1, 2. (a) Antoy sankamablian ya kayarian tayo? (b) Anto ray papablien tayon katuaan, tan akin? (Nengnengen so litratod gapo na artikulo.)

ANTOY sankamablian ya kayarian mo? Labay mo kasin isalat itan ed bengatlan mas abebay kantidad to? Parad saray dedikadon lingkor nen Jehova, mainomay labat iratan ya ebatan. Say sankamablian ya kayarian tayo et say relasyon tayod si Jehova, tan agtayo labay ya isalat itan ed anggan anton bengatla. Papablien tayo met so katuaan ya manlalapud Biblia, ya tinmulong ed sikatayon nawalaan na maapit ya relasyon ed Ama tayod tawen.​—Col. 1:9, 10.

² Isipen pa labat so amin ya ibabangat ed sikatayo na Makapadinayew a Managbangat tayo panamegley na Salita to, say Biblia! Ipapaamta to so katuaan nipaakar ed kabaliksan na ngaran to tan saray balibalin kualidad to. Ipapakabat tod sikatayo so nipaakar ed makapadinayew ya probisyon na dondon, ya maar-aro ton intarya parad sikatayo panamegley na Anak to, si Jesus. Ipapakabat met nen Jehova ed sikatayo so nipaakar ed Mesianikon Panarian, tan inter to ed saray alanaan so ilalo ya manbilay diad tawen tan ed saray ‘arum a karnero’ so ilalo ya manbilay diad Paraison dalin. (Juan 10:16) Ibabangat to itayo met no panon so nepeg tayon  pambilay. Papablien tayo iratan ya katuaan lapud ontutulong iratan ed sikatayo ya onapit ed Manamalsa tayo. Walay kabaliksan na bilay tayo lapud saratan.

3. Antoy aglabay ya ibaga na pangaliw ed katuaan?

³ Si Jehova et maiter ya Dios. Agto isisiblet so maabig ed saray manaanap na katuaan. Inter to ni ingen so bilay na inad-aro ton Anak bilang regalo. Seguradon agto kerewen ed sikatayo ya bayaran tayo na kuarta so katuaan. Diad tua, sanen say lakin manngaran na Simon et babayaran toy apostol Pedro na kuarta pian nawalaan met na autoridad ya mangiter na masanton espiritu, sikatoy binano nen Pedro, ya imbaga to: “Naderal komon so pilak mo a pati sika, lapud iisipen mo a nakayarian moy regalo na Dios diad panamegley na kuarta.” (Gawa 8:18-20) Anto sirin so labay ya ibaga na bilin na Dios ya “saliw moy katuaan”?

4. Diad sayan artikulo, antoy aralen tayo nipaakar ed katuaan?

⁴ Basaen so Proverbio 23:23. Kaukolan tayoy mansagpot pian naalmo tayoy katuaan ed Salita na Dios. Nepeg ya akaparaan tayon mansakripisyo pian naala itan. Singa imbaga na marunong ya nansulat na Proverbio, no ‘asaliw,’ odino wala lad sikatayo so “katuaan,” nepeg ya agtayo itan “ilalako,” odino ibabalang. Pantongtongan tayo no antoy labay ya ibaga na ‘saliwen’ so katuaan tan no antoy nayarin ibayar tayo parad satan, a singa panangibaga. Diad ontan et mas naapresya tayo so katuaan tan ombiskeg so determinasyon tayo ya agbalot itan ‘ilako.’ Nanengneng tayon sulit so pangaliw ed katuaan.

5, 6. (a) Akin ya agkaukolan so kuarta pian nasaliw so katuaan? Iyilustra. (b) Panon ya makagunggona ed sikatayo so katuaan?

⁵ Anggan say bengatlan libre et nayarin wala nin siansiay iter mon kasalat to. Say Hebreon salita ya impatalos ya “saliw” diad Proverbio 23:23 et mankabaliksan met na “gamoran.” Parehon ipapatnag na saratan ya salita a kaukolan so pansagpot odino nepeg ya walay isalat parad sakey a bengatla. Nayari tayon iyilustra so pangaliw ed katuaan diad onian paraan. Kunwari et naamtaan mon walay libren ponti diad sakey ya tindaan. Kasin bigla labat ya niwalad lamisaan tayo so ponti? Andi. Kaukolan ya mansagpot tayon onlad tindaan pian makala tayo. Kasin libre iray ponti? On, balet kaukolan tayoy mansagpot tan ipanaon so onlad tindaan. Mipadpara, agkaukolan so kuarta pian nasaliw so katuaan. Balet kaukolan tayoy mansagpot pian naala itan.

⁶ Basaen so Isaias 55:1-3. Makatulong so imbaga nen Jehova ya insulat nen Isaias pian natalosan tayo so labay ya ibaga na pangaliw ed katuaan. Diad sayan teksto, inkompara nen Jehova so salita to ed danum, gatas, tan alak. No panon ya makaparepresko so iyinum na ambetel tan malinis ya danum, makaparepresko met ed sikatayo so katuaan. Mipadpara, no panon ya say gatas et makatulong pian ombiskeg itayo tan ombaleg iray ugugaw, say salita nen Jehova et makatulong met pian ombiskeg tan ombaleg itayo ed espiritual. Say salita nen Jehova et singa met alak. Diad anton paraan? Diad Biblia, say alak et mikonektaan ed panliket. (Sal. 104:15) Kanian sanen imbaga nen Jehova ed totoo to ya “mangaliw kayoy alak,” ipapaseguro tod sikatayo ya no unoren tayo ray ganggan to, magmaliw itayon maliket. (Sal. 19:8) Talagan matukoy iratan ya ilustrasyon pian natalosan tayo ray gunggona na pangamta tan pangiyaplika ed saray katuaan ya walad Biblia! Nibagan say pansasagpot tayo so pinagkabayar tayo. Aralen tayo sirin so limaran bengatla ya nayarin ibayar tayo pian nasaliw so katuaan.

7, 8. (a) Akin ya kaukolan so panaon pian nasaliw tayoy katuaan? (b) Panon kabaleg so imbayar na sakey ya kalangweran ya estudyante, tan antoy resulta?

⁷ Panaon. Nepeg iyan ibayar na amin a malabay  ya mangaliw na katuaan. Kaukolan so panaon pian dengelen so mensahe na Panarian, basaen so Biblia tan saray literatura ya base ed Biblia, nawalaan na personal a panagaral, tan manparaan tan onatendi ed saray aral ed kongregasyon. Nepeg tayon ‘saliwen,’ odino alaen so panaon ya uusaren tayod saray agtanton importantin gagawaen tayo. (Basaen so Efeso 5:15, 16 tan paimanod leksab.) Panon karakel ya panaon so kaukolan pian nawalaan tayoy suston kakabatan ed saray manunan bangat na Biblia? Depende itan ed kipapasen tayo. Anggapoy limitasyon na naaralan tayod si Jehova nipaakar ed karunongan, paraan, tan saray kimey to. (Roma 11:33) Diad unonan isyu na Watch Tower et inkompara so katuaan ed “melag ya rosas,” tan oniay nabasa: “Nepeg ya agka labat nakontento ed sakey ya rosas na katuaan. No magenap la so sakey ya rosas na katuaan, agla komon mangiter so Dios na dakel ni ran katuaan. Mantipon ka, mananap ka ni.” Nayarin tepetan tayoy sarili tayo, ‘Panon la kabaleg so bouquet na katuaan ya aromog ko?’ Anggan diad panaon ya anggapoy anggaan, dakel nin siansiay naaralan tayo nipaakar ed si Jehova. Say importante et marunong tayon uusaren so panaon tayo diad pangaliw na dakel ya katuaan anggad iyabuloy na sirkumstansya tayo. Imanoen tayoy alimbawa na sakey ya pinirawat ton niwala ed sikato so katuaan.

⁸ Si Mariko, * ya biin kalangweran a tagad Japan, et linmad New York City, U.S.A., pian manaral. Diad saman, sikatoy membro na sakey ya relihyoson grupo a ginmapo ed Japan nen 1959. Akabat na sakey ya payunir si Mariko diad panagpulong ed kaabungan. Nen nanaaralan to lay katuaan ed Biblia, malikeliket kanian kinerew tod samay payunir ya sikatoy iyaralan na Biblia ya mamidua ed sakey simba. Anggano busy ed eskuelaan si Mariko tan wala ni part-time ya trabaho to, ginapoan to lan tampol so onatendi ed saray aral diad kongregasyon. Tinundaan to met la ray arum ya panagligliwaan to pian walay panaon ton aralen so katuaan. Lapud saratan ya impansakripisyo to, maples so inyaligwas tod espiritual. Diad loob labat na sakey taon et sikatoy abautismoan. Kalabas na anem bulan, nen 2006, sikatoy nampayunir, tan anggad natan et payunir ni.

9, 10. (a) Anto lay magmaliw ya panmoria tayod materyal iran bengatla no sasaliwen tayo so katuaan? (b) Anto ran posibilidad so insakripisyo na sakey ya kalangweran a bii, tan antoy nalilikna to lapud satan?

⁹ Materyal iran bengatla. Pian nasaliw so katuaan, ompan kaukolan tayon ikbanan so sakey ya marakep a trabaho odino karera. Nen inimbitaan nen Jesus iray managsigay ya si Pedro tan Andres a magmaliw ya “sumisigay na totoo, tinaynan dan tampol iray iket” da. (Mat. 4:18-20) Siempre, maslak ed saramay manaaral na katuaan natan et agda nayarin basta taynanan iray trabaho da. Wala ray Makasulatan ya obligasyon da. (1 Tim. 5:8) Balet, maslak ya manaaral na katuaan et nepeg dan umanen so panmoria da nipaakar ed materyal iran bengatla, anggan saray prayuridad da. Malinew ya satan so tutukoyen nen Jesus sanen imbaga to: “Agkayo la mantitipon na saray kayamanan diad dalin . . . Imbes, mantipon kayo na saray kayamanan ed tawen.” (Mat. 6:19, 20) Imanoen pay alimbawa na sakey ya biin kalangweran.

¹⁰ Si Maria et labalabay toy man-golf anggan sanen sikatoy agni mani-eskuela. Sikatoy tuloytuloy a nagmaliw ya marunong ed satan legan na panaaral tod high school tan agnambayag et nagmaliw ya iskolar ed sakey ya unibersidad. Satan so manuna ed bilay to, tan labay toy onyaman bilang sakey ya professional golfer. Insan ginmapon nanaral na Biblia si Maria, tan labalabay to ray katuaan ya nanaaralan to. Sikatoy malikeliket lapud saray pananguman ya ginawa tod bilay to diad tulong  na katuaan. Imbaga to: “No diman ko uumanen so ugalik tan kabibilay ko pian natumbok iray estandarte na Biblia, diman ak met mas naliliketan.” Atalosan nen Maria ya agto sarag a pambansagen ya anapen so espiritual tan materyal iran kayamanan. (Mat. 6:24) Inter ton pinagkabayar so abayag lan pangarap to ya magmaliw a professional golfer tan say posibilidad ya onyaman tan onsikat. Balet lapud sinaliw toy katuaan, sikatoy manlilingkor la bilang payunir tan imbaga ton sikatoy walaan la natan na “sankaliketan tan makabkabaliksan ya bilay.”

11. No saliwen tayo so katuaan, antoy nayarin nagawa ed relasyon tayod arum?

¹¹ Say relasyon ed arum. No pilien tayon iyaplika ed bilay so katuaan ya walad Biblia, nayarin manguman so relasyon tayod saray kakaaro tan kakanayon tayo. Akin? Oniay impikasi nen Jesus parad saray patumbok to: “Pasantom ira diad panamegley na katuaan; say salitam et katuaan.” (Juan 17:17; paimanod leksab.) Say salitan “pasantom ira” et mankabaliksan met na “ibiig mo ra.” No awaten tayo so katuaan, nibiig tayo manlapud mundo lapud agtayo la manpapaimpluensya ed satan. Duma lay pakanengneng na arum ed sikatayo lapud tutumboken tayo la ray estandarte na Biblia. Anggano labay tayon pansiansiaen so maong a relasyon tayod saray kakaaro tan kakanayon tayo, siansian arum ed sikara et nayarin onarawi ed sikatayo tan kontraen da ni ingen so balon pananisia tayo. Agla itan makapabigla. Oniay binidbir a mismo nen Jesus: “On, say mamusol ed sakey a too et saray membro na mismon pamilya to.” (Mat. 10:36) Balet impaseguro to met ya antokaman so isakripisyo tayo parad katuaan, say naawat tayon kasalat et agnabayaran.—Basaen so Marcos 10:28-30.

12. Anto so imbayar na sakey ya Judio pian nasaliw to so katuaan?

¹² Manlapu lad inkaugaw to, say sakey a negosyanten Judio ya manngaran na Aaron et abangonan to so bangat ya agnepeg a bitlaen so ngaran na Dios. Balet labalabay nen Aaron ya naamtaan so katuaan. Sikatoy aliketan nen walay Tasi ya angipanengneng ed sikato ya no say apatiran Hebreo iran consonant ya ngaran na Dios et ikdan na vowel, say nayarin pangibalikas ed satan et “Jehovah.” Sikatoy malikeliket ya linmad sinagoga pian ibagad saray rabbi so balibalin naamtaan to. Balet duma so reaksion da ed iilaloan nen Aaron. Imbes ya naliketan ira ed naamtaan dan katuaan nipaakar ed ngaran na Dios, sikatoy nilutdaan da tan binusol da. Agmet aliketan so pamilya to. Balet intultuloy ton sinaliw so katuaan tan nanlingkor bilang makpel ya Tasi nen Jehova ed interon bilay to. Singa si Aaron, pian makapanakar tayo met ed katuaan, kaukolan ya akaparaan tayon awaten so antokaman ya pananguman diad relasyon tayod arum odino ed pamilya tayo pian nasaliw tayo so katuaan.

13, 14. Anto ray kaukolan tayon umanen ed panagnonot tan kagagawa tayo pian nasaliw tayoy katuaan? Mangiter na alimbawa.

¹³ Marutak ya panagnonot tan kondukta. Pian naawat tayo so katuaan tan makapambilay tayo base ed saray estandarte na Biblia ed moral, nepeg ya akaparaan tayon umanen so panagnonot tan kondukta tayo. Imanoen iyan insulat nen Pedro nipaakar ed saratan ya pananguman: “Bilang matulok ya ananak, agkayo la manpapaimpluensya ed saray pilalek yo nensaman sanen anggapo ni kakabatan yo, noagta magmaliw kayon masanto diad amin a kagagawa yo.” (1 Ped. 1:14, 15) Saray imoral ya totoo ed syudad na Corinto et kaukolan day manggawa na baleg iran pananguman ed kabibilay da pian nasaliw da so katuaan. (1 Cor. 6:9-11) Ontan met natan, tinaynan na dakel so marutak iran kagagawa da pian nasaliw so katuaan. Onia ni imbilin nen Pedro ed saray Kristiano nen panaon to: “Magenap lad sikayo imay panaon a linmabas sanen ginawa yoy labalabay na saray totoo ed  mundo, salanti, saray anggapoy-baing a kagagawa, agnakontrol a pilalek ed sekso, alabas a panag-inum na alak, mabanday a panliliket, paniinuman, tan makapadimlan idolatriya.”—1 Ped. 4:3.

¹⁴ Diad dakel ya taon, si Devynn tan Jasmine et buanges. Anggano si Devynn et marunong ed pangirekord na saray transaksion ed negosyo, anggapoy nagmaliw ya permanentin trabaho to lapud alabas ya kakainum to. Kabkabat met si Jasmine ya agresibo tan bayolenti. Aminsan, nen manaakar ya akainum si Jasmine, walay akabat ton duaran Tasi ya misionero. Inyeskedyul na saray misionero so pangiyaral na Biblia ed sikato, balet nen linma rad abung nen Devynn diad tinmumbok ya simba, asabian dan abuek si Jasmine tan Devynn. Agda inilaloan ya mansagpot ni iray misionero ya onlad abung da. Duma la balet so situasyon nen pinmawil ira. Manlapu lad unonan impanaral di Jasmine tan Devynn, nagmaliw ira ya makulin estudyante na Biblia tan ginapoan dan iyaplika iray nanaaralan da. Diad loob na taloy bulan, nandesisyon iran itunda lay kakainum da tan nankasal ira. Balitado so impanguman da, kanian apakiwas met so arum ed lugar da ya manaral na Biblia.

15. Anto so nayarin sakey ed saray sankairapan ya ibayar parad katuaan, tan akin?

¹⁵ Agmakasulatan iran kustombre tan kagagawa. Sakey ed saray sankairapan ya ibayar parad katuaan et say pangitunda ed agmakasulatan iran kustombre tan kagagawa. Anggano nayarin mainomay parad arum ya awaten iray Makasulatan ya rason pian taynanan iratan ya kagagawa, say arum balet et nayarin manaalangan ya isakripisyo iratan lapud dedesdesen ira na kapamilya, katrabaho, tan kakaaro ra. Nayarin makapakonsiensia itan ed sikara lalo la no kaiba ed satan ya kustombre so pangigalang ed saray inaatey lan kapamilya da. (Deu. 14:1) Say makpel ya alimbawa na arum so ontulong ed sikatayo pian manggawa na kaukolan iran pananguman. Imanoen so inkakpel na arum ed saray manaayam ed Efeso nen inmunan siglo.

16. Antoy ginawa na arum ya Kristiano diad Efeso pian nasaliw da so katuaan?

¹⁶ Kabkabat so Efeso ed panagmahiko. Antoy ginawa na balon komberte iran Kristiano ya datin managmahiko pian nataynan da so agmakasulatan iran kagagawa tan pian nasaliw da so katuaan? Oniay impaliwawa na Biblia: “Dakel ed saramay datin manmamahiko et tinipon da ray libro ra tan pinoolan dad arapan na amin. Tan sanen kinuenta ray bili na saratan ya amin, mankantidad iratan na 50,000 a piraso na pilak. Kanian diad makapanyarin paraan et nantultuloy a binmulaslas tan tinmalona so salita nen Jehova.” (Gawa 19:19, 20) Mabli so insakripisyo na sarayan matoor a Kristiano pian naawat so agnabayaran iran bendisyon.

17. (a) Anto ray nayarin kaiba ed saray ibayar tayo pian nasaliw tayo so katuaan? (b) Anto ran tepet so ebatan tayo diad onsublay ya artikulo?

¹⁷ Anto lay imbayar mo parad katuaan? Amin tayo et manguusar na panaon pian mantipon na saray rosas na katuaan. Say arum et insakripisyo da so tsansan onyaman tan inarap da ray pananguman ed relasyon dad arum pian nasaliw da so katuaan. Kaukolan ya umanen na dakel so panagnonot tan kondukta da tan nepeg dan itunda so agmakasulatan iran kustombre tan kagagawa. Anggano anto ni so ibayar tayo, kombinsido tayon sulit so pangaliw ed katuaan ya walad Biblia. Lapud satan et niwalad sikatayo so sankamablian ya kayarian tayo, say maapit ya relasyon tayod si Jehova. No nonoten tayo ray bendisyon ya nanaawat tayo manlapu nen naamtaan tayo so katuaan, agtayo natalosan no akin ya labay itan ya ilako na arum. Panon ya nayarin nagawa itan, tan panon tayon napaliisan itan ya baleg a lingo? Amtaen tayo so ebat ed saratan a tepet diad onsublay ya artikulo.