1-2. Antoy maslak ya nagagawa no walay manpabautismo, tan antoy pantongtongan tayo ed sayan artikulo?

 ASALIM lan inobserbaan iray kandidato parad bautismo? Di ba diad sampot na paliwawa ed bautismo, walay duaran tepet ya ebatan da. Sankalikas so determinasyon da ed maksil ya ebat da ya “On!” Malikeliket tan pap-proud iray kapamilya tan kakaaro da. Kaimwas na saray nampabautismo, anggad layag so imis da, tan narengel moy maksil ya tipakan. Diad tua, kada simba et nilibo so manpapabautismo bilang dedikadon Tasi nen Jehova.

² Sika ey? Kasin iisipen mo met lay manpabautismo? No on, espisyal ka diad pakanengneng nen Jehova. Ta diad binilyon ya totoo ed mundo, sakey ka ed saray “manaanap” ed sikato. (Sal. 14:1, 2) Parad sika iyan artikulo, anggan antoy edad mo. Pero sikatayo ran abautismoan la et natulongan met na sayan artikulo pian ombiskeg so determinasyon tayon panlingkoran si Jehova diad anggad angga. Pantongtongan tayo sirin so taloran rason no akin ya say sakey et labay ton panlingkoran si Jehova.

3. Akin et inar-aro na saray lingkor nen Jehova so katuaan tan say inkatunong? (Salmo 119:128, 163)

³ Imbaga nen Jehova ed saray lingkor to ya nepeg dan ‘aroen so katuaan.’ (Zac. 8:19) Binilin met nen Jesus iray papatumbok to ya pansagpotan dan unoren so matunong ya estandarte na Dios. (Mat. 5:6) Labay ton ibaga, gawaen da no antoy duga, maong, tan malinis ed pakanengneng nen Jehova. Sika ey, kasin inarom so katuaan tan say inkatunong? Segurado kami ya “on” so ebat mo. Kabusol moy katilaan tan amin ya mauges ya kagagawa. (Basaen so Salmo 119:128, 163.) Saramay matila et aaligen day Satanas, say manuley na sayan mundo. (Juan 8:44; 12:31) Mangikakalat na tila si Satanas ta labay ton paugesen so masanton ngaran nen Jehova.  Gagawaen to la itan manlapu nen tinilaan toy Adan tan Eva. Pinapaway ton matila si Jehova tan wala kunoy isisiblet To ed sikara. (Gen. 3:1, 4, 5) Anggad natan et sasamalan nen Satanas so isip tan puso na totoo pian napanisia to ra ya aliwan maaro so Dios. No say sakey et agto ‘inaro so katuaan,’ mainomay ya natukso nen Satanas ya manggawa na mauges.—Roma 1:25-31.

4. Antoy prueba ya si Jehova so “Dios na katuaan”? (Nengnengen met so litrato.)

⁴ Si Jehova so “Dios na katuaan.” (Sal. 31:5) Labalabay ton ibangat so katuaan ed saramay mangaaro ed sikato. Agto labay ya naloko ira nen Satanas. Ibabangat met nen Jehova iray lingkor to ya magmaliw ya matua tan matunong. Lapud satan, walay respeto dad sarili da tan mareen so nonot da. (Pro. 13:5, 6) Kasin alikas mo itan ed sarilim nen manaaral ka lay Biblia? Apatunayan mo ya parad pankaabigan mo lanlamang iray ganggan nen Jehova. (Sal. 77:13) Kanian apakilos ka ya unoren so matunong ya estandarte to. (Mat. 6:33) Tan seguradon labay mon ipaamta ed arum so katuaan pian nanengneng da ya aliwa iramay paratang nen Satanas ed si Jehova. Panon mon nagawaan itan?

5. Panon mon napruebaan ya talagan inar-arom so katuaan tan inkatunong?

⁵ Nanengneng ed kabibilay mo no talagan inar-arom so katuaan tan say inkatunong. Anggano agka mansalita, singa ibabagam ya: “Si Jehova so bibirbiren kon Manuley kanian sikato so unoren ko. Amtak tan inar-arok so katuaan kanian agak balot manpaloko ed si Satanas.” Antoy gawaen mo pian nipanengneng mo ya atan so paninindigan mo? Ipikasim tan i-promise mod si Jehova ya idedikam lay sarilim ed sikato tan panlingkoran mo ya anggad angga. Insan manpabautismo ka pian naamtaan na amin so desisyon mo. On, no talagan inar-arom so katuaan tan say inkatunong, napakilos ka ya manpabautismo.

6. Base ed Salmo 45:4, akin et inar-aro tayoy Jesu-Kristo?

⁶ Akin et inar-arom si Jesu-Kristo? Imanoen so pigaran rason ya nabasad Salmo 45:4. (Basaen.) Inar-aro nen Jesus so katuaan tan inkatunong, tan imbangat toy kapaabebaan. Kanian no inarom so katuaan tan say inkatunong, seguradon inar-arom met si Jesus. Diad impanaral moy Biblia, naamtaan mo ya makpel ton indepensa so katuaan tan say  inkatunong. (Juan 18:37) Panon balet ya imbangat nen Jesus so kapaabebaan?

7. Antoy makapabilib ed kapaabebaan nen Jesus?

⁷ Mapaabeba si Jesus. Lanang ton ipapaarap so dayew ed si Aman Jehova, aliwan diad sarili to. (Mar. 10:17, 18; Juan 5:19) Antoy epekto to ’tan ed sika ey? Seguradon mas naar-arom si Jesus tan labay mon aligen so alimbawa to. Akin et mapaabeba si Jesus? On ta inar-aro tan aaligen toy Ama to, say sankamapaabebaan ed amin. (Sal. 18:35; Heb. 1:3) No dalepdepen moy alimbawa nen Jesus tan no panon ton aaligen so ugali nen Jehova, lalon onasingger so liknaan mod sikato.

8. Akin et inar-arom si Jesus bilang Ari tayo?

⁸ Inar-aro tayoy Jesus bilang Ari tayo. Sikato lay sankamaongan ya Ari. Si Jehova ya mismo so angipasal tan nampili ed sikato. (Isa. 50:4, 5) Isip mo pay panangaro tan impansakripisyo nen Jesus parad totoo. (Juan 13:1) On, inar-aro ka na Ari tayo, kanian duga met labat ya aroen mo. No aroen moy Jesus tan unoren mo ray ganggan to, ituring to kan kaaro. (Juan 14:15; 15:14, 15) Baleg ya kagalangan ya ituring kan kaaro na Anak na Dios!

9. Antoy pamparehoan na bautismo na saray Kristiano tan say bautismo nen Jesus?

⁹ Ingganggan nen Jesus iray papatumbok to ya manpabautismo ira. (Mat. 28:19, 20) Sikaton mismo et nampabautismo. Diad tua, walay pidumaan na impanpabautismo to ed bautismo na saray papatumbok to. (Nengnengen so kahon ya “ Antoy Pandumaan na Bautismo nen Jesus tan say Bautismo na Saray Papatumbok To?”) Pero wala met so pamparehoan da. Nampabautismo si Jesus bilang simbolo ya sikatoy manpokus la ed panggawa na linawa o panlabayan na Ama to. (Heb. 10:7) Manpapabautismo met iray papatumbok to bilang simbolo ya indedika da lay sarili da ed si Jehova tan say sankaimportantian lad bilay da et say panggawa na panlabayan na Dios. Kanian no say sakey et manpabautismo, aaligen toy alimbawa nen Jesus.

10. Panon mon napruebaan ya inar-arom si Jesus?

¹⁰ Amta mi ya manisia kan si Jesus so Anak na Dios tan sikato so pinili nen Jehova ya man-ari ed sikatayo. Akabkabat mo lay Jesus. Antam ya sikatoy mapaabeba tan aaligen toy amin ya ugali na Ama to. Antam met iray ginawgawa to nen wadiad dalin. Pinakan to ray narasan, pinabiskeg toy liknaan na saray onkakapuy, tan pinaabig to ray mansasakit. (Mat. 14:14-21) Nanenengneng mo met natan iray ebidensya ya sikato so mangidadaulo ed kongregasyon. (Mat. 23:10) Tan bilang Ari ed Panarian na Dios, dakdakel ni gawaen to diad arapen. Amin iratan et prueba ya inar-aro itayo nen Jesus. Panon mo met ya napruebaan ya sikatoy inar-arom? Alig moy alimbawa to. (Juan 14:21) Naalig moy alimbawa to no idedikam so sarilim ed si Jehova tan manpabautismo ka.

11. Anto so sankaimportantian ya rason no akin ya say sakey et manpabautismo, tan akin?

¹¹ Anto so sankaimportantian ya rason no akin ya say sakey et manpabautismo? Unong ed si Jesus, say sankaimportantian ya ganggan et: “Arom si Jehova a Dios mo ed interon pusom tan interon kamarerwam tan interon nonot mo tan interon biskeg mo.” (Mar. 12:30) Kasin inarom si Jehova diad interon pusom, kamarerwam, nonot mo, tan biskeg mo?

12. Akin et inar-arom si Aman Jehova? (Nengnengen met so litrato.)

¹² Agtayo naupotan na rason no akin ya inar-aro tayo si Jehova. Singa bilang, sikato  so lapuan o “subol na bilay” tan inter tod sikatayo so “amin a maong tan sankaabigan a regalo.” (Sal. 36:9; Sant. 1:17) On, amin ya panliliketan mod bilay mo et nanlapud maite-iter tan maar-aron Dios tayo.

13. Akin et espisyal ya regalo nen Jehova so dondon?

¹³ Espisyal ya regalo nen Jehova ed sikatayo so dondon. Akin et ontan so nibaga tayo? Pian naebatan itan, isip mo pay malmalet ya ulopan nen Jehova tan nen Jesus. Imbaga nen Jesus ya sikatoy inar-aro na Ama to tan inar-aro to met so Ama to. (Juan 10:17; 14:31) Bilyon-bilyon ya taon la ran saniba, kanian seguradon close iran maong. (Pro. 8:22, 23, 30) Kanian isip mo pay alikna nen Jehova nen anengneng ton maniirap tan manpapanabos so Anak to. Seguradon asakisakitan pero intepe-tepel to lapud inar-aro to ka tan say amin ya totoo. Ontay lay panangaro to ed sikatayo ya kaya ton iter so Anak to bilang dondon pian manbilay tayo na andi-anggaan. (Juan 3:16; Gal. 2:20) No dalepdepen mo iraya, mas naar-arom si Jehova.

14. Antoy kekerewen met labat nen Jehova ed sikatayo, tan panon mo itan ya nagawaan?

¹⁴ Legan mon nakakabat si Jehova, mas naar-arom tan lalon onasingger so liknaan mod sikato. Kasin labay mon onelet ni so pankakaaro yo anggad angga? Diad tua, atan so labay nen Jehova ya nagawa. Antoy gawaen  mo balet ey? Ibabaga na Biblia ya say kekerewen to met labat et amay paliketen moy puso to. (Pro. 23:15, 16) No talagan inarom si Jehova, dapat aliwa labat ya anggad salita. Ipanengneng mod kabibilay mo ya sikatoy inarom tan labay mon paliketen. (1 Juan 5:3) Seguradon agmo itan pagbabawian!

15. Panon mon nipanengneng ed si Jehova ya sikatoy talagan inar-arom?

¹⁵ Panon mon nipanengneng ya talagan inar-arom si Jehova? Unona, ipikasim tan i-promise mod si Jehova ya idedikam lay sarilim ed sikato. Espisyal itan ya pikakasi. (Sal. 40:8) Insan, manpabautismo ka pian naamtaan na amin so dedikasyon mo ed si Jehova. Singa apantongtongan ed gapo, say bautismo et malikeliket tan importantin agew ed bilay na sakey ya lingkor na Dios. Onggapo lay ‘balon chapter’ na bilay mo ta manlapud satan ya agew et manbilay ka la parad si Jehova, aliwa lan parad sarilim. (Roma 14:8; 1 Ped. 4:1, 2) Siempre, seryoso tan ambelat itan ya desisyon. Pero atan so mangiter ed sika na sankaabigan ya bilay.

16. Base ed Salmo 41:12, antoy iregalo nen Jehova ed saramay uusaren day bilay da parad sikato?

¹⁶ Si Jehova so sankamaiteran ed amin. No walay inter mod sikato, balesen ton balesen, ya mas dakel ni nen samay inter mo. (Mar. 10:29, 30) Ipapaseguro to ya no sikatoy panlingkoran mo, magmaliw kan maliket tan walay direksion na bilay mo. Tan sayan ‘balon chapter’ na bilay mo ya onggapo ed pampabautismom et posiblin mantultuloy ya anggad balon mundo. Napanlingkoran moy inar-arom ya Ama diad anggad angga. Seguradon kada agew et lalon onelet so aroan yon sanama. On, anggad mabilay si Jehova, tuloytuloy ka met ya manbilay.—Basaen so Salmo 41:12.

17. Antoy nairegalom ed si Jehova ya anggapo nid sikato?

¹⁷ No idedikam so sarilim ed si Jehova tan manpabautismo ka, diad tua et reregaloan moy Amam ed tawen. Isip mo pay amin ya marakep ya walad sika tan amin ya maliket ya agawgawad bilay mo. Amin iratan et regalo tod sika. Wala met kasi nairegalom ed sikato anggano gawa toy interon uniberso? On  wala—say matoor ya panlingkor mo ed sikato. (Job 1:8; 41:11; Pro. 27:11) Atan lay sankarakepan ya napangusaran moy bilay mo. On, no inar-arom si Jehova, talagan napakilos ka ya manpabautismo.

18. Anto ray itepet mod sarilim?

¹⁸ Antoy iyebat mo no walay mantepet ed sika, Planom lay manpabautismo? Sika so makaebat lapud personal itan ya desisyon. Pero makatulong no tepetan moy sarilim, ‘Akin ya tua et agak ni abautismoan anggad natan?’ (Gawa 8:36) Isip mo pa imay taloran rason ya apantongtongan tayo. Unona, inar-arom so katuaan tan say inkatunong. Komadua, inar-arom si Jesu-Kristo. Tan say komatlo tan sankaimportantian, inar-arom si Aman Jehova. Natan tepetan moy sarilim, ‘Kasin labalabay ko lan onsabi so panaon ya amin ya totoo et matua tan matunong? Kasin si Jesu-Kristo so bibidbiren kon Ari tan labay kon aligen so alimbawa to? Kasin labay kon panlingkoran si Jehova pian napaliket koy puso to?’ No “on” so ebat mo ed saratan ya tepet, anto sirin so rason akin et agka ni manpabautismo? Anto ni aalagaren mo?—Gawa 16:33.

19. Akin et agka dapat manaalangan ya manpabautismo? Mangiter na ilustrasyon. (Juan 4:34)

¹⁹ No medyo manaalangan ka ni ya manpabautismo, isip mo may imbaga nen Jesus ya nabasad Juan 4:34. (Basaen.) Apansin mo ya inkompara nen Jesus ed naakan so panggawa na linawa na Ama to? Akin kasi? Di ba no agtayo mangan, onkapuy tayo. Mamangan tayo ta parad pankaabigan tayo itan. Amta nen Jesus ya parad pankaabigan tayo met no gawaen tayoy amin ya ipapagawa nen Jehova ed sikatayo. Agbalot mangiter si Jehova na ganggan ya pakarisgoan tayo. Kanian nen ingganggan to ya nepeg ya manpabautismo iray lingkor to, parad pankaabigan da itan sirin. (Gawa 2:38) On, parad pankaabigan mo so pampabautismom kanian agka komon manaalangan. Di ba, agka manalangan ya mangan no pinarungoan da kay masarap tan healthy ya naakan? Anggapo sirin so rason ya manalangan kan manpabautismo.

20. Antoy aralen tayo diad onsublay ya artikulo?

²⁰ Akin et wala ray agda ni labay so manpabautismo? Say maslak ya ebat da et, “Agak ni ready.” Normal met labat itan, ta diad tua, say dedikasyon tan bautismo so sankaimportantian ya desisyon ya gawaen na sakey. Kanian duga met labat ya pan-isipan mo itan ya maong. Kaukolay panaon tan sagpot pian magmaliw kan kualipikado. No bilang ta goal moy manpabautismo, antoy gawaen mo la natan pian magmaliw kan kualipikado tan nai-ready’m so sarilim? Atan so pantongtongan tayo diad onsublay ya artikulo.