1-2. No pikakasi so pantongtongan, anto ray nitepet tayo?

 ASALIM la ya walay ipipikasim pero pakaliknam et singa ag-eebatan nen Jehova? Agmo bukbukor so makakaliknay ontan. Alikna met itan na arum ya agagi, lalo la nen dinmalan irad mairap ya subok. Normal met labat itan. Siempre, no say sakey et ondadalan ed mairap ya situasyon, ompan agton tampol nalikas so ebat nen Jehova ed pikakasi to.

² Pantongtongan tayo sirin no akin ya segurado tayon eebatan nen Jehova iray pikakasi na saray lingkor to. (1 Juan 5:15) Tan pantongtongan tayo met irayan tepet: Akin kasi ya no maminsan et singa ag-eebatan nen Jehova iray pikakasi tayo? Panon ya eebatan nen Jehova iray pikakasi tayo natan?

3. Akin et labay nen Jehova ya manpikasi tayod sikato?

³ Ibabaga na Biblia ya inar-aro itayo nen Jehova tan mabmabli tayo ed sikato. (Ag. 2:7; 1 Juan 4:10) Kanian no ondadalan tayo ed subok, labay to ya manpatulong tayod sikato. (1 Ped. 5:6, 7) Labay to tayon tulongan pian nalampasan tayo iratan tan pian agnaapektoan so relasyon tayod sikato.

4. Panon tayon amta ya eebatan nen Jehova so pikakasi na saray lingkor to? (Nengnengen met so litrato.)

⁴ Dakel so nabasa tayod Biblia ya inebatan nen Jehova iray pikakasi na saray lingkor to. Seguro, say nanonotan mon tampol et si Arin David. Nen aminpigan apeligro so bilay to lapud tutugisen na saray kalaban, si Jehova so lanang ton kekerewan na tulong. Aminsan, oniay impikasi to: “O Jehova, dengel mo pay pikakasik; dengel mo pay ikekerew koy tulong.  Ebatan mo ak komon unong ed inkamatoor tan inkatunong mo.” (Sal. 143:1) Inebatan nen Jehova so pikakasi nen David tan inligtas to. (1 Sam. 19:10, 18-20; 2 Sam. 5:17-25) Talagan alikna nen David so tulong nen Jehova kanian imbaga to: “Si Jehova et asingger ed amin ya ontatawag ed sikato.” Singa si David, makapantiwala tayo met ya ebatan nen Jehova iray pikakasi tayo.​—Sal. 145:18.

5. Nensaman, kasin lanang ya eebatan nen Jehova so pikakasi na saray lingkor to diad paraan ya labay da? Mangiter na alimbawa. (Nengnengen met so litrato.)

⁵ No maminsan, say ebat nen Jehova ed pikakasi tayo et aliwan samay labay tayon nagawa. Asali itan nen apostol Pablo. Sikatoy amitlon akikasi ya ekalen la komon nen Jehova so “sakey a sabit ed laman” to. Kasin inebatan nen Jehova itan ya espisipikon pikakasi nen Pablo? On, pero dumay ebat nen Jehova. Ag-inekal nen Jehova so problema to, pero inikdan To na biskeg pian tuloytuloy ya makapanlingkor.​—2 Cor. 12:7-10.

6. Akin ya no maminsan et singa ag-eebatan nen Jehova iray pikakasi tayo?

⁶ Singa si Pablo, ompan wala ray panaon ya say ebat nen Jehova ed saray pikakasi tayo et duma ed labay tayon nagawa. Tandaan tayo ya amta nen Jehova no antoy sankaabigan parad sikatayo. Diad tua, “sarasarag ton gawaen so mas ni nen say amin a bengatlan kekerewen odino iisipen tayo.” (Efe. 3:20) Kanian no maminsan, say timing tan say mismon ebat to ed pikakasi tayo et amay agtayo iilaloan.

7. Akin et wala ray pagkakataon ya kaukolan tayon umanen so ipipikasi tayo? Mangiter na alimbawa.

⁷ No natebek o na-realize tayo ya walay arum ya labay nen Jehova ya gawaen tayo, ompan kaukolan tayon umanen so ipipikasi tayo. Asali itan nen Brother Martin Poetzinger. Nen kakkapankasal da nen Sister Gertrude, apriso si Brother Martin diad Nazi concentration camp. Impikasi to ya nibulos la komon pian nakaiba toy misis to tan makapanpulong lamet. Pero kayari duay simba, anggapo nin siansiay nanengneng to ya palatandaan ya labay nen Jehova ya sikatoy nibulos la. Kanian oniay impikasi to: “Jehova, ipanengneng mo pad siak no antoy labay mon gawaen ko.” Inisip nen Brother Martin no antoy dadalanen na saray brother ya kaiba to ed concentration camp. Aburido met irad asawa tan ananak da. Nen a-realize to itan, oniay impikasi to: “Aman Jehova, salamat ed sayay balon asainmin ko. Tulongan mo ak sirin pian napabiskeg tan napaseseg ko ray agagi.”  Siameran taon ya ontan so ginawa to diad loob na kampo.

8. Antoy importantin tandaan tayo no manpipikasi tayo?

⁸ Tandaan tayo ya wala lay inyeskedyul nen Jehova no kapigan to sumpalen so gagala to. Onsabi panaon ya permanente to lan ekalen so amin ya problema tayo—singa say kalamidad, sakit, tan patey. Usaren to so Panarian to pian nasumpal so gagala to. (Dan. 2:44; Apo. 21:3, 4) Pero anggad agni itan sinmabi, aabuloyan ni nen Jehova si Satanas ya uleyan o kontrolen so mundo. b (Juan 12:31; Apo. 12:9) No solusyonan la nen Jehova so amin ya problema tayo natan, ompaway laingen ya marakep so uley nen Satanas. Tandaan tayo sirin ya aliwa nin saya so panaon ya gawaen nen Jehova so amin ya im-promise to. Pero legan tayon manaalagar, tulongan to tayo ed saray problema tayo. Pantongtongan tayo sirin so pigaran paraan ya tutulongan itayo nen Jehova.

9. Panon itayon tutulongan nen Jehova no walay kailangan tayon desisyonan? Mangiter na alimbawa.

⁹ Ikdan to tayoy karunongan. Labay nen Jehova ya duga iray desisyon tayo, kanian im-promise to ya ikdan to tayoy karunongan no mandedesisyon tayo. Kaukolan tayoy karunongan lalo la no say gawaen tayon desisyon et apektoen toy interon bilay tayo. (Sant. 1:5) Singa bilang, ompan iisipen na sakey ya agi no kasin mansiansian single odino mangasawa o miasawa. Imanoen so eksperiensya na sakey ya marikit ya malikeliket ed pampapayunir to, si Sister Maria. c Walay akabat nen Maria ya brother. Oniay istorya to: “Nagmaliw kamin sankaaro. Nen lalo min akabat so sakey tan sakey, a-develop kami. Pero antis ak ya mandesisyon, impikasik itan ya maong ed si Jehova. Labay ko ya igiya to ak, pero amtak met ya agto ak idesisyonan.” Antoy ebat nen Jehova ed pikakasi to? Imbaga nen Maria ya sikatoy inikdan nen Jehova na karunongan. Panon? Nen nan-research si Maria ed saray publikasyon tayo, akalmo na saray artikulo ya dugaruga ed situasyon to. Dinengel to met so advice nen nanay to, ya sakey ya maespiritual ya sister. Akatulong itan ya advice pian nausisa ton maong so liknaan to. On, nampaigiya si Maria ed si Jehova tan dinmengel ed advice kanian akapandesisyon na duga.

10. Base ed Filipos 4:13, antoy gawaen nen Jehova pian natulongan to ray lingkor to? Mangiter na alimbawa. (Nengnengen met so litrato.)

¹⁰ Ikdan to tayoy biskeg pian makapan-anos tayo. Singa si apostol Pablo, ikdan itayo met nen Jehova na biskeg ya kaukolan tayo pian naanosan tayo ray subok. (Basaen so Filipos 4:13.) Naeksperiensya itan nen Brother Benjamin.  Nen kabataan ni si Benjamin, sikato tan say pamilya to et nanayam ed nanduruman refugee camp diad Africa. Oniay imbaga to: “Lanang kon ipipikasi ed si Jehova ya ikdan to ak komon na biskeg pian makapanmatoor ak tan nagawaan ko no antoy makapaliket ed sikato.” Panon ya inebatan nen Jehova so pikakasi to? Imbaga to: “Inikdan to ak na deen na nonot. Inikdan to ak met na pakpel pian agak natatakot ya manpulong, tan walan-walay nanaawat kon publikasyon kanian agkinmapuy so espiritualidad ko. No nababasak so eksperiensya na arum ya agagi tan no panon iran tinulongan nen Jehova, lalon ombibiskeg so determinasyon ko ya manmatoor.”

11-12. Panon ya uusaren nen Jehova so espiritual ya pamilya tayo pian ebatan iray pikakasi tayo? (Nengnengen met so litrato.)

¹¹ Usaren toy espiritual ya pamilya tayo. Diad samay labi antis ya iyapay nen Jesus so bilay to, aminpigan nampikasi ya impapuso. Sankanonot toy akusasyon ed sikato ya anggapo kunoy respeto tod Dios, tan inisip to ya mangiter itan na kababaingan ed Ama to. Kanian akikasi ed si Jehova ya aliwan ontan komon so ipatey to. Pero dumay ebat nen Jehova. Sikatoy angibaki na anghel ya manpabiskeg ed si Jesus. (Luc. 22:42, 43) Diad panaon tayo, ompan pakilosen nen Jehova so sakey ya agi ya ontawag o ompasyar ed sikatayo pian napaseseg itayo. Anggan siopa ed sikatayo et sarag ya usaren nen Jehova. Kanian komon ta alisto tayon manpaseseg ed saray agagi. Agtayo papalampasen so kada pagkakataon ya napabiskeg tayo ra.​—Pro. 12:25.

¹² Makaaral tayod eksperiensya nen Sister Miriam. Pigaran simba ni labat so linmabas kayari na impatey na asawa to, bigla labat kuno ya akalikna na graben ermen, tan akis lan akis. Anggapoy kaiba tod abung kanian anggapoy nakatongtong to. Imbaga to: “Labay ko komon ya tawagan iray kakaarok pero makapkapuy ak. Kanian nampikasi ak la ed si Jehova. Peles ak nin onaakis tan manpipikasi, insan biglan nan-ring so telepono.” Sikatoy tinawagan na elder tan say asawa to. Linmemew so liknaan nen Miriam ed impitongtong tod sikara. Kombinsido si Miriam ya pinakilos ira nen Jehova ya ontawag ed sikato.

13. Mangiter na alimbawa ya inusar nen Jehova so sakey ya agmandadayew ed sikato pian ebatan so pikakasi na lingkor to.

 ¹³ Sarag ton usaren iray agmandadayew ed sikato. (Pro. 21:1) No maminsan, anggan saray agmandadayew ed si Jehova et pakilosen to pian natulongan iray lingkor to. Singa bilang, pinakilos toy Arin Artaxerxes ya payagan si Nehemias ya ompawil ed Jerusalem pian makatulong ed pangipaalagey lamet ed syudad. (Neh. 2:3-6) Diad panaon tayo, sarag met ya pakilosen nen Jehova ya ontulong ed sikatayo iramay agmandadayew ed sikato.

14. Akin et makapabiskeg so eksperiensya nen Sister Soo Hing? (Nengnengen met so litrato.)

¹⁴ Imanoen so eksperiensya nen Sister Soo Hing. Agto nalinglingwanan imay agawad bilay to nen inusar nen Jehova so sakey ya doktor ya ontulong ed pamilya to. Say anak nen Soo Hing et a-diagnose ya walay nanduruman mental disorder to nen ugaw ni. Kalabas na pigaran taon, linmoor so situasyon nen naaksidente iyan anak to. Nan-resign ed trabaho si Soo Hing tan si asawa to pian naasikaso da. Kanian namproblema irad pinansyal. Imbaga nen Soo Hing ya ngalngali la ombigay, singa kuno lastiko ya apinat ya maong tan magano lan napultot. Imbaga tod si Jehova so amin ya pampapagaan to tan kinmerew na tulong. Walay doktor ya nanmalasakit ed sikara nen naamtaan toy situasyon da. Lapud tulong to, akaawat iray benepisyo manlapud gobierno, tan akalmo iray panayaman ya mamura labat so renta. Oniay imbaga nen Soo Hing: “Anengneng mi so lima nen Jehova. Amtak ya sikato so nanggaway paraan. Talagan ‘Dumerengel na pikakasi.’”​—Sal. 65:2.

15. Antoy akatulong ed sakey ya sister pian nalikas toy ebat nen Jehova ed saray pikakasi to?

¹⁵ Aliwan lanang ya makapakelkelaw tan ekstraordinaryo so ebat nen Jehova ed saray pikakasi tayo. Pero say segurado, say iter ton ebat et no anto may kailangan tayo pian makapanmatoor tayod sikato. Kanian maabig no alerto tan malikas tayo ed saray ebat nen Jehova ed pikakasi tayo. Imanoen so eksperiensya nen Sister Yoko. Say pakalikna to et ag-eebatan nen Jehova iray pikakasi to. Naisip to ya ilista ed notebook iray kerew to ed si Jehova. Kalabas na panaon, pinawil to iramay insulat tod notebook tan a-realize to ya inebatan nen Jehova so halos amin ya pikakasi to, anggan saramay alingwanan to la. On, maabig  no sagpaminsan et ontunda tayon magano tan isipen tayo no panon ya eebatan nen Jehova iray pikakasi tayo.​—Sal. 66:19, 20.

16. No walay impikasi tayod si Jehova, panon tayon nipanengneng so pananisia tayod sikato? (Hebreo 11:6)

¹⁶ Say pampikasi ed si Jehova et pakapatnagan la ya walay pananisia tayod sikato. Pero kailangan met so pananisia pian tanggapen tayo so antokaman ya ebat to ed pikakasi tayo. (Basaen so Hebreo 11:6.) Imanoen so eksperiensya nen Mike tan Chrissy. Say goal dan sanasawa et manlingkor ed Bethel. Oniay imbaga nen Mike: “Aminpiga kamin nan-apply ya sanasawa tan lanang min ipipila ed pikakasi mi iyan goal mi. Pero agkamin balot atawag ed Bethel.” Anggaman ontan, baleg so tiwala nen Mike tan Chrissy ya amta nen Jehova no iner ira mas nausar. Kanian inter da nin siansia so ‘the best’ da ed sikato. Nampayunir ira diad lugar ya daiset so Tasi tan namboluntaryo ira ed saray construction project na organisasyon. Tan natan et manlilingkor la rad sirkito. Oniay a-realize nen Mike: “No maminsan, say ebat nen Jehova ed saray pikakasi mi et aliwan samay labay mi, pero say importante et inebatan to iratan. Diad tua, amay paraan na impan-ebat to et agmin balot naimadyin!”

17-18. Base ed Salmo 86:6, 7, makapantiwala tayo ed anto?

¹⁷ Basaen so Salmo 86:6, 7. Segurado si David ya dedengelen tan eebatan nen Jehova iray pikakasi to. Komon ta ontan met kabiskeg so tiwalam ed si Jehova! Anengneng tayo ed saray alimbawa ed sayan artikulo ya sarag itayon ikdan nen Jehova na karunongan tan biskeg pian makapan-anos tayo. Sarag ton pakilosen ya ontulong ed sikatayo iray agagi tan anggan saray agto lingkor.

¹⁸ Tua, say ebat nen Jehova ed saray pikakasi tayo et aliwan lanang ya samay labay tayo, pero segurado tayo ya ebatan to iratan. Iter to no antoy kailangan tayo tan no kapigan tayo itan kailangan. Kanian agka komon onsasawa ya manpikasi, tan mantiwala ka ya dedengelen ka nen Jehova. Tandaan mo ya diad sayan kaunoran iran agew, agto kan balot paulyanan. Tan diad balon mundo, makapantiwala ka ya iter toy “pirawat na balang mabilay a bengatla.”​—Sal. 145:16.