1-2. Anto ray nanduruman problema ya aarapen na saray agagi?

PINASESEG nen apostol Pablo si Timoteo ya ‘sigpot ton sumpalen so ministeryo to.’ (2 Tim. 4:5) Parad sikatayon amin itan ya bilin. Gagawaen tayoy anggaay nayarian tayon unoren itan, pero no maminsan, mairap ta wala ray subok. Diad tua, wala ray lugar ya mairap so manpulong tan kaukolan na saray agagi so pakpel. (2 Tim. 4:2) Singa bilang, isip mo pa iray agagin manaayam ed bansan inistriktoan odino imbawal ni ingen na gobierno so panagpulong. Pero manpupulong ni ran siansia anggano amta ran pakaprisoan da itan.

² Duma met so dadalanen na arum ya lingkor nen Jehova. Singa bilang, wala ray agagi tayo ya kaukolan day impasyan mantrabaho pian walay pambilay na pamilya ra. Labalabay da komoy ombawi ed panagpulong no Sabado tan Simba, pero naknaksawan la ra. Say arum balet ya agagi et walay graben sakit da odino matatken la ra, kanian limitado lay nagagawaan dad ministeryo. Tan say arum et aglan talaga makakaalis ed abung da. Tan wala met iray agagi ya say pakalikna ra et ag-ira inaro nen Jehova. Ontan so situasyon nen Mary * ya taga Middle East. Imbaga to: “Lalabanan koy negatibon liknaan ko pero makapakapuy. Kanian no maminsan, anggapo lay biskeg kon manpulong. Mas nakokonsiensia ak laingen.”

3. Antoy aralen tayo ed sayan artikulo?

³ Antokaman so subok ya dadalanen tayo, sarasarag itayon pabiskegen nen Jehova pian makapantultuloy tayon manlingkor ed sikato. Balet antis tayon aralen no panon itayon tutulongan nen Jehova, amtaen tayo ni no panon ton pinabiskeg  si Pablo tan Timoteo pian nasumpal day ministeryo ra anggano wala ray subok ya dinalan da.

4. Anto ran subok so dinalan nen Pablo?

⁴ Dakel so subok ya dinalan nen Pablo. Asali toy nilewet, tinupak, tan impriso. (2 Cor. 11:23-25) Inamin to met ya no maminsan, say pakalikna to et anggapoy nagagawaan ton duga. (Roma 7:18, 19, 24) Wala met so sakit to ya tinawag ton “sabit ed laman” ya talagan mamapairap ed sikato, kanian akikasi ed Dios ya naekal la komon itan.—2 Cor. 12:7, 8.

5. Anto ray agawaan nen Pablo anggano dakel so subok ya dinalan to?

⁵ Pinabiskeg nen Aman Jehova si Pablo, kanian agawaan toy ministeryo to anggano dakel so subok ya dinalan to. Isip mo pa ray agawaan nen Pablo. Singa bilang, nen sikatoy impriso diad sakey ya abung ed Roma, impulong to nin siansia so maong a balita ed saray lider na saray Judio, tan ompan anggan saray opisyal na gobierno. (Gawa 28:17; Fil. 4:21, 22) Pinulongan to met iray Guardia na Emperador, pati saray ombibisita ed sikato. (Gawa 28:30, 31; Fil. 1:13) Sikatoy nanggawa met na saray sulat ya amaseseg ed saray agagi nensaman ya anggad sikatayo natan. Apaseseg met iray agagi diad Roma lapud alimbawa nen Pablo, kanian nagmaliw iran “makmakpel tan andian na takot a mangipupulong ed salita na Dios.” (Fil. 1:14) Anggano limitado labat so nagawaan nen Pablo, ginawa toy anggaay nayarian ton manpulong kanian “nanresulta laingen [itan] ed inyaligwas na maong a balita.”—Fil. 1:12.

6. Base ed 2 Corinto 12:9, 10, akin et asarag nen Pablo ya sumpalen so ministeryo to?

⁶ Binidbir nen Pablo ya agawaan to iratan ya amin lapud biskeg ya inter nen Jehova ed sikato, aliwan lapud sarili ton biskeg. Apaneknekan to ya ‘no kapigan makapuy, diman mabisbiskeg so pakayari na Dios.’ (Basaen so 2 Corinto 12:9, 10.) Inikdan nen Jehova si Pablo na masanton espiritu pian walay biskeg ton sumpalen so ministeryo to anggano apairap, impriso, tan dakel nin subok so dinalan to.

7. Anto ray subok ed si Timoteo diad asainmin to?

⁷ Sakey ed saray kabataan ya akaiba nen Pablo diad impan-misionero to et si Timoteo. Sikatoy ibabaki met nen Pablo ya ombisita tan  mamaseseg ed saray kongregasyon. (1 Cor. 4:17) Kakkaukolan nen Timoteo so tulong nen Jehova ed sarayan asainmin to. Akin ey? On ta mabaing si Timoteo tan ompan say pakalikna to et uga-ugaw ni. Nayarin atan so rason no akin ya oniay bilin nen Pablo ed sikato: “Anggapo komon so manleglemew ed inkaugaw mo.” (1 Tim. 4:12) Sakey ni, ‘mabetbet ya mansakit.’ (1 Tim. 5:23) Balet kombinsido si Timoteo ya sikatoy ikdan nen Jehova na masanton espiritu pian walay biskeg ton ipulong so maong a balita tan natulongan to ray agagi.—2 Tim. 1:7.

8. Panon itayon papabiskegen nen Jehova natan?

⁸ Iiter met nen Jehova ed sikatayo natan so “pakayari . . . a mas mabiskeg nen say pakayari na too” pian tuloytuloy tayon makapanlingkor ed sikato. (2 Cor. 4:7) Aralen tayo sirin so apatiran paraan ya uusaren nen Jehova pian pabiskegen tan natulongan to tayon manmatoor: pikakasi, say Biblia, saray agagi, tan say ministeryo tayo.

9. Antoy nitulong ed sikatayo na pikakasi?

⁹ Pikakasi. Diad Efeso 6:18, papasesegen itayo nen Pablo ya lanang tayon manpikasi ed Dios diad anggan anton situasyon. Tan bilang ebat ed pikakasi tayo, pabiskegen itayo nen Jehova. Asalin mismo itan nen Brother Jonnie ya taga Bolivia nen nantutumbokan iray subok ed bilay to. Bansag ya nansakit na grabe so asawa tan atateng to. Nairapan ya maong si Jonnie ed impangasikaso tod sikaran talo. Inatey si nanay to, tan abayag to nin inasikaso si asawa tan si tatay to antis iran inmabig. Oniay nanonotan nen Jonnie ya akatulong ed sikato: “No aburido ak lan maong, manpikasi ak ed si Jehova tan ibagak ed sikato so amin ya naliliknak.” Pinabiskeg nen Jehova so liknaan nen Jonnie pian nasarag to iman ya subok. Si Ronald ya elder ed Bolivia et agto inilaloan ya sakey bulan labat manayay pambilay nen nanay to manlapu nen a-diagnose ya walay cancer to. Antoy akatulong ed si Ronald nen inatey si nanay to? Oniay imbaga to: “Kada no manpipikasi ak ed si Jehova, ibabagak ya amin no antoy walad pusok. Amtak ya natatalosan to ak nen say anggan siopan too. Natatalosan to ak ingen anggano agko natatalosan so sarilik.” Ompan no maminsan, singa labay tayo lay onsuko tan agtayo la amta no antoy ibaga tayod si Jehova. Pero tandaan tayo ya anggano agtayo amta no antoy ipikasi tayo, agtayo komon manaalangan ya onasingger ed sikato ta labalabay to tayon tulongan.—Roma 8:26, 27.

10. Base ed Hebreo 4:12, akin et importantin basaen tayo so Biblia tan dalepdepen tayo ray nababasa tayo ditan?

¹⁰ Biblia. Binmiskeg tan apaseseg si Pablo diad pambabasa toy Kasulatan. Ombiskeg tayo met no ontan so gawaen tayo. (Roma 15:4) No basaen tayoy Biblia tan dalepdepen tayoy nababasa tayo, tulongan itayo na espiritu nen Jehova pian makaromog tayo na prinsipyo ya dugaruga ed situasyon tayo. (Basaen so Hebreo 4:12.) Oniay imbaga nen Ronald ya abitla nen niman: “Maong labat ta niyugalik so manbasa na Biblia kada labi. Dadalepdepen ko ray kualidad nen Jehova tan no panon ton inasikaso iray lingkor to nensaman. Akatulong itan pian ombiskeg so liknaan ko.”

11. Panon ya akatulong so Biblia ed sakey ya sister ya abiyuda?

¹¹ Makatulong so pandalepdep ed saray nababasa tayo ed Biblia pian agtayo masyadon akapokus ed saray problema tayo. Ontan so ginawa na sakey ya sister ya abiyuda. Imbaga  ed sikato na sakey ya elder ya maabig no basaen to so libron Job. Nen babasaen la na sister imay salaysay ya aliwa lay panagkatunongan nen Job, singa labay ton bagaan si Job ya, “Agaykala Job! Aliwa ’tay iisipen mo. Sarilim labat so sankanonot mo.” Pero a-realize na sayan sister ya parehas ira labat, kanian anengneng to ya kaukolan ton umanen so panagnonot to. Akatulong so impandalepdep tod sayan salaysay pian nasarag toy ermen ya nalilikna to.

12. Panon ya uusaren nen Jehova iray agagi pian pabiskegen itayo?

¹² Saray agagi. Uusaren met nen Jehova iray agagi pian pabiskegen itayo. Anggan si Pablo et anap-anapen toy panamaseseg na saray agagi. Imbaga ton labay to ran nanengneng pian diad ontan et “makapanpapasesegan” ira. (Roma 1:11, 12) Si Mary ya abitla nen niman et papablien toy tulong na saray agagi. Imbaga to: “Uusaren nen Jehova iray agagi pian pabiskegen to ak. Anggano say arum ed sikara et agda amtay dadalanen ko, walay mangiter ed siak na card odino walay ibaga ra ya aman so kakkaukolan kon narengel. Baleg met so nitulong na saray sister ya alikna da met iyay naliliknak. Ibabaga dad siak no anto ray akatulong ed sikara. Lanang met ya ipapalikna ed siak na saray elder ya importante ak ed kongregasyon.”

13. Panon tayon napaseseg so sakey tan sakey diad aral?

¹³ Maabig no agtayo lilingwanan so manpapasesegan antis tan kayari na aral. Anto kasi no salien mon ibaga ed saray agagi ya inar-arom ira tan napapaseseg kad alimbawa ra? Ontan so ginawa na sakey ya elder ya si Peter. Antis na aral, oniay imbaga to ed sakey ya sister ya anemira so anak to tan aliwan Tasi so asawa to: “Antam, no nanenengneng mi kayon saniina, napapaseseg yo kami. Lanang mon ipipila iray ananak mo, desente panangawes da, tan mankokomento ira.” Akalua imay sister, tan oniay imbaga to: “Agi, salamat ed satay imbaga yo. Kakkaukolan ko ’tan natan.”

14. Panon ya makatulong ed sikatayo so ministeryo?

¹⁴ Ministeryo. Kada no ibabaga tayod arum iray katuaan ya walad Biblia, onlelemew tan ombibiskeg so liknaan tayo, ondengel man ira odino andi. (Pro. 11:25) Naeksperiensya itan nen Sister Stacy nen walay adispelo ya kapamilya to. Agaylay ermen to tan lanang ton naiisip ya wala amoy nankulangan to. Pero akatulong ed sikato so ministeryo. Kada no manpupulong, say sankanonot to et no panon ton natulongan iray totoo diad teritorya ra. Oniay imbaga to: “Misalsalamat ak ta diad saman, inikdan ak nen Jehova na Bible study ya mapmaples so inyaligwas to. Say naaralan ko, no maermen ka dapat manpulong ka.”

15. Antoy naaralan mo ed imbaga nen Mary?

¹⁵ No maminsan, wala ray agagi ya pakalikna da et dagdaiset so nagagawaan dad ministeryo. No ontan so naliliknam, tandaan mo ya basta gagawaen moy anggaay nayarian mo, napapaliket moy Jehova. Imanoen lamet so alimbawa nen Mary. Nen inmalis ed foreign-language ya kongregasyon, pakalikna to et singa anggapoy nagagawaan to. Oniay imbaga to: “Nairapan ak ed lenguahe ra. Diad ministeryo, daiset labat so amtak ya ibaga, manbasa ak labat na teksto, odino mangiter ak labat na tracts.” Makakaibeg si Mary ed saramay mainomay day akaaral. Pero inuman toy panagnonot to. A-realize to ya anggano agto ni kabisadon maong so lenguahe ra, agto labay ya ibagan agla nausar nen Jehova pian tulongan so arum. Oniay imbaga to: “Simpli labat iray katuaan ya walad Biblia, tan atan so makapanguman  ed bilay na saray totoo, aliwan say dunong tan abilidad tayo.”

16. Antoy nepeg ya isipen na saray agagin labalabay day manpulong pero agda la sarag so onalis ed abung?

¹⁶ Amta nen Jehova ya wala ray agagin labalabay day manpulong pero agda la sarag so onalis ed abung. No ontan so situasyon tayo, tulongan to tayo pian napulongan tayo ray mangaasikaso ed sikatayo odino saray doktor tan nurse. Agtayo ikokompara so nagagawaan tayo natan ed saray agawaan tayo nensaman. Ta no andi, ompan nadismaya tayo labat. Say pampokusan tayo et no panon itayon tutulongan nen Jehova natan. No ontan so gawaen tayo, naanosan tayo ray subok tan mansiansia tayon maliket.

17. Base ed Eclesiastes 11:6, akin et importantin agtayo ontutundan manpulong anggano agtayo nanengneng ya tampol so resulta?

¹⁷ Agtayo amta no dinan so ontubo ed saray intanem tayon bini na katuaan. (Basaen so Eclesiastes 11:6.) Singa bilang, si Sister Barbara ya masulok lan 80 so taon to et lanang ya manpupulong panamegley na telepono tan sulat. Diad sakey ya sulat to, walay intekep ton Panag-bantayan ya Marso 1, 2014 ya say tema to et “No Antoy Ginawa na Dios Parad Sika.” * Agto amta ya say angipawitan to manaya na samay sulat et sanasawa ya masulok ya 27 taon lan adispelo. Paulit-ulit dan binasa imay magasin, tan alikna na samay asawan laki ya singa si Jehova ya mismo so mitotongtong ed sikato. Kanian akiaral ira lamet anggad akapawil ira ed kongregasyon. Seguradon malikeliket ya maong si Sister Barbara tan apaseseg nen anengneng toy bunga na sagpot to!

18. Antoy gawaen tayo pian ikdan itayo nen Jehova na biskeg?

¹⁸ On, dakel so uusaren nen Jehova pian napabiskeg to tayo, singa say pikakasi, Biblia, saray agagi, tan say ministeryo. No anggapoy papalagpasen tayo ed saratan ya probisyon, ipapanengneng tayod si Jehova ya walay tiwala tayod sikato ta amta tayo ya sarasarag tan labalabay to tayon tulongan. Komon ta lanang tayon mantiwala ed si Aman Jehova, ta sikatoy malikeliket ya “onnenengneng ed interon dalin pian ipatnag toy biskeg to parad saramay matoor so puso rad sikato.”—2 Awa. 16:9.