AARALEN YA ARTIKULO 14
“Diad Saya et Naamtaan na Amin a Sikayo Iray Disipulok”
“Diad saya et naamtaan na amin a sikayo iray disipulok—no manaaroan kayo.”—JUAN 13:35.
KANSION 106 Bayuboan so Kualidad ya Aro
DIAD SAYAN ARTIKULO a
Antoy epekto ed saray aliwan Tasi nen naobserbaan day aroan na saray Tasi nen Jehova? (Nengnengen so parapo 1)
1. Antoy pambiliban na saramay first time day miaral ed Kingdom Hall? (Nengnengen met so litrato.)
IMADYIN mo pay sanasawa ya first time day miaral ed Kingdom Hall na Saray Tasi nen Jehova. Dakel so nan-welcome ed sikara, tan anengneng da ya talagan close iray agagi kanian manbilib ira. Nen pasempet la ra, oniay imbaga na asawan bii ed mister to, ‘Duma ray Tasi, awa? Anlemew so liknaan kod sikara.’
2. Antoy sakey ya rason akin et wala ray ontutundan manlingkor ed si Jehova?
2 Talagan nikadkaduma so aroan na saray Tasi nen Jehova. Pero siempre, aliwa tayon perpekto. (1 Juan 1:8) Tan diad tua, no diman tayo mas nakakabat iray agagi, diman tayo met mas nanengneng iray kakapuyan tan lingo ra. (Roma 3:23) Makapaermen ta wala ray tinmundan nanlingkor ed si Jehova ta agapol ira ed lingo na arum.
3. Panon ya nabidbir iray tuan papatumbok nen Jesus? (Juan 13:34, 35)
3 Imanom pa lamet so pinagkateman teksto na sayan artikulo. (Basaen so Juan 13:34, 35.) Panon kunon nabidbir na totoo no siopa ray tuan papatumbok nen Kristo? Imbaga nen Jesus ya manaaroan ira; agto imbaga ya dapat et perpekto ira. Kasin naimanom met ya agto imbagan: ‘Diad saya et naamtaan yo a sikayo iray disipulok’? Say imbaga to: “Diad saya et naamtaan na amin a sikayo iray disipulok.” On, say aroan na saray tuan disipulo nen Jesus et napansin na amin ya totoo, anggan saramay agto disipulo.
4. Anto ray posiblin iisipen na saray aliwan Tasi?
4 Ompan oniay iisipen na saray aliwan Tasi: ‘Akin et panangaro so palatandaan na saray tuan Kristiano? Panon ya impanengneng nen Jesus so panangaro ed saray apostol to? Tan panon tayon naalig so alimbawa nen Jesus?’ Anggano Tasi tayo la, marakep no isipen tayo met so ebat ed saratan ya tepet pian nipanengneng tayo nin siansia so panangaro anggano nanenengneng tayo ray lingo tan kakapuyan na agagi.—Efe. 5:2.
AKIN ET PANANGARO SO PALATANDAAN NA SARAY TUAN KRISTIANO?
5. Ipaliwawa imay imbaga nen Jesus ya nabasad Juan 15:12, 13.
5 Imbaga nen Jesus no akin ya espisyal so aroan na saray tuan papatumbok to. (Basaen so Juan 15:12, 13.) Imanoen so ingganggan tod sikara: “Manaaroan kayo a singa ed impangarok ed sikayo.” Antoy labay ton ibaga? Impaliwawa to ya aya may klase na panangaro ya mabulos kan mansakripisyo parad arum. Atan so manpakilos ed sakey ya Kristiano ya iter ni ingen so bilay to parad kapara ton Kristiano no nakaukolan. b
6. Anto ray pigaran teksto ed Biblia ya mangipapanengneng ya importantin maong so panangaro?
6 Ibabangat na Biblia ya importantin maong so panangaro. Diad tua, saray bersikulo ed Biblia ya paborito na dakel ya totoo et tungkol ed panangaro. Singa bilang: “Say Dios et aro.” (1 Juan 4:8) “Arom so kaparam a too a singa ed sikan dili.” (Mat. 22:39) “Sasakoban na aro so dakel a kasalanan.” (1 Ped. 4:8) “Say aro et agbalot mangangga.” (1 Cor. 13:8) Nanengneng ed sarayan teksto tan ed arum nin bersikulo ya talagan importante so panangaro.
7. Akin et agbalot sarag nen Satanas so manbuo na organisasyon ya walay tuan aroan tan pankakasakey?
7 Dakel nin totoo so manaanap ed katuaan. Pero say tepet da: ‘Panon kon naamtaan no dinan so tuan relihyon? Amin ya relihyon et ibabaga ran sikara so tua, pero nanduruma so ibabangat da tungkol ed Dios.’ Dakdakel ya relihyon so binuo nen Satanas pian naibalang to ray totoo tan agda naromog so tuan relihyon. Pero agbalot sarag nen Satanas so makabuo na organisasyon ya manaaroan iray membro anggano nanduruma so lahi ra. Si Jehova labat so makagawa ed satan ta sikato so lapuan na tuan panangaro. On, nipanengneng labat na sakey ya organisasyon so panangaro no walad sikara so espiritu tan bendisyon nen Jehova. (1 Juan 4:7) Kampegan imbaga nen Jesus ya say tuan panangaro so palatandaan na saray tuan Kristiano.
8-9. Antoy epekto ed dakel ya totoo nen naobserbaan day aroan na saray Tasi nen Jehova?
8 Dakel ya eksperiensya so manpatunay ya duga imay imbaga nen Jesus. Say tuan aroan na saray papatumbok to so rason no akin ya abidbir na dakel ya totoo natan no siopa ray tuan Kristiano. Imanoen so eksperiensya nen Brother Ian. Say unonan kombension ya naatendian to et diad sports stadium ya asingger ed abung to. Pigaran bulan antis na kombension, nambantay si Ian na sports event diad satan lanlamang ya stadium. Nen inmatendi ed kombension, oniay naobserbaan to: “Talagan baleg so pandumaan. Magalang tan maong ya mangawes iray Tasi, tan makalakal iray ugugaw. Pero say talagan pambiliban ko, amay kontento tan mareen iran totoo. Labay ko, onman ak met. Diad tua, anggapoy atandaan kon paliwawa diad saman ya agew. Pero say agko nalingwanan, amay balibalin ugali na saray Tasi.” c Akin et ontan so impresyon na maslak ya totoo? On ta tua so aroan tayo. Lapud inar-aro tayo ray agagi, maomaong tan marespeto so panagtrato tayod sikara.
9 Ontan met so naeksperiensya nen Brother John. Oniay naobserbaan to nen first time toy miaral ed Kingdom Hall: “Bilib ak ta mabait iran amin, . . . singa ra santo. Anengneng ko ya tua so aroan da, kanian akombinse ak ya nalmok lay tuan relihyon.” d On, ipapanengneng na sarayan eksperiensya ya tuan Kristiano iray Tasi nen Jehova.
10. Diad anton situasyon ya mas kaukolan tayon ipanengneng so panangaro? (Nengnengen met so paimanod leksab.)
10 Singa abitlad gapo, amin tayo et aliwan perpekto. No maminsan, walay naibaga o nagawaan na saray agagi ya nayarin nasakitan tayo. e (Sant. 3:2) Diad ontan iran situasyon, agtayo komon bastabasta manre-react. Diad tua, tsansa tayo itan ya ipanengneng ya talagan inar-aro tayo ray agagi. Makaaral tayo ed alimbawa nen Jesus.—Juan 13:15.
PANON YA IMPANENGNENG NEN JESUS SO PANANGARO ED SARAY APOSTOL TO?
Maar-aro so impantrato nen Jesus ed saray apostol to anggano wala ray makapuy ya ugali ra (Nengnengen so parapo 11-13)
11. Anto ran makapuy ya ugali so walad si Santiago tan Juan? (Nengnengen met so litrato.)
11 Tanggap nen Jesus ya aliwan perpekto iray papatumbok to. Kanian imbes ya onsyodot no nanengneng to ray makapuy ya ugali ra, tinulongan to ra ya naekal da itan pian naawat day pabor nen Jehova. Aminsan, inmasingger ed si Jesus so duaran apostol to, si Santiago tan si Juan, kaibay ina ra. Impaibaga rad ina ra ya ikdan ira komon nen Jesus na atagey ya posisyon diad Panarian. (Mat. 20:20, 21) Nanengneng ed satan ya ginawa nen Santiago tan Juan ya maambisyon ira tan atagtagey so pakanengneng dad sarili da.—Pro. 16:18.
12. Kasin si Santiago tan Juan labat so walaan na makapuy ya ugali? Ipaliwawa.
12 Lapud satan ya ginawa nen Santiago tan Juan, pinmaway met so makapuy ya ugali na arum ya apostol. Oniay reaksion da: “Nen nadngelan iya na saray samplora, asyodotan ira ed sayan sanagi.” (Mat. 20:24) Seguro, akapan-alaan na salita si Santiago, Juan, tan arum nin apostol, tan ansasakit so imbagbaga ra. Anganko oniay imbaga dad si Santiago tan Juan: ‘Mamaong kayon onkerew na atagey ya posisyon. Say amta yo, mas nayaryari kayo! Akin a, sikayo labat sirin so nansakripisyo parad si Jesus? Pati sikami pa met!’ Agtayo amtay eksakton imbaga o ginawa ra. Pero say segurado, alingwanan dan impanengneng so tuan panangaro lapud agda kinontrol so reaksion da.
13. Panon so impantrato nen Jesus ed saray apostol to anggano wala ray makapuy ya ugali ra? (Mateo 20:25-28)
13 Antoy reaksion nen Jesus? Agto ra pinantamian tan agto imbaga ya mananap lay arum ya apostol ya mas mapaabeba tan amay talagan aroen day sakey tan sakey. Imbes ya manpasnok, kinatongtong to ra tan maan-anos to ran sinimbawa, ta amta to ya aliwa met iran mauges ya totoo. (Basaen so Mateo 20:25-28.) Diad tua, aliwan satan so unona o sampot ya nan-diskusyonan na saray apostol no siopay sankaimportantian ed sikara. Pero maar-aro nin siansia so impantrato nen Jesus ed sikara.—Mar. 9:34; Luc. 22:24.
14. Anton kultura so binalegan na saray apostol nen Jesus?
14 Amta nen Jesus ya onman so ugali na saray apostol ta baleg so epekto na kultura ya binalegan da. (Juan 2:24, 25) Diad lugar da, anggan saray lider na relihyon et atagtagey so pakanengneng dad sarili da tan importantin maong ed sikara so posisyon. (Mat. 23:6; nengnengen so video ya Pinakamagandang Puwesto sa Sinagoga diad study note na Mateo 23:6.) Diad tua, matunong tan masanto so pakanengneng dad sarili da. f (Luc. 18:9-12) Kanian posiblin naalisan labat iray apostol na ontan ya ugali. Sankanonot nen Jesus itan ya background da kanian agla abigla nen anengneng to ray makapuy ya ugali ra. (Pro. 19:11) Amta to ya lalabanan da pa met iray kakapuyan da ta labay dan gawaen so duga. Kanian anggano walay tinmubon panagpasirayew diad puso ra, agto ra sinukoan. Maan-anos to ran tinulongan pian nabagot da itan tan nasalatan na inkamapaabeba tan panangaro.
PANON TAYON NAALIG SO ALIMBAWA NEN JESUS?
15. Antoy naaralan tayo ed samay agawa ed si Santiago, Juan, tan arum nin apostol?
15 Dakel so naaralan tayo ed samay agawa ed si Santiago, Juan, tan arum nin apostol. Tua, aliwa may ginawa nen Santiago tan Juan ya kinmerew iray atagey ya posisyon ed Panarian. Pero aliwa met may reaksion na arum ya apostol. Pinunuyan day syodot da kanian akapan-alaan laingen iray salita. Duma balet so reaksion nen Jesus. Anggapoy pinilaan to tan kalmado to ran kinatongtong ya amin, tan maar-aro to ran binilin. Antoy naaralan tayo ey? Anggano asakitan tayo ed lingo o makapuy ya ugali na arum, kaukolan tayon kontrolen so reaksion tayo pian agla ombaleg so problema. No bilang ta asakitan ka ed ginawa na sakey ya agi, antoy makatulong pian nakontrol moy liknaan mo? Tepetan moy sarilim: ‘Akin et apektado ak ya maong ed ginawa to? Kasin ontan so reaksion ko ta wala met so aliwliwan ugalik? Kasin walay problema to may agi kanian onmay ginawa to? Anggano makapasyodot ya talagay ginawa to, sarag ko la kasin palampasen tan sakoban ko lay aro?’ No maaro nin siansia so pantrato tayod saray agagi anggano asakitan da tayo, ipapanengneng tayo ya tua tayon Kristiano.
16. Anto ni naaralan tayo ed alimbawa nen Jesus?
16 Say sakey nin naaralan tayod si Jesus et kaukolan tayon talosan iray agagi. (Pro. 20:5) Tua, si Jesus et makabasa na puso; sikatayo balet et andi. Pero no kabaten tayon maong iray agagi tan amtaen tayoy background da, mas nitepel tayoy kakapuyan da. (Efe. 4:1, 2; 1 Ped. 3:8) Imanoen so sakey ya alimbawa.
17. Antoy resulta nen kinabat ya maong na manangasikaso na sirkito so sakey ya brother?
17 Walay manangasikaso na sirkito diad East Africa ya say first impression tod sakey ya brother et singa magasal so ugali to. Antoy ginawa na C.O.? Oniay imbaga to: “Imbes ya iwasan ko yan brother, kinabat kon maong.” Naamtaan to ya aliwliwa manayay impanugaw na brother. Onia ni imbaga to may C.O.: “Nen akapan-istoryaan kami, diman ko a-realize ya agaylay irap ton inuman so ugali to lapud background to, pero ginawa to itan pian nakasundo to ray agagi. Nen naamtaan koy amin ya inuman tod sarili to, pambiliban ko tan nagmaliw kamin malet ya sankaaro.” On, no kabaten tayon maong iray agagi, mas natalosan tan mas naar-aro tayo ra.
18. Anto ray itepet tayod sarili tayo no asakitan tayo ed imbaga o ginawa na sakey ya agi? (Proverbio 26:20)
18 No asakitan ka ed imbaga o ginawa na sakey ya agi, ompan say naisip mon tampol et katongtongen mo. Pero antis kan mandesisyon no kasin katongtongen mo o andi, tepetan mo ni so sarilim: ‘Kasin amtak so amin ya detalye?’ (Pro. 18:13) ‘Kasin ginagala to ak ya sakitan o andi met?’ (Ecl. 7:20) ‘Kasin ayay ginawa tod siak et ginawak met lad arum?’ (Ecl. 7:21, 22) ‘No katongtongen ko, kasin naayos so problema, o ombaleg laingen?’ (Basaen so Proverbio 26:20.) No isipen mon maong iratan, ompan na-realize mo ya agmet la kailangan ya katongtongen imay agi, tan mas maabig no palampasen mo lay agawa.
19. Antoy desididom ya gawaen?
19 Bilang grupo, ipapanengneng na Saray Tasi nen Jehova ya talagan sikara so tuan disipulo nen Jesus. Bilang indibidual, ipapanengneng tayo ya tua itayon Kristiano no inar-aro tayo nin siansia iray agagi anggano wala ray lingo o kakapuyan da. No ontay gagawaen mo, agmo amta, ompan wala manayay natulongan mo ya nabidbir toy tuan relihyon tan mila met lad sikatayo ya mandayew ed maar-aron Dios tayo, si Jehova. Komon ta agka onsasawan ipanengneng imay klase na panangaro ya palatandaan na saray tuan Kristiano!
KANSION 17 “Labay Ko”
a Dakel so magmamaliw ya interesado ed katuaan lapud nanenengneng day tuan aroan tayo. Pero diad tua, no maminsan et aliwan mainomay ya ipanengneng so panangaro ed saray agagi ta aliwa tayon perpekto. Pantongtongan tayo no akin ya importantin maong so panangaro tan no panon tayon naalig so panangaro nen Jesus no nanengneng tayo ray lingo tan kakapuyan na agagi.
b Nengnengen so libron “Gala Magmaliw Kan Patumbok Ko,” kap. 17, par. 10-11.
c Nengnengen so artikulo ya “Sa Wakas, May Layunin Na ang Buhay Ko,” diad Ang Bantayan, Nobyembre 1, 2012, p. 13-14.
d Nengnengen so artikulon “Parang Wala Na Akong Mahihiling Pa sa Buhay Ko,” diad Ang Bantayan, Mayo 1, 2012, p. 18-19.
e Ag-iya ontutukoy ed saray seryoson kasalanan ya kaukolan ya asikasoen na saray elder, ya singa saramay kasalanan ya nabasad 1 Corinto 6:9, 10.
f Unong ed sakey ya reperensya, walay rabbi ya angibagan: “Diad mundo, seguro manga 30 labat ya lalaki so matunong ya singa si Abraham. No bilang ta walay 30, kaiba kamin dua nen ana’ko; no samplora labat, kaiba kamin dua nen ana’ko; no lit-limara, kaiba kamin dua nen ana’ko; no duat-duara, sikamin dua nen ana’ko; no saksakey labat, siak iman.”
