1. Anto so importantin desisyonan na kada sakey ed sikatayo?

 WALAY kaukolan ya desisyonan na amin ya totoo, pati sika: Kasin suportaan moy uley nen Jehova lapud sikato so bibidbiren mo ya makanepegan ya Manuley ed uniberso? Odino suportaan moy mauge-uges ya kabusol to, si Satanas a Diablo? Sakey labat so pilien mo, tan akadepende ed desisyon mo no kasin manbilay ka na andi-anggaan diad arapen o andi. (Mat. 25:31-33, 46) Akadepende met ed satan no kasin namarkaan ka parad kililiktar o parad kadederal legan na “baleg a kairapan.”—Apo. 7:14; 14:9-11; Eze. 9:4, 6.

2. (a) Antoy ipapaseseg na Hebreo 10:35-39 ya gawaen na kada sakey ed sikatayo? (b) Panon itayon natulongan na libron Apocalipsis?

² Basaen so Hebreo 10:35-39. No si Jehova so pinilim ya suportaan, duga so desisyon mo. Seguradon labalabay mon tulongan so arum pian makapandesisyon met ira na duga. Pian natulongan mo ra, sarag mon usaren iray impormasyon ya walad libro na Apocalipsis. Ipapaamta na sayan libro no antoy nagawa ed saramay kontra ed uley nen Jehova, balet nabasa met ditan iray bendisyon ed saramay matoor ya onsusuporta ed uley to. Aralen tayo sirin iratan ya importantin katuaan ta pian ombiskeg so determinasyon tayon manmatoor ed si Jehova. Sakey ni, no nakabisado tayo iratan ya katuaan, mas natulongan tayo so arum pian pilien da met so uley nen Jehova tan manlingkor irad sikato.

3. Antoy aralen tayo ed sayan artikulo?

³ Diad sayan artikulo, ebatan tayo irayan tepet: Antoy nagawa ed saramay onsusuporta ed uley na Dios? Anto balet so pansumpalan na saramay onsusuporta ed ambalbalangan  atap ya ayep ya adeskribe ed libro na Apocalipsis?

4. Anton grupo so anengneng nen Juan ya kaiba nen Jesus ed tawen?

⁴ Diad sakey ya pasingawey, anengneng nen apostol Juan so duaran grupo ya onsusuporta ed uley nen Jehova tan naikdan na bilay ya andi-anggaan. Say unonan grupo et bubuoen na 144,000. (Apo. 7:4) Nanlapu ira diad dalin tan sikara so pinili na Dios ya nakaiba nen Jesus diad tawen pian manuley ed gobierno o Panarian To. Uleyan nen Jesus tan na 144,000 so interon dalin. (Apo. 5:9, 10; 14:3, 4) Diad samay pasingawey, anengneng nen Juan so 144,000 ya akaalagey ed simbolikon Palandey Sion diad tawen tan kaiba ray Jesus.—Apo. 14:1.

5. Antoy asingger lan nagawa ed saray kabiangan na 144,000 ya wadia nid dalin?

⁵ Manlapud panaon na saray apostol anggad natan, nilibo la so apili ya magmaliw ya kabiangan na 144,000. (Luc. 12:32; Roma 8:17) Impaamta balet ed si Juan ya pigpigara labat ed sikara so mabilay diad dalin legan na kaunoran iran agew. Sarayan “nakekeraan” et naawat day permanentin ‘tatak’ da antis ya onggapo so baleg ya kairapan. Satan ya simbolikon tatak so mangipanengneng ya matoor irad si Jehova. (Apo. 7:2, 3; 12:17) Insan legan na baleg ya kairapan, saray alanaan ya wadia nid dalin et natipon ed tawen pian nakompleto lay 144,000. Magmaliw iran arari tan nakaiba ray Jesus ed Panarian na Dios.—Mat. 24:31; Apo. 5:9, 10.

6-7. (a) Anton grupo so sinmublay ya anengneng nen Juan, tan antoy naamtaan to tungkol ed sikara? (b) Balanglan kabiangan itayo na 144,000 o kabiangan itayo na “baleg ya ulop,” akin et importantin ikdan tayoy imano imay walad Apocalipsis kapitulo 7?

⁶ Say sinmublay ya anengneng nen apostol Juan et sakey a “baleg ya ulop.” Aliwan singa samay unonan grupo ya 144,000 so bilang da, say komaduan grupo et “agnayarian a bilangen.” (Apo. 7:9, 10) Siopa iratan? Oniay impaamta ed si Juan: “Saraya may nanlapud baleg a kairapan, tan nilinisan da ray kawes da tan pinaputi da iratan ed dala na Kordero.” (Apo. 7:14) Sayan “baleg ya ulop” ya akaliktar ed baleg ya kairapan et manbilay irad dalin tan dakdakel ya bendisyon so awaten da.—Sal. 37:9-11, 27-29; Pro. 2:21, 22; Apo. 7:16, 17.

⁷ Balanglan say ilalom et manbilay diad tawen o diad dalin, kasin nanenengneng moy sarilim ed sarayan eksena ya adeskribe ed Apocalipsis kapitulo 7? Labay nen Jehova ya kaiba ka ed satan. Tatalaranan tayo lan amin itan! Diad satan ya panaon, seguradon malikeliket tayo tan agtayo pagbabawian ya sinuportaan tayoy uley nen Jehova. Anto ni ray nabasa ed Apocalipsis tungkol ed baleg a kairapan?—Mat. 24:21.

8. Antoy palatandaan ya ginmapo lay baleg ya kairapan, tan antoy reaksion na dakel ya totoo?

⁸ Singa naaralan tayod apalabas ya artikulo, asingger lan atakien na saray lider na gobierno ed interon mundo so Makapanyarin Babilonia, say empiryo na palson relihyon. (Apo. 17:16, 17) Atan so palatandaan ya ginmapo lay baleg ya kairapan. No nagawa la itan, kasin ondakel so malabay ya manlingkor ed si Jehova? Andi. Diad tua, ibabaga na Apocalipsis kapitulo 6 ya say ilaloan na totoo ya manprotekta ed sikara et say sistema na politika tan komersyo, ya nikompara ed saray palandey. Mapatpatnag ya agdan talaga labay so manpasakop ed Panarian na Dios, kanian  ipasen ira nen Jehova ya kalaban to.—Luc. 11:23; Apo. 6:15-17.

9. Legan na baleg ya kairapan, akin et nanengneng na amin ya totoo ya duma iray lingkor nen Jehova, tan antoy resulta?

⁹ Legan na baleg ya kairapan, nanengneng na amin ya totoo ya talagan duma iray lingkor nen Jehova. Sikara labat so grupo na totoo diad dalin ya mandadayew ed Dios ya Jehova tan agda labay ya suportaan so “atap ya ayep.” (Apo. 13:14-17) Lapud satan, nasyodotan iray kalaban nen Jehova. Bilang resulta, atakien na alyansa na saray bansa iray lingkor na Dios ed interon mundo. Atan imay impropesiya na Biblia ya iyataki na Gog na Magog.—Eze. 38:14-16.

10. Base ed Apocalipsis 19:19-21, antoy gawaen nen Jehova no atakien la iray lingkor to?

¹⁰ Antoy gawaen nen Jehova no atakien la na Gog na Magog iray lingkor to? Imbaga to: “Ondalang so baleg a sanok ko.” (Eze. 38:18, 21-23) Nabasa ed Apocalipsis kapitulo 19 no antoy ontumbok ya nagawa. Ibaki nen Jehova si Jesus pian protektaan iray lingkor To tan deralen iray kalaban. Kaiba nen Jesus ya milaban “iray armada ed tawen”—saray matoor ya anghel tan say 144,000. (Apo. 17:14; 19:11-15) Antoy resulta na sayan guerra? Naderal so amin ya organisasyon tan totoo ya onkokontra ed si Jehova!—Basaen so Apocalipsis 19:19-21.

11. Anton espisyal tan importantin okasyon so adeskribe ed libron Apocalipsis?

¹¹ Imadyin mo pay nalikna na saray makaliktar ya lingkor na Dios diad dalin no aderal lan amin iray kalaban na Dios. Seguradon malikeliket ira! Diad tawen et oneyag ira ed liket no naderal la so Makapanyarin Babilonia. Pero wala ni tatalaranan dan mas makapaliket. (Apo. 19:1-3) Diad tua, sakey itan ed saray sankaimportantian a nagawa ya abitla ed Apocalipsis—say “kasal na Kordero”!—Apo. 19:6-9.

12. Base ed Apocalipsis 21:1, 2, kapigan nagawa so kasal na Kordero?

¹² Kapigan nagawa iyan kasal? Wala lad tawen so amin ya kabiangan na 144,000 antis ya mismo na Armagedon. Pero aliwa nin saman so pankasal na Kordero. (Basaen so Apocalipsis 21:1, 2) Nagawa so kasal na Kordero kayari na Armagedon, no aderal lan amin so kakabusol na Dios.—Sal. 45:3, 4, 13-17.

13. Antoy isisimbolo na kasal na Kordero?

¹³ Antoy isisimbolo na kasal na Kordero? Diad literal ya kasal, maniba tan mankasakey so nobyo tan nobya manlapu lad agew na kasal da. Kanian diad simbolikon kasal na Kordero, say Ari ya si Jesu-Kristo (say nobyo) et mikasakey ed 144,000 (say nobya). Manlapu lad satan ya agew, onggapo la so Sanlibon Taon ya Uley nen Jesus kaiba so 144,000.—Apo. 20:6.

14-15. Base ed Apocalipsis kapitulo 21, inkompara so 144,000 ed anto? (Nengnengen so litrato ed apis.)

¹⁴ Diad Apocalipsis kapitulo 21, say 144,000 et inkompara ed marakdakep ya syudad ya tatawagen ya “Balon Jerusalem.” (Apo. 21:2, 9) Sayan syudad et akaletneg ed 12 pundasyon a bato tan akaukit ed saratan so “12 ngaran na 12 apostol na Kordero.” Anto kasi reaksion nen Juan nen anengneng to iratan? Seguradon nala so imano to lapud akasulat so ngaran to ed sakey ed saratan ya bato. Talagan baleg itan ya kagalangan!—Apo. 21:10-14; Efe. 2:20.

 ¹⁵ Anggapoy makapipara ed karakep na sayan simbolikon syudad! Say hugis to et perpekton kuadrado, tan say manunan karsada to et puron balitok. Say 12 puerta to et perlas, tan saray padir tan pundasyon to et adekorasyonan na mabmabli iran bato. (Apo. 21:15-21) Balet naimano nen Juan ya singa walay kulang. Oniay imbaga to: “Anggapoy anengneng kon templo ditan, ta say templo na satan et si Jehova a Dios a Makapanyarin-amin, pati say Kordero. Tan agla nakaukolan na syudad so sinag na agew odino bulan, ta liliwawaan itan na gloria na Dios, tan say silew na satan et say Kordero.” (Apo. 21:22, 23) Saramay kabiangan na Balon Jerusalem et kaiba ran mismo si Jehova, kanian agla kaukolan so templo. (Apo. 22:3, 4) Ontan met, diad panlilingkor da ed Dios, idaulo iran mismo nen Jesus bilang Atagey a Saserdote. (Heb. 7:27) Saratan so rason no akin ya adeskribe si Jehova tan Jesus bilang templo na satan ya syudad.

16. Antoy nagawa ed saray totoo diad Sanlibon Taon ya Uley na Panarian na Dios?

¹⁶ Seguradon naliliketan iray alanaan no iisipen da itan ya syudad. Pero walay epekto met na satan ya syudad ed saray parad dalin kanian malikeliket met ira. Legan na Sanlibon Taon ya Uley na Panarian na Dios, dakdakel ya bendisyon so iter na Balon Jerusalem diad saray manaayam ed dalin. Anengneng nen Juan ya onaagus iratan ya bendisyon ya singa “ilog na danum na bilay.” Diad biek tan biek na ilog et wala ray “kiew na bilay” ya saray bulong da et “mamaabig ed saray nasyon.” (Apo. 22:1, 2) Amin ya totoo ed satan ya panaon et naikdan na pagkakataon ya minabang ed saratan ya bendisyon. Kalkalnan magmaliw ya perpekto so amin ya maunor ya totoo. Anggapo lay mansakit, naekal lay amin ya panotot, tan agtayo la onakis lapud ermen.—Apo. 21:3-5.

17. Base ed Apocalipsis 20:11-13, siopay minabang ed saray bendisyon legan na Sanlibon Taon ya Uley nen Kristo?

¹⁷ Siopay minabang ed sarayan bendisyon? Say unona et say baleg ya ulop ya akaliktar ed Armagedon tan saray magmaliw ya ananak da diad balon mundo. Balet nabasa met ed Apocalipsis kapitulo 20 ya nabilay iray inaatey. (Basaen so Apocalipsis 20:11-13.) Siopa ray bilayen diad dalin? Saray “matunong”  ya lingkor nen Jehova, tan saray “agmatunong” o saramay ag-awalaan na tsansan kabaten si Jehova. (Gawa 24:15; Juan 5:28, 29) Kasin labay ya ibaga na satan ya amin ya inatey et paolien legan na Sanlibon Taon ya Uley nen Kristo? Andi. Saramay pinili day agmanlingkor ed si Jehova et agla paolien. Naikdan ira na tsansa ya kabaten si Jehova pero agdan talaga labay so mandayew ed sikato, kanian impanengneng da ya ag-ira karapat-dapat ya manbilay ed Paraison dalin.—Mat. 25:46; 2 Tes. 1:9; Apo. 17:8; 20:15.

18. Antoy situasyon ed dalin kayari na 1,000 taon?

¹⁸ Kayari na 1,000 taon, amin ya totoon manaayam diad dalin et perpekto la. Nakal lan amin so epekto na kasalanan ya atawir da ed si Adan. (Roma 5:12) Kanian kasumpal na 1,000 taon, nibaga ya singa ‘abilay’ ira lapud agla ra aripen na kasalanan tan patey.—Apo. 20:5.

19. Akin et kaukolan ni so unor ya subok?

¹⁹ Nen wadiad dalin si Jesus, amta tayo ya aminpigan tinukso nen Satanas. Pero nansiansian matoor ed si Jehova. Ontan met kasi so gawaen na amin ya perpekton totoo no suboken met ira nen Satanas? Sikatayon mismo so makaebat ed satan ya tepet no ibulos lay Satanas manlapud kaaralman kayari na 1,000 taon. (Apo. 20:7) Saramay manmatoor ed si Jehova diad unor ya subok et awaten day bilay ya andi-anggaan tan nawalaan iray tuan “kawayangan bilang ananak na Dios.” (Roma 8:21) Pero saramay manrebelde ed si Jehova et permanente lan naderal, kaiba ray Diablo tan saray demonyo to.—Apo. 20:8-10.

20. Antoy naliliknam ed saray inaral tayon propesiya?

²⁰ Antoy naliliknam ed saray inaral tayon propesiya ed Apocalipsis? Kasin naiimadyin moy sarilim ya kaiba ka no nagawa la irayan propesiya? Kasin apaseseg ka ya pansagpotan mon tulongan so arum ya mandayew met ed si Jehova? (Apo. 22:17) On, talagan eksayted tayo la ed sarayan nagawa ed arapen! Kanian labalabay tayo met ya ibaga iyan imbaga nen apostol Juan: “Amen! Onsabi ka la komon, Katawan a Jesus.”—Apo. 22:20.