1. Anton alimbawa ed panagpulong so impanengneng nen Jesus ed saray papatumbok to, tan panon dan inalig so alimbawa to? (Nengnengen so litrato ed apis.)

NEN wadiad dalin si Jesus, sikatoy maseseg tan makulikulin nampulong, tan labay ton ontan met so gawaen na saray papatumbok to. (Juan 4:35, 36) Nen kaiba na saray disipulo si Jesus, agaylay seseg dan manpulong. (Luc. 10:1, 5-11, 17) Balet nen inaresto tan inatey si Jesus, tinmabang irad satan ya kimey. (Juan 16:32) Kanian kayari na inkioli to, pinaseseg to ran manpokus lamet ed panagpulong. Impapuso da itan ya bilin to. Kanian nen wala lad tawen si Jesus, makulikuli ra lamet ya nampulong ya anggad punton asyodotan ya maong iramay onkokontra ed sikara tan imbaga dan: “Pinano yo na bangat yo so Jerusalem.”—Gawa 5:28.

2. Antoy ebidensya ya benendisyonan nen Jehova so panagpulong a kimey?

² Indaulo nen Jesus so impanpulong na saray inmuunan Kristiano, tan mapatpatnag ya benendisyonan nen Jehova so impansagpot da ta dinmakerakel ira. Singa bilang nen Pentecostes 33 C.E., manga 3,000 so nampabautismo. (Gawa 2:41) Tan tuloytuloy ni ran dinmakel. (Gawa 6:7) Balet singa impasakbay nen Jesus, lalon linmaknab so panagpulong a kimey diad sayan kaunoran iran agew.—Juan 14:12; Gawa 1:8.

3-4. Akin et nanairapan ya manpulong so arum ya agagi, tan antoy aralen tayo ed sayan artikulo?

³ Gagawaen tayoy anggaay nayarian tayo pian mansiansia tayon maliket diad ministeryo. Diad arum ya bansa, balibali so manpulong ta dakel so malabay ya paiyaralan na Biblia. Say arum ingen et kaukolan da ni manalagar ya anggad wala lay available ya mangiyaral ed sikara. Balet diad arum ya bansa,  nanairapan ya manpulong so arum ya agagi ta ngalngali agda nasabi iray totoo ed kaabungan. Tan no bilang walay nasabi da, agmet lanlamang interesado ed Biblia.

⁴ No wala ray ontan ya subok diad lugar yo, makatulong iray suggestion ed sayan artikulo. Amtaen tayo no antoy gagawaen na arum ya agagi pian mas dakel so napulongan da. Aralen tayo met no akin ya agtayo dapat onsasawan manpulong, ondengel man iray totoo odino andi.

5. Antoy situasyon ed teritorya na arum ya agagi?

⁵ Diad arum ya lugar, mairap parad saray agagi ya nakatongtong iray totoo diad mismon abung da. Ompan diad teritorya da et dakdakel so apartment odino subdivision ya guardiado. Agda ra palooben no anggapoy permiso na akan-abung. Diad arum ya lugar, aliwan bawal so manpulong ed kaabungan, pero anggapo lanlamang so nasasabi na saray agagi. Wala met iray agagi ya say teritorya da et diad nisulinek iran baryo ya dagdaiset so manaayam. Arawi so biabiahien da pian nasabi labat so sakey ya abung, kasabi da balet et anggapoy too. No wala ray ontan ya teritorya tayo, agtayo dapat onsuko. Anto sirin so gawaen tayo pian walan walay napulongan tayo?

6. Akin ya say panagpulong et inkompara ed panagsigay?

⁶ Say panagpulong et inkompara nen Jesus ed panagsigay. (Mar. 1:17) No maminsan, anggapoy naeerel na saray managsigay anggano pigay agew la ran mansisigay. Balet ag-ira onsusuko. Umanen day oras na pansigay da, onalis ira ed pasen ya posiblin dakel so sira, odino salien day arum ya paraan na panagsigay. Sarag tayo met ya gawaen iratan diad ministeryo tayo. Nengnengen tayo so pigaran suggestion.

7. Antoy posiblin resulta no umanen tayoy oras na panagpulong tayo?

⁷ Umanen so oras na panagpulong. Mas dakel so nakatongtong tayo no manpulong tayo diad oras ya posiblin walad abung iray totoo. Sabagay, walan wala met seguroy oras na isempet dad abung da. Say pampupulong na arum ya agagi et diad ngarem o labi ta mas dakel so nasasabi da, tan ompan mas relaks iray unabung kanian mas labay day mitongtong. Walay gagawaen na sakey ya elder ya si David ya sarag tayon aligen. Kayari da kunon pulongan so sakey a teritorya, pawilen dan tampol iramay abung ya anggapoy asabi dan too. Imbaga to: “Makapaliket ta no ontoktok kami lamet, maslak et wala lay too.” *

8. Panon tayon niyaplika so Eclesiastes 11:6 ed panagpulong?

⁸ No agtayo nasasabi ed kaabungan iray totoo, agtayo dapat onsuko. Ontan so ipapaseseg na pinagkateman teksto na sayan artikulo. (Basaen so Eclesiastes 11:6.) Si David ya abitla nen niman et agsinmuko. Walay abung ya aminpiga da lan nila, balet anggapon talagay nasasabi da. Pero aminsan, walan siansiay akatongtong dan laki ya interesado ed Biblia. Imbaga na sayan laki: “Waloy taon ko lan manaayam dia, pero natan ak labat apulongan na saray Tasi nen Jehova.” Imbaga nen David: “Maslak ed saramay totoon agmo nasasabi, no nasabim ira, ondengel ira manaya.”

9. Antoy ginawa na arum ya agagi pian nakatongtong da iramay agnasasabi ed abung da?

⁹ Manpulong ed kawalaan na totoo. Wala ray agagi ya manpupulong ed publikon lugar  pian nakatongtong da iramay agnasasabi ed abung da. Singa bilang, anengneng dan mas epektibo so street witnessing o cart witnessing diad saray teritorya ya dakel so angkakabaleg ya apartment ya bawal so manpulong. Lapud satan ya ginawa da, nakakatongtong da iramay totoon manaayam ditan. Wala met iray agagi ya anengneng dan epektibo so pampulong ed plaza, tindaan, tan lugar na negosyo ta dakel so nakakatongtong da tan dakel met so mangaawat na saray publikasyon tayo. Oniay imbaga nen Floiran, sakey a manangasikaso na sirkito ed Bolivia: “Manpupulong kami ed saray tindaan tan lugar na negosyo manlapud ala-una ya anggad alas-tres na ngarem, ta diad satan ya oras et daiset lay mansasaliw. Kanian maslak et nakakatongtong mi ray managlako tan wala ra ingen so nigapo min Bible study.”

10. Anto ni arum ya paraan pian napulongan mo iray totoo?

¹⁰ Salien so duman paraan na panagpulong. Panon to no aminpigam lan pinawil so sakey ya abung diad nanduruman oras pero anggapo nin siansiay nasasabim? Anto ni kasi sarag mon gawaen? Oniay imbaga nen Katarína: “Susulatan ko iramay agko nasasabi ed abung. Say isusulat ko et no anto may ibagak no nakatongtong ko rad personal.” Antoy naaralan tayo ed satan? Walan walay paraan pian napulongan tayo anggad posible so amin ya totoo diad teritorya tayo.

11. Akin et wala ray totoo ya ag-interesado ed ipupulong tayo?

¹¹ Wala ray totoo ya ag-interesado ed ipupulong tayo. Seguro iisipen da ya agda kaukolan  so Dios tan agda met kaukolan so Biblia. Say arum et agmanisia ya walay Dios ta dakdakel so problema ed mundo. Say arum balet et anggapoy interes dan manaral na Biblia ta nanenengneng day pankunkunwari na saray lider na relihyon. Wala ra met so subsob ya maong ed trabaho da, akapokus irad pamilya da, odino dakdakel so problema da, tan agda amta ya makatulong manaya so Biblia ed bilay da. Antoy gawaen tayo pian agtayo nadismaya anggano wala ray ontan diad teritorya tayo?

12. Panon tayon niyaplika so Filipos 2:4 diad panagpulong?

¹² Ipanengneng so malasakit ed pupulongan mo. Wala ray totoo ya diad unaan et ag-interesado ed maong a balita, balet dinmengel lanlamang ira nen alikna dan walay malasakit to may manpupulong ed sikara. (Basaen so Filipos 2:4.) Singa bilang, oniay imbaga nen David ya abitla nen niman: “No walay unabung ya ibaga ton ag-interesado, ipawil mi nid bag mi so Biblia odino say publikasyon ya awit mi, insan mi ra tepetan: ‘Nayarin naamtaan no akin ya ontan so nibaga yo?’” Nalikas na katongtong tayo no walay malasakit tayo ed sikara. Ompan agda la nanonotan iramay imbaga tayo, balet seguradon agda nalingwanan imay alikna ra nen katongtong tayo ra. No bilang ta agdan talaga labay ya pantongtongan so Biblia, nipalikna tayo nin siansia ya imamalasakit tayo ra diad ekspresyon na lupa tayo tan no makaaro tayo.

13. Antoy gawaen tayo pian mas dengelen na unabung so mensahe tayo?

¹³ Nipanengneng tayon walay malasakit tayo no ibagay tayoy presentasyon tayo ed posiblin pan-interesan na unabung. Singa bilang, kasin walay pakapatnagan ya wala ray ananak to? No wala, ompan sikatoy interesado ed saray bilin na Biblia ed pamabaleg na ananak odino ed saray advice na Biblia no panon ya magmaliw a maliket so pamilya. Kasin piga-pigaray kandado na puertay abung da? Ompan mas ondengel no say topic ya itongtong mo et tungkol ed krimen odino saray makapataktakot ya nagagawa ed mundo, insan kayari to et ibagam no antoy permanentin solusyon ed saraya. Antokaman so situasyon na unabung, no nalikas mon ondengel, ipanengneng mod sikato no panon ya makatulong so Biblia ed bilay to. Oniay imbaga nen Katarína ya abitla nen niman: “Lanang kon iisipen no panon ya inuman na Biblia so bilay ko.” Kanian diad ministeryo, kombinsido si Katarína ed ipupulong to, tan seguradon nalilikas itan na saray katongtong to.

14. Base ed Proverbio 27:17, panon ya makaaral ed sakey tan sakey so san-partner ed panagpulong?

 ¹⁴ Makaaral ed arum. Imbangat nen apostol Pablo ed si Timoteo iray epektibon paraan na panagpulong tan panagbangat. Insan to pinaseseg si Timoteo ya ibangat to met iratan ed saray agagi. (1 Cor. 4:17) Singa si Timoteo, makaaral tayo met ed saray agagin eksperiensyado ed panagpulong. (Basaen so Proverbio 27:17.) Nengnengen tayoy alimbawa na sakey a brother ya si Shawn. Sikatoy abayag a nampayunir ed sakey a baryo ya saray totoo et debotadon maong ed relihyon da. Antoy akatulong pian mansiansian maliket ed ministeryo to? “Anggad posible, labay ko ya walay partner kon manpulong,” so kuan to. “No paonla kami lad onsublay ya abung, pantotongtongan mi no panon min napaaligwas so pitotongtong mi ed saray totoo. Singa bilang, pantongtongan mi no anto ray imbaga to may unabung ya nakar mi tan no anto ray inyebat mi ed sikato. Insan kami manisip na mas marakep ya iyebat no bilang ta wala lamet so onman ya nakatongtong mi.”

15. Akin et importante so pikakasi kada no manpulong ka?

¹⁵ Manpikasi. Kada no manpulong ka, kerew moy tulong nen Jehova ta kaukolan tayoy masanton espiritu to ed amin ya gagawaen tayo. (Sal. 127:1; Luc. 11:13) Dapat espisipiko so pikakasim. Singa bilang, kerew mo ya igiya to ka ed saramay ondengel tan labay da so manaral na Biblia. Kayarim ya manpikasi, gawam met so betang mo—anggad posible et agmo papalampasen so pankanawnawam ya napulongan so sakey a too.

16. Akin ya makatulong ed ministeryo tayo so panag-personal study?

¹⁶ Man-personal study. Ibabaga na Biblia: “[Paneknekan] yo ed inkasikayo so maong tan makapaliket tan ayadyarin linawa na Dios.” (Roma 12:2) No walay personal study tayo, diman tayo magmaliw ya mas kombinsido ed saray katuaan ya nanaaralan tayo. Kanian nalikas na saray pupulongan tayo ya talagan manisia tayo ed ipupulong tayo. Oniay imbaga nen Katarína ya abitla nen niman: “Wala may panaon ya naisip kon kaukolan kon pabiskegen so pananisiak ed saray manunan bangat na Biblia. Kanian im-personal study’k no anto ray ebidensya ya talagan walay Amalsa, ya say Biblia et Salita na Dios, tan walay organisasyon na Dios ya mangirerepresenta ed sikato.” Imbaga nen Katarína ya lapud pampi-personal study to et binmiskeg so pananisia to tan mas maliket ed ministeryo to.

17. Akin et agtinmundan nampulong si Jesus?

¹⁷ Nansiansian maliket si Jesus ed ministeryo to tan agtinmundan nampulong anggano wala ray ag-interesado ed mensahe to. Akin? On ta amta to ya importantin naamtaan na totoo so katuaan, tan labay to ya anggad posible et dakel so naikdan na tsansa ya mangawat ed mensahe na Panarian. Amta to met ya wala ray agmangawat diad unaan balet magmaliw lanlamang iran interesado ed katuaan. Ontan so agawa ed mismon pamilya to. Diad loob na talora tan kapalduan taon na impanpulong to, anggapo ed saray agagi to so nagmaliw ya disipulo to. (Juan 7:5) Balet kayari na inkioli to, nagmaliw lanlamang iran Kristiano.—Gawa 1:14.

18. Akin et agtayo dapat onsasawan manpulong?

¹⁸ Diad ilalabas na panaon, agtayo amta no siopa ni ray mangawat ed katuaan. Say arum et pigay taon ni insan ira ondengel ed mensahe  tayo. Wala met iramay talagan agmangawat, balet no nanengneng dan maong so ugali tayo tan agtayo onsasawan manpulong, ompan onsabi lanlamang so panaon ya “igloria ray Dios.”—1 Ped. 2:12.

19. Base ed 1 Corinto 3:6, 7, antoy nepeg tayon tandaan?

¹⁹ Sikatayo so mantatanem tan mansasalog, pero tandaan tayo ya say Dios so mamapabaleg. (Basaen so 1 Corinto 3:6, 7.) Oniay imbaga nen Brother Getahun ya taga Ethiopia: “Diad masulok ya 20 taon, bukbukor koy Tasi diad lugar mi. Balet natan, 14 kami lan publisher dia. Labintalo so bautismado, kaiba lay asawak tan taloran ananak mi. Manga 32 lay onaatendi ed saray aral mi.” Malikeliket si Getahun ta agsinmawan nampulong tan maan-anos a nanalagar ya iyasingger nen Jehova ed organisasyon To iray mapaabeban totoo!—Juan 6:44.

20. Akin et singa itayo manag-rescue?

²⁰ Mabmabli ed si Jehova so bilay na amin ya totoo. Inter to ed sikatayo so pribilehyon mikimeyan ed Anak to pian natipon iray totoo manlapud amin ya nasyon antis ya onsabi so anggaan. (Ag. 2:7) Say kimey ya panagpulong et singa rescue mission, tan kaiba tayo ed rescue team. Imadyin mo pa ya kaukolan yon i-rescue iramay atabonan ed sakey ya minaan. Anggano pigara labat ed grupo yo so akaromog na mabilay, agto labay ya ibagan asayang so sagpot mo, ta amin yo et nantutulongan. Ontan met ed ministeryo tayo. Agtayo amta no pigara ni so niliktar ed sayan sistema nen Satanas. Balet tandaan tayo ya sarag nen Jehova ya usaren so anggan siopa ed sikatayo pian natulongan ira. Oniay imbaga nen Brother Andreas ya taga Bolivia: “No say sakey et naaralan toy katuaan ya anggad abautismoan, segurado ak ya resulta itan na impantutulongan tayo.” Kanian agtayo komon onsasawan manpulong. Diad ontan et bendisyonan itayo nen Jehova tan panliketan tayoy ministeryo tayo.