1-2. Antoy sakey ya rason akin et interesado tayo ed libron Apocalipsis?

 ASALIM lay nambukay na photo album na arum? Legan mon bubukayen, seguro maslak ya nanenengneng mo et agmo kabat. Pero, walay sakey ya litrato ya nala toy atension mo ta naimanom ya wadman ka manaya! Legan mon kukuninengen, iisipen mo no kapigan tan iner iman, tan bibirbiren mo no siopa iramay kakaibam ed saman ya litrato. Kanian nagmaliw ya espisyal ed sika iman ya litrato.

² Say libron Apocalipsis et singa satan ya litrato. Akin ey? Pantongtongan tayoy duaran rason. Unona, satan ya libro et impaisulat nen Jehova parad sikatayo ran lingkor to. Oniay nabasa ed sankaunaan ya bersikulo: “Say panangiparungtal nen Jesu-Kristo, ya inter na Dios ed sikato, pian ipanengneng ed saray aripen to no anto ray magano lan nagawa.” (Apo. 1:1) Kanian saray nabasa ditan et aliwan parad amin ya totoo, noagta parad sikatayo ran dedikadon lingkor na Dios. Tan diad tua, kaiba tayo ed pakakasumpal na saray propesiya ya walad sayan libro. On, kaiba tayo ed “litrato”!

3-4. Base ed libron Apocalipsis, kapigan so pakagawa na saray propesiya ya akasulat ditan, tan antoy epekto to ed sikatayo?

³ Say komaduan rason no akin ya interesado tayo ed libron Apocalipsis et lapud nagagawa lad panaon tayo iray propesiyan akasulat ditan. Panon tayon amta ya nagagawa la iratan? Walay imbaga nen apostol Juan ya pakaalaan tayoy ideya no kapigan nagawa iray propesiya ed Apocalipsis. Kuan to: “Diad  panamegley na masanton espiritu, niyakar ak diad agew na Katawan.” (Apo. 1:10) Nen insulat to itan nen manga 96 C.E., mabayag ni so isabi na “agew na Katawan.” (Mat. 25:14, 19; Luc. 19:12) Pero base ed saray propesiya na Biblia, ginmapo itan ya agew nen 1914 nen introno si Jesus bilang Ari ed Panarian diad tawen. Manlapu lad satan ya taon, nasusumpal la iray propesiya ed Apocalipsis. On, manbibilay tayo la natan ed “agew na Katawan”!

⁴ Importante sirin ya imanoen tayon maong imay bilin ya walad Apocalipsis 1:3: “Maliket imay manbabasan maksil tan saramay ondedengel ed saray salita na sayan propesiya tan samay manguunor ed saray nisulat ditan, ta asingger lay aturon panaon.” Kailangan tayon ‘basaen ya maksil, dengelen, tan unoren iray salita na sayan propesiya.’ Anto iratan ya “salita” ya kailangan tayon unoren?

5. Diad libron Apocalipsis, antoy pakanengnengan ya kaukolan tayon seguroen ya awaten nen Jehova so panagdayew tayo?

⁵ Diad gapo ni labat na Apocalipsis, nanengneng tayo ya amta nen Jesus so amin ya nagagawa ed saray kongregasyon. (Apo. 1:12-16, 20; 2:1) Akin et nibaga tayo itan? Say sakey ya paneknek et samay mensahe to ed pitoran kongregasyon ed Asia Minor. Espisipiko iray bilin to ed kada kongregasyon, depende ed no antoy situasyon da. Labay to ya say panagdayew da et awaten nen Jehova. Saratan ya bilin to et onaplika nin siansia ed amin ya mandadayew ed si Jehova natan. Antoy ipapanengneng na satan? Amta nen Kristo Jesus so espiritualidad na kada sakey ed sikatayo. Bilang Lider tayo, idadaulo tan proprotektaan to tayo, tan nanenengneng ton amin so gagawaen tayo. Labalabay to tayon tulongan pian tuloytuloy ya walad sikatayo so pabor nen Jehova. Pantongtongan tayo iratan ya bilin to ya kaukolan tayon unoren natan.

6. (a) Base ed imbaga nen Jesus diad Apocalipsis 2:3, 4, antoy problema ed kongregasyon na Efeso? (b) Antoy naaralan tayo ed satan?

⁶ Basaen so Apocalipsis 2:3, 4. Agmon balot aabuloyan ya ombetel so panangarom ed si Jehova. Nanengneng tayo ed samay mensahe nen Jesus ed kongregasyon ed Efeso ya maanos iray agagi ditan tan ag-ira tinmundan nanlingkor ed si Jehova anggano dakel so subok. Pero inabuloyan dan naandi so inmunan panangaro ra ed si Jehova. Kaukolan dan ipawil tan papetangen lamet so panangaro rad si Jehova, ta no andi, agto awaten so panagdayew da. Walay naaralan tayod saya: Agto labay ya ibaga ya no aanosan tayo ray subok et napapaliket tayo lay Aman Jehova. Dapat duga so motibo tayo. Naaralan tayod saya ya aliwan saray gagawaen tayo labat so nenengnengen nen Jehova. Importante ed sikato no akin ya gagawaen tayo itan. Labay tayo ya say rason no akin ya mandadayew tayo ed sikato et lapud inar-aro tayo tan misatsalamat tayo ed amin ya kamaongan to.—Pro. 16:2; Mar. 12:29, 30.

7. (a) Base ed Apocalipsis 3:1-3, anton problema so anengneng nen Jesus ed kongregasyon na Sardis? (b) Antoy dapat tayon gawaen?

⁷ Basaen so Apocalipsis 3:1-3. Mansiansian alerto tan aliing ed espiritual. Duma met so problema na saray agagi ed kongregasyon na Sardis. Dati et masetseseg ira, pero sinmabi panaon ya agla ra masyadon aktibo. Kanian imbaga nen Jesus ya kaukolan day “onliing” ed espiritual. Antoy naaralan tayo? Tua, agan balot lingwanan nen Jehova so amin ya ginawa tayo parad sikato. (Heb. 6:10) Pero agtayo komon iisipen ya ayos labat no agtayo  masyadon aktibo natan lapud maseseg tayo met nensaman. No bilang ta limitado lay nagagawaan tayo natan kompara ed nagagawaan tayo nensaman, dapat aktibo tayo nin siansia ed “kimey na Katawan” pian mansiansia tayon alerto tan aliing ed espiritual anggad isabi na anggaan.—1 Cor. 15:58; Mat. 24:13; Mar. 13:33.

8. Antoy naaralan mod samay mensahe nen Jesus ed saray agagi ed Laodicea ya nabasa ed Apocalipsis 3:15-17?

⁸ Basaen so Apocalipsis 3:15-17. Dapat maseseg ka tan interon puso so panagdayew mo. Duma so problema na saray agagi ed kongregasyon na Laodicea. “Malainem-em” ira ed panagdayew da. Lapud nginmiras ira, imbaga nen Jesus ya “miserable tan pakaskasi” so situasyon da. Kanian binilin to ra ya magmaliw iran maseseg ed panagdayew dad si Jehova. (Apo. 3:19) Antoy naaralan tayod saya? No aliwa lan singa dati so seseg mo, isip mo so amin ya kamaongan nen Jehova ed sika tan say amin ya itatarya na organisasyon to. Pablim itan lapud atan so espiritual ya kayamanan mo. (Apo. 3:18) Agmo komon aabuloyan ya napaulyanan moy panaglingkor mod si Jehova lapu labat ta mas labay moy mainawan bilay.

9. Base ed samay mensahe nen Jesus ed saray agagi ed Pergamo tan Tiatira, antoy nepeg tayon iwasan?

⁹ Iwasan iray bangat na apostata. Ambelat so simbawa nen Jesus ed kongregasyon na Pergamo lapud wala ray agagi ditan ya ontutumbok ed bangat na nanduruman sekta, kanian naapag-apag ira. (Apo. 2:14-16) Kinomendaan to balet iray agagi ed Tiatira ya inmiwas ed “aralem iran bengatla nen Satanas.” Tan pinaseseg to ra ya “bembenan [dan] malet” so katuaan. (Apo. 2:24-26) Antoy nepeg ya gawaen na saray agagi ditan ya naimpluensyaan na saray palson bangat? Imbaga nen Jesus ya kaukolan day magbabawi. Antoy naaralan tayod saya? Dapat iwasan tayo met so antokaman ya bangat ya kontra ed kanonotan nen Jehova. Saray apostata et “singano walay takot da ed Dios balet agnapatnagan [itan] ed kabibilay da.” (2 Tim. 3:5) No makuli tayon manaral na Biblia, mas mainomay tayon nabirbir tan naiwasan iray bangat na apostata.—2 Tim. 3:14-17; Jud. 3, 4.

10. Anto ni so naaralan tayo ed mensahe nen Jesus ed kongregasyon na Pergamo tan Tiatira?

¹⁰ Agtayon balot manggagawa na imoral tan agtayo kokonsintien so imoralidad. Wala ni problema ed kongregasyon na Pergamo tan  Tiatira. Imbaga nen Jesus ya aliway gagawaen na arum ed sikara ta kokonsintien day seksual ya imoralidad ed kongregasyon. (Apo. 2:14, 20) Antoy naaralan tayod saya? Agan balot konsintien tan palampasen nen Jehova so amin ya imoral ya kagagawa, anggano abayag tayo lan manlilingkor ed sikato tan wala ray pribilehyo tayo ed organisasyon. (1 Sam. 15:22; 1 Ped. 2:16) Iilaloan to ya tumboken tayo so atagey ya estandarte to ed moral anggano abebbeba lay estandarte na sayan mundo.—Efe. 6:11-13.

11. Anto la ray naaralan tayo? (Nengnengen met so kahon ya “ Saray Naaralan Tayo.”)

¹¹ Anto la ray naaralan tayo? Kaukolan tayon seguroen ya awaten nen Jehova so panagdayew tayo. No bilang ta walay gagawaen mon aglabay nen Jehova, itundam la tan gawam no antoy duga. (Apo. 2:5, 16; 3:3, 16) Pero wala ni so importantin bilin nen Jesus ed saray kongregasyon. Anto itan?

12. Antoy naaralan tayo ed mensahe nen Jesus ed kongregasyon na Smirna tan Filadelfia? (Apocalipsis 2:10)

¹² Pantongtongan tayo natan so mensahe nen Jesus ed kongregasyon na Smirna tan Filadelfia. Binilin to ra ya ag-ira natatakot ed panamairap ta bendisyonan ira nen Jehova no manmatoor ira. (Basaen so Apocalipsis 2:10; 3:10) Antoy naaralan tayod saya? Dapat iparaan tayo lay sarili tayo ed saray onsabin subok tan panamairap, tan nepeg ya determinado tayon itepel itan. (Mat. 24:9, 13; 2 Cor. 12:10) Akin ey?

13-14. Antoy epekto ed saray lingkor na Dios na samay agawa ya nabasa ed Apocalipsis kapitulo 12?

¹³ Impropesiya ed libron Apocalipsis ya napairap iray lingkor na Dios diad “agew na Katawan”—say mismon panaon ya pambibilayan tayo. Nabasa ed Apocalipsis kapitulo 12 ya nen niletneg so Panarian na Dios, walay agawan guerra ed tawen. Si Miguel (say niglorian Jesu-Kristo) tan saray anghel to et akilaban ed si Satanas tan saray demonyo. (Apo. 12:7, 8) Atalo irayan kabusol na Dios tan imbantak ira nen Jesus diad dalin. Manlapu lad saman et guguloen tan papairapen da iray totoo. (Apo. 12:9, 12) Antoy epekto na satan ed saray lingkor na Dios?

¹⁴ Ibabaga na Apocalipsis no antoy reaksion nen Satanas ed sayan agawa. Lapud agla makapawil ed tawen, ipapangget toy pasnok to ed saray nakekeran alanaan diad dalin ta sikara so mangirerepresenta ed Panarian na Dios, tan gagawaen da so “kimey a panagtasi nipaakar ed si Jesus.” (Apo. 12:17; 2 Cor. 5:20; Efe. 6:19, 20) Panon ya agawa iyan propesiya?

15. Siopa so irerepresenta na ‘duaran tasi’ ya abitla ed Apocalipsis kapitulo 11, tan antoy agawa ed sikara?

 ¹⁵ Inataki nen Satanas iray alanaan ya mangidadaulo ed panagpulong ya kimey. Diad libro na Apocalipsis, sikara imay isisimbolo na ‘duaran tasi’ ya pinatey. * (Apo. 11:3, 7-11) Nen 1918, walora ed sarayan alanaan ya agagi so inakusaan tan senentensiaan ya naprison mabayag. Diad pakanengneng na saray totoo, singa la “inatey” so kimey na sarayan alanaan.

16. Antoy makapabiglan agawa nen 1919, pero antoy tuloytuloy ya gagawaen nen Satanas manlapu lad saman?

¹⁶ Nabasa lanlamang ed Apocalipsis kapitulo 11 ya agmabayag et nabilay lamet imay ‘duaran tasi.’ Panon ya asumpal itan ya propesiya? Walay makapabiglan agawa kayari labat na pigaran bulan. Nen Marso 1919, sarayan aprison alanaan et imbulos, tan imbasura so kaso ra. Intuloy dan tampol so kimey ya panagpulong tan panagbangat. Pero agtinmunda si Satanas ed pangaataki to ed saray lingkor na Dios. Diad tua, ibabaga na Apocalipsis ya sikatoy angibuga na singa “ilog” na panamairap ed amin ya lingkor na Dios. (Apo. 12:15) Kaukolan sirin na kada sakey ed sikatayo so “panagsungdo tan pananisia” pian nitepel tayo itan.—Apo. 13:10.

17. Anggano pupuntiryaen nen Satanas iray lingkor na Dios, anton ag-iilaloan ya tulong so nanaawat da?

¹⁷ Nabasa ed Apocalipsis kapitulo 12 ya saray lingkor na Dios et makaawat na ag-iilaloan ya tulong. Diad bersikulo 16, nabasa tayo ya “sinmangi so dalin” tan inakmon toy “ilog” na panamairap. Ontan ya ontan so nagagawa. No maminsan, walay nitutulong na arum ya kabiangan na mundo nen Satanas ed saray lingkor na Dios. Singa bilang, lapud saray desisyon na korte ya pabor ed sikara, awalaan iray kalayaan ya mandayew ed si Jehova. Sinambot da itan ya kalayaan pian nagawaan day kimey ya ipapagawa nen Jehova. (1 Cor. 16:9) Anto itan ya kimey?

18. Antoy sankaimportantian ya kimey tayo ed sayan kaunoran iran agew?

¹⁸ Impropesiya nen Jesus ya ipulong na saray papatumbok to so “maong a balita na Panarian” na Dios diad interon dalin antis ya onsabi so anggaan. (Mat. 24:14) Legan dan gagawaen itan, tutulongan ira na anghel o grupo na saray anghel ya adeskribe ya mangiyaabawag  na “andi-anggaan a maong a balita . . . ed saramay manaayam diad dalin, diad kada nasyon tan tribu tan lenguahe tan rasa.”—Apo. 14:6.

19. Anton mensahe so kaukolan ya ipulong na saray lingkor nen Jehova?

¹⁹ Aliwa labat ya maong a balita na Panarian so kaukolan ya ipulong na saray lingkor na Dios. Kaukolan da met ya suportaan so kimey na saray anghel ya adeskribe ed Apocalipsis kapitulo 8 anggad 10. Iyaanunsio na sarayan anghel so mantutumbokan ya dusa na saramay agda labay so manpasakop ed Panarian na Dios. Kanian ipupulong met na saray Tasi nen Jehova so mensahe na panangukom ya nikompara ed “uran a kristal tan apoy.” Ipapaamta ra ya deralen na Dios so amin ya kabiangan na mundo nen Satanas. (Apo. 8:7, 13) Kaukolan ya naamtaan na saray totoo ya asingger lay anggaan pian nauman da lay kabibilay da tan makaliktar ira ed “agew na sanok nen Jehova.” (Sof. 2:2, 3) Pero diad tua, aglabay na totoo iyan mensahe. Kaukolan tayoy manpakpel sirin pian nipulong tayo itan. Diad tua, no baleg ya kairapan la, mas ambelat tan mas direktan mensahe na panangukom so ipulong tayo.—Apo. 16:21.

20. Antoy aralen tayo ed ontumbok ya duaran artikulo?

²⁰ Kaukolan tayon seryosoen tan unoren iray “salita na sayan propesiya” ya walad libro na Apocalipsis ta kaiba tayo ed pakakasumpal na saratan. (Apo. 1:3) Antoy gawaen tayo pian nitepel tayoy panamairap tan makpel tayon makapanpulong? Walay duara ya mamabiskeg na liknaan tayo. Unona, amtaen tayo no antoy ibabaga na Apocalipsis ya nagawa ed saray kakabusol na Dios. Tan komadua, amtaen tayo met no anto ran bendisyon so manatalaran ed sikatayo no mansiansia tayon matoor. Pantongtongan tayo iratan diad ontumbok ya duaran artikulo.