1-2. Akin et agka dapat nadidismaya no agka ni kualipikado parad bautismo? (Nengnengen so litrato ed apis.)

 KASIN labay mo lay manpa-baptize? No on, balibali itan ya goal mo. Pero say tepet, kasin ready ka la? No iisipen mo ya ready ka la tan imbaga na saray elder ya kualipikado ka la, iplanom la sirin so pampa-baptize mo diad onsublay ya asemblea o kombension. Ditan la onggapo so ‘balon chapter’ na bilay mo—say maliket ya panlingkor mo ed si Jehova.

² Panon to balet no walay angipaimano ed sika ya wala ni ray kaukolan mon paaligwasen, tan antam met ed sarilim ya agka ni kualipikado? Agka komon nadidismaya. Antokaman so edad mo, basta pansagpotan moy onaligwas, nagawaan mon siansia so goal mon manpabautismo.

3. Antoy intepet na Etiopen opisyal na palasyo ed si Felipe, tan antoy nayarin naisip mo ed satan ya tepet to? (Gawa 8:36, 38)

³ Basaen so Gawa 8:36, 38. Walay opisyal na palasyo ya taga Etiopia ya oniay intepet to ed si Felipe: “Antoy makasbel [o makahadlang] ed pakabautismoan ko?” Nanengneng ed sayan tepet to ya labalabay to lay nabautismoan. Pero ompan naisip mo, ‘Anggano labalabay to la, kualipikado la sirin?’

4. Antoy patunay ya samay Etiopen opisyal na palasyo et labalabay to ni makaaral?

⁴ Amay Etiopen laki et “linmad Jerusalem pian mandayew” ed si Jehova. (Gawa 8:27) Mapatnag sirin ya anggano aliwan Israelita, sikatoy akomberte la ed Judaismo. Kanian seguradon abasa to lay Hebreon Kasulatan tan dakel lay amta to tungkol ed si Jehova. Pero labalabay to ni makaaral. Diad tua, nen pinulongan nen Felipe iyan laki diad dalan, asabian to ya babasaen to ray insulat nen propetan Isaias. (Gawa 8:28) Anawet itan ya espiritual ya naakan! Patunay itan ya agkontento  iyan laki ed saray manunan bangat na Kasulatan.

5. Antoy patunay ya samay Etiopen opisyal na palasyo et inyaplika toy naaralan to?

⁵ Samay laki et atagey ya opisyal ya manlilingkor ed “Candace a reyna na saray Etiope, tan mangaasikaso ed amin a kayamanan to.” (Gawa 8:27) Kanian seguradon busy’n maong tan dakel so responsabilidad to. Pero sinegurado ton walay panaon to ya mandayew ed si Jehova. Agto labat inaral so katuaan, inyaplika to met itan. Say sakey ya patunay et amay impanbiahe to na arawrawi manlapud Etiopia ya anggad Jerusalem pian makapandayew ed si Jehova diad templo. Piga-pigaran agew ya nambiahe tan seguradon baleg so gastos to! Pero agmanhinayang ta importantin maong ed sikato so panagdayew tod si Jehova.

6-7. Antoy naamtaan na Etiope ya nampabiskeg ed panangaro to ed si Jehova, tan antoy epekto na satan ed sikato?

⁶ Nen pinulongan nen Felipe imay Etiopen laki, wala ray balon katuaan ya naaralan to. Singa bilang, naamtaan to ya si Jesus so Mesias. (Gawa 8:34, 35) Seguradon a-touch ya maong nen naamtaan to ya inatey si Jesus parad sikato. Antoy epekto ed sayan laki nen naamtaan to itan? Lalo ton naar-aroy Aman Jehova tan say Anak To. Kanian imbes ya mansiansia ed Judaismo, nandesisyon ya manpabautismo bilang patumbok nen Jesu-Kristo. Anengneng nen Felipe ya kualipikado la iyan laki, kanian binautismoan to.

⁷ No aligen mo so alimbawa na sayan Etiope, magmaliw ka met ya kualipikado parad bautismo. Agka met manalangan ya mangibagan, ‘Antoy makahadlang ed pampabautismok?’ Pantongtongan tayo sirin imay ginawa na Etiope ya dapat mo met ya gawaen pian nai-ready’m so sarilim ed goal mon manpa-baptize: Itultuloy moy manaral, iyaplikam iray nanaaralan mo, tan pabiskeg moy panangarom ed si Jehova.

8. Base ed Juan 17:3, antoy nepeg mon gawaen?

⁸ Basaen so Juan 17:3 tan paimanod leksab. Kasin sayan teksto so nampakilos ed sika ya manaral na Biblia? Ompan “on” so ebat na maslak ed sikatayo. Base ed paimanod leksab na sayan teksto, say panaral tungkol ed si Jehova et tuloytuloy tayon gawaen. On, tuloytuloy tayon “kabaten [so] saksakey a tuan Dios.” (Ecl. 3:11) Anggano manbilay tayo ni na andi-anggaan, walan-walay balo ya naaralan tayo ed si Jehova. Tan no diman tayo mas nakakabat si Jehova, diman met mas onasingger so liknaan tayod sikato.—Sal. 73:28.

9. Anto ni nepeg tayon gawaen anggano amta tayo la ray manunan bangat na Biblia?

 ⁹ Siempre, no kakkagapom ni labat ya kakabaten si Aman Jehova, man-umpisa ka ed saray manunan bangat na Biblia. Nen sinulatan nen apostol Pablo iray Hebreon Kristiano, inkompara to ed gatas iray manunan bangat na Biblia. Di ba, say sakey ya baby, diad gapo et gatas ni labat so inumen to. Pero diad ilalabas na panaon, kaukolan to met lay anawet ya naakan pian mas maples ya ombaleg. (Heb. 5:12; 6:1) Ontan met ed sikatayo ran Kristiano. Pian ontatken tayod espiritual, aliwan saray manunan bangat labat so aralen tayo, kaukolan tayo met ya aralen iray mas aralem ya katuaan ya walad Biblia. Sika ey? Ompan kabisadom la ray manunan bangat na Biblia. Marakep no ontan. Pero tandaan mo ya ontatken ka labat ed espiritual no tuloytuloy mon kabaten si Jehova tan aralen mo nin maong so gagala to.

10. Akin et nanairapan so arum ya manaral?

¹⁰ Say arum ed sikatayo et agda hilig so manaral. Sika ey? Diad eskuelaan, kasin mabasa tan maaral ka? Kasin nai-enjoy moy manaral ta dakel so nanaamtaan mo? Odino sika may toon magangganon onsawa ya manbasa? No ontan ka, agka komon nadidismaya ta tulongan ka nen Jehova. Sikato so sankamaongan tan sankarunongan ya Managbangat.

11. Akin et “Makapadinayew a Managbangat” si Jehova?

¹¹ Imbagan mismo nen Jehova ya sikato so “Makapadinayew a Managbangat” tayo. (Isa. 30:20, 21) Maan-anos tan mabaibait ya Maestro si Aman Jehova. Natatalosan toy situasyon na kada estudyante to. Aliwan saray lingom so nenengnengen to. Say pampopokusan to et saray abilidad mo tan no anto ni ray sarag mon gawaen. (Sal. 130:3) Tan agto ipagawa ed sika so agmo nakaya. Tandaan mo ya sikato so nanggawa ed utek mo. (Sal. 139:14) Pinalsa to itan ya dakdakel so nakarga ton impormasyon. Kanian di ba labalabay tayoy makaaral na balo? On, labay nen Jehova ya tuloytuloy tayon manaral tan na-enjoy tayo itan anggad angga. No ontan sirin, balibali no natan ni labat et panliketan tayo lan aralen iray katuaan ed Biblia. (1 Ped. 2:2) Panon mon nagawaan itan? I-goal mo ya walay regular ya panagbasam na Biblia tan panag-personal study’m, tan tumbok moy eskedyul mo. (Jos. 1:8) Diad tulong nen Jehova, napasalan tan na-enjoy mo lanlamang so manbasa tan manaral.

12. Akin et i-personal study tayo so bilay tan ministeryo nen Jesus?

¹² Marakep no i-personal study’m so bilay tan ministeryo nen Jesus. No “tumboken [mo] iray bakat to,” makapanmatoor ka ed si Jehova anggano mairap so situasyon. (1 Ped. 2:21) Diad tua, imbaga nen Jesus ya amin ya disipulo to et onarap ed nanduruman subok. (Luc. 14:27, 28) Pero imbaga to met ya makapanmatoor ira ya singa sikato, anggan anto ni tay subok ya onsabi. (Juan 16:33) Kanian aral mo iray detalye na bilay nen Jesus, tan manisip kay paraan no panon mon naalig so alimbawa to kada agew.

13. Antoy lanang mon ipikasi ed si Jehova, tan akin?

¹³ Agto labay ya ibaga ya no dakel lay antam ed Biblia et ayos la. Dapat usar mo iratan ya impormasyon pian lalom ya nakabat si Jehova tan pian lalon ombiskeg so panangarom tan pananisiam ed sikato. (1 Cor. 8:1-3) Legan mon kakabaten ya maong si Jehova, lanang mon ipikasi ed sikato ya pabiskegen toy pananisiam. (Luc. 17:5) Labalabay ton ebatan iray ontan ya pikakasi. No kabkabat mo lay Jehova tan mabiskeg lay pananisiam ed sikato, napakilos kan iyaplika iray nanaaralan mo.—Sant. 2:26.

14. Anton alimbawa so inusar nen apostol Pedro pian idanet ya importantin iyaplika tayoy nanaaralan tayo? (Nengnengen met so litrato.)

¹⁴ Inusar nen apostol Pedro so alimbawa nen Noe pian idanet ya importantin iyaplika na saray Kristiano so nanaaralan da. Diad panaon nen Noe, mauge-uges iray totoo. Kanian imbaga nen Jehova ed si Noe ya deralen To so amin ya mauges panamegley na delap. Kasin automatic ya makaliktar si Noe tan say pamilya to lapu labat ta amta dan walay onsabin delap? Siempre andi, walay nepeg dan gawaen. Diad 1 Pedro 3:20, say impaimano nen Pedro et amay panaon antis ya onsabi so delap, “legan ya ipapaalagey so biong.” On, kinmilos si Noe tan say pamilya to nen naamtaan da ya walay onsabin delap. Nanggawa ray biong! (Heb. 11:7) Say impangipaalagey nen Noe ed biong et inkompara nen Pedro ed bautismo. Oniay imbaga to: “Say bautismo so mangililiktar met natan ed sikayo.” (1 Ped. 3:21) Kanian say pampaparaan mo natan ta pian nagawaan moy goal mo ya manpabautismo et singa samay impanpaalagey nen Noe tan say pamilya to na biong. Anto sirin so gawaen mo pian naiparaan moy sarilim ed pampabautismom?

15. Panon mon nipanengneng ya impapuso so panagbabawim?

¹⁵ Pian magmaliw kan kualipikado parad bautismo, importante ya magbabawi ka ed saray kasalanan mo. (Gawa 2:37, 38) Nibagan impapuso so panagbabawim no umanen moy kabibilay mo. Singa bilang, no dati et walay gagawaen mon imoral, mansisigarilyo o manaayew ka, tan ansakit so panagsalitam, kasin intundam la iratan pian napaliket moy Jehova? (1 Cor. 6:9, 10; 2 Cor. 7:1; Efe. 4:29) No andi ni, komon ta gawam so anggaay nayarian mon manguman. No nanairapan ka, ibagam ed samay mangiyaaral ed sika, odino patulongan ka ed saray elder. No ugaw ka ni tan wala ka nid pudir na atateng mo, patulongan kad sikara pian naitundam iray kagagawa ya makakahadlang ed pampabautismom.

16. Antoy gawaen mo pian magmaliw ya parte na bilay mo so panagdayew ed si Jehova?

¹⁶ Balibali no magmaliw ya parte na bilay mo so panagdayew ed si Jehova. Nagawaan mo itan no lanang kan onatendi tan mankomento  diad aral. (Heb. 10:24, 25) Tan no kualipikado ka lan manpulong, maabig no walay regular ya eskedyul mo ed ministeryo. No lanang ka lan manpupulong, mas na-enjoy mo itan. (2 Tim. 4:5) No ugaw ka ni tan Tasi iray atateng mo, itepet mod sarilim: ‘Kasin siak lay mankukusa ya manpulong tan miaral? Odino kailangan ak nin bagaan na atateng ko?’ No sika lan mismo so mankukusa, patunay itan ya papanindigan mo lay pananisiam tan inar-arom si Aman Jehova. Ipapanengneng mo met ya misatsalamat ka ed amin ya gagawaen to parad sika. “Pakapatnagan [iratan] na debosyon mod Dios.” Singa iratan regalo ya iiter mod sikato. (2 Ped. 3:11; Heb. 13:15) Naliliketan si Jehova ed amin ya regalom no iiter mo iratan lapud panangarom ed sikato, aliwan lapud napipilitan ka. (Ikompara so 2 Corinto 9:7.) Anggan sikan mismo et naliketan no antam ya iiter moy ‘the best’ mo ed si Jehova.

17-18. Antoy manpakilos ed sika ya onaligwas anggad nabautismoan ka, tan akin et importante itan? (Pro. 3:3-6)

¹⁷ Diad iyaaligwas mod espiritual, walan-wala ray subok ya arapen mo. Ompan balawen o kontraen ka ingen na arum no nanengneng da ya nansalat ka lay relihyon. (2 Tim. 3:12) Ompan gagawaen mo met so anggaay nayarian mon itunda so sakey ya bisyo, pero agmo napigilan so sarilim no maminsan. Odino ompan nadidismaya kad sarilim ta abaybayag ka lan mani-study pero agka nin siansia kualipikado. Antoy makatulong ed sika pian agka onsuko? Say panangarom ed si Jehova.

¹⁸ Say panangarom ed si Jehova so sankarakepan ya liknaan tan sankabiskegan ya puersa ya manpakilos ed sika. (Basaen so Proverbio 3:3-6.) No inar-arom si Jehova, agka ontundan manlingkor ed sikato anggano nantatabonan lay problema. Diad Biblia, mabetbet tayon nababasa so matoor ya panangaro nen Jehova ed saray lingkor to. Atan imay klase na panangaro ya ag-oniikban tan agto ka sukoan. (Sal. 100:5) Ginawa nen Jehova so too ya sarag tayon aligen so ugali to. (Gen. 1:26) Anto sirin so gawaen mo pian nipanengneng mo met itan ya klase na panangaro?

19. Antoy gawaen mo pian napano so pusom na pisasalamat ed si Jehova? (Galacia 2:20)

¹⁹ Iyugalim so misalamat ed si Jehova. (1 Tes. 5: 18) Kada agew, isip mo, ‘Antoy ginawa nen Jehova natan parad siak pian nipalikna  ton inar-aro to ak?’ Espisipikom ya bitlaen iratan no manpikasi ka tan pisalamatan moy Aman Jehova. Singa si apostol Pablo, isip mon lanang ya amin ya kamaongan nen Jehova ed sika et gagawaen to lapud inar-aro to ka. (Basaen so Galacia 2:20.) Tan tepetan moy sarilim, ‘Panon ko met kasin nipanengneng ya inar-arok si Jehova?’ No inar-arom si Jehova, nalabanan mo ray tukso tan nasarag moy anggan anton subok. Atan so manpakilos ed sika ya iyunam ed bilay mo so pandayew ed sikato. Agka sirin ompapayag ya onlabas so sanagew ya agmo naipanengneng so panangarom ed Amam.

20. Antoy gawaen mo pian naidedikam so sarilim ed si Jehova, tan akin et importante itan ya desisyon?

²⁰ Legan mon mas naaaro si Jehova, napakilos ka ya manpikasi pian i-promise ya idedikam lay sarilim ed sikato tan panlingkoran mo anggan antoy nagawa. Espisyal itan ya pikakasi! Tandaan mo ya no indedikam lay sarilim ed si Jehova, sikato lay akanggawa ed sika, tan insipan to ya sikato lay akauley ed sika diad anggad angga. Say dedikasyon ed si Jehova et maminsan labat ya gawaen. Tua, seryoso itan ya desisyon, pero atan la so sankarakepan ya desisyon ya nagawaan mo. (Sal. 50:14) Manggaway paraan si Satanas pian ombetel so panangarom ed Aman Jehova ta agto labay ya manmatoor ka. Agka komon manpapatalo ed sikato! (Job 27:5) No tuloytuloy mon pabiskegen so panangarom ed si Jehova, seguradon natoor moy dedikasyon mod sikato tan lalon onelet so pankakaaro yo diad ilalabas na agew.

21. Akin et dapat mon tandaan ya say bautismo et gapoan ni labat?

²¹ No indedikam lay sarilim ed si Jehova, mitongtong kad saray elder ed kongregasyon yo tan ibagam ya labay mo lay manpabautismo. Tandaan mo balet ya say bautismo et gapoan ni labat. Atan so gapoan na maliket ya panlingkor mod si Jehova ya posiblin mantultuloy anggad angga! Kanian natan ni labat, pabiskeg mo lay panangarom ed si Jehova. Kada agew, manggawa kay paraan pian lalom ya naaro so Amam ed tawen. No gawaen mo itan, nagawaan mon siansia so goal mon manpabautismo. Seguradon malikeliket itan ya agew. No nasabi-sabi itan, komon ta itultuloy mon pabiskegen so panangarom ed si Jehova tan ed Anak to anggad angga!