Inyanak ak nen 1983. Diad saray unonan taon na impanugaw ko et normal met so imbaleg ko, balet manlapu nen mantaon ak lay samplora, akalikna ak lay pinasyan sakit ed interon laman ko. Kalabas na manga duay taon, aminsan ya kabuasan nen kabangon ko et agak makagalaw. Anggano piliten kon igalaw so salik, agko nigalaw. Manlapu lad saman ya agew, agak lan balot akaakar. Agak met la binmaleg lapud sakit ko. Anggad natan et singa ak labat kamelag na sakey ya ugaw.

Pigay bulan ak lan ag-ompapaway ed abung mi nen walay duaran bibiin Tasi nen Jehova ya linmad sikami. Dati, basta no onsabi ra et onaamot ak, balet diad saman ya agew et akitongtong ak ed sikara. Legan dan ibabaga so nipaakar ed Paraiso, anonotan ko may nadngel ko nen mantaon ak ni labat na manga limara. Diad saman et oonlad baryo mi so sakey a misionero ya Jethro so ngaran to. Sikatoy manaayam ed Suriname tan maminsan ed sakey bulan ya oonlad baryo mi tan iyaaralan to na Biblia si tatay ko. Maomaong ed siak si Jethro kanian labalabay ko. No maminsan et ipipila ak met nen lakik tan baik ed aral na saray Tasi ya gagawaen ed baryo mi. Kanian nen tinepetan ak nen Florence, sakey ed saramay bibii ya linmad sikami, no labay koy manaral na Biblia, imbagak ya on.

Kapawil nen Florence et kaiba to lay asawa to, si Justus, tan inyaralan da ak na Biblia. Nen naimano da ya agko amtay manbasa, binangatan da ak ya manbasa. Ag-abayag et makabasa ak la. Balet sakey ya agew et imbaga dad siak ya niyasain la ran manlingkor ed Suriname. Makapaermen ta anggapo lay arum a Tasi ed Orealla ya mangiyaral ed siak. Balet makapaliket ta agto ak nilingwanan nen Jehova.

Ag-abayag, sinmabi ed Orealla so sakey ya payunir a manngaran na Floyd, tan aromog to ak legan ton manpupulong ed kaabungan diad baryo mi. Nen tinepet to no labay koy manaral na Biblia, akaimis ak. Kuan to, “Akin et makakaimis ka ey?” Imbagak ya niyaral lad siak so brosyur ya Anto so Kakaukolanen na Dios ed Sikatayo? tan akagapo ak la ed libron Pikakabat a Mangitonton ed Andi-Anggaan a Bilay. * Impaliwawak no akin ya nitunday panaaral ko. Intuloy nen Floyd ya iyaral ed siak so libron Pikakabat, balet ag-abayag et niyasain met ya manlingkor ed arum ya lugar. Kanian anggapo la lamet so mangiyaral ed siak.

 Balet nen 2004, niyasain ed Orealla so duaran espisyal payunir, si Granville tan Joshua. Aromog da ak met nen manpupulong irad kaabungan. Nen tinepetan da ak no labay koy manaral na Biblia, inmimis ak. Imbagak ya say labay kon iyaral dad siak et amay libron Pikakabat, tan igapo mi manlapud unaan. Labay kon nengnengen no say ibangat da et pareho ed imbangat na saramay akaunan angiyaral ed siak. Imbaga nen Granville ya walay nagagawan aral diad baryo mi. Anggano ngalngali samploy taon lan agak onaalis ed abung mi, labay koy onatendi. Kanian sinamar ak nen Granville tan inlugan to ak ed wheelchair tan intulak to itan anggad Kingdom Hall.

Ag-abayag, pinaseseg ak nen Granville ya manpalista ed Teokratikon Eskuelaan Parad Ministeryo. Imbaga to: “Agka makaakar, pero makasalita ka. Onsabi panaon et manpaliwawa ka met la. Segurado ’tan.” Lapud saratan ya imbaga to et awalaan ak na kompiyansa ed sarilik.

Asabi panaon et akila ak met lan manpulong tan si Granville so kaulop ko. Balet maabot iray karsada diad baryo mi kanian mairap ya itulak so wheelchair ko. Imbagak laingen ed si Granville ya diad karitelya to ak la ilugan. Mas mainomay nen onman so ginawa mi. Abautismoan ak nen Abril 2005. Kayari na satan, impasal ak ya tampol na saray brother ya mangasikaso ed saray literatura tan ed sound system na Kingdom Hall.

Makapaermen ta nen 2007 et naplag si tatay ko diad baloto, tinmama ed sikato so elisi, tan kayari pigaran agew et inatey. Agmi ilaloan ya onman so nagawa. Nampikasi si Granville kaibay pamilyak insan angibasa na saray makaligliwan teksto diad Biblia. Kalabas na duay taon, abigbigla kami lamet ed agawan trahedya​—linmubog so baloton niluganan nen Granville tan inatey.

Say melag ya kongregasyon mi et maer-ermen ya maong ta anggapo lay elder tan saksakey so ministeryal a lingkor. Ansaki-sakit so impatey nen Granville; sikatoy maomaong ya kaaro. Talagan tinulongan to ak ed espiritual tan pisikal iran pankaukolan ko. Diad aral, kayari na impatey to, et betang ko so manbasa na parapo diad Panagaral na Panag-bantayan. Kayarik ya binasa so duaran parapo, akaakis ak la tan agla ontunday pantedter na luak. Kanian inmepas ak lad stage.

Linmemew so liknaan ko nen sinmabi ed Orealla iray pigaran brother a nanlapud arum ya kongregasyon pian tulongan kami. Imbaki met na branch office si Kojo, sakey ya espisyal payunir. Malikeliket ak nen si nanay ko tan say yugtan kon laki et nanaral met lay Biblia ya anggad abautismoan ira. Tan nen Marso 2015 et aturo ak bilang ministeryal a lingkor. Ag-abayag et awalaan ak met lay asainmin ya manpaliwawa parad publiko. Diad samay sankaunaan ya paliwawak, akaimis tan akaakis ak nen anonotan ko may imbaga nen Granville pigaran taon lay apalabas: “Onsabi panaon et manpaliwawa ka met la. Segurado ’tan.”

Lapud saray programa ed JW Broadcasting^®, naamtaan ko ya wala ray agagi ya kaparak met na situasyon. Balet anggano walay kapansanan da, dakel nin siansia so nagagawaan da tan maliket ira. Kanian amtak ya wala ni ray arum ya nagawaan ko. Labalabay kon iter ed si Jehova so antokaman a biskeg ya walad siak. Atan so rason no akin ya nan-regular payunir ak. Tan agko inilaloan so naawat kon balita nen Setyembre 2019! Diad satan a bulan et aturo ak bilang sakey ya elder ed kongregasyon mi ya walaan na manga 40 ya manangipalapag.

Misalsalamat ak ed saramay maar-aron agagi ya angiyaral tan tinmulong ed siak pian makapanlingkor ak ed Dios. Tan say talagan pisalsalamatan ko et agto ak nilingwanan nen Jehova.