1. No goal ed espiritual so pantongtongan, antoy subok ed sikatayo?

 KASIN walay goal mo ed espiritual pero nanairapan kan gawaen itan? b No on, agmo bukbukor. Singa bilang, say goal nen Philip et naynay ya manpikasi tan na-improve toy karga na pikakasi to. Pero lapud busy, ngalngali anggapoy panaon ton manpikasi. Say goal nen Erika et onsabin masakbay ed meeting place antis na panagpulong. Pero nali-late nin siansia kanian agto la nasasabian so meeting for field service. Say goal nen Tomáš et basaen so interon Biblia. Pero oniay inamin to: “Agko nai-enjoy so manbasa na Biblia nensaman. Amitlok ya sinali, pero no wala ak lad Levitico, makatunda ak la.”

2. No walay goal tayo ed espiritual ya agtayo ni nagagawaan, akin et agtayo dapat nadidismaya?

² No walay goal mo ed espiritual ya agmo ni nagagawaan, agka komon nadidismaya. No nanengneng nen Jehova ya mani-effort ka, nalikna to ya inar-arom tan labay mon iter so ‘the best’ mo ed sikato. Ta diad tua, anggano simpli so goal mo, kailangan moy mansakripisyo tan ikdan itan na oras. Papablien iratan nen Jehova. Pero siempre, amta to iray limitasyon mo tan agto kerewen ed sika so agmo sarag ya iter. (Sal. 103:14; Miq. 6:8) Kanian no maniisip kay goal, seguradom ya realistic odino amay nasarag mo. No akaisip ka la, anto balet so makatulong pian nagawaan moy goal mo? Pantongtongan tayo iray pigaran praktikal ya suggestion.

3. Pian nagawaan moy goal mo, akin et importante ya pursigido tan ganado ka?

³ No talagan labay mon nagawaan iray goal mod espiritual, dapat pursigido tan ganado ka. No ontan so nalilikna na sakey ya too, anggapoy makapigil ed sikato tan pankulian ton gawaen so plano to. Atan ya liknaan et singa dagem ya mangitutulak ed baloto o bangka ya anggad makasabi ed destinasyon to. No tuloytuloy so siplog na dagem, seguradon naliketan may akalugan ed baloto ta amta ton makasabin-makasabi ed laen to. Tan no diman mas maksil so dagem, mas maples ya makasabi. Ontan met ed saray goal tayod espiritual, no diman tayo mas ganado tan mas pursigido, mas baleg so posibilidad ya nagawaan tayoy goal tayo. Oniay imbaga nen Brother David ya taga El Salvador: “No ganado ka, talagan man-effort ka. Agka ompayag ya walay makahadlang ed sika.” Anto sirin so makatulong pian mas pursigido tan ganado kan gawaen so goal mo?

4. Antoy ipikasi tayod si Jehova? (Filipos 2:13) (Nengnengen met so litrato.)

⁴ Ipikasim ed si Jehova ya tulongan to kan magmaliw ya ganado. Usaren nen Jehova so espiritu to pian ikdan to kay “panlabay” ya gawaen so goal mo. (Basaen so Filipos 2:13.) No maminsan, say rason no akin ya walay goal tayo et lapud amta tayon atan so dugan gawaen. Pero diad tua, ompan agtayo ganadon gawaen itan. Ontan so alikna nen Sister Norina ya taga Uganda. Say goal to et makalmo na Bible study, pero agmamapasya ya mananap ta pakalikna to et aliwan maong ya manbangat. Anto balet so akatulong ed sikato? Oniay inistorya to: “Inagew-agew kon impikasi ed si Jehova ya tulongan to ak pian nalabayan koy mangiyaral na Biblia, tan nan-effort ak met pian na-improve koy panagbangat ko. Kalabas na pigaran bulan, apansin ko ya labalabay ko lay nawalaan na Bible study. Diad saman ya taon, walay naigapok ya duaran Bible study.”

5. Antoy dalepdepen tayo pian mas pursigido tayon gawaen iray goal tayo?

⁵ Isip mo no anto la ray ginawa nen Jehova parad sika. (Sal. 143:5) Nen dinalepdep nen apostol Pablo so agnaparaan a kaabigan nen Jehova ed sikato, apakilos ya iter so ‘the best’ to ed si Jehova. (1 Cor. 15:9, 10; 1 Tim. 1:12-14) No sankanonot mo met ya lanang iray ginawa la nen Jehova parad sika, napakilos kan gawaen so goal mo. (Sal. 116:12) Ontan so ginawa na sakey ya sister ed Honduras pian nagawaan toy goal to ya man-regular pioneer. Kuan to: “Inisip koy amin ya ginawa nen Jehova parad siak tan a-realize ko ya talagan inar-aro to ak. Inawat to ak ed pamilya to. Aasikasoen tan proprotektaan to ak. No iisipen ko iratan, lalok ya naaaro si Jehova tan mas pursigido ak ya manpayunir.”

6. Anto ni makatulong pian mas ganado tan pursigido tayon gawaen so goal tayo?

⁶ Isip mo ray balibalin resulta no nagawaan moy goal mo. Imanoen no antoy akatulong ed si Erika ya abitla ed parapo 1 pian nagawaan toy  goal to ya onsabin masakbay ed meeting place. Oniay imbaga to: “No na-late ak, dakel so napalagpas ko. Pero no masakbay ak, nakaistoryaan ko ni ray agagi. Makaaral ak met ed saray natalakay ya suggestion ya makatulong pian mas na-enjoy tan na-improve koy ministeryok.” Lapud inisip nen Erika iray balibalin resulta, agla natan nali-late ed kapapaway. Sika ey? Kasin say goal mo et i-improve so panagbasam na Biblia o panagpikasim? Maabig sirin no isipen mo ya lalon onelet so relasyon mod si Jehova no gawaen mo itan. (Sal. 145:18, 19) No say goal mo et ipanengneng so sakey ya balibalin ugali o kualidad, isip mo ya lapud satan et lalo kan naaro na arum. (Col. 3:14) Anto kasi no ilistam so amin ya rason no akin ya labay mon gawaen so goal mo? No nisulat mo lan amin, maabig no lanang mon nengnengen itan ya listaan. Oniay imbaga nen Tomáš ya abitla ed parapo 1: “No mas dakel so naisip kon rason, mas desidido ak ya gawaen so goal ko.”

7. Antoy akatulong ed si Julio tan ed asawa to pian nagawaan day goal da?

⁷ Pilim ya kaaro iramay napaseseg da kan gawaen so goal mo. (Pro. 13:20) Oniay imbaga nen Julio ya akatulong ed sikaran sanasawa pian nagawaan day goal da ya manboluntaryo ed lugar ya daiset so Tasi. “Say pipilien min kakaaro et saramay napaseseg da kamin gawaen so goal mi. Lanang min ibabaga ed sikara iray plano mi. Dakel ed sikara et asali da lay namboluntaryo ed arum ya lugar, kanian praktikal iray advice tan tips da ed sikami. Lanang da met ya kukumustaen no anto lay update ed saray plano mi. Tan no nalikas dan onkakapuy so liknaan mi, papasesegen da kami.”

8. Antoy nagawa ed goal mo no say ikilos mo labat et no ganado ka? (Nengnengen met so litrato.)

⁸ Diad tua balet, walan-wala ray agew ya agtayo ganadon gawaen so goal tayo. No ontay naliliknam, labay to kasin ibaga, anggapo lay gawaen mo? Andi. Isip mo pa may ilustrasyon nen niman tungkol ed dagem. No maksil so dagem, maples ya makasabi imay baloto ed destinasyon to. Pero di ba, nandurumay kakasil na dagem? Tan no maminsan ingen, anggapon balot so siplog na dagem. No onman, kasin anggapo lay nagawaan to may akalugan ed baloto pian tuloytuloy so biahe to? Wala ni. Singa bilang, no de-motor may baloto, paandaren to. No anggapo balet, sarag toy manbegsay o mansagwan. On, manggawan-manggaway paraan pian makasabi ed laen to. Ontan met ed saray goal tayo. Ompan wala ray agew ya ganado tayon maong, pero no maminsan et anggapoy ganas tayo. No say ikilos tayo labat et no ganado tayo, agtayo nagawaan so goal tayo. Pero singa samay akalugan ed baloto diad ilustrasyon, makaandar tan makasabi tayod laen tayo no manggawa tayoy paraan. Tua, kailangan so disiplina ed sarili, pero sulit so pan-effort mo. Antis tayon pantongtongan no anto ray makatulong pian tuloytuloy mon nagawaan so goal mo, pantongtongan tayo ni so sakey ya tepet.

9. Kasin agnaliliketan si Jehova no pipiliten tayoy sarili tayo ya gawaen so goal tayo? Ipaliwawa.

 ⁹ Labay nen Jehova ya maliket tan mabulos tayon manlingkor ed sikato. (Sal. 100:2; 2 Cor. 9:7) Panon to balet no anggapo tayod mood tan kaukolan tayon piliten so sarili tayon gawaen so goal tayo? Kasin agnaliliketan si Jehova? Makala tayoy ideya ed si apostol Pablo. Oniay imbaga to: “Pepekpeken [o didisiplinaen] koy laman ko tan gagawaen kon aripen.” (1 Cor. 9:25-27, paimanod leksab; nengnengen so nwtsty-TG study note na bersikulo 27) On, pinilit nen Pablo so sarili to ya manggaway duga anggano agto komon labay. Kasin aliketan si Jehova ed satan ya ginawa nen Pablo? On! Tan benendisyonan nen Jehova iray sagpot to.​—2 Tim. 4:7, 8.

10. Anto ray balibalin resulta no man-effort tayo nin siansia ya gawaen so goal tayo anggano singa anggapo tayod mood?

¹⁰ Antoy naaralan tayo ed sayan eksperiensya nen Pablo? Naliliketan si Jehova no nanenengneng ton mani-effort tayo nin siansia ya gawaen so goal tayo anggano singa anggapo tayo ed mood. Akin ey? On ta amta to ya ginawa tayo iman lapud panangaro tayo ed sikato, anggano no maminsan et agtayo komon labay. Tan singa si Pablo, bendisyonan met nen Jehova iray sagpot tayo. (Sal. 126:5) No diman tayo nalilikna so bendisyon nen Jehova, ompan diman tayo la magmaliw ya ganado. Oniay imbaga nen Sister Lucyna ya taga Poland: “No maminsan, nangingirasan ak ya manpulong, lalo la no naksawan ak. Pero kayarik ya manpulong, grabe liket ko. Sulit so sakripisyok!” Pantongtongan tayo natan no anto ray gawaen tayo no singa natatabangan tayon gawaen so goal tayo.

11. Panon itayon natulongan nen Jehova ya kontrolen so sarili tayo?

¹¹ Ipikasim ed si Jehova ya nakontrol moy sarilim. No walay kontrol mo ed sarilim, nakontrol moy liknaan mo tan saray gagawaen mo. No nabitla so kontrol ed sarili, ompan say nanonotan tayon tampol et amay pigilan tayoy sarili tayo ya manggaway aliwa. Pero diad tua, kailangan tayo met so kontrol ed sarili pian nagawaan tayoy duga, singa diad saray goal tayo ed espiritual, lalo la no naiirapan o natatabangan tayon gawaen itan. Tandaan, say kontrol ed sarili et kaiba ed bunga na espiritu. Kanian kerew mo ed si Jehova ya ikdan to ka na masanton espiritu pian naipanengneng mo itan ya kualidad. (Luc. 11:13; Gal. 5:22, 23) Baleg so nitulong na pikakasi ed si Brother David ya abitla ed parapo 3. Say goal to et regular ya makapan-personal study. Kuan to: “Lanang kon ipipikasi ed si Jehova ya tulongan to ak pian nakontrol koy sarilik. Diad tulong to, wala lay eskedyul ko natan parad personal study tan natutumbok ko itan.”

12. No walay goal tayo ed espiritual, panon ya makatulong imay prinsipyo ed Eclesiastes 11:4?

¹² Agmo la aalagaren ya ondakep ni situasyon. Diad sayan mundo, walan-walay problema ya arapen tayo. Kanian no alagaren mo ni ya ondakep so situasyon mo, agmon talaga nagawaan so goal mo. (Basaen so Eclesiastes 11:4.) Oniay imbaga nen Brother Dayniel: “Anggapo tay dugarugan timing o situasyon, agmo la itan aalagaren. Basta igapom la, atan so duga.” Onia met so imbaga nen Brother Paul ya taga Uganda no akin ya agtayo la dapat ipapanabuas o pabayagen ni so goal tayo: “No ginapoan mon gawaen so goal mo anggano aliwan marakep so situasyon, iikdan moy Jehova na rason pian bendisyonan to ka.”​—Mal. 3:10.

13. Akin et maabig no onggapo ka ed mas simpli iran goal?

¹³ Onggapo ed mas simpli iran goal. Ompan nangirasan tayo ed goal tayo no singa mair-irap itan ya gawaen. Mas maabig sirin no igapom ed mas simpli iran goal. Singa bilang, no say goal mo et ipanengneng so sakey ya balibalin  ugali o kualidad, manisip kay simplin paraan pian naipanengneng mo itan. No say goal mo et basaen so interon Biblia, mas realistic no diad gapo et pigaran minuto labat so iyeskedyul mon pambasam. Si Tomáš ya abitla ed parapo 1 et in-goal to ya basaen so interon Biblia diad loob na sakey taon, pero nairapan. Oniay imbaga to: “A-realize ko ya agko sarag may dakdakel so babasaen ko, kanian inggapok lamet. Implanok ya pigaran bersikulo labat so basaen ko kada agew tan sineguradok ya walay panaon kon mandalepdep. Kanian mas nai-enjoy ko lay pambabasak.” Nen apasal lay Tomáš tan nai-enjoy to la, mas ganado la kanian mas andukey lay babasaen to. Agawaan ton siansiay goal to, abasa toy interon Biblia! c

14. Anto ray nayarin makahadlang ed goal tayo?

¹⁴ Diad tua, anggano pursigido o disiplinado tayo, agtayo naiwasan ya wala ray makahadlang ed goal tayo. Singa bilang, ompan agtayo natumbok so eskedyul tayo no wala ray “ag-iilaloan a nagawa.” (Ecl. 9:11) Ompan onkapuy so liknaan o naupot so biskeg tayo lapud problema ya aarapen tayo. (Pro. 24:10) Tan no walay nagawaan tayon lingo, ompan natabangan tayo la ed goal tayo. (Roma 7:23) Sakey ni, wala ray agew ya talagan naknaksawan tayo. (Mat. 26:43) Anto ray dapat tayon tandaan no wala ray ontan ya hadlang?

15. Akin et agka dapat onsuko anggano wala ray agew ya agmo agawaan so goal mo? (Salmo 145:14)

¹⁵ Tandaan mo ya no agka onsuko, ipapanengneng mo ya inar-arom si Aman Jehova. Ibabaga na Biblia ya walan-walay panaon ya naproblema tan nalingo tayo. Pero im-promise nen Jehova ya tulongan to tayo no natumba o nairapan tayo. (Basaen so Salmo 145:14.) Oniay imbaga nen Brother Philip ya abitla ed parapo 1: “Anggano maminpiga ak ya natumba, aliwan satan so pampopokusan ko. Amtak ya napapaliket koy Aman Jehova no ombangon ak tan no man-umpisa ak lamet.” Onia met so imbaga  nen David ya abitla nen niman: “No naknaksawan ak o wala ray problemak, agko iisipen ya hadlang iratan. Chance ko ingen iratan pian ipanengneng ko ya inar-arok si Aman Jehova.” On, no agka manpatalo ed antokaman ya nayarin makahadlang ed goal mo, ipapanengneng mo ed si Jehova ya talagan labalabay mon paliketen! Seguradon makakaimis si Jehova no nanenengneng ton mani-effort kan gawaen so goal mo anggano wala ray hadlang.

16. No walay panaon ya agmo agawaan so goal mo, antoy gawaen mo pian pakaaralan mo itan?

¹⁶ No walay panaon ya agmo agawaan so goal mo, tandaan mo ya pakaaralan mo itan. Isip mo no akin ya onmay agawa, tan tepetan moy sarilim, ‘Anto kasi gawaen ko pian agla ’ya naulit?’ (Pro. 27:12) No maminsan balet, ompan sinyales itan ya aliwan realistic so goal mo. Kanian maabig no usisam lamet so sarilim tan isip mo no anton goal so talagan nasarag mo. d Agka mapaga ta natalosan nen Jehova no umanen moy daiset so goal mo, amay talagan nasarag mo.​—2 Cor. 8:12.

17. Akin et agtayo dapat lilingwanan iray agawaan tayo la?

¹⁷ Agmo lilingwanan iray agawaan mo la. Ibabaga na Biblia ya ‘say Dios et matunong kanian agto lingwanan iray ginawam.’ (Heb. 6:10) No si Jehova et agto lilingwanan iray ginawam parad sikato, agmo met komon iratan lilingwanan. Isip mo pa iray goal ya agawaan mo la. Singa bilang, akaarom lay Jehova, manpupulong ka la, tan ompan a-baptize ka la. Agawaan mo iratan lapud nan-effort ka. Kanian no itultuloy moy man-effort, seguradon nagawaan mo met iray balon goal mo.​—Fil. 3:16.

18. Antoy tandaan tayo legan tayon pansasagpotan ya gawaen iray goal tayo? (Nengnengen met so litrato.)

¹⁸ Diad tulong nen Jehova, nagawaan mo iray goal mod espiritual. Kasin nanonotan mo imay ilustrasyon nen niman tungkol ed samay akalugan ed baloto? Seguradon malikeliket no makasabi ed destinasyon to. Pero diad tua, mani-enjoy la legan na biahe ta dakel so marakep ya nanenengneng to. Ontan met ed saray goal tayo ed espiritual. Legan kan mani-effort pian nagawaan moy goal mo, nengneng mo no panon kan tutulongan tan bebendisyonan nen Jehova. Atan ni labat et makapaliket la. (2 Cor. 4:7) Kanian komon ta itultuloy mon gawaen so goal mo. No agka onsuko, seguradon mas dakel ya bendisyon so iter nen Jehova ed sika.​—Gal. 6:9.