1-2. Akin et magmaliw ya espisyal ed sikatayo iray espisipikon teksto o prinsipyo ed Biblia no manguman so situasyon tayo?

 DIAD seremonya na kasal, madengedengel ed paliwawa so guapguapo ya nobyo tan say maganggana ya nobya to. Diad tua, aliwa lan balo ed sikara iray teksto ya tatalakayen na managkasal. Pero manlapud satan ya agew, espisyal lad sikara iratan ya prinsipyo lapud iyaplika da la iratan bilang sanasawa.

² Ontan met so situasyon na sanasawa no magmaliw la ran atateng. Seguro, nen anggapo ni anak da, dakdakel lan paliwawa so arengel da tungkol ed pamabaleg na ananak. Pero natan ya wala lay anak da, espisyal lad sikara iratan ya prinsipyo. Amta ra ya baleg ya responsabilidad so mamabaleg na anak tan aliwa itan ya gakgalaw! On, no manguman so situasyon tayo, wala ray teksto o prinsipyo ed Biblia ya magmaliw ya espisyal ed sikatayo, ya ompan dati et agtayo masyadon iimanoen. Atan so sakey ya rason no akin ya kaukolan tayon basaen tan dalepdepen so Kasulatan ed “amin ya agew” na bilay tayo, ya singa ingganggan met nen Jehova ed saray arari ed Israel nensaman.—Deu. 17:19.

3. Antoy aralen tayod sayan artikulo?

³ Sikayo ran atateng, responsabilidad yon ibangat iray ananak yo tungkol ed si Jehova. Balbaleg itan ya pribilehyo! Pero agto labay ya ibagan no kabat na ananak yo no siopa so Dios et susto la. Kaukolan yo ran tulongan pian naar-aro da met si Jehova. Panon yo itan ya nagawaan? Pantongtongan tayod sayan  artikulo so apatiran prinsipyo ed Biblia ya makatulong ed sikayo ran atateng. (2 Tim. 3:16) Amtaen tayo met no panon ya inyaplika na arum ya atateng iray bilin na Biblia tan no anto ray marakep ya resulta.

4. Antoy sakey ya prinsipyo ya makatulong ed atateng pian natulongan da ray ananak da ya aroen si Jehova? (Santiago 1:5)

⁴ Unonan prinsipyo: Kerewen so tulong nen Jehova. Ipikasi yod si Jehova ya ikdan to kayoy karunongan. Kaukolan yo itan pian natulongan yo ray ananak yo ya sikatoy aroen da. (Basaen so Santiago 1:5.) Akin et si Jehova so sankaabigan ya kerewan yoy advice? Dakdakel so rason, pero mangibaga tayo labat na duara. Unona, si Jehova so sankabayagan lan ateng ed interon uniberso. (Sal. 36:9) Tan komadua, lanang ya parad pankaabigan tayo iray advice nen Jehova.—Isa. 48:17.

5. (a) Anto ray itatarya na organisasyon nen Jehova pian natulongan iray atateng? (b) Diad video ya abitla ed paimanod leksab, antoy naaralan mo ed impamabaleg nen Brother tan Sister Amorim ed saray ananak da?

⁵ Uusaren nen Jehova so Salita tan say organisasyon to pian tulongan iray atateng ya napabaleg ed katuaan iray ananak da. (Mat. 24:45) Singa bilang, dakdakel so nabasan mararakep ya advice diad saray artikulo ed serye ya “Tulong Parad Pamilya.” Nensaman et nabasa itan diad magasin ya Onliing! pero natan et wala lad jw.org. Dakel met so nabantayan ya interbyu tan dramatization ed jw.org ya makatulong ed saray atateng pian niyaplika da ray bilin nen Jehova legan dan papabalegen iray ananak da. *—Pro. 2:4-6.

6. Antoy imbaga na sakey ya tatay tungkol ed saray itatarya na organisasyon nen Jehova ya makatulong ed saray atateng?

⁶ Dakel ya ateng so misatsalamat ed saray itatarya na organisasyon nen Jehova. Oniay imbaga nen Brother Joe: “Aminen ko ya aliwan mainomay ya pabalegen ed katuaan so taloran ananak mi. Lanang min ipipikasi nen asawak ya komon et tulongan kami nen Jehova. Misatsalamat kami ta walan-walay ompaway ya artikulo o video ya sakto ed situasyon na ananak mi. Ebat iratan nen Jehova ed pikakasi mi.” Lapud saratan ya artikulo tan  video, lalon inmapit ed si Jehova iray ananak da.

7. Akin et nepeg ya maong ya alimbawa iray atateng ed saray ananak da? (Roma 2:21)

⁷ Komaduan prinsipyo: Ipanengneng yoy maong ya alimbawa. Oobserbaan na ugugaw iray atateng da. No antoy nanengneng da ed ateng da, aligen da. Tua, anggapo tay perpekton ateng. (Roma 3:23) Pero dapat gawaen nin siansia na atateng so anggaay nayarian da pian naipanengneng day maong ya alimbawa ed ananak da. (Basaen so Roma 2:21.) Oniay imbaga na sakey ya tatay: “Singa espongha iray ugugaw, esepen dan amin.” Onia ni imbaga to: “Isumbat da no dumay gagawaen mo ed ibabangat mo.” Kanian no labay yon aroen na ananak yo si Jehova, dapat nanengneng dad mismon alimbawa yo ya talagan inar-aro yoy Jehova.

8-9. Antoy naaralan mo ed imbaga nen Andrew tan Emma?

⁸ Dakel so paraan pian nibangat na atateng iray ananak da ya aroen si Jehova. Oniay imbaga nen Andrew, sakey ya brother ya mantaon na 17: “Lanang ya ibabagad sikami na atateng mi ya agmi dapat lilingwanay manpikasi. Kada labi, ipipikasian to ak nen Daddy anggano asumpal ak lan nampikasi. Oniay lanang ya ibabaga dad sikami nen agik: ‘Agkayo nababaingan ya mitongtong ed si Jehova. Manpikasi kayon lanang anggano maminpigapiga.’ Tinmatak itan ed isip ko. Lapud satan, inturing kon Tatay si Jehova. Labalabay koy mitongtong ed sikato ta amtak ya inar-aro to ak.” Sikayo ran atateng, tandaan yo ya no nanengneng na ananak yo ya talagan inar-aro yoy Jehova, aligen da kayo.

⁹ Imanoen met so eksperiensya nen Emma. Nen tinaynan nen tatay to so pamilya ra, si nanay to so apilitan ya manbayar na balbaleg ya utang nen tatay to. Oniay imbaga nen Emma: “Wala ray panaon ya agla amta nen Mamak no iner so pangalaan day pambilay mi. Pero lanang dan ibabaga ed sikami nen agik ya agan balot paulyanan nen Jehova iray lingkor to. Anengneng kon mismo ed si Mamak ya baleg so tiwala rad si Jehova. No antoy ibabangat dad sikami, aman met so gagawaen da.” Antoy naaralan tayod saya? Anggano mair-irap so situasyon, sarag nin siansia na ateng ya ipanengneng so maong ya alimbawa.—Gal. 6:9.

10. Kapigan nakakatongtong na saray Israelita nensaman iray ananak da? (Deuteronomio 6:6, 7)

¹⁰ Komatlon prinsipyo: Lanang kayon miistoryaan ed saray ananak yo. Ingganggan nen Jehova iray Israelita nensaman ya lanang dan ibangat iray ananak da tungkol ed sikato. (Basaen so Deuteronomio 6:6, 7.) Diad sanagew, walan-walay panaon ya nakatongtong na saray Israelita iray ananak da tan naibangat da ran aroen si Jehova. Singa bilang, saniban mankikimey ed alog so sanama ya Israelita no panaon na panagtanem tan panag-ani. Saray anak ya bibii balet et iibaan day nanay da ya mandait, manlaga, tan diad arum ni ran kimey ed abung. Legan iran mantratrabaho, seguradon dakdakel so napantongtongan da. Singa bilang, sarag ya istoryaen na ateng ed anak to so kamaongan nen Jehova tan no panon Ton aasikasoen tan bebendisyonan so pamilya ra.

11. Antoy sakey ya paraan pian nakaistoryaan na atateng iray ananak da?

¹¹ Duma la balet so bilay natan. Diad dakel a lugar, agla masyadon makapaniiba iray ananak tan atateng diad loob na sanagew. Saray atateng et walad trabaho, saray ananak da balet et walad eskuelaan. Kanian dapat manggawa na paraan iray atateng pian nakaistoryaan  da ray ananak da. (Efe. 5:15, 16; Fil. 1:10) Atan so kaabigan na family worship. Oniay imbaga na kabataan ya brother ya si Alexander: “Seseguroen nen Papak ya sinimba kamin makapan-family worship, tan kompleto kamin pamilya. Kayari min manaral, manistoryaan kami.”

12. Anto ray nepeg tan agnepeg ya gawaen na ulo na pamilya no family worship?

¹² No sakey kan ulo na pamilya, antoy gawaen mo pian na-enjoy na ananak mo so family worship yo? Maabig no iyaral mod sikara imay balon libro ya Panliketan so Bilay ya Anggapoy Anggaan! Seguradon mabilabilay so istoryaan yo legan yon aaralen iyan libro. Atateng, agyo komon pantatamian o sesermonan iray ananak yo no family worship. Ta no ontan so gawaen yo, agla ra mangistorya tan agda la ibagad sikayoy nalilikna o problema ra. No walay ibaga dan kontra ed bangat na Biblia, kontrol yoy reaksion yo tan agyo ra pampapasnokan. Misalamat kayo ingen ta ibabaga ray tuan nalilikna ra. Ipalikna yod sikara ya agyo ra huhusgaan tan akaparaan kayon ondengel. Tandaan, natulongan yo labat iray ananak yo no amta yoy walad puso ra.

13. Anto ni ray arum ya pagkakataon ya natulongan na atateng iray ananak da ya lalon onapit ed si Jehova?

¹³ Atateng, seguroen yo ya diad loob na sanagew et walay ibaga yod saray ananak yo ya mamaapit ed liknaan da ed si Jehova. Agyo iisipen ya say pangibangat yo labat ed sikara tungkol ed si Jehova et no iyaralan yo ra na Biblia tan diad family worship. Oniay imbaga nen Sister Lisa: “Impasal mi ray ananak mi ya isipen iray ugali o kualidad nen Jehova ya nanengneng dad saray pinalsa to. Singa bilang, no panlikliketan na ananak mi so gagawaen na alaga min aso, ibabaga mid sikara ya prueba itan ya maliket ya Dios si Jehova tan agto labay ya boring so bilay.”

14. Akin et importante ya tulongan na atateng iray ananak da ya nawalaan na maong iran kakaaro? (Proverbio 13:20)

¹⁴ Komapat ya prinsipyo: Tulongan iray ananak yo ya nawalaan na maong ya kakaaro. Malinlinew so ibabaga na Biblia ya maksil so impluensya na saray kakaaro tayo—nayarin maong o mauges so impluensya rad sikatayo.  (Basaen so Proverbio 13:20.) Atateng, kasin kabat yo iray kakaaro na ananak yo? Kasin nakakaiba tan nakakatongtong yo met iray kakaaro da? Antoy gawaen yo pian say magmaliw ya kakaaro na ananak yo et saramay inar-aro day Jehova? (1 Cor. 15:33) Maabig no mangipila o mangimbita kayo na saray maespiritual ya agagi pian nakaiba tan nakaaro da iray ananak yo.—Sal. 119:63.

15. Antoy sarag ya gawaen na atateng pian nawalaan na maong ya kakaaro iray ananak da?

¹⁵ Imanoen so ginawa nen Brother Tony tan say asawa to pian natulongan da ray ananak da ya nawalaan na maong ya kakaaro. Oniay imbaga nen Tony: “Lanang min iimbitaan nen asawak diad abung mi iray agagi ya nandurumay edad tan situasyon dad bilay. Itatagar mi ran mangan tan mi-join ed family worship mi. Kanian akabkabat mi iray agagi ya inar-aro day Jehova tan malikeliket ya manlilingkor ed sikato. Wala ray manangasikaso na sirkito, misionero, tan arum ni ya nampundo ed abung mi. Apaseseg ya maong iray ananak mi ed saray eksperiensya ra, ontan met ed maseseg tan masakripisyon alimbawa ra. Akatulong itan pian lalon onapit ed si Jehova iray ananak mi.” Atateng, komon ta manggawa kayoy paraan pian nawalaan na maong ya kakaaro iray ananak yo.

16. Panon to no ibaga na anak mo ya agto labay so manlingkor ed si Jehova?

¹⁶ Panon to no ginawam lay anggaay nayarian mo pero imbagad sika na anak mo ya agto labay so manlingkor ed si Jehova? Agmo iisipen ya kinmulang ka bilang ateng. Tandaan mo ya inikdan itayon amin nen Jehova na karapatan ya mandesisyon parad sarili tayo. Kanian say anak mo so manpili no kasin manlingkor ed Dios o andi. No bilang ta nandesisyon so anak mo ya ontunda lan manlingkor ed si Jehova, agka nanaekalan na ilalo ya sikatoy ompawil lanlamang. Seguro, nanonotan mo imay ilustrasyon nen Jesus tungkol ed managdarak ya anak. (Luc. 15:11-19, 22-24) Dakdakel so mauges ya ginawa to, pero pinmawil lanlamang ed si ama to. Ompan ibaga na arum: “Istorya labat itan. Nagawa kasi itan ed tuan bilay?” On! Diad tua, ontan ya  ontan so naeksperiensya na kabataan ya si Elie.

17. Akin et apaseseg kad eksperiensya nen Elie?

¹⁷ Oniay imbaga nen Elie: “Tasi nen Jehova iray ateng ko, tan ginawa ray anggaay nayarian dan ibangat ed siak ya aroen si Jehova tan say Salita to, say Biblia. Balet nen tinedyer ak la, nanrebelde ak.” Sinmabi panaon ya isesekreto la nen Elie iray mauges ya gagawaen to. Nen nandesisyon ya agton talaga labay so manlingkor ed si Jehova, inanosan ya tinulongan na atateng to, pero imbaliwala ton amin so ginawa ra. Sikatoy linmayas tan nagmaliw ya mauges so kabibilay to. Pero wala ray panaon ya naiistorya tod sakey ya barkada to iray amta tod Biblia. Lapud satan ya istoryaan da, mabetbet to lan sankanonot si Jehova. Oniay imbaga to: “Say bini na katuaan a nansagpotan ya intanem na atateng ko [ed pusok] et kalkalnan sinmimit.” Diad inlabas na panaon, pinmawil lanlamang si Elie ed si Jehova. * Imadyin yo pay liket na atateng to! Maong labat ta nen ugaw ni si Elie et impurek da la ed sikato so katuaan.—2 Tim. 3:14, 15.

18. Antoy nibaga yod saray atateng ya pansasagpotan dan ibangat iray ananak da ya aroen si Jehova?

¹⁸ Sikayo ran atateng, balbaleg ya pribilehyo so inter nen Jehova ed sikayo. Sikayo so mamabaleg na balon henerasyon ya mandayew ed sikato. (Sal. 78:4-6) Aliwa itan ya mainomay, kanian pisalamatan mi so amin ya sagpot yo ya ibangat iray ananak yon aroen si Jehova. No itultuloy yo ran pabalegen diad disiplina tan panamilin nen Jehova, seguradon napapaliket yoy Ama tayod tawen.—Efe. 6:4.