DAKEL ed saray agagi tayon nan-abroad nensaman so pinmawil lad bansa ra. Lapud panangaro dad si Jehova tan ed kapara dan totoo, inmalis irad saray lugar ya kakkaukolan so mangipulong ed maong a balita. (Mat. 22:37-39) Anto ran sakripisyo so ginawa ra, tan anto ran bendisyon so naawat da? Pian naamtaan tayo, nengnengen tayoy eksperiensya na saray agagin pinmawil ed bansan Cameroon.

Binmaleg ed Cameroon si Onésime, balet nen 1998 et nan-abroad tan asabi toy 14 ya taon ed arum ya bansa. Aminsan diad aral et walay nadngel ton ilustrasyon nipaakar ed panagpulong. Imbaga na espiker, “Isip yo pa ya walay sankaaro ya mansisigay ed nandumaan ya pasen, pero mas dakel so nanaerel to may sakey. Agta mas maabig no onalis imay dagdaiset so nanaerel to diad kawalaan na samay kaaro to?”

Apaisip si Onésime ed satan ya ilustrasyon, lalo la ta amta to ya diad Cameroon et dakdakel so malabay ya manaral na Biblia. Pero wala ray pampapagaan to. Kasin makapan-adjust ed Cameroon ta apasal lad abroad? Pian naamtaan nen Onésime no kasin nasarag to, sinali toy nanayam ed Cameroon na anem bulan. Insan nen 2012, sikatoy nandesisyon ya man-permanente la ditan.

Oniay imbaga nen Onésime: “Kaukolan koy man-adjust ed ampetang ya panaon tan mas simplin panagbilay. Diad Kingdom Hall, impasal ko lamet so onyurong ed anawet ya bangko. Balet no pipiliten koy sarilik ya manpokus legan na aral,” so inkuan to ya makakaimis, “kalnakalnan nalilingwanan ko met la imay de-kutson ya yurongan ed abroad.”

Nen 2013, inkasal nen Onésime si Géraldine, ya pinmawil met ed Cameroon kayari na siam taon ya impan-abroad to ed France. Antoy bendisyon nen Jehova ed sayan sanasawa lapud inyuna day Panarian ed bilay da? Oniay imbaga nen Onésime: “Akapanaral kamin sanasawa ed School for Kingdom Evangelizers tan natan et manlilingkor kami ed Bethel. Nen imbeneg ya taon, 20 so nampabautismo ed kongregasyon mi. Talagan nibagak ya mas dakel lay sira ed ‘pansisigayan’ ko natan.” (Mar. 1:17, 18) Oniay inyarum nen Géraldine: “Agko inilaloan ya onia karakel so bendisyon ya iter nen Jehova ed sikami.”

Nan-abroad si Judith ed United States, balet labay ton napalaknab so ministeryo to. Imbaga to: “Kada no manbakasyon ak ed Cameroon pian bisitaen so pamilyak et wala ray naroromog kon interesado tan nigagapok so panangiyaral na Biblia, kanian makaakis ak no taynan ko la ra.” Balet manaalangan si Judith ya man-permanente  ed Cameroon. Baleg so sueldo tod trabaho to kanian makakatulong itan pian nabayaran toy panpapa-ospital nen ama to diad Cameroon. Balet sikatoy nanmatalek ed si Jehova tan nandesisyon ya onsempet la. Imbaga to ya no maminsan et nanailiw toy mas komportablen bilay ed abroad. Balet impikasi tod si Jehova ya komon et makapan-adjust. Binmiskeg met so determinasyon to nen pinaseseg na manangasikaso na sirkito tan say asawa to.

Oniay imbaga nen Judith: “Diad loob labat na taloy taon, akalmo ak na apatiran ananak ko ed espiritual.” Nanlingkor si Judith ya espisyal payunir. Tan natan et kaiba to so asawa to ya manangasikaso na sirkito, si Sam-Castel. Kumusta balet imay ama nen Judith? Akalmo ran pamilya na ospital ed arum ya bansa a libre so impan-opera dad si ama to. Makapaliket ta maabig so resulta na operasyon to.

Si Victor et linmad Canada. Kayari ton binasa imay artikulo ed Panag-bantayan nipaakar ed peligro na pangala na mas atagey ya edukasyon, inisip to no kasin ituloy to ni panaaral tod unibersidad. Antoy desisyon to? Intunda toy panaaral to tan angala na vocational course. “Akalmo ak ya tampol na trabahok,” so kuan to, “tan lapud satan et akapanpayunir ak, abayag ko la ’tan ya pangarap.” Ag-abayag, inkasal nen Victor si Caroline, tan pinmasyar iran sanasawa ed Cameroon. Nen wadman ira, nan-tour irad branch office tan wala ray brother ya amaseseg ed sikara ya pan-isipan da no sarag day manlingkor ed Cameroon. Oniay imbaga nen Victor: “Anggapoy nibaraan mi, tan lapud pansiasiansiaen min simpli so bilay mi, anggapoy makasbel ed sikamin onalis.” Anggano walay sakit nen Caroline, nandesisyon ira ya manlingkor ditan.

Saniban nampayunir si Victor tan Caroline pian natulongan da ray interesado ed Cameroon. Walay tipon da kanian diad gapo et agda ni kaukolan so mantrabaho. Pero nen naupot la itan, amawil irad Canada pian mantrabaho na pigaran bulan. Insan pinmawil irad Cameroon tan intuloy day pampapayunir da. Anto ran bendisyon so naawat da? Nanaral ira ed School for Kingdom Evangelizers, niyasain ira ya espisyal payunir, tan natan et construction servants la ra. Oniay imbaga nen Victor: “Nen tinaynan mi komportablen bilay mi, nanmatalek kami lad si Jehova tan agto kami pinaulyanan.”

Nen 2002, binasa nen Alain, a diad saman et estudyante ed sakey ya unibersidad ed Germany, imay tract ya Sikayo Ran Kalangweran​—Anto so Gawaen Yo ed Bilay Yo? Lapud saman et apakiwas ya nawalaan na balon goal. Nen 2006, sikatoy nanaral ed Ministerial Training School tan niyasain ed Cameroon, say bansa ya niyanakan to.

Nen wala lad Cameroon, akalmo si Alain na part-time ya trabaho. Ag-abayag, akalmo na sananey a trabaho ya baleg so sueldo, balet mapaga ta ompan nabawasan so panaon to ed ministeryo. Kanian nen naimbitaan ya manlingkor bilang espisyal payunir, inawat ton tampol itan ya asainmin. Imbaga na amo to ya aruman da so sueldo to, balet agla anguman so desisyon nen Alain. Legan na pampapayunir to, inkasal nen Alain si Stéphanie, ya abayag met ed France. Anto ray subok ed si Stéphanie nen inmalis ed Cameroon?

Oniay imbaga nen Stéphanie: “Awalaan ak na pigaran sakit tan allergy, pero aliwa met ya grabe tan manpapadoktor ak kanian ayos labat.” Abendisyonan so panaanos dan sanasawa. Oniay imbaga nen Alain: “Nen nampulong kami diad  arawdawin baryo, diad Kate, wala ray akatongtong mi ya labay day manaral na Biblia. Ag-abayag kayari na satan, nigapo mi lan iyaralan so pigara ed sikara diad panamegley na telepono. Duara ed saray inyaralan mi na Biblia ed satan ya lugar et bautismado la natan, tan walay aporman melag ya grupo ed lugar da.” Oniay inyarum nen Stéphanie: “Talagan makapalikliket ya iyaralan iray totoo anggad idedika day bilay da ed si Jehova. Lapud namboluntaryo kami dia, dakel so atulongan mi kanian malikeliket kami.” Natan et manlilingkor lan manangasikaso na sirkito si Alain kaibay Stéphanie.

Si Gisèle et abautismoan legan ya manaaral ed medical school diad Italy. Panbiliban to so simplin panagbilay na sanasawan payunir ya angiyaral ed sikato, tan labay ton palaknaben met so ministeryo to. Kanian nampayunir si Gisèle legan ton susumpalen so panaaral to.

Labay nen Gisèle so ompawil ed Cameroon, balet wala ray pampapagaan to. Imbaga to: “No man-permanente ak ed Cameroon, pultoten ko lay legal ya kanepegan kon manayam ed Italy. Sakey ni, makaarawi ak lad saray kakaaro tan kapamilyak ed Italy. Balet nen Mayo 2016, nandesisyon si Gisèle ya ompawil ed Cameroon. Ag-abayag kayari na satan, akiasawa si Gisèle ed si Léonce, tan inrekomenda na branch office ed Cameroon ya diad baley na Ayos ira manlingkor, ta kakkaukolan diman so dakel ya managpulong.

Kumustay bilay ed Ayos? Oniay istorya nen Gisèle: “Mabetbet ya pigaran simba ya anggapoy kuryente, kanian agmi na-charge iray cellphone mi. Katon agmi lanlamang iratan nanausar. Naaralan koy manparlang na kiew pian makapanluto ak. No onaasol kami, walay karitelya tan flashlight mi, ta labi so iyaakar mid kulos pian daiset so too.” Antoy akatulong ed sikara pian makapantultuloy ira ed panlilingkor da? Oniay intuloy nen Gisèle: “Baleg ya tulong ed sikami so masanton espiritu nen Aman Jehova, papabiskegen mi sakey tan sakey, tan papabiskegen kami na saray kapamilya tan kakaaro mi, tan no maminsan et papawitan da kami na kuarta.”

Kasin maliket si Gisèle ed insempet to ed Cameroon? “On! Talagan malikeliket ak,” so kuan to. “Diad unaan et wala ray subok tan pakakadismayaan mi, balet nen alampasan mi la iratan, nibaga mi nen asawak ya ginawa mi labat no antoy kaukolan min gawaen. Manmamatalek kamin lanang ed si Jehova tan inmapit kami ed sikato.” Si Leonce tan Gisèle et nanaral ed School for Kingdom Evangelizers, tan natan et manlilingkor ira bilang temporaryo ya espisyal payunir.

Singa saray makpel ya sumisigay ya itutuloy day mansigay anggano aliwliway panaon, mabulos met ya mansasakripisyo iramay pinmawil ed nanlapuan dan bansa pian natulongan da iray malabay ya manaral na Biblia. Seguradon agnalingwanan nen Jehova so pansasakripisyo na sarayan agagi tan say panangaro ya ipapanengneng da parad ngaran to. (Neh. 5:19; Heb. 6:10) No wala kad abroad tan walay pankaukolan parad dakel nin managpulong diad bansan nanlapuan mo, kasin sarag moy ompawil? No ontan so gawaen mo, seguradon dakel ya bendisyon so manatalaran ed sika.​—Pro. 10:22.