ed nasyon ya dedikado ed tuan Dios. Satan ya panangaro to ed si Jehova so amakiwas met ed sikaton manpabautismo tan magmaliw ya disipulo nen Kristo.​—Mat. 28:19.

3. Antoy nayarin mangamper ed sakey ya manpabautismo? (Nengnengen so kahon ya “ Antoy Walad Pusom?”)

³ Say panangarom ed si Jehova so mamakiwas ed sikan manpabautismo. Balet nayarin amperen ka met na panangaro. Akin ey? Nia ray pigaran rason. Nayarin inar-arom iray aliwan Tasi ya kapamilyam tan kakaarom, tan ompan iisipen mo ya  busolen da ka la no manpabautismo ka. (Mat. 10:37) Odino wala ray gagawaen mo ya aglabay na Dios, tan ompan nanairapan kan itunda iratan. (Sal. 97:10) Odino manlapud inkaugaw mo et mimila kad saray selebrasyon ya walay koneksion tod palson relihyon, tan talagan mani-enjoy ka ed saratan. Kanian ompan nairapan ka ya agla mibiang ed saray selebrasyon ya aglabay nen Jehova. (1 Cor. 10:20, 21) Kaukolan mo sirin ya tepetan so sarilim: “Anto odino siopa so mas inarok?”

4. Anto so sankaimportantian ya rason no akin ya manpabautismo ka?

⁴ Seguradon dakdakel ya bengatla so aaroen tan aapresyaen mo. Singa bilang, anggan sanen agka ni iyaaralan na Saray Tasi nen Jehova, nayarin papanisiaan mo lay Biblia. Tan nayarin inarom met lay Jesus. Natan ya akabat mo la ray Tasi nen Jehova, nayarin naarom met la ra. Balet aliwan saratan so manunan mamakiwas ed sika ya idedika so sarilim ed si Jehova tan manpabautismo. Say sankaimportantian ya rason ya manpabautismo ka et lapud inar-arom si Jehova. No mas inarom si Jehova nen say anggan siopa odino anggan anton bengatla, anggapon balot so makaamper ed sikan manlingkor ed sikato. Say panangarom ed si Jehova so mamakiwas ed sikan manpabautismo tan satan met so ontulong ed sikan manmatoor diad panlingkor mod sikato.

5. Anto ran tepet so pantongtongan tayo?

⁵ Imbaga nen Jesus ya kaukolan tayon aroen si Jehova diad interon puso, kamarerwa, nonot, tan biskeg tayo. (Mar. 12:30) Antoy gawaen mo pian naaralan mon aroen tan respetoen si Jehova? No dalepdepen moy panangaro nen Jehova ed sika, napakiwas kan sikatoy aroen met. (1 Juan 4:19) Anto ni ray nalikna tan gawaen tayo no inaro tayoy Jehova? *

6. Base ed Roma 1:20, anto so sakey ya paraan pian naaralan moy nipaakar ed si Jehova?

⁶ Aralen so nipaakar ed si Jehova diad saray pinalsa to. (Basaen so Roma 1:20; Apo. 4:11) Dalepdep mo so karunongan nen Jehova ya nanengneng ed saray tanaman tan ayayep. Aral mo met so makapadinayew ya inkagawa na laman mo. (Sal. 139:14) Tan isip moy pakapanyari odino enerhiya ya inyan nen Jehova ed agew, ya sakey labat ed saray binilyon ya bitewen ya ginawa to. * (Isa. 40:26) No gawaen mo iratan, seguradon onaralem so respetom ed si Jehova. Balet aliwan magenap ya naamtaan moy karunongan tan pakapanyari nen Jehova. Pian onelet so panangarom ed si Jehova, kaukolan ya mas kabaten mo ni.

7. Pian onaralem so panangarom ed si Jehova, antoy nepeg mon panisiaan?

⁷ Nepeg mon panisiaan ya inar-aro ka nen Jehova. Kasin singa agmo napanisiaan ya say Amalsa ed tawen tan dalin et kabat to ka tan inar-aro to ka? No ontan so naliliknam, tandaan mo ya si Jehova et “ag-arawi ed balang sakey ed sikatayo.” (Gawa 17:26-28) “Uusisaen [to] so amin a kapusoan,” tan insipan to ya “no sikatoy anapen mo, abuloyan to kan naromog mo,” ya singa imbaga nen David ed si Solomon. (1 Awa. 28:9) Diad tua, say rason no akin ya manaaral ka natan na Biblia et lapud ‘inyasingger ka nen Jehova ed sikato.’ (Jer.  31:3) No natatalosan moy amin ya ginawa nen Jehova parad sika, onaralem so panangarom ed sikato.

8. Panon mon nipanengneng ya aapresyaen moy panangaro nen Jehova?

⁸ Say sakey ya paraan ya nipanengneng mon aapresyaen moy panangaro nen Jehova et diad pitongtong mod sikato panamegley na pikakasi. Mas onelet so panangarom ed Dios no ibagam ed sikato iray problemam, tan ibalikas moy pisasalamat mo ed amin ya gagawaen to parad sika. Tan no nanengneng mon eebatan to iray pikakasim, onelet so pankaaro yo. (Sal. 116:1) Napaneknekan mo ya talagan natatalosan to ka. Balet ta pian mas onapit ka ed si Jehova, importante ya natalosan mo so panagnonot to. Tan kaukolan mon amtaen no antoy labay ton gawaen mo. Naamtaan mo itan no aralen moy Salita to, say Biblia.

9. Panon mon nipanengneng ya papablien moy Biblia?

⁹ Pablim so Salita na Dios, say Biblia. Diad Biblia labat nabasa so katuaan nipaakar ed si Jehova tan say gagala to parad sika. Ipapanengneng mo ya papablien moy Biblia no inagew-agew mo itan ya babasaen, no ipaparaan moy leksion ya iyaral ed sika, tan no iyaaplikam iray nanaaralan mo. (Sal. 119:97, 99; Juan 17:17) Kasin walay eskedyul mo ya manbasa na Biblia? Kasin tutumboken mo itan ya eskedyul, tan inagew-agew mon babasaen so Biblia?

10. Anto so sakey ya rason no akin ya espisyal so Biblia?

¹⁰ Say sakey ya rason no akin ya espisyal so Biblia et lapud nabasa ditan iray salaysay na saray aktual ya akanengneng ed saray ginawa nen Jesus. Ditan labat so pakabasaan na suston impormasyon nipaakar ed ginawa nen Jesus parad sika. Legan mon aaralen iray imbaga tan ginawa nen Jesus, mas napakiwas kan mikaaro ed sikato.

11. Antoy gawaen mo pian onaralem so panangarom ed si Jehova?

¹¹ Aral mon aroen si Jesus. No inarom si Jesus, mas naarom si Jehova. Akin? Lapud inalig nen Jesus iray kualidad nen Ama to. (Juan 14:9) Kanian legan ya mas nakakabat  moy Jesus, mas natalosan tan naapresyam si Jehova. Isip mo pay panangasi nen Jesus ed saray ipapasen na arum ya abebbeba—saray mairap-bilay, mansasakit, tan saray pakaskasi. Isip mo met iray inter ton praktikal ya simbawa tan say liket ya aliknam nen inyaplikam iratan ed bilay mo.​—Mat. 5:1-11; 7:24-27.

12. Legan mon mas nakakabat si Jesus, napakiwas kan gawaen so anto?

¹² Lalom ya naaro si Jesus no dalepdepen mo so impansakripisyo to pian naperdona iray kasalanan tayo. (Mat. 20:28) No natatalosan mo ya sikatoy mabulos ya inatey parad sika, napakiwas kan magbabawi tan kerewen so panamerdona nen Jehova. (Gawa 3:19, 20; 1 Juan 1:9) Legan ya onaaralem so panangarom ed si Jesus tan si Jehova, seguradon onapit so liknaan mo ed saramay mangaaro met ed sikara.

13. Anto so sakey a paraan ya tulongan ka nen Jehova?

¹³ Aral mon aroen so pamilya nen Jehova. Posiblin agnatalosan na saray kapamilyam tan datin kakaarom no akin ya labay mon idedika so sarilim ed si Jehova. Ompan kontraen da ka ni ingen. Tulongan ka nen Aman Jehova panamegley na espiritual a pamilyam​—saray agagi ed kongregasyon. No mansiansia kan maapit ed espiritual ya pamilyam, naliknam so panangaro tan iter dad sika so suporta ya kaukolan mo. (Mar. 10:29, 30; Heb. 10:24, 25) Diad ilabas na panaon, nayarin manlingkor lanlamang ed si Jehova iray kakanayon mo tan unoren da met iray estandarte to.​—1 Ped. 2:12.

14. Antoy apaneknekan mo nipaakar ed saray prinsipyo nen Jehova ya singa ibabaga na 1 Juan 5:3?

¹⁴ Pablim iray estandarte nen Jehova tan iyaplikam iratan. Antis mon akabat si Jehova, nayarin walay sarilim ya estandarte no antoy duga tan aliwa, balet natan et apaneknekan mo la ya mas maong iray estandarte nen Jehova. (Sal. 1:1-3; basaen so 1 Juan 5:3.) Isip mo pa iray bilin na Biblia parad saray asawan lalaki, asawan bibii, atateng, tan ananak. (Efe. 5:22–6:4) Legan mon iyaaplika iratan, kasin nagmaliw ya mas maliket so pamilyam? Sanen uunoren mo la iray prinsipyo nipaakar ed panagpili na kakaaro, kasin nagmaliw ya mas maong so ugalim? Kasin mas maliket ka? (Pro. 13:20; 1 Cor. 15:33) Segurado ya say ebat mo ed saratan et on.

15. Antoy gawaen mo no kaukolan moy tulong diad pangiyaplika ed saray prinsipyo na Biblia?

¹⁵ No maminsan, ompan agmon tampol natalosan no panon mon iyaplika iray nanaaralan mon prinsipyo ed Biblia. Atan so rason no akin ya uusaren nen Jehova so organisasyon to ya mangitarya na saray publikasyon ya base ed Biblia ya makatulong ed sikan ibiig so duga tan aliwa. (Heb. 5:13, 14) No basaen tan aralen mo iratan ya publikasyon, nanengneng mo ya talagan mausar iratan tan niyaplikam ed inagew-agew ya bilay mo, kanian mas onapit ka ed organisasyon nen Jehova.

16. Panon ya oorganisaen nen Jehova iray totoo to?

¹⁶ Aral mon aroen tan suportaan so organisasyon nen Jehova. Inorganisa nen Jehova iray totoo to diad saray kongregasyon. Say Anak ton si Jesus so ulo na amin ya kongregasyon. (Efe. 1:22; 5:23) Tinuro nen Jesus so melag a grupo na alanaan ya lalaki a mangidaulo ed pangorganisa na kimey ya ipapagawa to. Tinawag nen Jesus iyan grupo bilang “matoor tan makabat ya aripen,” tan seseryosoen da so responsabilidad da ya pakanen tan protektaan ka ed espiritual. (Mat. 24:45-47) Say sakey ya paraan ya aasikasoen ka na matoor  ya aripen et seseguroen da ya wala ray kualipikadon elder ya mangigiya tan manprotekta ed sika. (Isa. 32:1, 2; Heb. 13:17; 1 Ped. 5:2, 3) Mabulos iray elder ya mansakripisyo pian asikasoen tan ligliwaen ka, tan tulongan da ka ya mas onapit ed si Jehova. Balet say sakey ya importantin nitulong da et say pangipasal ed sika ya ibangat so arum nipaakar ed si Jehova.​—Efe. 4:11-13.

17. Base ed Roma 10:10, 13, 14, akin ya ipapaamta tayo ed arum so nipaakar ed si Jehova?

¹⁷ Tulongan so arum ya aroen met si Jehova. Imbaga nen Jesus ed saray papatumbok to ya ibangat da ed arum so nipaakar ed si Jehova. (Mat. 28:19, 20) Ompan gawaen itan na sakey pian labat nipanengneng ya uunoren to itan ya ganggan. Balet legan ya onaaralem so panangarom ed si Jehova, naliknam met imay alikna nen apostol Pedro tan Juan sanen imbaga ra: “Agkami nayarin ontundan mansalita nipaakar ed saray anengneng tan nadngel mi.” (Gawa 4:20) Seguradon maliket tayo no walay natulongan tayo ya mangaro met ed si Jehova. Isip mo pay liket nen Felipe sanen nampabautismo imay Etiope ya pinulongan to! No aligen moy Felipe tan unoren moy ganggan nen Jesus ya manpulong, papaneknekan mo ya labay moy magmaliw ya sakey ed saray Tasi nen Jehova. (Basaen so Roma 10:10, 13, 14.) Kanian nayarin itepet mo met imay intepet na Etiopen opisyal: “Antoy makasbel ed pakabautismoan ko?”​—Gawa 8:36.

18. Antoy aralen tayo diad ontumbok ya artikulo?

¹⁸ Say pampabautismo so sankaimportantian ya desisyon ya gawaen mo ed bilay mo. Lapud seryoso itan, kaukolan mon nonoten a maong no antoy nalalanor ed satan. Antoy nepeg mon naamtaan nipaakar ed bautismo? Antoy nepeg mon gawaen antis tan kayarim ya manpabautismo? Naebatan iratan ya tepet diad ontumbok ya artikulo.