1. Anto ran bendisyon so panliliketan tayo manlapu la nen nagmaliw tayon parte na organisasyon nen Jehova?

 MAGULOGULO tan mair-irap so bilay legan na sayan kaunoran iran agew. Pero maong labat ta parte itayo na organisasyon nen Jehova. Malikeliket tayo nin siansia ta wadtan iray maar-aron agagi ya akaparaan ya ontulong ed sikatayo. (Sal. 133:1) Ibabangat itayo met nen Jehova no antoy makatulong pian walay deen tan aroan ed pamilya tayo. (Efe. 5:33–6:1) Tan iikdan to tayo met na karunongan pian nakontrol tayoy emosyon tayo tan mareen so nonot tayo.

2. Antoy kailangan tayon gawaen, tan akin?

² Anggano dakel so bendisyon nen Jehova ed sikatayo, kailangan tayo nin siansiay mansagpot pian agtayo makatunda ed panlilingkor tayod sikato. Akin ey? On ta ompan onsabi panaon et nasakitan tayo ed ibaga o gawaen na arum. Ompan nadismaya tayo met ed sarili tayo no makagawa tayoy lingo, lalo la no paulit-ulit itan. Komon ta agka ontutundan manlingkor ed si Aman Jehova anggano (1) asakitan ka ed imbaga o ginawa na sakey ya agi, (2) nadidismaya kad si asawam, tan (3) nadidismaya kad sarilim. Pantongtongan tayod sayan artikulo irayan situasyon. Pantongtongan tayo met so alimbawa na taloran karakter ed Biblia ya nanmatoor anggano wala ray akadismayaan da.

NO ASAKITAN KA ED IMBAGA O GINAWA NA SAKEY YA AGI

3. No maminsan, antoy subok ed sikatayo ran lingkor nen Jehova?

³ No antoy subok. Ompan no maminsan et nairita tayo ed ugali na arum ya agagi. Ompan walay imbaga o ginawa ra ya agtayo agustoan. Nayarin nadismaya tayo met ed saray elder ta nalilingo met ira. No wala ray onian nagawa, ompan pandudaan la na arum ya agagi no talaga kasin organisasyon iya na Dios. Iwasan da la imay agin akasakit ed sikara o agla ra miaral. Duga kasi itan? Andi, ta say labay nen Jehova et “mankakasakey  [tayon] manlingkor ed sikato.” (Sof. 3:9) Makaaral tayod alimbawa na sakey ya karakter ed Biblia ya ontan met so naeksperiensya to.

4. Anto ran subok so inarap nen apostol Pablo?

⁴ No siopay pakaaralan tayo. Asali met nen apostol Pablo so asakitan lapud imbaga tan ginawa na arum ya agagi. Anengneng ton mismo iray kakapuyan tan lingo ra. Singa bilang, sikatoy hinusgaan na arum ya agagi nen balobalo ni labat ya disipulo. (Gawa 9:26) Nen ombibisita lay Pablo ed saray kongregasyon, wala ray agagi ya dineral day reputasyon to. (2 Cor. 10:10) Anengneng to met so aliwliwa tan makapagapol ya ginawa na sakey ya manangidaulo. (Gal. 2:11, 12) Tan wala met may panaon ya adismayan maong si Pablo ed ginawa na sakey ya agi ya kaiba ton ombibisita ed saray kongregasyon, si Marcos. (Gawa 15:37, 38) Wala komoy rason nen Pablo ya ombarong ed sarayan agagi, pero kasin iniwasan to ra? Andi, ag-anguman so pakanengneng tod sikara, tan aga pinmayag ya naapektoan so panaglingkor tod si Jehova lapud lingo na arum. Antoy akatulong ed si Pablo pian nitepel to iratan ya amin?

5. Akin et asarag nen Pablo ya itepel so lingo na agagi? (Colosas 3:13, 14) (Nengnengen met so litrato.)

⁵ Inar-aro nen Pablo iray agagi. Kanian imbes ya manpokus ed saray lingo da, say ninengneng to la et say maong ya ugali da. Panangaro met so nampakilos ed si Pablo ya iyaplikan mismo imay insulat to ya akarekord ed Colosas 3:13, 14. (Basaen.) Singa bilang, imanoen tayo pa no panon ton impanengneng so panangaro ed si Marcos. Diad samay unonan impanbiahe nen Pablo bilang misionero, adismayan maong ed si Marcos ta bigla labat ya tinmaynan. Pero panon tayon amta ya agbinmarong si Pablo ed si Marcos? On ta kalabas na dakel ya taon, nen sinulatan nen Pablo so kongregasyon ed Colosas, pap-proud ton imbaga ya maomaong ya kakimeyan si Marcos tan “makapabiskeg a tulong” ed sikato. (Col. 4:10, 11, paimanod leksab) Diad tua, nen akaprisoy Pablo ed Roma, espisipiko ton imbaga ya pasyaren komon nen Marcos pian ontulong ed ministeryo to. (2 Tim. 4:11) On, maap-apit nin siansia so liknaan nen Pablo ed saray agagi anggano wala ray agawaan dan lingo. Panon tayon naalig si Pablo?

6-7. Antoy sekreto pian ag-ombetel so panangaro tayod agagi anggano nalilingo ra? (1 Juan 4:7)

⁶ No antoy naaralan tayo. Labay nen Aman Jehova ya itultuloy tayon aroen iray agagi. (Basaen so 1 Juan 4:7.) No bilang ta asakitan da tayo, isipen tayo la ya agda itan ginagala tan mani-effort met ira ya unoren iray prinsipyo na Biblia. (Pro. 12:18) Tandaan tayo met ya inar-aro na Dios iray matoor ya lingkor  to anggano wala ray nagagawaan dan lingo. Di ba no makakagawa tayoy lingo, peperdonaen itayo nen Jehova tan ituturing to tayo nin siansia ya kaaro? (Sal. 103:9) No say Ama tayod tawen et mabulos ya mamerdona, di mamerdona tayo met sirin!​—Efe. 4:32–5:1.

⁷ Anto ni sakey ya manpakilos ed sikatayon manpeperdonaan? Tandaan tayo ya asingsingger lay anggaan kanian kaukolan tayon paeleten so aroan tayon sanaagi. Lalo la ta amta tayon onsabi panaon et pairapen itayo na gobierno tan ompan napriso tayo ni ingen lapud pananisia tayo. No nagawa itan, sika-sikatayo lanlamang so mantutulongan. (Pro. 17:17) Naeksperiensya itan nen Josep a ya elder ed Spain. Sikatoy apriso kaibay arum nin brother ta agda labay so mansundalo. Oniay inistorya to: “Saksakey ya selda so kawalaan mi, kanian no maminsan et agan talaga naiwasan ya nairita kad sakey ya agi. Kaukolan min itepel tan perdonaen so sakey tan sakey. Lapud anggapoy barongan, akaparaan kamin protektaan so sakey tan sakey. Lalo la ta wala ray kaiba mi ed selda ya aliwan Tasi. Aminsan, na-injure so taklay ko kanian agko naigalaw. Pero impesakan tan inasikaso ak na sakey ya brother. Alikliknak so panangaro nen kakkailangan ko itan.” On, komon ta natan ni labat et ayosen tayo la ray barongan tan agpantatalosan ta onsabi panaon et sika-sikatayo lanlamang so mantutulongan!

NO NADIDISMAYA KAD SI ASAWAM

8. Antoy sakey ya subok ed saray sanasawa?

⁸ No antoy subok. Anggapo tay sanasawa ya anggapoy problema ra. Diad tua, ibabaga na Biblia ya saramay mangasawa et “nawalaay irap ed laman da.” (1 Cor. 7:28) Akin ey? On ta anggano inar-aro day sakey tan sakey, pareho ra ya aliwan perpekto tan walay kanya-kanyan ugali tan inkatoo ra. Ompan mandumaan so kultura tan background da. Ompan diad ilabas na panaon et wala ray ompaway ya ugali da ya agda anengneng nen saninaro ni ra labat. Amin iratan et nayarin panlapuan na problema. No maminsan no naproproblema so sanasawa, tetelen day sakey tan sakey, imbes ya ayosen day problema tan birbiren da ya walay kanya-kanyan lingo ra. Tan ompan onsabi ni ingen ed punto ya isipen da lay mansian o mandiborsyo ta atan labat la kunoy ultimon solusyon. Pero, duga kasi itan? b Makaaral tayo ed sakey ya karakter ed Biblia ya nantepel anggano aliwliway ugali na asawa to.

9. Antoy subok ed si Abigail?

⁹ No siopay pakaaralan tayo. Maomaong ya bii si Abigail, pero ibabaga na Biblia ya say asawa ton si Nabal et “anggapoy panangasi to tan aliwliway ugali to.” (1 Sam. 25:3) Seguradon mairap so miamong ed ontan ya too. Diad tua, walay tsansa komon nen Abigail ya makalaya ed asawa to. Aman may nen labay ya pateyen nen David si Nabal ta ininsulto to ray bataan to tan anggapoy respeto to ed si David, say onsublay ya ari ed Israel. (1 Sam. 25:9-13) Nen naamtaan itan nen Abigail, sarag to la komoy ontakas tan paulyanan to lan ompatey so asawa to. Pero andi, sikatoy akikasi ed si David pian agto sakitan si Nabal. (1 Sam. 25:23-27) Akin et labay ton iligtas si asawa to anggano aliwliway ugali to?

10. Antoy nayarin nampakilos ed si Abigail ya itepel so asawa to?

¹⁰ Inar-aro nen Abigail si Jehova tan baleg so respeto to ed uksoyan na panangasawa. Seguradon  kabisado to may imbaga na Dios ed si Adan tan Eva nen inkasal To ra. (Gen. 2:24) Amta nen Abigail ya diad pakanengneng nen Jehova, sagrado so panangasawa. Kanian anggano mairap so situasyon to, say sankanonot to et no antoy makapaliket ed si Aman Jehova. Ginawa ton amin pian nailigtas toy asawa to tan amin ya walad pudir da. Kinmilos ya tampol pian agnatuloy so plano nen David ya pateyen si Nabal. Tan anggano anggapoy kasalanan nen Abigail, sikato la so kinmerew na perdona ed si David. Seguradon inar-aro nen Jehova iyan bii ta agmakasarili tan makpel ton ginawa no antoy duga. Antoy naaralan na saray sanasawa ed si Abigail?

11. (a) Base ed Efeso 5:33, antoy labay nen Jehova ya gawaen na sanasawa? (b) Antoy naaralan mod si Sister Carmen? (Nengnengen met so litrato.)

¹¹ No antoy naaralan tayo. Labay nen Jehova ya respetoen na asawan laki tan asawan bii so uksoyan na panangasawa anggano walay kakapuyan na asawa ra. Seguradon naliliketan si Aman Jehova no nanenengneng to ray sanasawa ya gagawaen day anggaay nayarian dan ayosen iray problema da tan ipapanengneng day panangaro tan respeto. (Basaen so Efeso 5:33.) Ontan so ginawa nen Sister Carmen. Nen manga anem taon la ran kasal nen asawa to, sikatoy nampa-Bible study ed saray Tasi tan abautismoan. “Mamapasnok si asawak,” kuan nen Carmen. “Panseselosan toy Aman Jehova. Lanang to ak ya iinsultoen tan tinaktakot to ak ingen ya isian to ak.” Pero intepel iratan ya amin nen Sister Carmen. Anggano mairap, impanengneng to nin siansiay panangaro tan respeto ed si mister to diad loob na 50 taon. Kuan to: “Tinalosan koy liknaan nen masiken ko, tan inaral koy magmaliw ya kalmado tan marespeto no mitotongtong ak ed sikato. Amtak ya diad pakanengneng nen Jehova et sagrado so panangasawa. Kanian ginawak so amin pian agkami mansian nen asawak. Nantepel ak ta inar-arok si Aman Jehova.” c On, no walay problemam ed si asawam, agka komon onsusuko. Mantiwala ka ya suportaan tan tulongan ka nen Jehova pian mansiansiay aroan yo.

NO NADIDISMAYA KAD SARILIM

12. Antoy subok ed sakey ya Kristiano no akagaway seryoson kasalanan?

¹² No antoy subok. No say sakey ya Kristiano et akagaway seryoson kasalanan, ompan onsuko la ta dismayadon maong ed sarili to. Diad tua, ibabaga na Biblia ya say toon akagawa na kasalanan et singa ‘asugatan so puso to’ kanian mainomay ya onkapuy so liknaan to.  (Sal. 51:17) Imanoen so eksperiensya nen Ruben. Pigaran taon ya nansagpotan toy mandampot na pribilehyo ya anggad nagmaliw ya ministeryal a lingkor. Pero akagaway seryoson kasalanan tan pakalikna to et trinaidor toy Jehova. Kuan to: “Nen a-realize koy kabelat na kasalanan ko, agaylay pakakakonsiensiak. Ibabaing koy sarilik. Nampikasi ak ed si Aman Jehova tan inyaki-akis ko. Pero naisip ko, ‘Dengelen to ak ni kasi anta apaermen kon maong so puso to?’” No say sakey et akagaway kasalanan, ompan sukoan to lay sarili to, ta say pakalikna to et sinukoan la nen Jehova. (Sal. 38:4) Kasin aliknam met la itan? No on, makaaral kad sakey ya karakter ed Biblia ya agtinmundan nanlingkor ed si Jehova anggano akagaway seryoson kasalanan.

13. Anton seryoson kasalanan so ginawa nen apostol Pedro, tan anto ni ran lingo so agawaan to antis to ’tan?

¹³ No siopay pakaaralan tayo. Diad samay labi antis ya pateyen si Jesus, nantutumbokan ya lingo so agawaan nen apostol Pedro, ya anggad akapanggawa na seryoson kasalanan. Unona, malaslastog ton imbaga ya manmatoor kuno ed si Jesus anggano agmanmatoor iray kakaiba ton apostol. Sobsobray tiwala to ed sarili to! (Mar. 14:27-29) Nen wala rad hardin na Getsemani, aminpigan akaugip si Pedro anta binagaan nen Jesus ya mantultuloy ya manbantay. (Mar. 14:32, 37-41) Insan nen aarestoen lay Jesus, batik si Pedro ta tinmakot. (Mar. 14:50) Tan say sankagrabian ya ginawa nen Pedro, amitlo ton imburi si Jesus tan nansamba ni ingen ya agton talaga kabat. (Mar. 14:66-71) Nen a-realize to balet so kabelat na kasalanan to, kinmapkapuy tan inmakis ya ampaipait. Akonsiensia tan abaibaingan ed ginawa to. (Mar. 14:72) Insan kayari labat na pigaran oras, impasak ed poste si Jesus. Seguradon singa bebetagen so puso nen Pedro. Ompan inisip to ya anggapoy kuenta ton kaaro ta trinaidor toy Jesus!

14. Antoy akatulong ed si Pedro pian ag-ontundan manlingkor ed si Jehova anggano akagaway seryoson kasalanan? (Nengnengen so litrato.)

¹⁴ Dakel so akatulong ed si Pedro pian ag-ontundan manlingkor ed si Jehova anggano akagaway seryoson kasalanan. Unona, agto insian so sarili to. Akiulop nin siansia ed saray agagi tod espiritual tan seguradon pinabiskeg day liknaan to. (Luc. 24:33) Insan nen inmoli lay Jesus, nampanengneng ed si Pedro. Anganko et pinaseseg to. (Luc. 24:34; 1 Cor. 15:5) Insan nen kaiba nen Pedro so arum nin apostol, nampanengneng lamet si Jesus. Imbes ya pampasnokan toy Pedro, imbaga to ya ikdan toy kaaruman ya responsabilidad. (Juan 21:15-17) Tua, amta nen Pedro ya ambelbelat  so kasalanan to. Pero akin et agto sinukoan so sarili to? On ta anggano onman so agawa, kombinsido si Pedro ya sikatoy agsinukoan nen Jesus. Tan wadtan met iray espiritual ya agagi to ya nampabiskeg ed liknaan to. Antoy naaralan tayo ed si Pedro?

15. Kombinsido tayo dapat ed anto? (Salmo 86:5; Roma 8:38, 39) (Nengnengen met so litrato.)

¹⁵ No antoy naaralan tayo. Importante ya kombinsido tayo ya inar-aro itayo nen Jehova tan labalabay to tayon perdonaen. (Basaen so Salmo 86:5; Roma 8:38, 39.) No akagawa tayoy kasalanan, normal tan duga met labat ya nakonsiensia tayo. Pero aglabay nen Jehova ya isipen tayon agto tayo la inaro tan agto tayo lan balot naperdona. Imbes ya ontan so isipen tayo, onkerew tayon tampol na tulong. Oniay imbaga nen Ruben ya abitla nen niman: “Akagawa ak na kasalanan ta sobray talek kod sarilik ya sarasarag kon labanan so tukso.” A-realize balet nen Ruben ya kaukolan toy manpatulong ed saray elder. Kuan to: “Nen akitongtong ak ed sikara, aliknak ya singa ak nilakap nen Aman Jehova. Aga ak sinukoan na saray elder. Impaseguro dad siak ya inaro ak nin siansia na Dios.” Singa si Ruben, komon ta agtayo pandududaan ya inar-aro itayo nen Jehova tan sikatoy akaparaan ya mamerdona no pagbabawian tayo ray kasalanan tayo, no manpatulong tayod saray elder, tan no gawaen tayoy anggaay nayarian tayo pian agtayo la naulit so lingo tayo. (1 Juan 1:8, 9) No kombinsido tayod satan, agtayo ontunda ya manlingkor ed si Jehova anggano akagawa tayoy kasalanan.

16. Akin et determinado ka ya ag-ontundan manlingkor ed si Jehova anggano wala ray pakakadismayaan mo?

¹⁶ Papablien nen Jehova so panlilingkor tayod sikato, lalo la ta amta ton aliwan mainomay so bilay ed sayan kaunoran iran agew. Diad tulong to, tuloytuloy tayon makapanlingkor ed sikato anggano wala ray pakakadismayaan tayo. Anggano asakitan tayo ed imbaga o ginawa na sakey ya agi, sarag tayon sakoban itan na panangaro. Anggano walay problema tayod asawa tayo, resolbien tayo nin siansia itan ta sankanonot tayoy Jehova tan rerespetoen tayoy uksoyan na panangasawa. Tan anggano akagawa tayoy kasalanan, agtayo susukoan so sarili tayo. Imbes, manpatulong tayod si Jehova, awaten tayoy panangaro tan panamerdona to, tan agtayo ontutundan manlingkor ed sikato. Seguradon dakel ya bendisyon so awaten tayo, basta “ag-itayo ontutundan manggawa na maabig.”​—Gal. 6:9.