1. Antoy labay nen Jehova ya gawaen na saray lingkor to? (Nengnengen met so litrato.)

 SIOPAY aasinggeran mo no kaukolan moy tulong o advice? Amta tayo ya anggan anton oras et makaasingger tan makapanpikasi tayod si Aman Jehova. Diad tua, atan so labay ton gawaen tayo. Ibabaga ingen na Biblia ya “naynay [tayon] manpikasi.” (1 Tes. 5:17) Kanian antokaman so situasyon tayo, agtayo komon manaalangan ya onkerew na tulong o advice ed si Jehova. (Pro. 3:5, 6) Maar-aron Dios si Jehova, kanian aga nakulitan ed sikatayo anggano maminpiga tayon manpikasi.

2. Antoy pantongtongan tayo ed sayan artikulo?

² On, baleg ya pribilehyo so manpikasi. Pero lapud karakel na trabaho tan arum nin responsabilidad, ompan halos anggapo lay panaon tayon manpikasi. Tan no maminsan, agtayo amta no antoy ipila tayod pikakasi tayo. Maong labat ta wala ray alimbawa tan prinsipyo ed Biblia ya makatulong pian na-improve tayoy panagpikasi tayo. Pantongtongan tayo ed sayan artikulo no antoy naaralan tayod si Jesus tungkol ed pan-eskedyul na panaon parad pikakasi. Pantongtongan tayo met so limara ya importantin ipila tayo ed saray pikakasi tayo.

3. Akin et amta nen Jesus ya importante ed si Jehova iray pikakasi na lingkor To?

³ Amta nen Jesus ya importantin maong ed si Jehova iray pikakasi tayo. Antis ya linma diad dalin, abayag ton akaiba si Ama to. Kanian anengneng ton mismo no panon ya inebatan nen Aman Jehova iray pikakasi na saray matoor ya lalaki tan bibii. Singa bilang, si Jesus et walad abay nen Ama to nen inebatan To iray impapuson pikakasi nen Hana, David, Elias, tan arum ni. (1 Sam. 1:10, 11, 20; 1 Ara. 19:4-6; Sal. 32:5) Kanian  nen wadiad dalin, impurek to ed saray disipulo to ya ag-ira ontutundan manpikasi tan mantiwala ira ya naebatan so kerew da.​—Mat. 7:7-11.

4. Antoy naaralan tayod si Jesus tungkol ed panagpikasi?

⁴ Mapikasi si Jesus, kanian no pikakasi so pantongtongan, dakel so naaralan tayod sikato. Busy pa met si Jesus legan na ministeryo to, tan lanang ya tutumboken na totoo. Pero, sinegurado to ya walay panaon ton manpikasi. (Mar. 6:31, 45, 46) Aminsan, asaksakbay ya binmangon tan linmad “nisulinek a pasen” pian manpikasi. (Mar. 1:35) Wala met may sanlabin nampikasi si Jesus ta walay ambelat ya desisyonan to. (Luc. 6:12, 13) Tan diad samay labi antis ya ompatey, sikatoy aminpigan nampikasi pian makapanmatoor ed sankairapan ya parte na asainmin to diad dalin.​—Mat. 26:39, 42, 44.

5. Panon tayon naalig so alimbawa nen Jesus?

⁵ Antoy naaralan tayod alimbawa nen Jesus? Anggano busy tayo, dapat seguradoen tayo ya walay eskedyul tayon manpikasi. Singa bilang, ompan kaukolan tayoy ombangon na masakbay odino agtayon tampol onuugip no labi pian makapanpikasi tayo. Seguradon makakaimis si Aman Jehova no nanenengneng to ya mani-effort tayon manpikasi, tan agtayo ibabaliwala so pribilehyon mitongtong ed sikato. Oniay imbaga na sakey ya sister, si Lynne: “Nen first time kon naamtaan ya sarag koy mitongtong ed si Jehova ed anggan anton oras, diman ko atalosan ya labay na Dios ya sikatoy ituring kon Kaaro, tan apakilos ak met ya i-improve koy panagpikasik.” Seguradon ontan met so nalilikna tayo. Pantongtongan tayo sirin so limara ya importantin ipila tayo ed saray pikakasi tayo.

6. Base ed Apocalipsis 4:10, 11, antoy karapat-dapat ya awaten nen Jehova?

⁶ Irayew si Jehova. Diad makapakelkelaw ya pasingawey, walay anengneng nen apostol Juan ya 24 ya mamatatken diad tawen ya ondadakmomo tan mandadayew ed si Jehova. Imbaga da ya si Jehova so karapat-dapat ya mangawat na “gloria tan galang tan pakayari.” (Basaen so Apocalipsis 4:10, 11.) Anggan saray matoor ya anghel et dakel so rason dan irayew si Jehova. Kaiba day Jehova diad tawen kanian kabkabat dan maong. Lapud naoobserbaan da ray kualidad to ed amin ya  gagawaen to, agda napigilan so sarili da ya mangirayew ed sikato.​—Job 38:4-7.

7. Akin et irarayew tayoy Jehova?

⁷ Labay tayo met ya irayew si Jehova diad saray pikakasi tayo. Ibaga tayod sikato no antoy labalabay tayon ugali to tan no akin ya balbaleg so respeto tayod sikato. No manbabasa kay Biblia o manpe-personal study ka, isip mo no anto ran kualidad o ugali nen Jehova so naaralan mo tan no antoy pambiliban mo ed sikato. (Job 37:23; Roma 11:33) Insan ibagam ed sikato no antoy epekto na satan ed sika. Agmo met lilingwanan ya irayew si Jehova lapud pangaasikaso tod sika tan ed amin ya agagi. Agmamapaulyan si Aman Jehova tan lanang to tayon proprotektaan.​—1 Sam. 1:27; 2:1, 2.

8. Anto ray pigaran rason ya pisalamatan tayoy Jehova? (1 Tesalonica 5:18)

⁸ Misalamat ed si Jehova. Dakel so rason tayon misalamat ed si Jehova. (Basaen so 1 Tesalonica 5:18.) Diad tua, nanlapud sikato so antokaman ya mamapaliket ed sikatayo. (Sant. 1:17) Singa bilang, misalamat tayo ta marakdakep tan makapabilib so impanggawa tod dalin tan ed arum nin pinalsa. Pisalamatan tayo met ta inikdan to tayoy bilay, pamilya, kakaaro, tan pag-asa. Agtayo met lilingwanan so misalamat ed si Jehova ta inawat to tayo bilang kaaro to.

9. Akin et importante ya sankanonot tayo ray bendisyon nen Jehova ed sikatayo?

⁹ Pian niyugali tayoy misalamat ed si Jehova, importante ya sankanonot tayo ray bendisyon tod sikatayo. Diad mundo, maslak ya totoo et agda la amtay misalamat. Imbes ya misalamat ira ed no antoy wala lad sikara, say sankanonot da labat et no panon dan naala so labay da. No naalisan itayo na ontan ya ugali, ompan puros kerew so karga na pikakasi tayo. Agtayo ra labay ya aligen. Kanian komon ta malikas tayo ed saray bendisyon ya iiter nen Jehova, tan agtayo lilingwanan so misalamat ed amin ya gagawaen to parad sikatayo.​—Luc. 6:45.

10. Antoy epekto ed sakey ya sister lapud lanang ya misasalamat ed si Jehova? (Nengnengen met so litrato.)

¹⁰ Makatulong so lanang ya pisalamat ed si Jehova pian naanosan tayo ray subok. Ontan so ginawa nen Sister Kyung-sook ya say eksperiensya to et nabasa ed Enero 15, 2015 ya isyu na Say Panag-bantayan. A-diagnose ya walay graben lung cancer to. Oniay inamin to: “Talagan grabe [so] epektod siak na sayan sakit ko. Pakaliknak et anggapo lay ilalok, tan natatakot ak ya maong.” Antoy akatulong ed sikato? Kada labi antis ya onugip, onla kuno ed rooftop na abung da pian manpikasi. Agto kuno lilingwanan ya ipila ed pikakasi to so limaran pisatsalamatan to ed satan ya agew. Lapud satan, agla masyadon aburido ed sakit to. Kada no misasalamat, napapakilos met kuno ya ibaga ed pikakasi to ya inar-aro toy Jehova. Apatunayan ton mismo ya wadtan si Jehova ya onsuporta ed saray matoor ya  lingkor To no onaarap ira ed subok. A-realize to met ya mas dakel so bendisyon nen say problema. Singa si Kyung-sook, anggano ondadalan tayo ed subok, komon ta say pampokusan tayo et saray bendisyon ya iiter nen Jehova. No lanang tayon pisalamatan si Jehova ed amin ya gagawaen to parad sikatayo, makapan-anos tayo tan maliket tayo nin siansia ya manlingkor ed sikato.

11. Kapawil nen Jesus ed tawen, akin et kakkaukolan na saray disipulo to so pakpel?

¹¹ Ipikasim ed si Jehova ya ikdan to kay pakpel ya manpulong. Antis ya ompawil si Jesus ed tawen, impanonot to ed saray disipulo to so asainmin da ya manpulong “diad Jerusalem, diad interon Judea tan Samaria, tan diad sankaarawian a pasen na dalin.” (Gawa 1:8; Luc. 24:46-48) Ag-abayag, si apostol Pedro tan Juan et inaresto na saray lider na saray Judio tan inyarap da ra ed korte na Sanhedrin. Binawalan da ran manpulong tan tinaktakot da ni ra ingen. (Gawa 4:18, 21) Antoy reaksion nen Pedro tan Juan?

12. Base ed Gawa 4:29, 31, antoy ginawa na saray disipulo?

¹² Oniay inyebat nen Pedro tan Juan nen tinaktakot ira na saray lider na relihyon: “Sikayo so mangukom no kasin duga ed pakanengneng na Dios so idengel ed sikayo imbes a diad Dios. Balet parad sikami, agkami nayarin ontundan mansalita nipaakar ed saray anengneng tan nadngel mi.” (Gawa 4:19, 20) Nen imbulos da lay Pedro tan Juan, saniiba ya nampikasi iray disipulo ya nagawaan da komon so panlabayan nen Jehova. Oniay impikasi ra: “Ikdan mo komon na pakpel iray ariripen mo pian nitultuloy min niyabawag so salitam.” Inebatan nen Jehova itan ya impapuson pikakasi ra.​—Basaen so Gawa 4:29, 31.

13. Antoy naaralan tayo ed si Brother Jin-hyuk?

¹³ Aligen tayoy ginawa na saramay disipulo, ituloy tayoy manpulong anggano patundaen itayo na gobierno. Imanoen so alimbawa nen Brother Jin-hyuk. Sikatoy apriso lapud agto labay so mansundalo. Diad prisoan, sikato so aka-assign ya mangitulor na naakan ed arum ya priso ya akabartolina. Pero bawal to ran katongtongen tungkol ed Biblia. Say nayari to labat ya itongtong ed sikara et tungkol ed trabaho ya inyasain ed sikato. Kanian impikasi tod si Jehova ya ikdan To komon na pakpel pian makapanpulong nin siansia diad maingat ya paraan. (Gawa 5:29) Inistorya to: “Inebatan nen Jehova so pikakasik. Inikdan to ak na pakpel tan karunongan ya mangigapo na dakel ya Bible study ya tig-limaran minuto labat tan dia ed mismon puerta na bartolina. Insan no labi, manggawa ak na sulat ya iter kod saramay akabartolina diad ontumbok ya agew.” Aligen tayoy Jin-hyuk. Ipikasi tayod si Jehova ya ikdan to tayoy pakpel tan karunongan. Seguradon tulongan itayo nen Jehova pian nagawaan tayoy ministeryo tayo.

14. Antoy gawaen tayo no napro-problema tayo? (Salmo 37:3, 5)

¹⁴ Ipikasim ed si Jehova ya tulongan to ka ed saray problemam. Dakel ed sikatayo so ondadalan ed mairap iran situasyon. Singa bilang, ompan walay graben sakit tayo, nadi-depress tayo, inateyan itayo na kapamilya o kaaro, walay problema tayod pamilya, kokontraen na arum so panagdayew tayod si Jehova, tan arum ni. Anta wala la ray ontan ya problema, insan onarum ni pandemic tan guerra, doble-doble laingen so irap! No napro-problema ka, ibagam ed si Jehova so amin ya walad pusom. Mitongtong kad sikato ya singa ka mitotongtong ed best friend mo. Manmatalek ka  ya “sikatoy onkiwas parad sika.”​—Basaen so Salmo 37:3, 5.

15. Akin et makatulong so pikakasi pian naanosan o ‘nasungdoan tayoy kairapan’? Mangiter na alimbawa.

¹⁵ No ondadalan tayod problema, ‘seetan tayoy manpikasi’ ta makatulong itan pian naanosan o ‘nasungdoan tayoy kairapan.’ (Roma 12:12) Amta nen Jehova iray dadalanen na saray lingkor to, tan “dedengelen to so ikekerew day tulong.” (Sal. 145:18, 19) Apatunayan itan nen Sister Kristie, sakey ya payunir ya 29 so taon to. Bigla labat ya a-diagnose ya wala ray graben sakit to. Agto itan inilaloan kanian a-depress. Ag-abayag, a-diagnose met ya walay graben sakit nen nanay to ya agla natambal. Oniay imbaga nen Kristie: “Pikasi ak lan pikasi ed si Aman Jehova ya ikdan to ak na biskeg pian nasarag koy kada agew. Anggano mairap, pipiliten koy miaral tan man-personal study pian agko napaulyanan so espiritualidad ko.” Onia ni imbaga to: “Talagan balbaleg so nitulong na pikakasi, lalo la no magulogulo so isip ko. Amay amtak ya si Jehova et naynay ya wadtan, aman so mamapalemew na liknaan ko. Tua, abayag ni antis ya inmabig iray sakit ko. Pero akayak iman ta tinulongan ak nen Jehova pian ondeen so nonot ko tan kalmado ak labat. Aman so ebat to ed saray pikakasik.” On, agtayon balot lilingwanan ya “amta nen Jehova no panon ya iliktar ed subok iray totoon walaan na debosyon ed [sikato].”​—2 Ped. 2:9.

16. Akin et kaukolan tayoy tulong nen Jehova pian nalabanan tayoy tukso?

¹⁶ Ipikasim ed si Jehova ya tulongan to ka ya nalabanan moy tukso. Lapud agtayo perpekto, mainomay itayon natukso ya manggaway aliwa. Kanian dapat et lanang tayon akaparaan ya labanan so tukso. Mamapasyay Satanas tan dakel so uusaren ton paraan pian natukso tayo. Say sakey ya uusaren to pian nadutakan so isip tayo et saray imoral tan malaswan libangan. No akaloob lad isip  tayo iray marutak ya bagay, naapektoan met lay puso tayo ya anggad makagawa tayo lay seryoson kasalanan.​—Mar. 7:21-23; Sant. 1:14, 15.

17. No ipipikasi tayo ya nalabanan tayo komon so tukso, anto met dapat so gawaen tayo? (Nengnengen met so litrato.)

¹⁷ Agtayo nalabanan so tukso no anggapoy tulong nen Jehova. Atan so rason no akin ya impila itan nen Jesus ed samay pangaligan ya pikakasi ya imbangat to. Kuan tod Ama to: “Agmo aabuloyan a napelag kami ed tukso, noagta iliktar mo kami ed samay mauges.” (Mat. 6:13) Labalabay itayon tulongan nen Jehova, pero dapat nanengneng to ya labalabay tayo met so patulongan ed sikato. Kanian espisipiko tayon ipikasi ya tulongan to tayon nalabanan so tukso. Tan siempre, onkilos tayo met. Iwasan tayo iray bagay o situasyon ya iyasingger da itayo ed tukso. Agtayo manbabasa, ondedengel, tan manbabantay na anggan anto ya mandutak ed isip tayo tan mantukso ed sikatayon manggawa na aliwa. (Sal. 97:10) Manbasa tayoy Biblia tan man-personal study tayo pian napano so isip tayo na espiritual iran bagay. Naprotektaan met so nonot tayo no lanang tayon miaral tan manpulong. No gawaen tayo iratan ya amin, im-promise nen Jehova ya ‘agto abuloyan a nipaarap tayod tukso ya agtayo nayarian.’​—1 Cor. 10:12, 13.

18. No tungkol ed pikakasi, antoy nepeg ya gawaen tayon amin?

¹⁸ Diad sayan kaunoran iran agew, dakel ya subok so aarapen tayo. Pian makapanmatoor tayo ed si Jehova, dapat mas mapikasi tayo. Kanian kada agew, wala komoy eskedyul mon manpikasi ya impapuso ed si Aman Jehova. ‘Ibalikas mod sikato so amin a walad pusom’ lapud atan so labay to. (Sal. 62:8) Irayew tan pisalamatan mo ed amin ya gagawaen to. Ipikasim ya ikdan to kay pakpel ya manpulong. Agka onsasawa ya onkerew na tulong ed sikato pian nasarag mo ray problemam tan nalabanan moy tukso. Agka komon ompapayag ya walay makasagabal ed eskedyul mon mitongtong ed si Jehova. Pero, panon ya eebatan nen Jehova iray pikakasi tayo? Atan so pantongtongan tayo diad onsublay ya artikulo.