1, 2. Akin ya importante so panamaseseg?

“AGAK balot papasesegen na atateng ko, lanang da ak ya babalawen. Ansakisakit so panagsalita ra,” so kuan nen Cristina ya mantaon na 18. ^[1] “Ibabaga dan immature ak, agak onkakalakal, tan tabareg ak. Kanian lanang ak ya onaakis tan agko labay so mitongtong ed sikara. Pakaliknak et anggapoy kanak.” Talagan makapadismaya no anggapoy mamaseseg ed sika!

² Duma balet so nalikna no walay mamaseseg. “Pigay taon kon nilabanan so liknaan ya anggapoy kanak,” so kuan nen Rubén. “Pero aminsan, kaibak ya manpupulong so sakey ya elder tan naimano ton maermen ak. Masimpatyan dinmengel nen ibabalikas koy naliliknak. Insan to impanonot iray maong ya nagagawaan ko. Impanonot to met ed siak imay imbaga nen Jesus ya mas mabli itayo nen say dakel ya anuyaw. Lanang kon nononoten iman ya teksto, tan siansia nin napapaseseg ak. Talagan apabiskeg ak ed saman ya imbaga na elder.”—Mat. 10:31.

3. (a) Antoy imbaga nen apostol Pablo nipaakar ed panamaseseg? (b) Antoy aralen tayo ed sayan artikulo?

 ³ Agtayo pankelawan ya indanet na Biblia so regular ya pamaseseg ed arum. Oniay insulat nen apostol Pablo ed saray Hebreon Kristiano: “Manalwar kayo, agagi, ompan walad sikayo so nawalaay mauges a puso ya andiay pananisia diad iyaarawi tod mabilay a Dios; balet itultuloy yon pasesegen so sakey tan sakey diad kada agew, . . . pian anggapod sikayoy magmaliw ya anawet so puso to lapud mapalikdon pakayari na kasalanan.” (Heb. 3:12, 13) No asalim lay apaseseg, antam so kaimportantian na satan. Kanian pantongtongan tayo irayan tepet: Akin ya importante so panamaseseg? Antoy naaralan tayod paraan na impamaseseg nen Jehova, Jesus, tan Pablo? Tan panon itayon makapangiter na epektibon panamaseseg?

4. Siopa ray mankaukolan na panamaseseg, tan akin ya mataltalag la itan natan?

⁴ Kaukolan tayon amin so panamaseseg, lalo la no ugaw tayo ni. “Kaukolan na ugugaw . . . so panamaseseg a singa tanaman ya kaukolan a salogen,” so impaliwawa na managbangat ya si Timothy Evans. “No napapaseseg so sakey ya ugaw, nalikna ton walay maong ya nagagawaan to tan naaapresya.” Balet manbibilay tayod panaon ya mair-irap. Saray totoo et makasarili ra, anggapoy panangaro ra, tan agda amtay mamaseseg. (2 Tim. 3:1-5) Wala ray ateng ya agda kokomendaan iray anak da ta agda asali so pinaseseg na mismon atateng da. Dakel so empleyadon agnakokomendaan, kanian manrereklamo ra lapud singa agnaaapresyay trabaho da.

5. Antoy kaibad panamaseseg?

⁵ Mabetbet ya kaibad panamaseseg so pangiter na komendasyon ed sakey lapud maong ya agawaan to. Napaseseg tayo met so arum no ibaga tayod sikara iray maong ya ugali da odino no ‘ligliwaen tayo iramay nadidismaya.’ (1 Tes. 5:14, paimanod leksab) Say Griegon salita a kaslakan ya ipapatalos ya “panamaseseg” et literal a mankabaliksay “tawagen mod abay mo so sakey.” Diad panlilingkor tayo kaiba iray agagi, wala ray pankanawnawa tayon mangibaga na makapaseseg. (Basaen so Eclesiastes 4:9, 10.) Kasin manaanap tayoy matukoy ya pankanawnawan ibagad arum no akin ya inaro tan aapresyaen tayo ra? Antis tayon ebatan itan ya tepet, makatulong no isipen tayon maong iyan proverbio: “Say salitan imbalikas ed dugan panaon et alay abig!”—Pro. 15:23.

6. Akin et labay na Diablo ya dismayaen itayo? Mangiter na alimbawa.

⁶ Labay nen Satanas a Diablo ya dismayaen itayo lapud amta to ya no nadismaya tayo et onkapuy so espiritualidad tayo, pati say emosyon tan laman tayo. Ibabaga na Proverbio 24:10: “No onkapuy so liknaan mo diad agew na kairapan, say biskeg mo et onkulang.” Pinambansag nen Satanas iray kalamidad tan akusasyon pian dismayaey matunong ya Job, balet ag-apakapuy na saratan so pananisia to. (Job 2:3; 22:3; 27:5) Ontan met natan, nalabanan tayo ray pakana na Diablo no pasesegen tayoy pamilya tayo tan saray agagid kongregasyon. Diad ontan et magmaliw ya maliket tan maligen ya pasen so abung tayo tan say Kingdom Hall.

7, 8. (a) Anto ran alimbawa ed Biblia so mangipapanengneng ya importante ed si Jehova so pangiter na panamaseseg? (b) Panon ya naalig na saray atateng so alimbawa nen Jehova? (Nengnengen so litratod gapo na artikulo.)

⁷ Jehova. Inkansion na salmista: “Si Jehova et asingger ed samay asugatay puso  to; ililiktar to iramay nadidismaya.” (Sal. 34:18, paimanod leksab) Nen natatakot tan adismaya si Jeremias, pinabiskeg nen Jehova so kompiyansa na sayan matoor ya propeta. (Jer. 1:6-10) Tan imadyin mo pay imbiskeg na masiken lan propetan Daniel nen angibaki so Dios na anghel ya mamaseseg ed sikato. Say impanawag na satan ya anghel ed si Daniel et “pinabpabli” o “nirayrayew” a too! (Dan. 10:8, 11, 18, 19; paimanod leksab) Sarag mo met kasin pasesegen iray manangipalapag, payunir, tan saray onkakapuy ya maedad lan agagi?

⁸ Ag-impasen na Dios ya lapud abayag iran saniba na inad-aro ton Anak et agla kaukolan nen Jesus so komendasyon tan panamaseseg nen sikatoy wadiad dalin. Diad tua, amiduan nadngel nen Jesus iyan imbaga nen Ama to manlapud tawen: “Saya so Ana’ko, say inad-arok, ya inabobonan ko.” (Mat. 3:17; 17:5) Malinew ya kinomendaan na Dios si Jesus tan pinaseguroan Ton dugay gagawaen to. Seguradon apaseseg ya maong si Jesus nen amidua ton nadngel iratan—diad kagapo na ministeryo to tan diad sampot ya taon na impanbilay to ed dalin. Angibaki met si Jehova na anghel ya mamaseseg ed si Jesus nen nagogonigon a maong diad samay labi antis na ipatey to. (Luc. 22:43) No sakey kan ateng, alig moy alimbawa nen Jehova. Paseseg mon lanang iray anak mo tan komendaan mo ra no walay maong ya agawaan da. Suportaan mo met ira no wala ray subok ya aarapen dad eskuelaan.

9. Antoy naaralan tayod impantrato nen Jesus ed saray apostol to?

⁹ Jesus. Diad samay labi ya inggapo nen Jesus so Memoryal, naimano to ya mapaatagey iray apostol to. Mapaabeban inurasan nen Jesus iray sali da, balet siansian nansasangsangan da no siopad sikaray manunaan; tan sobray talek nen Pedro ed sarili to. (Luc. 22:24, 33, 34) Balet, kinomendaan nen Jesus iray matoor ya apostol to lapud sikatoy agda tinaynan legan ya nasusubok. Imbaga to ya manggawa ray kimey a mas baleg nen saray agawaan to, tan impaseguro tod sikara ya inaro ira na Dios. (Luc. 22:28; Juan 14:12; 16:27) Sarag tayon itepet ed sarili tayo, ‘Agta nepeg kon aligen si Jesus tan komendaan ko ray anak ko tan arum ni no wala ray maong ya nagagawaan da imbes ya say imanoen ko et saray lingo ra?’

10, 11. Panon ya impanengneng nen apostol Pablo ya kaukolan a pasesegen so arum?

¹⁰ Apostol Pablo. Diad saray sulat nen apostol Pablo, positibo so imbaga to nipaakar ed saray agagi. Pigay taon ton kaiban nambiahe so arum ed sikara tan seguradon amta toy kakapuyan da, balet positibo so imbaga to nipaakar ed sikara. Singa bilang, deniskribe nen Pablo si Timoteo bilang “inad-arok tan matoor ya ana’ko ed Katawan,” tan maasikaso ed saray kapara ton Kristiano. (1 Cor. 4:17; Fil. 2:19, 20) Kinomendaan nen apostol Pablo si Tito diad kongregasyon na Corinto ya imbaga ton, “sikatoy kaibak tan kakimeyan ko parad pankaabigan yo.” (2 Cor. 8:23) Seguradon apaseseg si Timoteo tan Tito nen naamtaan day imbaga nen Pablo nipaakar ed sikara!

¹¹ Inrisga nen Pablo tan Bernabe so bilay da nen pinmawil irad saray lugar ya grabe so impamairap ed sikara. Singa bilang, anggano wala ray panatikon onsusumpa ed Listra, pinmawil ni ran siansia ditan pian pasesegen iray balon disipulo ya mansiansian matoor. (Gawa 14:19-22) Diad Efeso, walay grupo na masesebeg ya totoon akaarap nen Pablo. Oniay imbaga na Gawa 20:1, 2: “Sanen tinmunda lay gulo, impatawag nen Pablo iray disipulo, tan sanen apaseseg to la ra tan akapampatanir la, sikatoy nambiahen paarap ed Macedonia. Kayari ton niliber iraman a rehyon tan pinaseseg iray disipulo diman diad panamegley na dakel ya imbalikas to, sikatoy akasabid Gresya.” On,  importantin maong ed si Pablo so pamaseseg ed arum.

12. Diad saray pantitipon, panon itayon makapangiter tan makaawat na panamaseseg?

¹² Say sakey a rason no akin ya inyuksoy nen Jehova iray regular ya pantitipon et pian makapangiter tan makaawat tayoy panamaseseg. (Basaen so Hebreo 10:24, 25.) Singa saray papatumbok nen Jesus nensaman, mantitipon tayo pian makaaral tan makapanpapasesegan. (1 Cor. 14:31) Oniay imbaga nen Cristina ya abitlad gapo: “Say labalabay kod saray aral et say panangaro tan panamaseseg dad siak. No maminsan et nadi-depress ak kasabik ed Kingdom Hall. Balet aasinggeran ak na saray sister, lakapen da ak, tan ibabaga dan magana ak. Ibabaga dan inaro da ak tan naliliketan irad iyaaligwas kod espiritual. Onlelemew so liknaan ko lapud panamaseseg da!” Talagan makapalikliket no amin tayo et gawaen tayoy betang tayo pian “makapanpapasesegan”!—Roma 1:11, 12.

13. Akin ya kaukolan na saray eksperiensyadon lingkor na Dios so panamaseseg?

¹³ Anggan saray eksperiensyadon lingkor na Dios et kaukolan day panamaseseg. Imanoen pay Josue. Anggan abayag lan matoor ya manlilingkor, siansian ingganggan na Dios si Moises ya mamaseseg ed sikato: “Turom si Josue tan paseseg mo tan pabiskeg mo, ta sikato so ombaliw diad unaan na sarayan totoo tan diad panamegley to et natawir da so dalin a nabantag mo.” (Deu. 3:27, 28) Baleg so responsabilidad nen Josue ta sikato so mangidaulo ed saray Israelita ya onloob ed Insipan a Dalin. Dakel so arapen ton problema tan natalo ya maminsan ed guerra. (Jos. 7:1-9) Talagan kaukolan nen Josue so panamaseseg tan panamabiskeg! Maong sirin no personal tayon pasesegen iray elder, pati saray manangasikaso na sirkito, ya mansasagpot a maong pian naasikasoy pulok na Dios. (Basaen so 1 Tesalonica 5:12, 13.) “No maminsan, wala ray agagi ya mangiter na thank you letter tan ibabaga ra ya na-enjoy day imbisita mi,” so inkuan na sakey ya manangasikaso na sirkito. “Isisinop mi iraman ya sulat tan babasaen mi no naeermenan kami. Talagan makapaseseg iraman.”

14. Antoy mangipapanengneng ya epektibo so pangiter na komendasyon tan panamaseseg no manisimbawa itayo?

¹⁴ Apruebaan na saray elder tan atateng ya epektibo so pangiter na komendasyon pian nipurek so simbawa na Biblia. Nen kinomendaan nen Pablo iray taga Corinto lapud inunor day simbawa to, seguradon apaseseg iran itultuloy ya gawaen so duga. (2 Cor. 7:8-11) Oniay imbaga nen Andreas ya walay duaran anak to: “Makatulong so  panamaseseg ed ananak pian onaligwas irad espiritual tan magmaliw ya balanse so emosyon da. Nipurek moy simbawa no pasesegen mo ra. Anggano amta na saray anak mi no antoy duga, nagmaliw ya parte na bilay da so panggawa na duga lapud tuloytuloy ya panamaseseg mi.”

15. Anto so sakey a paraan ya napaseseg tayoy arum?

¹⁵ Apresyaen so pansasagpot tan positibon kualidad na saray agagi. (2 Awa. 16:9; Job 1:8) Aapresyaen a maong nen Jehova tan Jesus iray nagagawaan tayo pian suportaan so Panarian, anggano limitado so niiter tayo lapud saray sirkumstansya tayo. (Basaen so Lucas 21:1-4; 2 Corinto 8:12.) Singa bilang, mansasagpot ya maong iray pinabpabli tayon maedad lan agagi pian makaatendi tan makapankomento ed saray aral tan makapanpulong ya regular. Agta dapat labat ya komendaan tan pasesegen tayo ra?

16. Akin et nepeg tayon ibalikas so panamaseseg tayod arum?

¹⁶ Mananap na pankanawnawan pasesegen so arum. No walay naimanom ya balibalin agawaan na arum, agta maong no komendaan mo ra? Imanoen so agawad si Pablo tan Bernabe nen wala rad Antioquia na Pisidia. Oniay imbaga na saray manangasikaso na sinagoga: “Agagi, no walaan kayoy antokaman a salitan makapaseseg ed saray totoo, ibaga yo.” Kanian angiter si Pablo na makapabiskeg ya paliwawa. (Gawa 13:13-16, 42-44) No walay pankanawnawa tayon mamaseseg, agta maabig no ibalikas tayo itan? Tandaan ya no niyugali tayoy mamaseseg, pasesegen itayo met na arum.—Luc. 6:38.

17. Antoy gawaen tayo pian mas epektiboy komendasyon tayo?

¹⁷ Sinsero tan espisipiko. Makatulong so pangibaga na panamaseseg tan komendasyon, balet diad samay mensahe nen Jesus ed saray Kristiano diad Tiatira, mas maong no espisipiko tayo. (Basaen so Apocalipsis 2:18, 19.) Singa bilang, no sakey tayon ateng, sarag tayon ibagad saray anak tayo no antoy nanenengneng tayon iyaaligwas dad espiritual. Sarag tayo met ya ibagad mansusulon ateng no antoy naaapresya tayod paraan na pangaasikaso tod ananak to anggano mairap. Baleg so nitulong na ontan ya komendasyon tan panamaseseg!

18, 19. Panon tayon napabiskeg iramay mankaukolan na panamaseseg?

¹⁸ Agpersonal ya ibaga nen Jehova ed sikatayo ya pasesegen tayo ray agagi a singa samay ingganggan tod si Moises ya pasesegen tan pabiskegen toy Josue. Balet, naliliketan so Dios no pasesegen tayo ray agagi tan arum ni. (Pro. 19:17; Heb. 12:12) Singa bilang, sarag mon ibaga ed espiker ya dugarugad situasyon mo imay simbawa to odino akatulong itan pian natalosan moy sakey a teksto. “Anggano pigaran minuto kayo labat ya nampaliwawa,” so insulat na sakey a sister ed bisitan espiker, “naimano yoy maermen a pusok, tan niligliwa tan pinabiskeg yo ak. Labay kon ipaamtad sikayo ya lapud maaron panagsalita yo, balanglan wala kayod stage o diad personal, pakaliknak et regalo itan nen Jehova.”

¹⁹ Seguradon dakel so paraan pian napaseseg tayod espiritual iray arum no determinado tayon iyaplika iyan simbawa nen Pablo: “Itultuloy yon pasesegen tan pabiskegen so sakey tan sakey, a singa gagawaen yo la.” (1 Tes. 5:11) On, napaliket tayoy Jehova no ‘itultuloy tayon pasesegen so sakey tan sakey diad kada agew.’