1-2. Anto ran bendisyon so awaten na sakey kayari ton nabautismoan?

 AGAYLAY liket tayo nen abautismoan tayo ta nagmaliw tayon parte na pamilya nen Jehova. Balbaleg itan ya pribilehyo! Talagan aga alingolingo si David nen oniay imbaga tod si Jehova: “Maliket so toon pipilien tan iyaasingger mo pian manayam ed saray sular na templom.”​—Sal. 65:4.

² On, pipilien nen Jehova no siopa labat iray palooben to ed sular na templo to. Singa apantongtongan ed imbeneg ya artikulo, sikatoy onaapit labat ed saramay mani-effort ya onapit ed sikato. (Sant. 4:8) Nen indedikam so sarilim ed si Jehova tan nampabautismo ka, mas naging espisyal so pankakaaro yon dua. Malikeliket si Jehova ed satan ya ginawam, kanian im-promise to ya ‘ikalbo tod sika so dakerakel a bendisyon ya anggad anggapo lay napanginan ed satan.’​—Mal. 3:10; Jer. 17:7, 8.

3. Antoy obligasyon na kada dedikado tan bautismadon Kristiano? (Eclesiastes 5:4, 5)

³ Siempre, say bautismo et gapoan labat. Kayari to ’tan, seguradon labay mon gawaen so anggaay nayarian mo pian natoor moy dedikasyon mo anggano wala ray tukso tan onsabin subok ed bilay mo. (Basaen so Eclesiastes 5:4, 5.) Lapud disipulo ka la nen Jesus, maapit mo lan tumboken so alimbawa to tan unoren mo met la ray ganggan to. (Mat. 28:19, 20; 1 Ped. 2:21) Makatulong iyan artikulo pian tuloytuloy mon natumbok si Jesus kayari na bautismom.

‘ITULTULOY MON TUMBOKEN’ SI JESUS ANGGANO WALA RAY SUBOK TAN TUKSO

4. Akin et nibagan amin ya disipulo nen Jesus et singa walay sasakbaten dan “panamairapan a poste”? (Lucas 9:23)

⁴ No say sakey et nampabautismo, agto labay ya ibagan aglan balot naproblema. Diad tua, malinlinew ya imbaga nen  Jesus ya amin ya disipulo to et walay sakbaten dan “panamairapan a poste.” Imbaga to ingen ya “inagew-agew” da itan ya sakbaten. (Basaen so Lucas 9:23.) Kasin say labay ya ibaga nen Jesus et puros irap tan problema labat so bilay na sakey ya Kristiano? Andi. Nia so punto to: Maliket so magmaliw ya Kristiano tan dakel so bendisyon, pero walan-walay irap tan subok ya arapen na saray patumbok to. No maminsan ingen, talagan grabe tan matindi ya subok so naeksperiensya ra.​—2 Tim. 3:12.

5. Antoy im-promise nen Jesus ed saramay akaparaan ya mansakripisyo parad Panarian?

⁵ Kasin kontra iray kapamilyam ed pandadayew mod si Jehova? Kasin walay insakripisyom pian naiyunam so Panarian ed bilay mo? (Mat. 6:33) No on, makapantiwala ka ya nanenengneng tan papablien nen Jehova so katooran mo tan pansasakripisyom. (Heb. 6:10) Seguradon apatunayan mo la ya tua iyan imbaga nen Jesus: “Siopaman ya anaynan ed abung to odino agagi ton lalaki odino agagi ton bibii odino ina to odino ama to odino ananak to odino kaumaan to nisengeg ed siak tan nisengeg ed maong a balita et mangawat na maminlasus ed karakel ed sayan panaon​—kaabungan, agagin lalaki tan bibii, kainaan, ananak, tan kaumaan, anggaman ed saray panamasegsegang—​tan diad onsabin sistema na mundo et bilay ya andi-anggaan.” (Mar. 10:29, 30) On, amin ya bendisyon ya iiter nen Jehova ed sikatayo et masulosulok ni kompara ed saray sakripisyon gagawaen tayo parad sikato.​—Sal. 37:4.

6. Anggano bautismado ka la, akin et kailangan ya tuloytuloy mo nin labanan so “pilalek na laman”?

⁶ Anggano bautismado ka la, kailangan mo nin labanan so “pilalek na laman.” (1 Juan 2:16) Anggad agka ni perpekto, walan-walay panaon ya naliknam itan. Seguro, maka-relate ka ed si apostol Pablo ed sayan insulat to: “Diad pusok et talagan panliliketan koy ganggan na Dios, balet nanenengneng ko ed laman ko so sananey a ganggan a milalaban ed ganggan na nonot ko. Sayan ganggan et say kasalanan a walad laman ko tan mangokontrol ed siak.” (Roma 7:22, 23) Singa si Pablo, ompan nadismaya ka met no wala ni ran siansiay lalabanan mon makasalanan ya pilalek. Pero antoy makatulong pian determinado kan labanan itan? Nonot mo imay im-promise mod si Jehova nen indedikam so sarilim ed sikato. Diad tua, no atan so sankanonot mo, agka la nairapan ya mandesisyon no nipaarap kad tukso. Akin ey?

7. Panon ya makatulong so dedikasyon mod si Jehova pian mansiansia kan matoor ed sikato?

⁷ Nen indedikam so sarilim ed si Jehova, imburi o intakwil mo lay sarilim. Labay ton ibaga, anggano walay labay mon gawaen o ambisyon mo pero antam ya kontra itan ed panlabayan nen Jehova, agmo la itan gawaen. (Mat. 16:24) Kanian no nasubok o natukso ka, agka la manduaran isip no antoy gawaen mo. Mainomay moy mandesisyon ta saksakey so labay mon gawaen​—say manmatoor ed si Jehova. Atan labat so sankanonot mo, kanian singa ka si Job. Anggano matindi so subok ya dinalan to, imbaga to nin siansia ya: “Agko ikbanan so integridad ko!”​—Job 27:5.

8. Akin et mas nalabanan moy tukso no sankanonot mo may promise mod si Jehova nen indedikam so sarilim ed sikato?

⁸ No sankanonot mo may promise mo ed si Jehova nen indedikam so sarilim ed sikato, mas desidido kan labanan so tukso. Singa bilang, no dedikado ka la, kasin salien mo ni mi-flirt ed asawa na arum? Siempre andi, ta im-promise mo lad si Jehova ya agka manggawa na kontra ed panlabayan to. Diad kabaliktaran balet, no agmo sankanonot so dedikasyon mo, paulyanan mo labat ya ontubo ed pusom  so mauges ya pilalek, ya anggad onlamot la itan. Kanian nairapan ka no kailangan mo lan bagoten so mauges ya pilalek mo. Mas maong sirin no diad gapo ni labat et “arawian mo [la]” so “dalan na saray mauges.”​—Pro. 4:14, 15.

9. Akin et mas determinado ka ya iyuna so panagdayew mod si Jehova no sankanonot moy dedikasyon mo?

⁹ Panon to no walay nan-offer ed sika na trabaho ya lapud satan et agmo la naatendian so amin ya aral? No sankanonot moy dedikasyon mod si Jehova, seguradon tanggian mo itan ya tampol, ta desidido ka ya agmangawat na trabaho ya apektoen toy pipiaral mo. Diad kabaliktaran balet, no agmo sankanonot so dedikasyon mo, ompan natukso kan awaten itan ya trabaho, kanian agmo la naiyunay Jehova ed bilay mo. Mas maong sirin no diad gapo ni labat et tanggian mo lan tampol so antokaman ya apektoen toy relasyon mod si Jehova, say Dios ya angidedikaan moy bilay mo. Alig moy Jesus. Komon ta lanang mon sankanonot no antoy makapaliket ed Dios.​—Mat. 4:10; Juan 8:29.

10. Panon kan tulongan nen Jehova pian ‘tuloytuloy mon natumbok’ si Jesus kayari na bautismom?

¹⁰ Kada no walay subok o tukso, tandaan mo ya tsansam itan pian nipanengneng mod si Jehova ya desidido kan ‘tuloytuloy ya tumboken’ si Jesus. Mantiwala ka ya tulongan ka nen Jehova pian nasarag mo ray subok tan nalabanan moy tukso. Ibabaga na Biblia: “Matoor so Dios, tan agto abuloyan a nipaarap kayod tukso ya agyo nayarian, balet sano onsabi so tukso et sikatoy manggawa met na dalan a pawayan pian nasungdoan yo itan.”​—1 Cor. 10:13.

ANTO RAY GAWAEN MO PIAN TULOYTULOY MON NATUMBOK SI JESUS?

11. Antoy sakey ed saray sankaabigan ya paraan pian tuloytuloy mon natumbok si Jesus? (Nengnengen met so litrato.)

¹¹ Maseseg si Jesus tan lanang ya manpipikasi kanian maap-apit so liknaan tod Ama to.  (Luc. 6:12) Alig moy alimbawa to. Anggano bautismado ka la, komon ta manisip ka no anto ni ray nagawaan mo pian lalo kan onapit ed si Jehova. Atan so sakey ed saray sankaabigan ya paraan pian tuloytuloy mon natumbok si Jesus. Ibabaga na Biblia: “Antokaman so inaligwasan tayo la, mantultuloy tayo komon ya onabante.” (Fil. 3:16) Seguro, napapaseseg ka kada no nababasam o nababantayan mo iray eksperiensya na saray agagi ya nansakripisyo pian mas napanlingkoran da ni Jehova. Ompan in-goal day manaral ed School for Kingdom Evangelizers odino namboluntaryo ra ed lugar ya daiset so Tasi. Marakep no ontan met so i-goal mo, lalo la no wala kad kipapasen ya gawaen itan. Dakel ya lingkor nen Jehova so akaparaan ya manpausar ed sikato diad nanduruman paraan. (Gawa 16:9) Panon to balet no agmo ni iratan nagawaan natan lapud situasyon mo? Agmo komon iisipen ya mas inaro nen Jehova iramay agagi ya nagagawaan da iratan ya goal. Say importante ed sikato et tuloytuloy tayon manlingkor tan manmatoor anggad anggaan. (Mat. 10:22) Antokaman so abilidad o situasyon mo, agmo komon lilingwanan ya napapaliket moy Jehova no iiter moy ‘the best’ mo ed sikato. Atan so sakey ya paraan pian tuloytuloy mon natumbok si Jesus kayari na bautismom.​—Sal. 26:1.

12-13. Antoy gawaen mo no nalikas mon onkakapuy lay seseg mo ed panaglingkor? (1 Corinto 9:16, 17) (Nengnengen met so kahon ya “ Itultuloy Moy Milumba Parad Bilay.”)

¹² Panon to no diad ilabas na panaon et nalikas mon aliwa lan impapuso iray pikakasim odino natatabangan ka lan manpulong? Panon to no napapaulyanan mo lay panagbasam na Biblia, odino manbabasa ka ya tua pero agmo la nai-enjoy? No bilang ta ontan so naliliknam kayarim ya abautismoan, agmo komon  iisipen ya anggapo lad sika so pabor nen Jehova. Lapud agtayo perpekto, wala ran talagay panaon ya manguman-uman so emosyon tayo. No bilang ta onkakapuy lay seseg mo, isip moy alimbawa nen apostol Pablo. Ginawa toy anggaay nayarian ton aligen si Jesus. Pero inamin to met ya no maminsan et natatabangan ed ministeryo. (Basaen so 1 Corinto 9:16, 17.) Kuan to: “Anggano napipilitan ak a gawaen iya, wala nin siansiay inmatalek ed siak a responsabilidad.” Singa ibabaga dia nen Pablo ya anggano walay negatibon nalilikna to, desidido ya sumpalen so responsabilidad ya inmatalek ed sikato nen Jehova.

¹³ Singa si Pablo, agka komon ompapayag ya natalo ka na emosyon mo. Gawam nin siansia no antoy duga anggano walay negatibon naliliknam. Diad tua, no ontan so gawaen mo, ompan agmo naliklikas et kalkalna la manayan ompapawil so liket tan seseg mo. Agka onsusuko ya tumboken si Jesus. Itultuloy mo labat so man-personal study, manpikasi, miaral, tan manpulong. Malay mo, ompan wala ray agagin napapaseseg mo ta nanenengneng da kan tuloytuloy ya manlilingkor ed si Jehova anggano lalabanan mo iray negatibon liknaan.​—1 Tes. 5:11.

“ITULTULOY YON SUBOKEN . . . ITULTULOY YON PANEKNEKAN”

14. Anto dapat so regular mon usisaen ed sarilim, tan akin? (2 Corinto 13:5)

¹⁴ Anggano bautismado ka la, importante ya regular mon usisaen so sarilim. (Basaen so 2 Corinto 13:5.) Marakep no sagpaminsan et usisaen moy panagpikasim, panagbasam na Biblia, personal study’m, pipiaral, tan panagpulong mo. Man-isip tan manggawa kay paraan pian lalom nin na-improve iratan. Singa bilang, tepetan moy sarilim: ‘Kumustay panagbangat ko? Kasin sarag kon i-explain iray manunan bangat na Biblia? Anto ni kasi sarag kon gawaen pian mas na-enjoy koy ministeryok? No manpipikasi ak, kasin espisipiko tan nalilikna nen Jehova ya mantitiwala ak ed sikato? Say pipiaral ko ey? Kasin naaatendian koy amin ya aral? Anto kasi gawaen ko pian mas akapokus ak legan na aral tan makapankomento ak?’

15-16. Antoy naaralan mod eksperiensya nen Brother Robert?

¹⁵ Importante met ya antam no anto ray kakapuyan mo. Walay naaralan tayod eksperiensya na sakey ya brother, si Robert. Kuan to: “Nen manga 20 so taon ko, walay part-time job ko. Aminsan kayari trabahok, walay biin katrabahok ya itatagar to ak ed abung da.  Bukor mi labat kunon dua kanian seguradon man-enjoy kami. Imbes ya tanggian kon tampol, nandahilan ak labat. Pero lapud agto ak tundaan, diman ko la imbaga ya agko labay tan in-explain ko no akin.” Nakomendaan si Robert ta alabanan toy tukso. Pero no pawilen to kuno iman ya agawa, wala ni komoy mas marakep ya ginawa to. Oniay inamin to: “Agkon tampol tinanggian may katrabahok, aliwan singa si Jose ya talagan imbatikan to may asawa nen Potifar. (Gen. 39:7-9) Diad tua, abigla ak ed sarilik ta nairapan ak ya ontanggi. Diman ko a-realize ya kailangan ko nin pabiskegen so pikakaarok ed si Jehova.”

¹⁶ Singa si Robert, marakep no usisam so sarilim no antoy naging reaksion mo nen nipaarap kad tukso. Nakomendaan ka no alabanan mo itan. Pero tepetan moy sarilim: ‘Kasin inmiwas tan tinmanggi ak ya tampol, odino nanduaran isip ak ni?’ No a-realize mo ya agka masyadon desidido ya gawaen so duga no walay tukso, agka komon nadidismaya. Maong ingen ta naamtaan moy kakapuyan mo. Ipikasim itan ed si Jehova. Patulongan kad sikato, tan manggawa kay paraan pian mas ombiskeg so determinasyon mon unoren iray estandarte to.​—Sal. 139:23, 24.

17. Panon ya nalalanor so ngaran nen Jehova diad samay eksperiensya nen Robert?

¹⁷ Wala ni naaralan tayod eksperiensya nen Robert. Oniay katuloyan na istorya to: “Nen tinanggian ko may katrabahok, say kuan to: ‘Akapasa ka!’ Tinepet ko no antoy labay ton ibaga. Inistorya to ya walay kaaro ton laki ya datin Tasi. Imbaga na sayan laki ya mansanto-santoan labat iray kabataan ya Tasi, tan mainomay day ombigay ed tukso. Kanian sinali to ak ya tuksoen pian nanengneng to kuno no ombigay ak met. Maong labat ta tinmanggi ak. Malikeliket ak ta apagalangan koy ngaran nen Jehova.”

18. Anggano bautismado ka la, antoy determinadom ya gawaen? (Nengnengen met so kahon ya “ Duaran Artikulo ya Makatulong ed Sika.”)

¹⁸ Say dedikasyon mo tan bautismom et patunay ya labay mon napasanto so ngaran nen Jehova anggan antoy nagawa. Nanenengneng nen Jehova so pani-effort mo ya anosan iray subok tan labanan iray tukso. Seguradon bendisyonan toy panmamatoor mo. Mantiwala ka ya tuloytuloy to kan ikdan na masanton espiritu to pian walay biskeg mon gawaen so duga. (Luc. 11:11-13) Diad tulong nen Aman Jehova, tuloytuloy mon natumbok si Jesus kayari na bautismom!