Lapud saman ya makapataktakot ya agawa, anguman so bilay ko tan ginawak so anggaay nayarian kon kabaten so Amalsa. Balet antis kon ibaga no antoy sinmublay ya agawa ed saman ya labi, istoryaen ko nid sikayoy impanugaw ko tan no panon ya akatulong itan pian niparaan so pusok diad pananap ko ed Dios.

Inyanak ak nen 1937 diad Guesnain, sakey a baley diad France ya say anapan na totoo et panagmina. Say tatay ko et coal miner, tan imbangat to ak ya mankuli ed trabaho. Patas so panagtrato nen tatay ed arum, tan atawir ko itan ya ugali to. Agto labay ya walay naagrabiado, kanian no wala ray katrabaho to ya nanairapan lapud aliwan patas so panagtrato ed sikara, manggaway paraan pian natulongan to ra. Labalabay ton umanen so situasyon da, kanian akimembro ed nanduruman grupo pian nidepensa so karapatan na saray trabahador tan akila ed saray protesta. Mansyodot met ya maong si tatay ed pankunkunwari na saray pari ed lugar mi. Dakel ed sikara so mayaman tan masamit so bilay da; balet onkekerew ni ray  kuarta tan naakan ed saray managmina anta mairap da kalamor so mananap na pambilay. Ampetang so ulo nen tatay ko ed saray pari kanian agto ak balot imbangat tungkol ed relihyon. Diad tua, agmin balot nantongtongan so tungkol ed Dios.

Legan ak ya ombabaleg, anengneng koy ag-inkahustisya tan kabkabusol ko met itan. Singa bilang, aliwliway panagtrato ed saray foreigner ya manaayam ed France. Labalabay ko balet so migalaw na soccer ed saray anak na foreigner diad lugar mi. Sakey ni, say nanay ko et agmet taga France, noagta tubo ed Poland. Naisip ko ya onsabi la komoy panaon ya agla manlalaban so nanduruman lahi tan pantay-pantay lan amin.

Atawag ak ya mansundalo nen 1957. Atan so rason no akin ya wadman ak ed saman ya labi diad kapalandeyan na Algeria. Amay arengel ko ya manaakar et aliwa manayan kalaban ya sundalo, noagta sakey ya asno! Akaingas ak! Lapud saman ya agawa—tan ed nagagawan guerra—apaisip ak no anton talagay gagala na bilay. Akin et manbibilay tayo ed sayan mundo? Wala kasi malasakit na Dios ed sikatayo? Onsabi ni kasi so panaon ya anggapo lay manlalaban?

Agnambayag, legan ya akabakasyon ak tan wala ak ed abung na atateng ko, walay akatongtong kon sakey ya Tasi nen Jehova. Inikdan to ak na kopya na La Sainte Bible, sakey a patalos ed Biblia na saray Katoliko diad lenguahen French. Binasak itan kapawil kod Algeria. Say teksto ya talagan tinmatak ed pusok et say Apocalipsis 21:3, 4. Say kuan to: “Say tolda na Dios et walad katooan . . . Tan punasen to so amin a lua ed kamataan da, tan anggapo lay patey, anggapo met lay panermen tan panakis tan panotot.” * Abigla ak ed satan ya abasak. Apaisip ak, ‘Tua kasi iya?’ Anggapo ni amtak ed saman nipaakar ed Dios tan ed Biblia.

Nen asumpal lay serbisyok ed militar nen 1959, akabat koy François. Sikatoy sakey a Tasi tan dakdakel so imbangat tod siak ya katuaan diad Biblia. Singa bilang, impanengneng tod siak ed Biblia ya walay personal a ngaran na Dios—Jehova manaya! (Sal. 83:18) Impaliwawa to met ya ekalen nen Jehova so ag-inkahustisya diad dalin tan gawaen to iyan paraiso, tan tooren to imay abasak diad Apocalipsis 21:3, 4.

Akombinse ak ya tua iratan tan asabi so pusok. Lapud amtak lay katuaan, ampetang so ulok ed saray pari tan labay kon ibulgar iray bangat dan aliwan base ed Biblia! Mapatpatnag ya atawi-tawir kon talagay tatay ko, agak makankaanos. Labay koy onaksion ya tampol!

Diad tulong nen François tan arum ni ran balon kakaarok a Tasi, naaralan koy magmaliw a kalmado. Impaliwawa da ya anggapoy kanepegan tayon mangukom, ta say kimey tayo bilang Kristiano et ipulong so maong a balita na Panarian na Dios pian nawalaan na ilalo iray totoo. Ontan so ginawa nen Jesus tan ingganggan to iray papatumbok to ya ontan met so gawaen da. (Mat. 24:14; Luc. 4:43) Kaukolan ko met ya aralen so makaaron pitotongtong ed saray totoo, tan marespeto ak nin siansia anggan anto ni papanisiaan da. Singa ibabaga na Biblia: “Say aripen na Katawan et  agnepeg a mikolkol, noagta nepeg a mauyamo ed amin.”—2 Tim. 2:24.

Inuman ko ray makapuy ya ugalik tan nampabautismo ak nen 1959 diad sakey a sirkiton asemblea. Ditan et akabat tan agustoan koy sakey a sister ya si Angèle. Kanian no maminsan et mimiaral ak ed kongregasyon da, tan nankasal kami nen 1960. Sikatoy maomaong ya bii, makapadinayew ya asawa, tan mabmablin regalo nen Jehova ed siak.—Pro. 19:14.

Diad linmabas iran taon, dakdakel so naaralan ko ed saray marunong tan eksperiensyadon brother. Say sakey: Pian nasarag mo so anggan anton mairap ya asainmin, dapat mapaabeba ka tan iyaplikam so bilin na Biblia ya walad Proverbio 15:22: “Walay nagawaan no dakel so mananimbawa.”

Nen 1964, apruebaan kon tua itan. Diad satan a taon et ginmapo ak ya nanlingkor bilang manangasikaso na sirkito. Ombibisita ak ed saray kongregasyon pian pasesegen iray agagi tan pabiskegen so espiritualidad da. Diad saman et 27 ko ni labat tan daiset ni eksperiensyak kanian wala ra manayay aliwan gagawaen ko. Balet akaaral ak ed saray lingok. Pero diad tua, mas akaaral ak ed saray marunong tan eksperiensyadon “mananimbawa.”

Walay nanonotan kod saya. Kayari na bisitak ed sakey a kongregasyon diad Paris, inmasingger ed siak so sakey a maespiritual ya brother tan intepet to no nayarin nakatongtong to ak. “Sige,” kuan ko.

Intepet to: “Louis, siopay tutulongan na doktor, amay mansasakit o amay maksil so laman to?”

“Siempre amay mansasakit,” so inyebat ko.

Imbaga to: “Duga ka. Balet naimanok ya mas pipiulopan mo so congregation overseer tan arum ni ya mabiskeg lay pananisia ra. Dakel ya agagi ed kongregasyon mi so maneermen, balo ni, odino mabaing. Seguradon labalabay da ka met ya nakatongtong tan nakaiban mangan diad abung da.”

Misalsalamat ak ed saman ya brother. Pandinayewan koy panangaro to ed saray karnero nen Jehova. Kanian inakmon koy pride ko tan ginawak ya tampol so imbaga to. Misalsalamat ak ed si Jehova ta wala ray ontan ya agagi tayo.

Nen 1969 tan 1973, niiter ed siak so pribilehyon mangasikaso ed Food Service Department ed duaran international convention diad Colombes, Paris. Diad samay 1973 ya kombension, manga 60,000 ya totoo so kaukolan ya pakanen diad  loob na limaran agew! Singa agko amtay gawaen ko. Balet anonotan ko imay Proverbio 15:22 ya maabig so mantepet ed saray marunong. Kanian sinmingger ak ed maespiritual iran brother ya walay eksperiensya dad ontan ya kimey. Say arum ed sikara et managpatas, mantatanem na pising, managluto, tan managsaliw. Nantutulongan kamin amin pian nasumpal iyan mair-irap ya asainmin.

Nen 1973, naimbitaan kami nen asawak ya manlingkor ed Bethel diad France. Nibagak ya talagan mairap so unonan asainmin ko ditan. Siak so niyasain ya manisip na paraan pian niyakaran na publikasyon iray agagi ed Cameroon, sakey ya bansa diad Africa ya imbawal so kimey tayo nen 1970 anggad 1993. Singa agko amta lamet so gawaen ko. Seguro alikas itan na brother ya mangaasikaso ed kimey tayo ed France, kanian pinaseseg to ak tan imbaga to: “Nanaerasan ed espiritual iray agagi tayo ed Cameroon. Kaukolan tayo ran pakanen!” Kanian apaseseg ak ya gawaen so asainmin ko pian napakan ira.

Aminpiga ak ya linma ed saray bansa ya asingger ed Cameroon pian minengneng ed saray elder ya manlalapud Cameroon. Baleg so nitulong ed siak na saratan ya makpel tan maalwar ya brother. Tinulongan da ak pian naamtaan ko ray kaukolan kon gawaen pian regular ya nasuplayan na espiritual a naakan iray agagi ed Cameroon. Benendisyonan nen Jehova so impansagpot mi. Diad loob na manga 20 taon, amin ya isyu na Panag-bantayan et naawat na saray lingkor nen Jehova diad satan a bansa, pati say publikasyon ya Our Kingdom Service ya binulan ya uusaren ed aral nensaman.

Manlapu la nen kinaraw koy Angèle, naobserbaan ko ya maespiritual ya bii tan balibali ugali to. Tan mas anengneng ko ray balibalin ugali to nen sanasawa kami la. Diad tua, anggan nen mismon labi na impankasal mi, kinerew ton ipikasik ed si  Jehova ya bilang sanasawa et nagawaan mi komon so pirawat min manlingkor ed sikato diad anggaay nayarian mi. Tan inebatan nen Jehova itan ya pikakasi mi.

Atulongan ak nen Angèle ya mas manmatalek ed si Jehova. Singa bilang, nen atawag kamin manlingkor ed Bethel nen 1973, no nayari et agko labay ta agustoan ko lay kimey ed sirkito. Balet impanonot nen Angèle ya dedikado kami ed si Jehova. Tinepetan to ak, ‘Duga kasi no agta unoren so ipapagawa na organisasyon to?’ (Heb. 13:17) Agak akasel ed saman ya imbaga to! Kanian linma kami ed Bethel. Akatulong so karunongan, maong a pakatebek, tan inkamaespiritual nen asawak pian tuloytuloy ya ombiskeg so ulopan min sanasawa tan makapandesisyon kami na duga.

Legan kamin ontatatken, nansiansian maomaong ya asawa si Angèle tan lanang to ak ya susuportaan. Singa bilang, nanaral kami na English pian makaatendi kami ed saray teokratikon eskuelaan ya maslak et ikokondukta ed English. Inmalis kami met ed English congregation, anggano mantaon kami lad saman na 70. Lapud dakel so responsabilidad ko bilang membro na Branch Committee ed France, ngalngali agko nisalet ed eskedyul ko so panaral koy English, balet tinulongan to ak nen Angèle. Masulok lan 80 so taon mi natan, balet siansian manpaparaan kami parad aral diad lenguahen English tan French. Anggad posible, gagawaen mi anggaay nayarian min mankomento ed aral tan manpulong kaiba ray kakongregasyon mi. Talagan benendisyonan nen Jehova so sagpot min manaral na English.

Say sakey ya sankarakepan a bendisyon ed sikami et naawat mi nen 2017. Naimbitaan kami nen Angèle ya manaral ed School for Branch Committee Members and Their Wives diad Watchtower Educational Center ed Patterson, New York.

Talagan si Jehova so Makapadinayew a Managbangat. (Isa. 30:20) Agla sirin makapakelaw ya sankaabigan a klase na edukasyon so aawaten na saray lingkor to, ugaw man o matatken! (Deu. 4:5-8) Anengneng kon mismo ya maabig so iyaaligwas ed espiritual tan maong so pansusumpalan na saray kabataan ya ondedengel ed si Jehova tan ed saray eksperiensyadon agagi. Singa ibabaga na Proverbio 9:9: “Bilin mo so toon marunong, tan sikatoy magmaliw a lalon marunong. Ibangat moy sakey a matunong, tan naaruman so nanaaralan to.”

Sagpaminsan ko nin nanononotan imay ambilbilunget tan makapataktakot ya labi diad kapalandeyan na Algeria manga 60 taon lay apalabas. Agko ilaloan ya maong manayay pansumpalan na bilay ko. Dakdakel so naaralan kod arum! Misalsalamat ak ed si Jehova ta inikdan to kami nen Angèle na marakdakep tan makapaliket ya bilay. Kanian determinado kamin tuloytuloy ya paibangat ed si Aman Jehova tan makaaral ed saray marunong tan eksperiensyadon agagi ya mangaaro ed sikato.