1. No maminsan, antoy nalilikna na anggan saray matoor ya lingkor nen Jehova?

 BALIBALI ed liknaan ya amta tayon walad sikatayoy pabor nen Jehova bilang Tasi to! Oniay ibabaga na Biblia: “Panliliketan nen Jehova so totoo to.” (Sal. 149:4) Pero no maminsan, ompan naisip mo, ‘Siak ey, kasin inaro ak nen Jehova tan naliliketan ed siak?’ No ontan so naliliknam, agmo bukbukor. Diad tua, alikna met itan na saray matoor ya lingkor nen Jehova diad panaon na Biblia.​—1 Sam. 1:6-10; Job 29:2, 4; Sal. 51:11.

2. Panon tayon napaliket si Jehova?

² Anggano agtayo perpekto, sarag tayon napaliket si Aman Jehova tan naala so pabor to. Nagawaan tayo itan no ipanengneng tayoy pananisia ed si Jesu-Kristo tan manpabautismo tayo. (Juan 3:16) Atan so mangipanengneng ed saray totoo ya nagbabawi tayo lad saray kasalanan tayo tan im-promise tayo lad si Jehova ya gawaen tayo lay panlabayan to. (Gawa 2:38; 3:19) Nen indedikam so sarilim ed si Jehova tan nampabautismo ka, sikatoy apaliket mo kanian mas naar-aro to ka. No gawaen moy anggaay nayarian mon manmatoor ed sikato ya singa ed samay im-promise mo, napaliket moy Jehova tan ituring to kan kaaro.​—Sal. 25:14.

3. Anto ran tepet so pantongtongan tayo ed sayan artikulo?

³ No maminsan, akin balet et nalilikna tayon ag-itayo inaro na Dios? Anto ray gagawaen nen Jehova pian ipaliknan inar-aro to tayo? Tan anto met so gawaen tayo pian agtayo pandudaan ya inar-aro itayo nen Jehova?

AKIN ET NALILIKNA NA ARUM YA AG-IRA INARO NEN JEHOVA?

4-5. Anto so dapat tayon isipen no nalilikna tayon anggapoy kana tayo?

⁴ Wala ray agagi ya manlapu lad inkaugaw da et abebbeba so pakanengneng dad sarili da. (Sal. 88:15) Oniay imbaga nen  Brother Adrián: “Manlapu la nensaman, say pakaliknak et anggapoy kanak. Nanonotan ko nen ugaw ak ni, ipipikasik ya komon et kompleto kamin pamilya ya makasabi ed Paraiso. Pero amtak ed sarilik ya agko deserve so manbilay ya andi-anggaan.” Onia met so imbaga nen Brother Tony ya aliwan Tasi iray atateng to: “Agkon balot arengel ed atateng ko ya inar-aro da ak o proud irad siak. Kanian feeling ko, singa anggapoy maong ya nagagawaan ko.”

⁵ Kasin makaka-relate ka ed si Brother Adrián tan Tony? No on, agmo komon lilingwanan ya inyasingger kan mismo nen Jehova ed sarili to. (Juan 6:44) Nanenengneng to ray maong ya ugalim ya ompan agmo nanenengneng ed sarilim. Tan amta to no anton talagay walad pusom. (1 Sam. 16:7; 2 Awa. 6:30) Kanian no imbaga ton mabmabli ka, panisiaan mo, ta diad pakanengneng to et karapat-dapat kan aroen.​—1 Juan 3:19, 20.

6. Antoy alikna nen apostol Pablo ed saray agawaan ton lingo nensaman?

⁶ Wala ray agagi ya nakokonsiensia ed agawaan dan lingo antis iran nagmaliw ya Tasi. (1 Ped. 4:3) Tan diad tua, anggano abaybayag tayo lan matoor ya manlilingkor ed si Jehova, ompan wala nin siansiay lalabanan tayon kakapuyan. Sika ey, kasin say pakaliknam et agka lan balot naperdona nen Aman Jehova? Diad tua, agmo bukbukor. Anggan saray matoor ya lingkor nen Jehova nensaman et ontan met so alikna ra. Sakey lay apostol Pablo. Kada no nanonotan to ray agawaan ton lingo antis ya nagmaliw ya Kristiano, say pakalikna to et miserable so bilay to. (Roma 7:24) Tua ya nagbabawian to la iraman ya ginawa to tan abautismoan la, pero indeskribe to nin siansia so sarili to ya “sankaabebaan ed saray apostol” tan “sankamanunaan” ed saray makasalanan.​—1 Cor. 15:9; 1 Tim. 1:15.

7. Antoy dapat tayon tandaan tungkol ed saray agawaan tayon lingo nensaman?

⁷ Im-promise nen Aman Jehova ya sikatoy akaparaan ya mamerdona no magbabawi tayo. (Sal. 86:5) Kanian no nagbabawian mo la ray lingom nensaman tan gagawaen moy anggaay nayarian mon agla itan uliten, makapantiwala ka ya talagan pinerdona to ka la.​—Col. 2:13.

8-9. Antoy tandaan tayo no pakalikna tayo et singa kulang so nagagawaan tayo parad si Jehova?

⁸ Normal labat ya labay tayon gawaen so anggaay nayarian tayo pian napaliket tayoy Aman Jehova. Pero ompan say pakalikna na arum et singa kulang so nagagawaan da parad si Jehova kanian agda napapaliket so Dios. Oniay imbaga nen Sister Amanda: “Iisipen ko ya no aliwan dakel so nagagawaan ko parad si Jehova, singa agko iiter so ‘the best’ kod sikato. Sasagaden koy sarilik. No daiset labat so nagagawaan ko, feeling ko palpak ak tan dismayadoy Aman Jehova ed siak.”

⁹ No nalilikna tayon singa kulang so nagagawaan tayo parad si Jehova, tandaan tayo ya sikatoy makatunongan tan makonsidera ya Dios. Amta to no anto labat so sarag tayon gawaen, kanian agto ipagawa ed sikatayo so agtayo met kaya. Say importante ed sikato et gagawaen tayoy anggaay nayarian tayo. Makatulong met no isipen tayo ray alimbawa ed Biblia ya interon puso ya nanlingkor ed si Jehova. Makaaral tayo ed alimbawa nen Pablo. Diad loob na pigaran taon, ararawi so nakar to tan masetseseg ya nampulong. Lapud kuli to, dakel so abuon kongregasyon. Pero nen anguman so situasyon to, limitado lay napupulongan to. Labay to kasin ibaga, nakal lay pabor na Dios ed sikato? Andi. Sikatoy benendisyonan nen Aman Jehova ta ginawa to nin siansia no antoy iyabuloy na situasyon to. (Gawa 28:30, 31) Singa si Pablo, ompan onsabi panaon ya aliwa lan singa dati so nagagawaan tayo  parad si Jehova. Pero say importante et say motibo tayo​—no akin ya gagawaen tayo itan. Pantongtongan tayo natan no anto ray gagawaen nen Jehova pian nipalikna ton inar-aro to tayo.

ANTO RAY GAGAWAEN NEN JEHOVA PIAN IPALIKNAN INAR-ARO TO TAYO?

10. Panon mon “narengel” si Aman Jehova ya singa to ibabagan, ‘Inar-aro ta ka’? (Juan 16:27)

¹⁰ Uusaren toy Biblia. Labalabay nen Jehova ya ibalikas so panamabli to ed saray inar-aro to. Akarekord ed Biblia so duaran pagkakataon ya nansalita si Jehova manlapud tawen tan imbaga tod si Jesus: “Saya so Ana’ko, say inad-arok.” (Mat. 3:17; 17:5) Sika ey, kasin labay mo met ya “narengel” si Jehova ya ibaga ton inar-aro to ka? Agtayo la direktan narengel so boses nen Aman Jehova natan manlapud tawen. Pero kada no manbabasa tayoy Biblia, singa to tayo kakatongtongen, lalo la no babasaen tayoy Ebanghelyo​—amay apatiran libro ya pakabasaan ed saray imbaga nen Jesus nen wadiad dalin. (Basaen so Juan 16:27.) Amin ya ugali tan kualidad nen Jesus et naalig to met labat ed Ama to. Kanian kada no nababasam iray ekspresyon na panangaro tan panamabli nen Jesus ed saray matoor ya papatumbok to anggano wala ray kakapuyan da, marakep no imadyinen mo ya singa met ibabagan mismo nen Jehova iratan ed sika.​—Juan 15:9, 15.

11. No ondadalan tayod subok, labay to kasin ibaga et ag-itayo la inaro nen Jehova? Ipaliwawa. (Santiago 1:12)

¹¹ Aasikasoen to itayo. Labalabay itayon tulongan nen Aman Jehova. Singa bilang, iiter to ray materyal ya kaukolan tayo. Tua, ag-itayo ipapaliis nen Jehova ed saray subok, ya singa agawad matoor ya lingkor ton si Job. (Job 1:8-11) Pero no ondadalan tayod subok, agto labay ya ibagan ag-itayo la inaro nen Jehova. Diad tua, tsansa tayo ingen itan pian ipanengneng ya sikatoy inar-aro tayo tan baleg so tiwala tayod sikato. (Basaen so Santiago 1:12.) No diman tayo aanosan iray subok, diman tayo met mas nalikna so malasakit tan suporta nen Jehova.

12. Antoy naaralan tayo ed eksperiensya nen Brother Dmitrii?

¹² Imanoen tayo pay eksperiensya nen Brother Dmitrii ya taga Asia. Sikatoy nakal ed pantratrabahoan to tan anggano pigay bulan lan manaanap, anggapoy naalmo ton trabaho. Legan na satan, labay ton ipanengneng ed si  Jehova ya mabiskeg so tiwala tod sikato, kanian mas dinakelan toy oras tod ministeryo. Pero linmabas lay pigaran bulan, anggapo nin siansiay trabaho to. Insan nansakit ni na grabe, tan sinmabid punto ya wala labat ed dukolan. Inisip to laingen ya anggapo lay kana to bilang asawa tan ama. Tan diad tua, alikna to kuno ya singa agla inaro nen Jehova. Pero aminsan ya labi, im-print na anak to imay nabasa ed Isaias 30:15: “Say biskeg yo et akadepende ed pansiansia yon kalmado tan pangipatnag yoy panagmatalek.” Insan to inawit ed si Dmitrii tan kuan to, “Daddy, no maermen kayo, basa yo yan teksto.” Diman a-realize nen Dmitrii ya sikatoy inar-aro nen Jehova tan agto ira papaulyanan. Wala nin siansiay naakan, kawes, tan panayaman na pamilya to. Oniay imbaga nen Dmitrii: “Say kaukolan ko labat ya gawaen et mansiansian kalmado tan tuloytuloy ya mantiwala ed si Jehova.” Kasin wala met so subok ya aarapen mo natan? Komon ta manmatalek ka ya asikasoen ka nen Jehova tan tulongan to ka pian nasarag mo itan.

13. Siopa ray uusaren nen Jehova pian ipaliknan inar-aro to tayo, tan panon to itan ya gagawaen?

¹³ Uusaren to ray agagi. Uusaren met nen Jehova iray agagi tayo pian ipaliknan inar-aro to tayo. Singa bilang, ompan pakilosen toy sakey ya agi ya mamaseseg ed sikatayo diad panaon ya kakkailangan tayo. Naeksperiensya itan na sakey ya sister diad Asia nen nantatabonan lay problema to. Sikatoy nakal ed trabaho tan nansakit na grabe. Insan akagawa na seryoson kasalanan so asawa to tan nakal ya elder. Oniay imbaga na sayan sister: “Say kuan kod sarilik, ‘Akin et oniay nagagawa? Wala amoy ginawak ya aliwa katon agak la inaro nen Jehova.’” Espisipikon impikasi na sayan sister ya ipalikna komon nen Jehova ed sikato ya inar-aro to. Panon ya inebatan nen Jehova so pikakasi to? Kuan to: “Kinatongtong ak na  saray elder tan impaseguro dad siak ya inar-aro ak nen Jehova.” Ag-abayag, onman lamet so impikasi tod si Aman Jehova. Oniay imbaga ton agawa: “Diad saman lanlamang ya agew, walay naawat kon sulat ya nanlapud pigaran agagi diad kongregasyon mi. Legan kon babasaen so sulat da, apaseseg ak tan aliknak ya aman so ebat nen Jehova ed pikakasik.” Kanian no walay mamaseseg ed sika, isip mo ya nanlapu itan ed si Jehova, ya singa to ibabagan, ‘Inar-aro ta ka.’​—Sal. 10:17.

14. Anto ni sakey ya paraan ya ipapalikna nen Jehova ya inar-aro to tayo?

¹⁴ Uusaren met nen Jehova iray agagi ya mansimbawa ed sikatayo no kaukolan tayo itan. Atan so sakey ya paraan pian nipalikna ton inar-aro to tayo. Singa bilang, nen inmunan siglo, inusar nen Jehova si apostol Pablo ya manggawa na 14 ya sulat parad nanduruman kongregasyon. Diad saratan ya sulat, prangka ton sinimbawa iray agagi pero diad maaron paraan. Akin et impaisulat nen Jehova ed si Pablo iratan ya simbawa? On ta maar-aro tan maomaong ya Ama si Jehova. Didisiplinaen to iray ananak to ta “papablien to” ra. (Pro. 3:11, 12) Kanian no walay mansimbawa ed sika base ed Biblia, agmo komon iisipen ya apabarong moy Jehova. Diad tua, patunay ingen itan ya inar-aro to ka. (Heb. 12:6) Anto ni ray pakanengnengan ya inar-aro itayo nen Jehova?

ANTO NI RAY PAKANENGNENGAN YA INAR-ARO ITAYO NEN JEHOVA?

15. Siopa labat so iikdan nen Jehova na masanton espiritu to, tan akin et makapaseseg iyan naamtaan?

¹⁵ Saray iikdan nen Jehova na masanton espiritu et saramay inar-aro to. (Mat. 12:18) Tepetan moy sarilim, ‘Kasin ipapanengneng ko iray ugali tan kualidad ya kaiba ed bunga na masanton espiritu?’ Singa bilang, ompan alikas mod sarilim ya mas maanos ka la natan kompara nen agmo ni kabat si Aman Jehova. No ipapanengneng mo ray kualidad ya kaiba ed bunga na masanton espiritu, labay ton ibaga, walad sika so pabor nen Jehova tan inar-aro to ka.​—Nengnengen so kahon ya “ Say Bunga na Espiritu et . . . ”

16. Siopa ray uusaren nen Jehova pian ipulong so maong ya balita, tan akin et makapaseseg iyan naamtaan? (1 Tesalonica 2:4)

¹⁶ Inmatalek nen Jehova so maong a balita ed saramay “inabobonan” o inar-aro to. (Basaen so 1 Tesalonica 2:4.) Aliklikna itan na sakey ya sister, si Jocelyn. Aminsan kabangon  to, tinmuka kunoy depression to. Oniay inistorya to: “Makapkapuy ak tan say pakaliknak et anggapoy kanak. Pero eskedyul koy manpulong ed saman ya agew ta payunir ak. Kanian nampikasi ak tan pinmaway ak.” Diad saman ya kabuasan, apulongan nen Jocelyn si Mary. Mabaibait iyan bii tan nampa-Bible study. Nen pigaran bulan la ran mani-study, naistorya nen Mary ya sikatoy nampikasi ed Dios diad samay kabuasan antis ya tinmoktok si Jocelyn ed abung da. Antoy alikna nen Jocelyn nen naamtaan to itan? Kuan to: “Singa imbaga nen Jehova ed siak ya, ‘Naliliketan ak ed sika tan inar-aro ta ka.’” Siempre, aliwan amin ya napulongan tayo et ondengel. Pero say segurado, naliliketan si Aman Jehova no gagawaen tayoy amin pian naipulong tayoy maong ya balita.

17. Antoy naaralan mo ed imbaga nen Vicky tungkol ed dondon? (Salmo 5:12)

¹⁷ Lapud dondon, peperdonaen nen Jehova so kasalanan na saramay inar-aro to. (1 Tim. 2:5, 6) Panon to balet no say pakalikna tayo et ag-itayo karapat-dapat ya aroen nen Jehova anggano walay pananisia tayo ed dondon tan abautismoan tayo la? Tandaan tayo ya aga napantiwalaan so ididikta na emosyon tan puso tayo, pero napantiwalaan tayoy Aman Jehova. Diad pakanengneng to, matunong tan malinis so sakey ya toon walay pananisia to ed dondon. Im-promise to ya bendisyonan toy ontan iran totoo. (Basaen so Salmo 5:12; Roma 3:26) Marakep sirin no dalepdepen tayo so dondon. Ontan so ginawa nen Sister Vicky. Onia kunoy a-realize to nen inisip ton maong so dondon: “Abayag la manayan manaanos si Jehova ed siak. . . . Pero singak ibabagad sikato: ‘Kulang ni panangarom ed siak. Tan say dondon bagat na Anak mo et kulang pian nabayaran toy kasalanan ko.’ . . . Pero lapud impandalepdep kod sayan balibalin regalo, sa wakas aliknak ya inaro ak ya talaga nen Jehova.” Singa si Vicky, ontan met so naliknam no dalepdepen mo so dondon.

18. Antoy ipapaseguro nen Aman Jehova ed saramay tuloytuloy ya mangaaro ed sikato?

¹⁸ Anggano inyaplikam lan amin so suggestion ed sayan artikulo, ompan no maminsan et onkapuy nin siansia so liknaan mo tan pandudaan mo no kasin inaro ka nen Jehova. Tandaan mo ya agmanguuman so panangaro to, tan sikatoy agan balot onsawan mangaro “ed saramay mantutultuloy a mangaaro ed Sikato.” (Sant. 1:12) Kanian itultuloy mo labat so onapit ed si Jehova. Kada agew, likas mo no panon ton ipapalikna ya inar-aro to ka. Agmo lilingwanan ya si Jehova et “ag-arawi ed balang sakey ed sikatayo.”​—Gawa 17:27.