1-2. Antoy imbaga na autor na sakey ya libro, tan antoy aralen tayo ed sayan artikulo?

MINILYON natan so mangibabaga ya manisia irad si Jesus, balet agda uunoren iray bangat to. (2 Tim. 4:3, 4) Oniay imbaga na autor na sakey ya libro: “No walay sananey ya ‘Jesus’ natan, tan ibangat to met iray bengatlan imbangat na orihinal ya Jesus . . . , kasin panisiaan tayo, odino andi ya singa agawa duan libon taon lay apalabas? . . . Say seguradon ebat et: Agtayo panisiaan.”

² Nen wadiad dalin si Jesus, dakel so akarengel ed saray bangat to tan anengneng dan mismo iray milagron ginawa to. Balet agni ran siansia anisia ed sikato. Akin ey? Diad akaunan artikulo, apantongtongan tayoy apatiran rason no akin ya agapol iray totoo ed imbaga tan ginawa nen Jesus. Natan et pantongtongan tayoy apatira nin rason. Nengnengen tayo met no akin ya dakel so agmanisia ed saray tuan Kristiano natan, tan no antoy gawaen tayo pian ag-onkapuy so pananisia tayo tan ag-itayo nagapol.

3. Antoy ginawa nen Jesus ya akagapolan na arum ya totoo?

³ Nen wadiad dalin si Jesus, pipiulopan to so amin ya klase na totoo. Akirungo ed saray mayayaman tan walaan na posisyon, pero akakkaiba to met iray mairap-bilay tan pakaskasi tan anggan saramay ipapasen ya “makasalanan.” Pero wala ray mapaatagey ya totoo ya agapol ed satan ya ginawa nen Jesus. Oniay intepet da ed saray disipulo to: “Akin et midudungo kayod saray managsingil na buis tan saray makasalanan?” Oniay inyebat nen Jesus: “Agmankaukolan na managtambal iramay maksil so laman da, noagta saraman labat so mansasakit. Linma ak dia  pian pasesegen a magbabawi iray makasalanan, aliwan saray matunong.”—Luc. 5:29-32.

4. Unong ed propesiya nen Isaias, antoy magmaliw ya reaksion na totoo ed Mesias ya agla komon nankelawan na saray Judio?

⁴ Antoy ibabaga na Kasulatan? Mabayag ni antis ya onsabi so Mesias, imbaga la nen propetan Isaias ya ag-awaten na saray totoo so Mesias. Oniay insulat to: “Sikatoy binalawbalaw tan inarawian na totoo . . . Singa niyamot ed sikami so lupa to. Sikatoy abalawbalaw, tan impasen min anggapoy kakanaan.” (Isa. 53:3) On, akapropesiya la ya say Mesias et ‘arawian na totoo,’ kanian agla komon nankelawan na saray Judio nen dakel so ag-angawat ed si Jesus.

5. Antoy pakanengneng na dakel ya totoo natan ed saray Tasi nen Jehova?

⁵ Kasin nagagawa met itan natan? On. Manliket iray pastor tan pari no say mimembro ed relihyon da et sikat, mayaman, tan matalino. Aawaten da ra anggano amta ran imoral so kabibilay da tan wala ray gagawaen dan mauges. Abebbeba balet so pakanengneng da ed saray Tasi nen Jehova tan balbalawen da ra anggano malinis so kabibilay da. Pero diad tua, imbaga nen Pablo ya say pipilien na Dios et saramay ipapasen na mundo ya ‘aliwan importante.’ (1 Cor. 1:26-29) Mabmabli ira ed si Jehova, anggano abebbeba so pakanengneng na arum ed sikara.

6. Base ed imbaga nen Jesus ya nabasa ed Mateo 11:25, 26, siopa ray uusaren nen Ama to, tan antoy naaralan tayod satan?

⁶ Antoy gawaen tayo pian ag-onkapuy so pananisia tayo? (Basaen so Mateo 11:25, 26.) Agtayo manpapaimpluensya ed sayan mundo. Anggano abebbeba so pakanengneng na totoo ed saray lingkor na Dios, tandaan tayo ya say uusaren nen Jehova pian nagawa so panlabayan to et saramay mapaabeba. (Sal. 138:6) Tan dalepdepen tayo ya anggano say uusaren to et saramay ipapasen na mundo ya aliwan “marunong tan mautek,” dakel nin siansiay nagagawaan to tan nasusumpal so gagala to.

7. Akin et imbaga nen Jesus ya mansimpisimpitan iray Fariseo, tan antoy reaksion da?

⁷ Makmakpel ya impaamta nen Jesus ed saray totoo ya aliway ibabangat na saray lider na relihyon da. Singa bilang, imbaga to ya mansimpisimpitan o mankunkunwari labat iray Fariseo, ta mas importante ed sikaray panuras na lima nen say pangasikaso ed atateng da. (Mat. 15:1-11) Anggan saray disipulo nen Jesus et abigla ed satan ya imbaga to. Kanian imbaga rad sikato: “Amtam ta ya asakitan iray Fariseo ed imbagam?” Oniay inyebat nen Jesus: “Balang tanaman ya ag-intanem nen Amak a walad tawen et nabagot. Paulyan yo ra labat. Bulag iran manangigiya. . . . No itabin na bulag so sakey nin bulag, napelag iran dua ed abot.” (Mat. 15:12-14) Anggano amta nen Jesus ya onsyodot iray Fariseo ed sikato, imbaga to nin siansia no antoy tua.

8. Antoy imbaga nen Jesus ya pakapatnagan ya aliwan amin ya relihyon et makapaliket ed Dios?

⁸ Impaamta met nen Jesus ed totoo ya aliwan tua so arum ya ibabangat na saray lider na relihyon. Agto imbagan makapaliket ed Dios so amin ya relihyon. Inkuan to ingen ya dakel so onloob ed maawang a dalan ya ompugta ed kadederal, pero daiset labat so makaromog ed makisir a dalan ya ompugta ed bilay. (Mat. 7:13, 14) Impasakbay to met ya wala ray totoon mangibaga ya manlilingkor irad Dios, pero diad tua et mankunkunwari labat ira. Kuan to: “Manalwar kayo ed saray palson propeta ya oonla ed sikayo a mankunkunwarin karnero, balet ta diad tua et sikaray masisiban lobo. Nabidbir yo ra ed saray bunga ra.”—Mat. 7:15-20.

9. Anto ray impaamta nen Jesus ya palson bangat na saray relihyon?

 ⁹ Antoy ibabaga na Kasulatan? Diad Biblia, akapropesiya lan say seseg na Mesias parad dugan panagdayew et singa apoy ya “mandarlang ed loob [to].” (Sal. 69:9; Juan 2:14-17) Lapud seseg nen Jesus, makpel ton impaamta ya palso so ibabangat na saray relihyon tan mauges so kagagawa ra. Singa bilang, ibabangat na saray Fariseo ya say kamarerwa et ag-ompatey. Imbangat balet nen Jesus ya anggapo lay amta na saray inatey ta singa ra labat naugip. (Juan 11:11) Agmanisia iray Saduceo ya nabilay lamet iray inatey, pero binilay nen Jesus si Lazaro ya kaaro to. (Juan 11:43, 44; Gawa 23:8) Manisia iray Fariseo ed kapalaran tan ibabangat da ya kokontrolen na Dios so bilay tayo. Imbangat balet nen Jesus ya sikatayon mismo so mandesisyon no kasin manlingkor tayo ed Dios odino andi.—Mat. 11:28.

10. Akin et dakel so agmalabay ed saray ibabangat tayo?

¹⁰ Kasin nagagawa met itan natan? On. Dakel so agmalabay ed sikatayo ran Tasi ta ipupulong tayo iray katuaan ed Biblia, tan naaamtaan laingen na totoo ya aliwan tua manayay ibabangat na relihyon da. Singa bilang, ibabangat na saray pari tan pastor ya dudusaen kuno na Dios iray mauges diad impierno. Ontan so ibabangat da pian unor-unor labat iray membro da ed sikara. Ibabangat tayo balet ya aliwan tua itan ta maar-aro so Dios. Ibabangat met na saray pari tan pastor ya say kamarerwa et ag-ompatey. Ipupulong tayo balet ya ag-itan ibabangat na Biblia. Ta no tua itan, di agla kaukolay kioli. Ibabangat met na dakel ya relihyon ya amin ya nagagawa ed bilay na sakey ya too et implano la na Dios. Pero ibabangat tayo ya kada sakey a too et sarag toy mandesisyon no antoy gawaen tod bilay to tan no kasin manlingkor ed Dios o andi. Seguradon ampetang so ulo na saray lider na relihyon, ta nanaamtaan laingen na saray membro ra ya aliwan tua iray ibabangat da!

11. Base ed samay imbaga nen Jesus ya walad Juan 8:45-47, antoy labay na Dios ya gawaen na saray lingkor to?

¹¹ Antoy gawaen tayo pian ag-onkapuy so pananisia tayo? No talagan inaro tayo so katuaan,  say nepeg tayon panisiaan tan unoren et “saray salita na Dios.” (Basaen so Juan 8:45-47.) Agtayo aaligen si Satanas ya Diablo ya agnansiansia ed katuaan. Imbes, iyaplika tayo iray nanaaralan tayo tan agtayon balot manggagawa na bengatlan kontra ed ibabaga na Biblia. (Juan 8:44) Singa si Jesus, uunoren tayo iyan ganggan na Dios: “Dimla yo mauges; peket kayo ed maong.”—Roma 12:9; Heb. 1:9.

12. Akin et agapol so dakel ya Judio ed paraan na impatey nen Jesus?

¹² Anto ni sakey ya rason no akin ya ag-anisia iray Judio ed si Jesus? Imbaga nen Pablo: “Ipupulong tayo ya impasak ed poste si Kristo, a parad saray Judio et pakagapolan.” (1 Cor. 1:23) Akin et agapol so dakel a Judio ed paraan na impatey nen Jesus? On ta nen impasak ed poste si Jesus, sikatoy impasen dan kriminal tan makasalanan kanian inisip da ya aliwan sikato so Mesias.—Deu. 21:22, 23.

13. Antoy ag-anengneng na saray Judio lapud nambulag-bulagan ira?

¹³ Nambulag-bulagan iray Judio, kanian agda anengneng ya anggapon talagay kasalanan nen Jesus, ya aliwan tua iray akusasyon dad sikato, tan agto kanepegan so ipasak ed poste. Diad tua, aliwan patas so impanlitis ed sikato na korte suprema na saray Judio. Senentensiaan dan tampol tan agda tinumbok so dugan proseso. (Luc. 22:54; Juan 18:24) Imbes ya imbestigaan da no kasin tua iray akusasyon ed si Jesus, sikara nin mismo so nananap na “palson testimonya ya iyakusa rad si Jesus pian sikatoy napatey da.” Nen anggapoy naromog da, nanggawa na paraan so atagey ya saserdote pian naakusaan day Jesus base ed saray salitan ompaway ed sangi to. Pero aliwa itan ya legal. (Mat. 26:59; Mar. 14:55-64) Insan nen inmoli si Jesus, inupaan da na dakel a pilak iramay Romanon sundalo ya guardia ed angiponponan ed sikato, pian say ikayat dan istorya et tinakew kuno na saray disipulo nen Jesus so bangkay to.—Mat. 28:11-15.

14. Antoy impropesiya na Kasulatan tungkol ed ipatey na Mesias?

¹⁴ Antoy ibabaga na Kasulatan? Diad tua et  oniay impropesiya na Kasulatan ya nagawad Mesias: “Inter toy bilay to anggad patey tan impasen a sakey ed saray makasalanan; inawit toy kasalanan na dakel a totoo, tan sikatoy nagmaliw a manamegley parad saray makasalanan.” (Isa. 53:12) Kanian agnayarin ibaraan na saray Judio ya agapol ira ed paraan na impatey nen Jesus ta akapropesiya la itan.

15. Anto ray inkaso ed saray Tasi nen Jehova ya lapud satan et ag-ira labay na saray totoo?

¹⁵ Kasin nagagawa met itan natan? On! No panon ya naakusaan tan impasen ya kriminal si Jesus nensaman, ontan met so nagagawa ed saray Tasi nen Jehova natan. Imanoen so pigaran alimbawa. Diad United States, manlapud 1930 anggad 1950, aminpigan inmarap ed korte iray Tasi pian idepensa so karapatan dan mandayew ed Dios. Mapatpatnag ya kontra ed sikatayo so arum ya judge. Diad Quebec, Canada, nansabwatan so Katolikon Simbaan tan gobierno pian kontraen so kimey tayo. Dakel ya agagi so impriso lapud ipupulong day Panarian na Dios. Diad Germany, dakel ya matoor ya kabataan a brother so impapatey na gobierno na Nazi. Tan diad agano ni labat iran taon, dakel ya agagi tayod Russia so kinasoan tan impriso lapud panaaral tan pangibabangat day Biblia. Ibabaga na gobiernoy Russia ya “extremist” kuno itan ya gagawaen da. Anggan say Balon Mundo a Patalos na Masanton Kasulatan ed lenguahen Russian et imbawal. Libro kuno itan na saray “extremist” lapud nabasa ditan so ngaran ya Jehova.

16. Singa ibabaga na 1 Juan 4:1, akin et agtayo nepeg ya panisiaan iray katilaan ya ikakayat na arum tungkol ed saray Tasi nen Jehova?

¹⁶ Antoy gawaen tayo pian ag-onkapuy so pananisia tayo? Amtaen tayo no anton talagay tua. Diad samay Sermon ed Palandey, impasakbay la nen Jesus ya saray disipulo to et ‘palsaan na amin lan klase na mauges a bengatla.’ (Mat. 5:11) Si Satanas so nanlapuan na saratan ya katilaan. Iimpluensyaan to iray mamubusol ed sikatayo pian deralan da tayo. (Apo. 12:9, 10) Agtayo dapat panisiaan iratan ya katilaan ya ikakayat da, ta no andi, onkapuy so pananisia tayo tan ompan agtayo la labay so manlingkor ed si Jehova.—Basaen so 1 Juan 4:1.

17. Anto ray agawa antis na impatey nen Jesus ya nayarin akagapolan na arum?

¹⁷ Antis na impatey nen Jesus, sikatoy trinaidor na sakey ed saray 12 apostol to. Insan amitlon imburi na sakey nin apostol to. Tan diad samay mismon labi antis na ipatey to, sikatoy tinaynan na amin ya apostol. (Mat. 26:14-16, 47, 56, 75) Diad tua, impropesiya la nen Jesus ya nagawa iratan kanian agla abigla. (Juan 6:64; 13:21, 26, 38; 16:32) Pero nayarin wala ray agapol, tan ompan inisip dan, ‘Agko labay so magmaliw ya patumbok nen Jesus, ta ontan manayay ugali na saray apostol to!’

18. Anto ran propesiya so asumpal antis na impatey nen Jesus?

¹⁸ Antoy ibabaga na Kasulatan? Nilasus taon antis ya linmay Jesus diad dalin, akapropesiya lad Kasulatan ya sikatoy traidoren kasalat na 30 piraso na pilak. (Zac. 11:12, 13) Say mantraidor ed sikato et sakey ed saray maapit ya kaaro to. (Sal. 41:9) Onia met so insulat nen propetan Zacarias: “Patey mo so managpastol, tan paulyan mon nitaytayak so pulok.” (Zac. 13:7) No say sakey et talagan inaro toy katuaan, agnagapol no nanengneng ton nagawa iratan ya propesiya ed si Jesus, noagta ombiskeg ni ingen so pananisia to.

19. Antoy iilaloan lan nagawa na saray mangaaro ed katuaan?

¹⁹ Kasin nagagawa met itan natan? On. Diad panaon tayo, wala ray pigaran kabkabat ya  Tasi ya tinaynan day katuaan. Nagmaliw iran apostata tan sinali da met ya kombinsien so arum. Mangikakayat iray aliwliwan istorya tan katilaan diad media tan Internet pian deralan iray Tasi nen Jehova. Pero no say sakey et talagan inaro toy katuaan, agnagapol ta amta ton impasakbay la iratan na Biblia, kanian iilaloan to lan nagawa iratan.—Mat. 24:24; 2 Ped. 2:18-22.

20. Antoy gawaen tayo pian ag-itayo nagapol anggano taynan na arum so katuaan? (2 Timoteo 4:4, 5)

²⁰ Antoy gawaen tayo pian ag-onkapuy so pananisia tayo? Kaukolan ya tuloytuloy tayon pabiskegen so pananisia tayo. Lanang tayon manpikasi, manaral na Biblia, tan manpokus tayo ed panagpulong a kimey. (Basaen so 2 Timoteo 4:4, 5.) No mabiskeg so pananisia tayo, agtayo onkapuy anggano wala ray narengel tayon aliwliwan istorya tungkol ed saray Tasi nen Jehova. (Isa. 28:16) No talagan inaro tayoy Jehova, say Salita to, tan saray agagi, agtayo nagapol anggano taynan na arum so katuaan.

21. Akin et agtayo nepeg ya nadismaya anggano dakel so ag-ondengel ed mensahen ipupulong tayo?

²¹ Nen wadiad dalin si Jesus, dakel so agapol tan ag-anisia ed sikato. Pero dakel met so angawat ed sikato. Sakey lay Jose ya taga Arimatea ya membro na korte suprema na saray Judio. Diad tua, “dakdakel a saserdote” so nagmaliw met ya patumbok nen Jesus. (Gawa 6:7; Mat. 27:57-60; Mar. 15:43) Diad panaon tayo, minilyon met so ag-agapol tan anggapoy akaamper ed sikara diad itutumbok dad si Jesus. Akin ey? On ta amta ra tan inaro da so katuaan ya walad Biblia. Oniay ibabaga na Salita na Dios: “Abalbaleg so kareenan na saramay mangaaro ed ganggan mo; anggapoy makagapol ed sikara.”—Sal. 119:165.