1-2. Akin et makaaral iray elder ed alimbawa nen apostol Pablo?

 INAR-ARON maong nen apostol Pablo iray agagi. Sikatoy akaparaan ya mansakripisyo parad sikara. (Gawa 20:31) Kanian naar-aro met na agagi si Pablo. Walay inkagawa ya “manak-akis” iray elder ed Efeso nen nampatanir lay Pablo ed sikara tan naamtaan da ya aman lay sampot ya pannenengneng da. (Gawa 20:37) Singa si Pablo, inar-aro met na saray makukulin elder iray agagi tan akaparaan iran mansakripisyo parad kongregasyon. (Fil. 2:16, 17) Pero siempre, wala met iray subok ya aarapen na saray elder. Antoy makatulong pian nasarag da iratan ya subok?

² Makatulong no aralen na saray elder so alimbawa nen Pablo. (1 Cor. 11:1) Too met labat si Pablo tan wala met iray kakapuyan to. Inamin to ingen ya no maminsan et naiirapan ya gawaen no antoy duga. (Roma 7:18-20) Tan diad tua, dakel ya irap so dinalan to. Pero, agsinmuko si Pablo tan nansiansian maliket ed panlilingkor to. Makatulong sirin so alimbawa to ed saray elder pian nasarag da ray subok tan agnabalang so liket da ed panaglingkor. Panon dan naalig so alimbawa to?

3. Anto ray pantongtongan tayo ed sayan artikulo?

³ Pantongtongan tayo ed sayan artikulo so apatiran subok ya inarap nen apostol Pablo tan aarapen met na saray elder natan: (1) no panon dan niyuna so panagpulong anggano dakel so responsabilidad da, (2) no panon iran magmaliw ya mas maaron pastol, (3) no wala ray lalabanan dan kakapuyan, tan (4) no nanenengneng da iray kakapuyan na agagi. Pantongtongan tayo no anto ray ginawa nen Pablo pian nasarag to iratan ya subok, tan no panon ya naalig na saray elder so alimbawa to.

4. Akin et subok ed saray elder so pangidaulo ed panagpulong ya kimey?

⁴ Akin et subok itan? Responsabilidad na saray elder ya idaulo  so panagpulong a kimey. Pero subok itan no maminsan, ta aliwan satan labat so gagawaen da. Singa bilang, sikara so maslak ya chairman no aral ed midweek tan managkondukta na Panag-aral na Kongregasyon ed Biblia (o CBS). Manpaparaan met iray paliwawa. Ipapasal da met iray ministeryal a lingkor, tan lanang dan papasesegen iray agagi. (1 Ped. 5:2) Say arum ya elder et akaasain ed panagpaalagey tan panagmintina na Kingdom Hall tan arum nin pasilidad na organisasyon tayo. Pero siempre, say sankaimportantian ya kimey tayon amin—anggan saray elder—et say pangipulong na maong a balita.—Mat. 28:19, 20.

5. Akin et balibalin alimbawa si Pablo diad panagpulong?

⁵ Antoy ginawa nen Pablo? Oniay bilin nen Pablo ya nabasa ed Filipos 1:10: “Seguroen yo komon no anto ray mas importantin bengatla.” Inyaplikan mismo itan nen Pablo. Sineguro to ya manuna ed bilay to so kimey ya panagpulong. Atan so nampokusan to diad loob na dakel ya taon. Sikatoy nampulong diad saray publikon lugar tan diad kabkaabungan. (Gawa 20:20) Pero aglabat manpupulong si Pablo ed oras tan agew ya inyeskedyul to. Anggan anton oras tan anggan iner so kulaan to, sasamboten toy kada pagkakataon ya makapanpulong. Singa bilang, legan ton aalagaren so pigaran agagi diad Atenas, pinulongan toy grupo na de-aral ya totoo. Makapaliket ta nagmaliw ya Kristiano so arum ed sikara! (Gawa 17:16, 17, 34) Diad tua, anggano apriso si Pablo, pupulongan to nin siansia iray guardia, sundalo, saray ombibisita ed sikato, tan arum ni.—Gawa 28:16-24; Fil. 1:13, 14.

6. Antoy ginawa nen Pablo pian naipasal toy arum?

⁶ Sinambot met nen Pablo so kada pagkakataon pian mangipasal na arum. Lanang ya mangitatagar na agagi ya mila ed sikato diad ministeryo. Singa bilang, diad unonan impanbiahe to bilang misionero et intagar toy Juan Marcos, insan intagar toy Timoteo diad komaduan biahe to. (Gawa 12:25; 16:1-4) Seguradon imbangat ira nen Pablo no panon ya asikasoen so kongregasyon, no panon ya pastolan iray agagi, tan no panon so epektibon pambangat.—1 Cor. 4:17.

7. Antoy nepeg ya gawaen na saray elder pian naunor da may bilin nen Pablo ya nabasa ed Efeso 6:14, 15?

⁷ Antoy naaralan na saray elder? Dapat akaparaan ya manpulong iray elder ed amin ya pagkakataon, aliwa labat ya diad kabkaabungan. (Basaen so Efeso 6:14, 15.) Singa bilang, sarag day man-informal witnessing ed saray katrabaho ra, o legan iran mititindaan. No bilang ta kaiba irad construction project na organisasyon tayo, sarag dan pulongan iray supplier o arum nin ka-transaksion da, tan anggan saray kakaabay. Naalig met na saray elder si Pablo no itagar tan ipasal da ray  agagi ed ministeryo, anggan saray ministeryal a lingkor.

8. No maminsan, antoy nepeg ya gawaen na sakey ya elder pian magmaliw ya balanse?

⁸ Anggano busy ya maong iray elder ed responsabilidad da ed kongregasyon odino diad sirkito, agda dapat papaulyanan so panagpulong. Lapud dakel so kimey ya kaukolan dan sumpalen, ompan kaukolan day ontanggi ed arum ya asainmin pian mansiansia ran balanse. Siempre, antis iran ontanggi, ipikasi tan nonoten da nin maong. Maabig no itepet na elder ed sarili to, ‘No awaten ko iya, wala ra kasi mas importantin bengatla ya napaulyanan ko?’ Singa bilang, ompan napaulyanan to lay sinimban family worship da, matalag lan makapanpulong, tan agto la naipasal iray ananak to ed ministeryo. No sika may too ya irap toy ontanggi ed asainmin, tandaan mo ya amta nen Jehova so situasyon mo. Tan no bilang et ontanggi ka, natatalosan to ya labay moy magmaliw ya balanse.

9. Antoy sakey nin subok ed saray elder natan?

⁹ Akin et subok itan? Dakdakel so probleman aarapen na saray lingkor na Dios natan. Mair-irap so bilay legan na sayan kaunoran iran agew, kanian kaukolan tayon amin so panamaseseg, suporta, tan ligliwa. Tan no maminsan, wala ray agagi ya kaukolan ya bilinen ta aliwa lay aarapen da. (1 Tes. 5:14) Siempre, agnasolusyonan na saray elder so amin ya problema tayo. Pero gagawaen day anggaay nayarian dan pasesegen tan protektaan so kongregasyon, ta amta ra ya labay nen Jehova ya naasikason maong iray karnero to. Antoy makatulong ed saray elder pian nagawaan da nin siansia itan anggano dakdakel so responsabilidad da?

10. Base ed 1 Tesalonica 2:7, panon so impangasikaso nen Pablo ed saray lingkor nen Jehova?

¹⁰ Antoy ginawa nen Pablo? Lanang ya kokomendaan nen Pablo iray agagi pian napaseseg to ra. Maabig no ontan met so gawaen na saray elder. Dapat mauyamo tan maar-aro so pantrato ra ed saray karnero nen Jehova. (Basaen so 1 Tesalonica 2:7.) Imbaga nen Pablo ya inar-aro to ray agagi tan inar-aro ira nen Jehova. (2 Cor. 2:4; Efe. 2:4, 5) Labalabay to ran kaiba tan inturing to ran kakaaro. Imbaga to met ed sikara iray kakapuyan tan pakakatakotan to pian nalikna ra ya walay tiwala tod sikara. (2 Cor. 7:5; 1 Tim. 1:15) Pero aliwan saray problema to so nampokusan to, noagta sankanonot to met no panon ton natulongan iray agagi.

11. Antoy rason akin et sisimbawaen nen Pablo iray agagi?

¹¹ Wala ray panaon ya sisimbawaen nen Pablo iray agagi ta kaukolan iran nabilin. Binilin to ra aliwan lapud nasyosyodotan ed sikara, noagta lapud inar-aro to ra tan agto labay ya makapuy so pansumpalan da. No mansisimbawa,  seseguroen to ya natatalosan da no antoy labay ton ibaga, tan interesado ni ingen no kasin inunor day bilin to. Singa bilang, nen sinulatan to ray agagi ed Corinto, walay direkta tan ambelat ya simbawa to ed sikara. Insan imbaki toy Tito ed kongregasyon da, ta labay ton naamtaan no antoy reaksion da ed samay simbawa to. Seguradon malikeliket si Pablo nen imbalita nen Tito ya inunor day bilin to.—2 Cor. 7:6, 7.

12. Antoy gawaen na saray elder pian napabiskeg da iray agagi?

¹² Antoy naaralan na saray elder? Singa si Pablo, dapat walay panaon na saray elder ed saray agagi. Singa bilang, maabig no masakbay iran onsabi ed aral pian makapi-istoryaan ni rad agagi tan napaseseg da ra. Diad tua, baleg lay nagawaan na anggan pigaran minuto labat ya pamaseseg da ed saray agagi. (Roma 1:12; Efe. 5:16) Marakep no say sakey ya elder et usaren toy Salita na Dios pian napabiskeg to ray agagi tan nalikna ran inar-aro ira nen Jehova. Maabig met no sikaton mismo et ibaga ton inar-aro to ra, insan lanang to ran kumustaen tan komendaan. No walay agi ya kaukolan a bilinen, lanang ton ibabase so simbawa to diad Biblia. Anggano direkta so pambilin to, seseguroen to ya maar-aro so pangibaga to pian mas mainomay ya awaten na agi so simbawa to.—Gal. 6:1.

13. Antoy posiblin epekto ed sakey ya elder no walay lalabanan ton kakapuyan?

¹³ Akin et subok itan? Aliwan perpekto iray elder. Nalilingo met ira ya singa sikatayo. (Roma 3:23) Nandurumay reaksion na saray elder no nalingo ra. Singa bilang, ompan say sakey ya elder et nadismayan maong ed sarili to no manpokus labat ed saray lingo tan kakapuyan to. Diad kabaliktaran balet, ompan ibaliwala to labat iratan, kanian agto nanengneng ya wala manayay kaukolan ton umanen ed sarili to.

14. Base ed Filipos 4:13, panon ya akatulong so inkamapaabeba nen Pablo pian nalabanan to ray kakapuyan to?

¹⁴ Antoy ginawa nen Pablo? Mapaabeban inawat nen Pablo ya agto nalabanan iray kakapuyan to no mandepende labat ed sarili ton biskeg. Amta to ya kaukolan toy tulong nen Jehova pian nalabanan to iratan. Nen aliwa nin Kristiano si Pablo, sikatoy kontran maong ed saray disipulo nen Jesus tan pinairap to ra. Pero nen Kristiano la, pagbabawian to iman ya ginawa to, tan ginawaan toy anggaay nayarian ton manguman. (1 Tim. 1:12-16) Diad tulong nen Jehova, sikatoy nagmaliw ya maar-aro, makasi, tan mapaabeban pastol. Siempre, naeermenan si Pablo kada no naiisip to iray aliwliwan ginawa to. Pero aliwa lan satan so  sankanonot to, ta amta ton pinerdona la nen Jehova. (Roma 7:21-25) Anggano tanggap tod sarili to ya aliwan perpekto, nansagpotan to nin siansia ya umanen so ugali to, tan nantiwala ed tulong nen Jehova pian nasumpal toy asainmin to.—1 Cor. 9:27; basaen so Filipos 4:13.

15. Antoy nepeg ya tandaan na sakey ya elder no walay lalabanan ton kakapuyan, tan antoy nepeg ton gawaen?

¹⁵ Antoy naaralan na saray elder? Tinuro nen Jehova iray elder ya mangasikaso ed kongregasyon anggano amta to ya wala ray kakapuyan da. Pero nepeg dan tandaan ya labay nen Jehova ya bidbiren dan nalilingo met ira, tan pansiansiaen dan akasulong ed sikara so balon personalidad. (Efe. 4:23, 24) No manpi-personal study so sakey ya elder, nepeg ton usisaen so sarili to tan nengnengen to no anto ni ray ugali tan kagagawa to ya kaukolan ton umanen. No gawaen to itan, sikatoy tulongan nen Jehova pian maliket ton nasumpal so amin ya responsabilidad to.—Sant. 1:25.

16. Antoy posiblin reaksion na sakey ya elder no manpokus ed lingo o kakapuyan na agagi?

¹⁶ Akin et subok itan? Naynay ya nakakatongtong tan nakakaiba na saray elder iray agagi kanian ompan mainomay dan nanengneng iray kakapuyan o lingo ra. No pinunuyan itan na saray elder, ompan onsyodot tan makapasnok ira, o husgaan da la ray agagi. Ontan so labay nen Satanas ya nagawa. Imbaga nen Pablo ya pakana itan na Diablo pian naderal so pankakasakey na kongregasyon.—2 Cor. 2: 10, 11.

17. Anggano wala ray kakapuyan na agagi, antoy nampokusan nen Pablo?

¹⁷ Antoy ginawa nen Pablo? Nampokus si Pablo ed saray maong ya ugali na agagi. Diad tua, amta to pa iray kakapuyan da. Ta no maminsan, anggan sikaton mismo et nasasakitan ed saray ibabaga tan gagawaen da. Pero nia so tinandaan nen Pablo: No say sakey et nalingo, agto labay ya ibagan mauge-uges lan too. Agto kinuestion so motibo na agagi ta inar-aro to ra. No bilang ta nalingo ra, tatalosan to ra. Say iisipen to la et nagawaan da met lanlamang so duga, basta walay ontulong ed sikara.

18. Antoy naaralan mo ed ginawa nen Pablo nen abalitaan toy situasyon nen Euodias tan Sintique? (Filipos 4:1-3)

¹⁸ Imanoen so ginawa nen Pablo nen abalitaan toy situasyon nen Euodias tan Sintique. Kaaro to irayan agagi diad kongregasyon na Filipos. (Basaen so Filipos 4:1-3.) Ompan walay barongan da kanian agla ra mantotongtong. Ag-ira nampasnokan nen Pablo tan agto ra hinusgaan. Amta to ya matoor tan makulikulin manpulong irayan bibii, kanian inar-aro ira nen Aman Jehova. Sankanonot nen Pablo iray maong ya ugali ra tan baleg so tiwala to ya naayos da lanlamang so problema ra. Kanian imbes ya pansakitan to ni na ulo so situasyon da, pinaseseg to ran mikareenan. Lapud agto hinusgaan si Euodias tan Sintique, ag-aderal so  pikakaaro tod sikara tan agla adamay so interon kongregasyon.

19. (a) Antoy nepeg ya pampokusan na saray elder pian agda husgaan iray agagi? (b) Diad sayay litrato, antoy naaralan mo ed sayay elder?

¹⁹ Antoy naaralan na saray elder? Sikayo ran elder, say nengneng yo et say maabig ya ugali na saray agagi. Kada sakey et walay kakapuyan to, pero seguradon walan-wala met so maong ya ugali to. (Fil. 2:3) Siempre, no maminsan et kaukolan ya bilinen na saray elder so sakey ya agi pian nauman toy aliwliwan ugali o kagagawa to. Anggano walay makapasyodot ya imbaga o ginawa na sakey ya agi, agdapat huhusgaan na saray elder tan aliwan satan so pampokusan da. Singa si Pablo, say dapat ya pampokusan da et say panangaro to yan agi ed si Jehova, say panmamatoor to, tan say pansasagpot ton gawaen so duga. No oniay gawaen na saray elder, maong iran alimbawa ed saray agagi kanian walay aroan tan pankakasakey diad kongregasyon.

20. Antoy marakep ya gawaen na saray elder pian tuloytuloy dan naalig so alimbawa nen Pablo?

²⁰ Sikayo ran elder, marakep no i-personal study yo so alimbawa nen Pablo. Makatulong iray reperensya ya walad Watch Tower Publications Index diad heading ya “Paul,” insan diad subheading ya “example for elders.” Legan mon aaralen iray artikulo ya akalista ditan, tepetan moy sarilim, ‘Antoy gawaen ko pian naalig koy Pablo tan maliket kon nagawaan so responsabilidad ko bilang elder?’

21. Makaseguro iray elder ed anto?

²¹ Sikayo ran elder, tandaan yo ya amta nen Jehova ya aliwa kayon perpekto. Say importante ed sikato et matoor kayo. (1 Cor. 4:2) Aliketan si Jehova ed makuli tan matoor ya impanlingkor nen Pablo. Tan seguradon naliliketan met ed amin ya gagawaen yo parad sikato tan ed saray agagi. On, agan balot lingwanan nen Jehova so amin ya sakripisyo tan “aro ya impanengneng yo parad ngaran to diad panlilingkor yo ed saray masanto.”—Heb. 6:10.