1. Base ed Mateo 24:9, akin et aliwa lan makapabigla no busolen itayo na totoo?

PINALSA itayo nen Jehova ya labalabay tayoy naaro tan mangaro. Kanian no walay manbusol ed sikatayo, normal labat ya nasakitan so liknaan tayo. Tan ompan natatakot tayo ni ingen. Alimbawa, oniay imbaga nen Sister Georgina ya taga Europe: “Nen 14 so edad ko, binusol ak nen nanay ko ta pinilik so manlingkor ed si Jehova. Ansakisakit iman. Naisip ko ingen ya mauges ak amo ya anak.” * Oniay imbaga met nen Danylo: “Natatakot ak tan nakakasian koy sarilik nen binugbog tan ininsulto ak na saray sundalo. Insan da imbagan pateyen da ak ta sakey ak ya Tasi nen Jehova.” Makapaermen no oniay nagawa, pero agla iya makapabigla ta imbaga nen Jesus ya busolen itayo na totoo.—Basaen so Mateo 24:9.

2-3. Akin et kabusol na mundo iray papatumbok nen Jesus?

² Akin et kabusol na mundo iray papatumbok nen Jesus? On ta singa si Jesus, “[ag-itayo] kabiangay mundo.” (Juan 15:17-19) Rerespetoen tayoy gobierno na totoo, pero si Jehova labat so pangiiteran tayoy dayew tan galang kanian agtayo mibabali ed politika, onsasaludo ed bandira, odino mangakansion na national anthem. Bibidbiren tayo met ya si Jehova labat so walaay karapatan ya manuley ed amin ya totoo. Pero kukuestionen itan nen Satanas tan saray “ilalak” to. (Gen. 3:1-5, 15) Ipupulong tayo met ya say Panarian na Dios labat so solusyon ed amin ya problema ed mundo tan asingsingger lan deralen na sayan Panarian so amin ya gobierno na totoo. (Dan. 2:44; Apo. 19:19-21) Satan ya maong ya balita et labalabay ya dengelen  na saray mauyamo, balet kabusol na saray mauges.—Sal. 37:10, 11.

³ Say sakey nin rason no akin ya kabusol itayo na mundo et lapud uunoren tayoy ganggan na Dios. Wala ray kagagawa ya ibabaga na Dios ya mauges, pero duga ed pakanengneng na totoo. Singa bilang, ibabaga na dakel ya totoo ya aliwan mauges so manggawa na imoral, anta satan so rason no akin ya dineral na Dios so syudad na Sodoma tan Gomorra! (Jud. 7) Lapud uunoren tayoy ibabaga na Biblia, babalawen itayo na totoo. Ibabaga dan istrikto tayon maong!—1 Ped. 4:3, 4.

4. Anto ran kualidad so makatulong ed sikatayo pian nitepel tayoy pambusol na mundo?

⁴ Antoy makatulong pian nitepel tayoy pambusol tan panag-insulto na totoo? Importantin mabiskeg so pananisia tayod si Jehova tan kombinsido tayo ya tulongan to itayo. Say pananisia tayo et singa samper ya sarag ton erepen so “amin a mandarlang a pana na samay mauges.” (Efe. 6:16) Pero, aliwa labat ya pananisia so kaukolan tayo. Kaukolan tayo met ya ipanengneng so panangaro. Akin ey? On ta say aro et “agmainomay a manpasnok” tan “itetepel toy amin a bengatla.” (1 Cor. 13:4-7, 13) Pantongtongan tayo natan no panon ya say panangaro ed si Jehova, say aroan tayon sanaagi, tan say panangaro tayo ed saray mamubusol ed sikatayo et makatulong pian nitepel tayoy pambusol na sayan mundo.

5. Antoy agawaan nen Jesus lapud inaro toy Ama to?

⁵ Diad samay labi antis ya pinatey si Jesus na saray mamubusol ed sikato, oniay imbaga to ed saray papatumbok to: “Inarok so ama, [kanian] gagawaen ko so ingganggan ed siak na Ama.” (Juan 14:31) Inar-aron maong nen Jesus si Aman Jehova, kanian asarag ton amin iray graben subok ya dinalan to. No inaro tayoy Jehova, ombiskeg so liknaan tayo, kanian nasarag tayo met so anggan anton subok.

6. Base ed Roma 5:3-5, antoy nalilikna na saray lingkor nen Jehova legan dan itetepel so pambusol na sayan mundo?

⁶ Manlapu la nensaman, asarag na saray lingkor nen Jehova ya itepel so pambusol na mundo lapud panangaro dad sikato. Singa bilang, saray apostol et ingganggan na korte suprema na saray Judio ya ontunda la ran manpulong, pero intultuloy dan ‘inunor so Dios bilang manuley imbes ya saray totoo’ lapud inaro day Jehova. (Gawa 5:29; 1 Juan 5:3) Dakel met ya agagi natan so papairapen na saray gobierno balet manmamatoor ira lapud inar-aro da met si Jehova. Diad tua, imbes ya nadismaya tayo, ipapasen tayo ni ingen ya pribilehyo so pangitepel na pambusol na sayan mundo.—Gawa 5:41; basaen so Roma 5:3-5.

7. Antoy gawaen tayo no busolen itayo na kapamilya tayo?

⁷ Sakey ed saray sankairapan ya subok et no busolen itayo na mismon kapamilya tayo. No naamtaan dan manaaral tayoy Biblia, ompan isipen dan aliway alooban tayon relihyon o natatapis tayo la. (Ikompara so Marcos 3:21.) Ompan insultoen o maltratoen da tayo ni ingen. Pero agla iya makapabigla ta impasakbay la nen Jesus ya say manbusol ed sakey a too et say “mismon pamilya to.” (Mat. 10:36) Pero anggan aliwliway pantrato dad sikatayo, agtayo ra bubusolen. Ta no inaro tayoy Jehova, inaro tayo met so kapara tayon too. (Mat. 22:37-39) Balet anggano inaro tayo ray kapamilya tayo, agtayo dapat ibabaliwala iray prinsipyo o ganggan na Biblia pian labat napaliket so arum.

8-9. Antoy akatulong ed sakey ya sister pian agto taynan so katuaan anggano kontran maong so nanay to?

⁸ Si Georgina ya abitla nen niman et agto tinaynan so katuaan anggano kontran maong so nanay to. Oniay inistorya to: “Bansag  kamin nan-Bible study nen nanay ko. Pero kayari anem bulan, nen labay ko lay miaral, anguma-uman so panagtrato dad siak. Naamtaan ko ya wala ra manayay nakakatongtong dan apostata tan uulit-uliten nen nanay ko iramay akusasyon da ed saray Tasi pian nakombinsi ak met. Iinsultoen, igugunot, tan titikelen da ak, tan imbabantak da ray literatura ya uusaren ko. Pero nandesisyon ak nin siansia ya manpabautismo nen 15 so edad ko. Lapud labay nen nanay ko ya ontunda ak lan manlingkor ed si Jehova, impanayam da ak ed abung ya kaibak iray kaparak ya tinedyer, ya say arum ed sikara et drug addict tan kriminal. Mas mairap ya itepel so subok no say onkokontra et amay mismon too ya mangaro komon tan mangasikaso ed sika.”

⁹ Panon itan ya asarag nen Georgina? Oniay imbaga to: “Diad samay agew ya aliwliwa lay panagtrato nen nanay kod siak, kakkasumpal kon binasa so interon Biblia. Kanian kombinsido ak ya nalmok lay katuaan. Tan aliknak ya maap-apit ak ed si Jehova. Lanang ak ya manpipikasi ed sikato tan eebatan to ray pikakasik. Nen manaayam ak ed samay abung ya kaibak so arum ya tinedyer, walay sister ya itatagar to ak ya man-personal study diad abung da. Tan papasesegen ak na saray agagi diad saray aral. Inturing da ak ya kapamilya ra. Anengneng kon mismo ya mas mabiskeg si Jehova nen saray mamubusol ed sikatayo, anggan siopa ni ra.”

10. Antoy nepeg tayon tandaan no ondadalan tayod subok?

¹⁰ Insulat nen apostol Pablo ya ‘anggapon balot so makapangisian ed sikatayo ed panangaro na Dios a walad si Kristo Jesus a Katawan tayo.’ (Roma 8:38, 39) Kanian anggano ondalan tayod saray subok, tandaan tayo ya wadtan ya lanang si Jehova pian onalalay tan mamabiskeg ed sikatayo. Tan singa naeksperiensya nen Georgina, usaren nen Jehova iray agagi ya ontulong ed sikatayo.

11. Panon ya akatulong ed saray disipulo nen Jesus imay panangaron indeskribe to ed Juan 15:12, 13? Mangiter na alimbawa.

¹¹ Diad samay labi antis ya ompatey si Jesus, binilin to lamet iray disipulo to ya manaaroan ira. (Basaen so Juan 15:12, 13.) Amta ton makatulong so masakripisyon aro pian mansiansia ran nankakasakey tan nasarag day pambusol na mundo. Imanoen so alimbawa na saray agagi ed Tesalonica. Manlapu la nen abuo so kongregasyon ditan, dakdakel so kinmontra ed sikara. Pero nansiansia ran matoor tan agbinmetel so aroan da. (1 Tes. 1:3, 6, 7) Pinaseseg ira nen apostol Pablo ya itultuloy dan  ipanengneng so panangaro ya “mas nagkalalo ni.” (1 Tes. 4:9, 10) Lapud panangaro, napakiwas iran ligliwaen iramay maneermen tan tulongan iramay makapuy. (1 Tes. 5:14) Mapatnag ya inunor da itan ya bilin nen Pablo, ta kayari sakey taon, diad samay komaduan sulat to, kinomendaan to ra tan imbaga ton: “Ombabaleg so panangaro yo ed sakey tan sakey.” (2 Tes. 1:3-5) On, ag-ira adaeg na subok tan panamairap lapud inaro day sakey tan sakey.

12. Legan na guerra, panon ya impanengneng na saray agagi ed sakey ya bansa ya inar-aro day sakey tan sakey?

¹² Makaaral tayo ed eksperiensya nen Danylo, ya abitla nen niman. Anggano walay guerra ed lugar da, tuloytuloy iran mimiaral nen asawa to, gagawaen day anggaay nayarian dan manpulong, tan inanabang dad agagi no antoy walad sikaran naakan. Pero sakey agew, wala ray sundalon linmad abung da. “Pipiliten da ak ya onekal ak lan Tasi,” so kuan nen Danylo. “Nen imbagak ya agko labay, binugbog da ak tan tinutukan da ak na paltog, insan da pinaputok pian nataktakot ak. Antis iran inmalis, imbaga dan ompawil ira ta rape-en da kunoy asawak. Nen naamtaan itan na agagi, impatnubang da kamin tampol ed tren ya paonlad arum ya baley. Alikliknak so panangaro da, agkon balot man nalingwanan. Kasabi mid samay baley, tinulongan kami na saray agagi diman. Inikdan da kami naakan, inyanapan da ak na trabaho, pati napanayaman mi. Kanian nen wala ray sinmasabin agagi ya tinakasan da met so guerra ed lugar da, sikami met so tinmulong tan pinatuloy mi ra.” Nanengneng tayo ed onia ran eksperiensya ya baleg so nagawaan na aroan tayon sanaagi pian nitepel tayoy pambusol na mundo.

13. Antoy nitulong na masanton espiritu pian nituloy tayoy manlingkor ed si Jehova anggano bubusolen itayo na arum?

¹³ Imbaga nen Jesus ed saray papatumbok to ya nepeg dan aroen iray mamubusol ed sikara. (Mat. 5:44, 45) Diad tua, aliwa yan mainomay. Pero sarag tayo itan ya gawaen diad tulong na masanton espiritu na Dios. Kaiba ed bunga na masanton espiritu so aro, anos, kaabigan, inkaulimek, tan kontrol ed sarili. (Gal. 5:22, 23) No walad sikatayo iratan ya kualidad, nitepel tayoy pambusol. Diad tua, dakel ed saray datin onkokontra ed sikatayo et linmemek so puso ra lapud anengneng day maong ya ugali na asawa, anak, o kaabay da ya Tasi. Say arum ed sikara ingen et kaagian tayo la natan! Kanian no wala ray mamubusol ed sika lapud manlilingkor ka ed si Jehova tan nanairapan ka ya aroen ira, kerew kay masanton espiritu to. (Luc. 11:13) Tan manmatalek ka ya no antoy imbaga nen  Jehova ya duga, atan so sankaabigan ya gawaen.—Pro. 3:5-7.

14-15. Panon ya akatulong ed si Yasmeen so Roma 12:17-21 pian ipanengneng so panangarod asawa to anggano sinali ton patundaen ed panlilingkor to?

¹⁴ Imanoen so alimbawa nen Yasmeen ya taga Middle East. Nen nagmaliw ya Tasi, inisip na mister to ya aliway alooban ton relihyon tan aloko labat. Kanian sinali ton patundaen ed panlilingkor tod Dios. Lanang ton iinsultoen si Yasmeen. Impatawag to met iray kakanayon, lider na relihyon, pati espiritista pian konsiensiaen si Yasmeen tan imbaga ra ya walay mauges ya nagawa no ag-onekal ya Tasi. Tan imbaga da met ya dederalen toy pamilya da. Aminsan ingen ya aral et nan-iskandalo imay mister to tan ininsulto to ray agagi. Mabetbet ya onaakis si Yasmeen ta aliwliwa so panagtrato ed sikato na asawa to.

¹⁵ Diad aral, papasesegen na agagi si Yasmeen. Sikatoy pinanonotan na saray elder ya iyaplika to may walad Roma 12:17-21. (Basaen.) “Nairapan ak,” so kuan nen Yasmeen. “Pero nampikasi ak ed si Jehova ya tulongan to ak komon, tan ginawak so anggaay nayarian kon iyaplika so ibabaga na Biblia. Kanian no gagalaen nen asawak so mandutak ed kusina, manlinis ak. No insultoen to ak, malumanay nin siansiay iyebat ko. Tan no mansakit, asikasoen ko.”

16-17. Antoy naaralan mo ed alimbawa nen Yasmeen?

¹⁶ Abendisyonan si Yasmeen lapud intultuloy ton impanengneng so panangaro ed asawa to. Oniay imbaga nen Yasmeen: “Mas pantitiwalaan ak la natan nen asawak lapud amta ton agak balot mantila. Marespeto lan ondedengel no relihyon so pantotongtongan mi. Tan imbaga to ya agto ak la kolkolen anggano mandumaan so relihyon mi. Agto ak met la babawalan ya miaral. Mas mareen tan mas maliket lay ulopan min dua. Onsabi komoy panaon ya awaten to met lay katuaan pian nakaibak ya manlingkor ed si Jehova.”

¹⁷ Ipapanengneng na eksperiensya nen Yasmeen ya say aro et “itetepel toy amin a bengatla, . . . maniilalo ed amin a bengatla, mansusungdo ed amin a bengatla.” (1 Cor. 13:4, 7) Anggano grabe tan ansakisakit so epekto na pambusol, mas mabiskeg so panangaro ta sarag ton palemeken so anaw-awet ya puso. Tan no itultuloy tayon ipanengneng so panangaro, napapaliket tayoy puso nen Jehova. Pero panon to no agmanguman iray mamubusol ed sikatayo? Walan nin siansiay rason tayon manliket. Anto iratan?

18. Akin et maliket tayo nin siansia anggano walay mamubusol ed sikatayo?

¹⁸ Imbaga nen Jesus: “Maliket kayo no busolen  kayo na totoo.” (Luc. 6:22) Siempre, agtayo labay ya walay manbusol ed sikatayo. Anggapo tay toon labay toy napairap. No ontan sirin, akin et maliket tayo nin siansia anggano walay mamubusol ed sikatayo? Walay taloran rason. Unona, amta tayo ya napapaliket tayoy Jehova no itetepel tayoy pambusol na mundo. (1 Ped. 4:13, 14) Komadua, nasusubok so pananisia tayo kanian mas lalo itan ya ombibiskeg. (1 Ped. 1:7) Tan komatlo, awaten tayo so agnaparaan ya premyo, say bilay ya andi-anggaan.—Roma 2:6, 7.

19. Akin et malikeliket nin siansia iray apostol anggano pinairap ira na saray mamubusol ed sikara?

¹⁹ Kayari na inkioli nen Jesus, aliknan mismo na saray apostol imay liket ya imbaga to. Anggano pinairap ira na saray mamubusol ed sikara, malikeliket ni ran siansia. Akin ey? On lapud impasen dan pribilehyo so “napabanday nisengeg ed ngaran [nen Jesus].” (Gawa 5:40-42) Mas mabiskeg so panangaro dad si Jesus nen say takot dad saray mamubusol ed sikara. Tan lapud satan ya panangaro, ag-ira tinmundan nampulong. Dakel met ya agagi natan so matoor ya manlilingkor anggano amayamay so subok ed bilay da. Kombinsido ira ya agbalot lingwanan nen Jehova so amin ya sagpot tan panangaro ya impanengneng da parad ngaran to.—Heb. 6:10.

20. Antoy aralen tayo ed ontumbok ya artikulo?

²⁰ Anggad wadia ni yan sistema, tuloytuloy itayon busolen na sayan mundo. (Juan 15:19) Pero anggapoy nepeg tayon takotan. Akin ey? On, ta “pabiskegen . . . tan protektaan” nen Jehova iray matoor ya lingkor to, tan atan so aralen tayo ed ontumbok ya artikulo. (2 Tes. 3:3) Kanian itultuloy tayon aroen si Jehova, saray agagi, tan anggan saray mamubusol ed sikatayo. No ontan so gawaen tayo, mansiansia so pankakasakey tayo, ombiskeg so pananisia tayo, napagalangan tayoy Jehova, tan napaneknekan tayo ya say aro et mas mabiskeg nen say pambusol.