1. Antoy reaksion na saray kakanayon tan kakaarom nen first time mo iran pinulongan?

NANONOTAN mo ni no antoy aliknam nen atalosan moy ibabangat na Biblia? Malikeliket ka ed saray katuaan ya nanaaralan mo. Tan say antam, ontan met so nalikna na arum no ibagam ed sikara so mensahe na Biblia. Segurado ka ya makatulong itan pian magmaliw ya maliket so bilay da natan tan nawalaan iray ilalo diad arapen. (Sal. 119:105) Kanian eksayted ka ya ibaga met itan ed saray kakanayon tan kakaarom. Pero antoy reaksion da? Abigla ka ta maslak ed sikara et agmanisia.

2-3. Nen wadiad dalin si Jesus, antoy reaksion na dakel ya totoo ed saray ginawa to?

² Agtayo la pankelawan no wala ray agmanisia ed ipupulong tayo. Nen wadiad dalin si Jesus, dakdakel so ag-anisia ed sikato anggano amayamay so ginawa ton milagro pian pruebaan ya sikatoy imbaki na Dios. Singa bilang, dakel so akanengneng nen binilay nen Jesus si Lazaro. Mabisbiskeg la komon itan ya prueba pian manisia ran si Jesus so Mesias. Balet agnin siansia anisia iray lider na saray Judio. Labay da ni ingen ya pateyen si Jesus tan si Lazaro!—Juan 11:47, 48, 53; 12:9-11.

³ Diad gapo ni labat et amta la nen Jesus ya dakel so agmanisia ya sikato so Mesias. (Juan 5:39-44) Amta to ya wala ray nagapol * ed sikato. Kanian oniay imbaga tod saray disipulo nen Juan Bautista: “Maliket imay agnagapol ed siak.” (Mat. 11:2, 3, 6) Akin et dakel so agapol o ag-anisia ed si Jesus?

4. Antoy aralen tayo ed sayan artikulo?

 ⁴ Aralen ed sayan artikulo tan diad ontumbok iray rason no akin ya dakel so ag-anisia ed si Jesus nensaman. Aralen tayo met no akin ya dakel so agmanisia natan ed ipupulong tayo. Insan tayo pantongtongan no panon tayon pabiskegen so pananisia tayo pian anggapoy makaamper ed itutumbok tayod si Jesus.

5. Antoy sakey a rason no akin ya wala ray agmanisia ya si Jesus so Mesias?

⁵ Say sakey a rason no akin ya ag-anisia so dakel ya totoo ed si Jesus et lapud lugar tan pamilyan nanlapuan to. Bidbiren dan maong ya managbangat si Jesus tan anengneng dan mismo ya nanggawa na milagro. Pero parad sikara, anak labat na karpentero si Jesus. Sakey ni, abebbeba so pakanengneng na totoo ed Nazaret, say syudad ya nanlapuan nen Jesus. Anggan si Natanael et oniay inkomento to antis ya nagmaliw ya disipulo nen Jesus: “Wala tay maong a too a manlapud Nazaret?” (Juan 1:46) Ompan agnararakepan si Natanael ed satan ya syudad. Odino nayarin sankanonot to imay propesiya ya walad Miqueas 5:2 ya say Mesias et iyanak ed Betlehem, aliwan diad Nazaret.

6. Anto komoy akatulong ed saray totoo diad panaon nen Jesus pian nabirbir da ya sikato so Mesias?

⁶ Antoy ibabaga na Kasulatan? Impasakbay nen propetan Isaias ya saray manbusol ed si Jesus et ibaliwala da iray “detalye nipaakar ed kabibilay [na Mesias].” (Isa. 53:8, paimanod leksab) Dakel so propesiya nipaakar ed Mesias. No nanusisa ni komon iray totoo, naamtaan da ya si Jesus et inyanak ed Betlehem tan sikatoy nanlapu ed poli nen Arin David. (Luc. 2:4-7) No ontan sirin, asumpal ed si Jesus imay propesiya ya walad Miqueas 5:2. Pero say problema, agla nanusisa iray totoo. Akin ey? On ta hinusgaan da lay Jesus, anggano agda ni amtan amin so detalye. Inisip da lan tampol ya aliwan sikato so Mesias.

7. Akin et dakel so agmalabay ed saray Tasi nen Jehova?

⁷ Kasin nagagawa met itan natan? On. Dakel ed saray lingkor nen Jehova et aliwan mayaman tan sikat. Say pakanengneng na arum ed sikatayo et “abebay-aral tan ordinaryo” labat. (Gawa 4:13) Wala met iray mangibabaga ya agtayo dapat manbabangat na Biblia ta agtayo graduate na kurson theology tan agtayo nanaral ed seminaryo. Ibabaga met na arum ya Saray Tasi nen Jehova et “relihyon na Amerikano” anta diad tua, maslak ya Tasi et aliwa met ya taga Amerika. Wala met iray mangibabaga ya agtayo kuno manisia ed si Jesus. Say arum balet et aakusaan da tayon “Komunista,” “espiya na Amerika,” tan “extremist” tayo kuno! Lapud anisiaan na totoo irayan impormasyon tan agla ra nanusisa no anton talagay tua, agda labay ya dengelen so ipupulong tayo.

8. Base ed Gawa 17:11, antoy nepeg ya gawaen na totoo no labay dan naamtaan no siopa ray tuan lingkor na Dios natan?

⁸ Antoy gawaen tayo pian ag-onkapuy so pananisia tayo? Kaukolan tayoy manusisa pian naamtaan tayo no anton talagay tua. Ontan so ginawa nen Lucas, ya sakey ed saray nansulat na Biblia. “Maalwar [ton] inusisa” so amin ya impormasyon ya insulat to. Labay nen Lucas ya saray makabasa ed satan et naamtaan da ya tua iray nadngelan da tungkol ed si Jesus. (Luc. 1:1-4) Ontan met so ginawa na saray Judio ya taga Berea nensaman. Nen unaan dan naamtaan so tungkol ed si Jesus, maalwar dan inusisa so Hebreon Kasulatan “pian naseguro da no  kasin tua iray nadngel da.” (Basaen so Gawa 17:11.) Ontan met so nepeg tayon gawaen, manusisa tayo. Nengnengen tayon mismo no talaga kasin nabasa ed Biblia iray nanaaralan tayo. I-research tayo met so history na Saray Tasi nen Jehova. No amtaen tayoy tua, agtayo basta-basta panisiaan so ibabaga na arum.

9. Antoy reaksion na arum nen ag-angipanengneng si Jesus na tanda manlapud tawen?

⁹ Anggano makapadinayew iray bangat nen Jesus, parad arum et kulang ni iman. Say labay da et “panengnengan to ray sakey a tanda manlapud tawen” pian paneknekan ya sikato so Mesias. (Mat. 16:1) Seguro, sankanonot da imay propesiya ya walad Daniel 7:13, 14. Pero aliwa nin saman so panaon pian nagawa iman ya propesiya. Diad tua, dia ni labat ed saray bangat nen Jesus et nakombinse la ra komon ya sikato so Mesias. Pero nen agginawa nen Jesus so labay da, agla ra anisia.—Mat. 16:4.

10. Panon ya sinumpal nen Jesus so propesiya nen Isaias tungkol ed Mesias?

¹⁰ Antoy ibabaga na Kasulatan? Oniay insulat nen propetan Isaias tungkol ed Mesias: “Agto iyeyag odino ikasil so boses to, tan agto iparengel so boses to diad karsada.” (Isa. 42:1, 2) Nen nampulong si Jesus, agto sinalin alaen so atension na totoo pian manpasikat. Ag-angipaalagey na angkakabaleg ya templo, agnansulong na magarbon kawes, tan anggapoy espisyal ya tawag ed sikato na totoo. Nen lilitisen si Jesus, kinmerew si Arin Herodes na sakey a tanda, pero agto pinagustoan. (Luc. 23:8-11) Tua, wala ray ginawa nen Jesus ya milagro, pero say nampokusan to et say pangipulong ed maong a balita. “Saya so rason na inyakar ko dia,” so kuan tod saray disipulo to.—Mar. 1:38.

11. Anto ray pambiliban na arum ya totoo natan, tan akin ya aliwa itan?

¹¹ Kasin nagagawa met itan natan? On. Pambiliban na totoo natan iray angkakabaleg ya simbaan ya ankabli ray dekorasyon to. Manbilib met ira ed saray pari tan pastor ya wala ray  espisyal ya tawag ed sikara, ontan met ed saray magarbon ritual tan seremonya ya ag-akabase ed Biblia. Balet wala kasi nanaaralan da diad saray simbaan da, diad saray pari tan pastor da, tan diad saratan ya seremonya? Saramay onaatendi ed saray pantitipon tayo et nanaaralan da iray ganggan nen Jehova tan no panon dan unoren iratan. Simpli labat iray Kingdom Hall tayo pero malinis tan mausa-usar. Saray manbabangat et agmansusulong na magarbo tan nikadkaduma iran kawes, tan anggapoy espisyal ya tawag ed sikara. Amin ya papanisiaan tan ibabangat tayo et akabase ed Biblia. Pero parad arum, masyadon simpli so paraan na panagdayew tayo, tan saray ibabangat tayo et aliwan samay labay dan narengel.

12. Base ed Hebreo 11:1, 6, iner dapat akabase so pananisia tayo?

¹² Antoy gawaen tayo pian ag-onkapuy so pananisia tayo? Oniay imbaga nen apostol Pablo ed saray Kristiano ed Roma: “Nawalaan labat na pananisia so sakey kayari ton narengel so salita. Tan narengel so salita no walay mansalita nipaakar ed Kristo.” (Roma 10:17) Kanian say mamabiskeg ed pananisia tayo et say panaral na Biblia, aliwan saray seremonya na nanduruman relihyon anggano singa balibali iratan. Importante ya akabase ed katuaan so pananisia tayo tan nepeg tayon pabiskegen itan. Ta diad tua, “no anggapoy pananisia [tayo] et imposiblin napaliket so Dios.” (Basaen so Hebreo 11:1, 6.) Kanian agtayo la kaukolan so makanengneng na makapadinayew ya tanda manlapud tawen pian nakombinse tayo ya tua iray nanaaralan tayo. Say kaukolan tayo labat ya gawaen et aralen tayon maong so Biblia pian ombiskeg so pananisia tayo tan naekal so panduaruwa tayo.

13. Akin et dakel so nambusol ed si Jesus?

¹³ Nen wadiad dalin si Jesus, mankelaw iray disipulo nen Juan Bautista ta agmanaayunal iray disipulo nen Jesus. Imbaga nen Jesus ya agda kaukolan so man-ayunal ta sikatoy mabilay ni. (Mat. 9:14-17) Si Jesus et  kinuestion met na saray Fariseo tan arum nin onkokontra ed sikato ta agto tutumboken iray tradisyon na saray Judio. Mamapasnok ni ra ingen nen wala ray pinaabig ton mansasakit diad agew na Sabaton. (Mar. 3:1-6; Juan 9:16) Sagrado kuno ed sikara so Sabaton kanian sisitaen day gagawaen nen Jesus. Bangno sikara balet, ayos labat ya manlako iray negosyante ed templo. Ampetang so ulo rad si Jesus nen imbaga ton gagawaen dan “ungib na matatakew” so abung na Dios. (Mat. 21:12, 13, 15) Mansyodot met iramay pinulongan nen Jesus diad sinagoga ed Nazaret, ta impanonot to iray agawa diad panaon nen propeta Elias tan Eliseo pian ipalupa ed sikara ya makasarili ira tan anggapoy pananisia ra. (Luc. 4:16, 25-30) Ag-inilaloan na saray Judio ya gawaen iratan nen Jesus kanian dakel so nambusol ed sikato.—Mat. 11:16-19.

14. Akin et agtinumbok nen Jesus so arum ya tradisyon na saray Judio?

¹⁴ Antoy ibabaga na Kasulatan? Oniay imbaga nen Jehova panamegley nen propeta Isaias: “Onaasingger ed siak irayan totoo ed panamegley labat na sangi ra, tan papagalangan da ak ed panamegley na bibil da, balet arawrawi ed siak so kapusoan da; tan say takot da ed siak et base ed saray ganggan na totoo a nibangat ed sikara.” (Isa. 29:13) Kanian duga labat may ginawa nen Jesus ya agto tinumbok iray tradisyon na saray Judio ya agmet ibabangat na Kasulatan. Saramay Judio ya mas importante ed sikaray tradisyon tan ganggan na too nen say ibabangat na Kasulatan et agda pinagalangan si Jehova tan agda inawat so imbaki ton Mesias.

15. Antoy syosyodotan na dakel ya totoo ed saray Tasi nen Jehova?

¹⁵ Kasin nagagawa met itan natan? On. Dakel so agmalabay ed sikatayo ran Tasi nen Jehova ta agtayo seselebraan iray okasyon ya ag-akabase ed Biblia, singa say birthday tan Krismas. Wala ra ingey onsyosyodot ed sikatayo ta agtayo gagawaen iray tradisyon parad saray inatey, tan agtayo met mibibiang ed saray nasyonalistikon selebrasyon. Say amta ra, napapaliket day Dios ed gagawaen da, anta diad tua et andi. Akin ey? On ta “ibabaliwala [da] so ganggan na Dios” tan mas importante ed sikara so “tradisyon na totoo.”—Mar. 7:7-9.

16. Base ed Salmo 119:97, 113, 163-165, antoy kaukolan tayon gawaen tan iwasan?

¹⁶ Antoy gawaen tayo pian ag-onkapuy so pananisia tayo? Kaukolan tayon pabiskegen so panangaro tayo ed saray ganggan tan prinsipyo nen Jehova. (Basaen so Salmo 119:97, 113, 163-165.) No inaro tayoy Jehova, agtayo mibiang ed saray tradisyon ya agmakapaliket ed sikato. Agtayo labay ya napabarong si Jehova lapu labat ed tradisyon na too.

17. Antoy iisipen na dakel ya Judio ya gawaen na Mesias?

¹⁷ Nen wadiad dalin si Jesus, labalabay na arum ya Judio ya nasalatan la so gobierno ra. Say amta ra et ibulos ira na Mesias ed maruksan uley na Roma. Kanian pinilit day Jesus ya magmaliw ya ari ra, pero agto labay. (Juan 6:14, 15) Natatakot balet iray saserdote tan arum nin totoo ta ompan manggawa na pananguman si Jesus ed gobierno ya agnagustoan na saray Romano, ya lapud satan et naekal ed posisyon irayan lider na relihyon. Politika so sankanonot na dakel ya Judio, kanian agda inawat si Jesus.

18. Anto ran propesiya tungkol ed Mesias so imbaliwala na saray Judio?

¹⁸ Antoy ibabaga na Kasulatan? Tua, dakel so propesiya ya mangibabagan say Mesias et magmaliw ya Ari tan ilaban to ray totoo. Pero  ipapanengneng na arum ya propesiya ya kaukolan nin ompatey so Mesias parad kasalanan tayo. (Isa. 53:9, 12) No wala ray ontan ya propesiya, akin et inisip nin siansia na saray Judio ya iliktar iran tampol na Mesias? Imbaliwala da iratan ya propesiya ta labay dan nasolusyonan ya tampol so problema da.—Juan 6:26, 27.

19. Anto ray pakakadismayaan na totoo natan ed sikatayo?

¹⁹ Kasin nagagawa met itan natan? On. Dismayado ed sikatayo iray totoo ta agtayo mibabali ed politika. Labay dan omboto tayo no eleksion. Pero amta tayo ya diad pakanengneng nen Jehova, no walay pilien tayon too bilang lider tayo, singa tayo ibabaga ed Sikato ya agtayo labay so uley To. (1 Sam. 8:4-7) Ibabaga met na arum ya imbes ya pulong tayo lan pulong, mas maong kuno no manpaalagey tayoy eskuelaan, ospital, tan arum ni pian makatulong tayo ed problema na mundo.

20. Base ed imbaga nen Jesus ed Mateo 7:21-23, antoy nepeg tayon pampokusan?

²⁰ Antoy gawaen tayo pian ag-onkapuy so pananisia tayo? (Basaen so Mateo 7:21-23.) Nepeg ya manpokus tayo ed panagpulong a kimey ta atan so ingganggan nen Jesus ya gawaen tayo. (Mat. 28:19, 20) Inaro tayo ray totoo tan imamalasakit tayo ra. Pero agtayo mibabali ed politika tan agtayo sasalien ya solusyonan iray problema ed mundo. Amta tayo ya say sankaabigan ya paraan ya natulongan tayo ra et no ibangat tayod sikara so Panarian na Dios tan no panon dan nakaaro si Jehova.

21. Antoy determinado tayon gawaen?

²¹ Diad sayan artikulo, inaral tayo so apatiran rason no akin ya dakel so ag-anisia ed si Jesus nensaman tan no akin ya dakel met so agmanisia ed saray papatumbok to natan. Pero wala ni apatiran rason ya aralen tayo diad onsublay ya artikulo. Komon ta determinado tayo ya anggapoy makaamper ed itutumbok tayod si Jesus tan pansiansiaen tayon mabiskeg so pananisia tayo!