Akin et imbaga na samay lakin atawag ya “Kien” ya sikatoy “naperdi” no asawaen toy Ruth? (Ruth 4:1, 6)

Diad panaon na Biblia, no ompatey so sakey ya laki ya walay asawa to pero anggapoy anak da, wala ray onlesan tepet. Singa bilang, antoy nagawad dalin to? Kasin permanente lan nabalang so ngaran na pamilya to? Naamtaan tayoy ebat ed saratan no nengnengen tayoy ibabaga na Mosaikon Ganggan.

Nensaman, importantin maong so tawir ya dalin. Kanian no say sakey ya laki et inmirap so bilay to kanian inlako to itan o sikatoy inatey, ibabaga na Ganggan ya sarag itan ya dondonen o saliwen na agi to o asingger ya kanayon to pian say dalin et mansiansia ed pamilya ra.—Lev. 25:23-28; Num. 27:8-11.

Kanian no say sakey ya laki et inatey tan anggapon balot so anak to ya manawir ed dalin to, antoy gawaen pian agnabalang so ngaran na pamilya ra? Walay tatawagen ya piasawa ed bayaw, ya singa ginawa nen Ruth. Say sakey ya laki et asawaen toy abalon ayro to pian nawalaan na anak ya manawir ed ngaran tan dalin na inatey lan asawa to. Maar-aro iyan uksoyan ta naasikaso met so pankaukolan na biyuda.—Deu. 25:5-7; Mat. 22:23-28.

Ontan so situasyon nen Noemi ya asawa nen Elimelec. Nen inatey si Elimelec tan say duaran anak dan laki, anggapo lay laki ya mangasikaso ed si Noemi. (Ruth 1:1-5) Kapawil tod Juda, imbaga tod manugang ton si Ruth ya mikasi ed si Boaz ya dondonen toy dalin nen Elimelec. Walay karapatan ton dondonen itan ta asingger ya kanayon nen Elimelec. (Ruth 2:1, 19, 20; 3:1-4) Pero amta nen Boaz ya wala ni arum ya kanayon nen Elimelec. Mas asingger iyan kanayon kompara ed si Boaz. Kanian mas walay karapatan ton dondonen so dalin. Sayan kanayon et tinawag na Biblia ya “Kien.”—Ruth 3:9, 12, 13.

Nen unaan, labay nen “Kien” ya dondonen so dalin nen Elimelec. (Ruth 4:1-4) Seguro naisip to ya anggano manggastos, ayos labat ta agmet la makaanak si Noemi kanian anggapo lay manawir ed dalin nen Elimelec. Onarum labat itan ed dalin nen Kien, kanian nabawi to lanlamang so gastos to.

Pero nen naamtaan nen Kien ya kaukolan to met ya asawaen si Ruth, anguman so desisyon to. Oniay imbaga to: “Agko ’tan nayarin dondonen, ta ompan naperdi ak.” (Ruth 4:5, 6) Akin et anguman so nonot to?

Onia ’tan ay: No asawaen nen Kien si Ruth tan nawalaan iray anak ya laki, atan ya anak so manawir ed dalin nen Elimelec. Natan say tepet, akin et imbaga nen Kien ya sikatoy “naperdi” no ontan so nagawa? Anggapoy espisipikon ibabaga na Biblia, pero nia ray posiblin rason:

• Unona, ompan inisip to ya sikatoy nalugi ta agto met lanlamang nakayarian imay dalin nen Elimelec. Onla itan ed anak da nen Ruth.

• Komadua, duara so kaukolan ton asikasoen tan pakanen, si Noemi tan Ruth.

• Komatlo, no nawalaan na arum nin ananak si Ruth tan Kien, nabawasan so tawir na akadkaunan ananak nen Kien ta miapag met iray ananak tod si Ruth.

• Komapat, no anggapoy arum ya anak nen Kien, say anak tod si Ruth so walaan na karapatan ya manawir ed amin ya dalin to, likud nid samay dalin nen Elimelec. Kanian no ompatey si Kien, amin ya dalin to et onlad anak da nen Ruth, pero say awi-awit ya ngaran na satan ya anak et ngaran nen Elimelec. Aglabay nen Kien ya irisga so tawir to pian labat natulongan toy Noemi. Kanian imbaga to ya si Boaz la so manondon ed dalin nen Elimelec. Pinmayag si Boaz ta labay to ya “say tawir na samay inatey et nipawil ed ngaran to.”—Ruth 4:10.

Mapatpatnag ya si Kien et makasarili ta mas sankanonot toy ngaran tan tawir to. Pero diad tua, ag-apreserba so ngaran to ta ag-anggan binitla na Biblia. Diad kabaliktaran, akarekord ed Biblia so espisyal ya pribilehyo ya naawat nen Boaz lapud intulong to—diad pamilya to so nanlapuan na Mesias, si Jesu-Kristo. Asayang nen Kien itan a pribilehyo ta makasarili tan iniwasan toy ontulong ed saray mankaukolan!—Mat. 1:5; Luc. 3:23, 32.